1 Sɛ Yesu ju dʋɔ tawɩ ba sɛ, <<Maa tawɩ sɛ n nyii na dieli sɛ, amɩɛ baa ɩ wɩɛ jɩna na barɛ baa na sɩŋ ŋ ga tala gʋ baa na Ɩsʋɔ Juori a kɔŋ doŋ naŋ.>>

2 Wɩɩ lʋrʋ wʋrʋgbɩɛ na, Yesu mʋ Petero, Jamesi na Yohane sɛ wʋ na ba nyiŋeŋ ju bʋrɔŋ jalɩŋtɛ garɛ dʋɔ. Dɩmaŋ sɛ ba na gʋ Yesu wʋsɛ gori ba asa dʋɔ. 3 Sɛ wʋ gagba ŋalagi fʋlʋŋsɛ parɛ-parɛ kii gʋ wʋrʋ a dɩlɛ yalɛ dukuru tibi gana dʋɔ na gaa yɩɛ dɩmʋŋ. 4 Dɩmaŋ sɛ ba na gʋ Ɩsʋɔ ɔja Eliya na Mosesi na Yesu a tawɩ.

5 Sɛ Petero tawɩ Yesu sɛ, <<Wʋkalaasa, ŋɩ wɩɛ dieli gʋ dɩ wɩɛ jɩna. Yela na dɩ baŋ akoneŋ atoro, n teri garɛ, Mosesi teri garɛ na Ɩsʋɔ ɔja Eliya gba teri garɛ.>> 6 Ŋii ŋɩ tibi na dʋɔ, nyɩŋtɩɛ chaŋ Petero na wʋ dɔŋa baa dɩmʋŋ dʋɔ sɛ wʋ tawɩ dɩmʋŋ.

7 Dɩmaŋ sɛ Ɩsʋɔ tanɛ fu ba dʋɔ. Sɛ lofu garɛ lɩɩ Ɩsʋɔ tanɛ gaa naŋ kɔŋ sɛ, <<Wina n nyina mabu wʋŋ maa ja wʋ wɩɛ. N nyii wʋ jaŋ.>>

8 Gʋ wʋ kpalɛnara batoro baa kɩɛ logo na, ba n na wʋrʋ ʋ, amʋɔ Yesu nyiŋeŋ.

9 Gʋ ba tibi bʋrɔŋ gaa baa kɔnɛ na, Yesu dʋ ba sɛ ba n baa tawɩ ŋii ba na na fa wʋrʋ ga tala gʋ Wʋkpa Bu wʋŋ aja feŋ lɩɩ sɩŋ naŋ. 10 Dɩmʋŋ dʋɔ ba mʋ wɩɛ ŋii dʋ ba nyienaŋ, sɛ ba tasɛ dɔŋa sɛ, <<Feŋ lɩɩ sɩŋ naŋ tie akala sɩnɛ?>>

11 Sɛ ba tasɛ Yesu sɛ, <<Be dʋɔ sɛ mbara bakalaasa baa tawɩ sɛ ŋɩ tiri gʋ Ɩsʋɔ ɔja Eliya n chɩŋkpɩɛ kɔŋ pɔɩ?>>

12 Sɛ Yesu lɩsɛ ba nʋɔ sɛ, <<Yɩɛ gasiŋteŋ bɛ, ŋɩ tiri gʋ Eliya n chɩŋkpɩɛ kɔŋ na wʋ a gaa desina bʋrʋkʋma si ga gbɩɛ dʋɔ. Ama be dʋɔ sɛ ba sabɩɛ Sabɩɛwɩɛ naŋ sɛ, Wʋkpa Bu wʋŋ aja na awʋrʋfʋɔ fɔɩ na baa pɩɛ ɩ? 13 Ama maa tawɩ amɩɛ sɛ Eliya taŋ kɔnɛ sɛ bakpa yɩɛ ɩ ŋii baa jawʋ ganaŋkʋ ba sabɩɛ wʋ wʋsɛ dʋɔ wɩɛ dʋ Ɩsʋɔ Wɩɛ naŋ na.>>

14 Gʋ Yesu na wʋ kpalɛnara batoro baa tibi bʋrɔŋ baa kɔŋ kpalɛnara ba baŋbaŋ baa jaŋ na, ba na jama logo ba, yela ba na mbara bakalaasa baa barɛ a di noro. 15 Gʋ bakpa baa na Yesu na, dɩ yɩɛ ba doba sɛ ba se ju wʋ jaŋ ga yɩlɩ ɩ.

16 Sɛ Yesu tasɛ wʋ kpalɛnara baa sɛ, <<Be bʋrʋ dʋɔ sɛ amɩɛ na ba ɩ di noro?>>

17 Sɛ jama baa tɩba wʋrʋ lɩsɛ nʋɔ sɛ, <<Wʋkalaasa, ma mʋ mabu baalɛ jaŋ wʋŋ feliŋ sʋbʋ chaɩ wʋ tɩba sɛ dɩ yela sɛ wʋ aa dɩlɛ wʋ aa tawɩ na kɔŋ sɛ nyaŋ chɔ ɩ. 18 Saŋa kʋma gaa feliŋ sʋbʋ wʋŋ jigisi wʋ wʋsɛ na, a kara ɩ lɔ, yela afʋfʋ a lɩɩ wʋ nʋɔ naŋ, yela wʋ a tawʋ wʋ kela naŋ sɛ wʋ wʋsɛ a kem. Ma sʋlʋ nya kpalɛnara baa sɛ ba n geŋ feliŋ sʋbʋ wʋŋ lɩɩ wʋ tɩba, ama ba n dɩlɛ ɛ.>>

19 Sɛ Yesu tawɩ ba sɛ, <<O, amɩɛ gɩnanaŋ baa ɩɩ lɩɛ ɩ di i. Mʋ ga tala wɩɛ aŋmaŋ sɛ maŋ na amɩɛ dɩ n cha? Mʋ ga tala wɩɛ aŋmaŋ sɛ ma n yu digela fa amɩɛ? N mʋ yeleŋbu wʋŋ kɔna maŋ.>>

20 Sɛ ba mʋ yeleŋbu wʋŋ kɔna Yesu. Gʋ feliŋ sʋbʋ wʋŋ na Yesu na sɛ dɩgbɩŋgbɩŋ chaŋ ɩ, gabʋanaŋ sɛ dɩ kara ɩ lɔ tibi, wʋ a fiti yela wʋ a gbiliti, yela wʋ nʋɔ naŋ a lɩɩ afʋfʋʋ.

21 Sɛ Yesu tasɛ wʋ juo sɛ, <<A yɩɛ ɩ dɩmʋŋ na dɩ taŋgɩlɛ?>> Sɛ wʋ juo wʋŋ lɩsɛ nʋɔ sɛ, <<Lɩɩ wʋ gɩ chasɩtɩɛ.>>

22 Sɛ wʋ ju dʋɔ tawɩ sɛ, <<Ŋii dɩlɛ ŋii kara ɩ ŋii lɔ bʋala naŋ yaa lɩŋ naŋ na ŋii kʋ ɩ. Nyaa dɩlɛ na, wɩɩ daa gɩyɔŋ na nyaa chɔna daa.>>

23 Sɛ Yesu tasɛ ɩ sɛ, <<Be n yɩɛ dʋɔ sɛ nya tawɩ sɛ maa dɩlɛ naa? Ɩsʋɔ a dɩlɛ yɩɛ bʋrʋkʋma fa wʋŋ wʋ lɩɛ di na.>>

24 Gabʋanaŋ sɛ wʋchaa bu baalɛ wʋŋ wʋ juo kuusi tawɩ sɛ, <<Ma lɩɛ di, chɔna maŋ na nyaa suri ma lɩɛ di dʋɔ.>>

25 Gʋ Yesu na bakpa sebie ɩ baa kɔŋ dɩmaŋ na, wʋ fʋba feliŋ sʋbʋ wʋŋ dʋɔ sɛ, <<Nyaŋ feliŋ sʋbʋ wʋŋ wʋ yɩɛ kpawu na namu, maa tawɩ nyaŋ sɛ lɩɩ wʋchaa bu baalɛ wʋŋ tɩba, n baa ti bɔrɛ kɔŋ gaa jʋʋ wʋ tɩba.>>

26 Sɛ feliŋ sʋbʋ wʋŋ kuusi sɛ dɩ kara wʋchaa bu baalɛ wʋŋ lɔ sɛ wʋ lɩɩ wʋ tɩba. Sɛ wʋ dʋɔ wʋ duwei takɩɛ atatɛ na sɛ wʋkʋma sɛ, <<Wʋ sɩŋ.>> 27 Ama Yesu chaŋ wʋchaa bu baalɛ wʋŋ pam naŋ sɛ wʋ chɔna ɩ sɛ wʋ kʋlʋ sɩŋ.

28 Ŋina wʋrʋ gbɩɛ na, Yesu na wʋ kpalɛnara baa nyiŋeŋ bɔrɛ ju dɩɛ, sɛ ba tasɛ ɩ sɛ, <<Be n yɩɛ sɛ dɩ n dɩlɛ geŋ feliŋ sʋbʋ wʋŋ lɩɩ wʋ tɩba?>>

29 Sɛ Yesu lɩsɛ ba nʋɔ sɛ, <<Amʋɔ dɩga* fa Ɩsʋɔ nyiŋeŋ aaŋ dɩlɛ geŋ dɩmʋŋ feliŋ sʋbʋ wina.>>

30 Ŋina wʋrʋgbɩɛ na, Yesu na wʋ kpalɛnara baa lɩɩ dɩmaŋ sɛ ba mʋna Galaliya tibi dʋɔ. Yesu baa ja na wʋrʋ a jiŋ diele gaa ba wɩɛ na a, 31 akala takɩɛ wʋ a kalaa wʋ kpalɛnara baa. Sɛ wʋ tawɩ ba sɛ, <<Baa lɩsɛ Wʋkpa Bu wʋŋ fa bakpa na baa kʋ ɩ. Ama wɩɛ atoro wɩɩ na, wʋ a feŋ lɩɩ sɩŋ naŋ.>> 32 Wʋ kpalɛnara baa n nyii wɩɛ ŋii wʋ a tawɩ na tie e, ama wɩɛ ba nyɩŋtɩɛ na baa tasɛ ɩ wɩɛ ŋii tie.

33 Yesu na wʋ kpalɛnara ju Kapeniyum dɩɛ naŋ. Gʋ ba wɩɛ waa dʋɔ na, wʋ tasɛ ba sɛ, <<Be bʋrʋ dʋɔ noro sɛ ɩ di gbɩɛ naŋ na?>> 34 Ama ba fu ba nʋɔ dʋɔ, akala takɩɛ ba di dɔŋa noro gbɩɛ naŋ sɛ Mmʋɔ n nyina wʋjaŋ-janɛ.

35 Gʋ Yesu cha na, wʋ yagɛ wʋ kpirida gifi bala baa kɔŋ wʋ jaŋ sɛ wʋ tawɩ ba sɛ, <<Wʋkʋma wʋŋ wʋ a ja sɛ wʋ a yɩɛ asanaŋtɛ amɩɛ tɩba na, ŋɩ tiri gʋ wʋ n yɩɛ wʋrʋgbɩɛtɛ na wʋ a yɩɛ amɩɛ kpiniŋ tʋmɩrɛ.>>

36 Sɛ Yesu mʋ wʋchaa pii wʋrʋ gaa sɩŋ ba asanaŋ. Sɛ wʋ mʋ wʋ pamɩɛ jaga wʋ dʋɔ sɛ wʋ tawɩ ba sɛ, 37 <<Wʋkʋma wʋŋ wʋ lɩɛ wʋchaa n na duluŋ ma yɩrɛ naŋ na, maŋ sɛ wʋ lɩɛ. Wʋkʋma wʋŋ wʋ lɩɛ maŋ na, naa ma nyiŋeŋ sɛ wʋ lɩɛ ɛ, ama wʋ lɩɛ wʋŋ wʋ kpiri maŋ na gba.>>

38 Sɛ Yohane tawɩ Yesu sɛ, <<Wʋkalaasa, dɩ na baalɛ wʋrʋ wʋ mʋ n yɩrɛ wʋ a geŋ feliŋ sʋbʋ wʋ a lɩɩ bakpa tɩba sɛ dɩ tawɩ ɩ sɛ wʋ n yela, akala takɩɛ wʋ n kpi daa dʋɔ ɔ.>>

39 Sɛ Yesu tawɩ ba sɛ, <<N baa tawɩ ɩ sɛ wʋ n yela. Wʋkpa kʋma wʋŋ wʋ chamɩna ma yɩrɛ wʋ a yɩɛ adaŋgana na, wʋ aa dɩlɛ tawɩ wɩɛ asʋbʋɛ lɩɩ ma dʋɔ ɔ. 40 Akala takɩɛ wʋkʋma wʋŋ wʋ aa yuo daa na wʋ kpi daa dʋɔ. 41 Maa tawɩ sɛ n nyii na dieli sɛ, wʋkʋma wʋŋ wʋ fa amɩɛ lɩŋ na gafie ma yɩrɛ naŋ, akala takɩɛ ɩ yɩɛ ma tʋmɩra na, Ɩsʋɔ aja fa ɩ ŋɩ dʋɔ kɩmtʋɔ.>>

42 Sɛ Yesu ju dʋɔ tawɩ sɛ, <<Wʋkʋma wʋŋ wʋ a yela na bachaasɛ buruburu baa ba lɩɛ maŋ di na tɩba wʋrʋ a yɩɛ dɩsʋbʋ na, ŋɩ wɩɛ dieli fa ɩ takɩɛ gʋ ba mʋ bʋɩ ganamsa janɛ pɔgʋ wʋ lafu tie, na baa lɔ ɩ dʋ ɔpʋ naŋ. 43 Sɛ n pam aja yela na nyaa yɩɛ dɩsʋbʋ na, kara tʋsʋ. Ŋɩ wɩɛ dieli fa nyaŋ takɩɛ nyaa mʋ pam garɛ ju nkpa ŋii ŋɩ taŋ gɩtɛ naŋ kii gʋ nya mʋ pamɩɛ ala ju awʋrʋfʋɔ bʋala naŋ, dɩmaŋ sɛ bʋala baa dum m. 44 Dɩmaŋ sɛ ba sieliesi baa sɩŋ ŋ, sɛ bʋala baa dum m.* 45 Sɛ n nafarɛ aja yela na nyaa yɩɛ dɩsʋbʋ na, kara tʋsʋ. Ŋɩ wɩɛ dieli fa nyaŋ takɩɛ nya mʋ nafarɛ garɛ ju nkpa ŋii ŋɩ taŋ gɩtɛ naŋ kii gʋ nya mʋ nafara ala ju awʋrʋfʋɔ bʋala naŋ, dɩmaŋ sɛ bʋala baa dum m. 46 Dɩmaŋ sɛ ba sieliesi baa sɩŋ ŋ, sɛ bʋala baa dum m.* 47 Sɛ n dɩsɛ aja yela na nyaa yɩɛ dɩsʋbʋ na, chɔla ga tʋsʋ. Ŋɩ wɩɛ dieli fa nyaŋ takɩɛ nyaa mʋ dɩsɛ garɛ ju Ɩsʋɔ Juori naŋ kii gʋ nya mʋ asa ala ju awʋrʋfʋɔ bʋala naŋ. 48 Dɩmaŋ sɛ

<<<Ba sieliesi baa sɩŋ ŋ,

sɛ bʋala baa dum m.>✝

49 Baa mʋ bʋala yɩɛ wʋkʋma dɩchɩrɩchɩrɩ takɩɛ ganaŋkʋ baa mʋ yasɛ baa yɩɛ gadiesa chɩrɩchɩrɩ na. 50 Yasɛ wɩɛ dieli, ama ŋɩ tʋsʋ ŋɩ jʋŋ lɩɩ ŋɩ tɩba na, sɩnɛ sɛ ɩ yɩɛ ŋɛ na ŋii tii yɩɛ jʋŋ? Dɩmʋŋ dʋɔ n yela na amɩɛ ayɩɛsa a yɩɛ jʋŋ takɩɛ yasɛ na ɩ cha wʋsɛfɩɛ naŋ.>>