Yesu wʋsɛ gori
2 Wɩɩ lʋrʋ wʋrʋgbɩɛ na, Yesu mʋ Petero, Jamesi na Yohane sɛ wʋ na ba nyiŋeŋ ju bʋrɔŋ jalɩŋtɛ garɛ dʋɔ. Dɩmaŋ sɛ ba na gʋ Yesu wʋsɛ gori ba asa dʋɔ. 3 Sɛ wʋ gagba ŋalagi fʋlʋŋsɛ parɛ-parɛ kii gʋ wʋrʋ a dɩlɛ yalɛ dukuru tibi gana dʋɔ na gaa yɩɛ dɩmʋŋ. 4 Dɩmaŋ sɛ ba na gʋ Ɩsʋɔ ɔja Eliya na Mosesi na Yesu a tawɩ.
5 Sɛ Petero tawɩ Yesu sɛ, <<Wʋkalaasa, ŋɩ wɩɛ dieli gʋ dɩ wɩɛ jɩna. Yela na dɩ baŋ akoneŋ atoro, n teri garɛ, Mosesi teri garɛ na Ɩsʋɔ ɔja Eliya gba teri garɛ.>> 6 Ŋii ŋɩ tibi na dʋɔ, nyɩŋtɩɛ chaŋ Petero na wʋ dɔŋa baa dɩmʋŋ dʋɔ sɛ wʋ tawɩ dɩmʋŋ.
7 Dɩmaŋ sɛ Ɩsʋɔ tanɛ fu ba dʋɔ. Sɛ lofu garɛ lɩɩ Ɩsʋɔ tanɛ gaa naŋ kɔŋ sɛ, <<Wina n nyina mabu wʋŋ maa ja wʋ wɩɛ. N nyii wʋ jaŋ.>>
8 Gʋ wʋ kpalɛnara batoro baa kɩɛ logo na, ba n na wʋrʋ ʋ, amʋɔ Yesu nyiŋeŋ.
9 Gʋ ba tibi bʋrɔŋ gaa baa kɔnɛ na, Yesu dʋ ba sɛ ba n baa tawɩ ŋii ba na na fa wʋrʋ ga tala gʋ Wʋkpa Bu wʋŋ aja feŋ lɩɩ sɩŋ naŋ. 10 Dɩmʋŋ dʋɔ ba mʋ wɩɛ ŋii dʋ ba nyienaŋ, sɛ ba tasɛ dɔŋa sɛ, <<Feŋ lɩɩ sɩŋ naŋ tie akala sɩnɛ?>>
11 Sɛ ba tasɛ Yesu sɛ, <<Be dʋɔ sɛ mbara bakalaasa baa tawɩ sɛ ŋɩ tiri gʋ Ɩsʋɔ ɔja Eliya n chɩŋkpɩɛ kɔŋ pɔɩ?>>
12 Sɛ Yesu lɩsɛ ba nʋɔ sɛ, <<Yɩɛ gasiŋteŋ bɛ, ŋɩ tiri gʋ Eliya n chɩŋkpɩɛ kɔŋ na wʋ a gaa desina bʋrʋkʋma si ga gbɩɛ dʋɔ. Ama be dʋɔ sɛ ba sabɩɛ Sabɩɛwɩɛ naŋ sɛ, Wʋkpa Bu wʋŋ aja na awʋrʋfʋɔ fɔɩ na baa pɩɛ ɩ? 13 Ama maa tawɩ amɩɛ sɛ Eliya taŋ kɔnɛ sɛ bakpa yɩɛ ɩ ŋii baa jawʋ ganaŋkʋ ba sabɩɛ wʋ wʋsɛ dʋɔ wɩɛ dʋ Ɩsʋɔ Wɩɛ naŋ na.>>
Matiyo 17:14-21; Luka 9:37-45