1 ଜଦି ନେଙ୍ଗ୍ ରେମୁଆଁଇଂନେ ବାରି କିତଂ ଦୁତ୍ଇଂନେ ବ୍ନାସାରେ ସାମୁଆଁ ମ୍ବାସଙ୍ଗ୍‌ଏ ନେଙ୍ଗ୍ ରୁଦୟ୍‍ନ୍ନିଆ ଆଲାଦ୍ ଆଲେଃଲା ତେଲା ନେଙ୍ଗ୍ ନ୍ନାଙ୍ଗ୍‌ନେ ଗଣ୍ଟା ଣ୍ଡୁଲା ଜିଲିଙ୍ଗ୍‌ ଜିଲିଙ୍ଗ୍‌ ଡିଂମ୍ୟାଃକ୍ନେ ମୁଇଂ ନ୍ତି ବାଃତିନେ ରକମ୍ ଡିଙ୍ଗ୍‌ନ୍ଲେକେ । 2 ✝ବାରି ଜଦି ନେଙ୍ଗ୍‌ନେ ଇଡ଼ିଂଡେ ସାମୁଆଁ ବାସଙ୍ଗ୍‌ନେ ବପୁ ଲେଃଏ । ସାପା ବିସୟ୍‌ରେ ଗ୍ୟାନ୍ ଲେଃଏ ତାଡ଼୍‍ତେ ବିସୟ୍ ବୁଜେନ୍‌ସା ବପୁ ଲେଃଏ ବିସ୍‌ବାସ୍‌ନେ ବପୁରେ କଣ୍ଡା ଗୁଚେନ୍‌ସା ବିସ୍‌ବାସ୍‌ ଲେଃଏ; ମାତର୍‌ ନେଙ୍ଗ୍‌ନେ ଆଲାଦ୍ ଆଲେଃଲା ନେଙ୍ଗ୍ ମେଃଡିଗ୍‌ ଣ୍ଡୁ । 3 ବାରି ଜଦି ନେଙ୍ଗ୍ ଅର୍‍କିତ୍‍ ରେମୁଆଁକେ ଆଃଚଙ୍ଗ୍‍ ନ୍‌ସା ନେଙ୍ଗ୍‌ନେ ସାପା ଦାନ୍ ଣ୍ଡିଙ୍ଗ୍‌ଏ ବାରି ଜଦି ନେଙ୍ଗ୍ ନେଙ୍ଗ୍‌ନେ ଗାଗ୍‌ଡ଼େକେ ବାବିଃନ୍‌ସା ଦାନ୍ ଣ୍ଡିଙ୍ଗ୍‌ଏ ମାତର୍‌ ନେଙ୍ଗ୍‌ନେ ଆଲାଦ୍ ଆଲେଃଲା ତେଲା ନେଙ୍ଗ୍‌ନେ ମେଃଡିଗ୍‌ ଲାବ୍‌ ଣ୍ଡୁ ।

4 ଆଲାଦ୍ ମାଲେ ସାଆସ୍ ବାରି ଲିବିସଃ, ଆଲାଦ୍‌, ରିସା ଣ୍ଡୁ ଆନ୍ତାର୍‍ବିନେ ଣ୍ଡୁ ବା ଆଂକାର୍ ଡିଙ୍ଗ୍‌ନେ ଣ୍ଡୁ । 5 ଆଲାଦ୍‌ ଦଦ୍ୟା ବାଃଲିର୍‌ବାଃତା ଆଡିଙ୍ଗ୍ ଣ୍ଡୁ, ନିଜର୍‌ ବଲ୍‌ ଚେସ୍‌ଟା ଆଡିଙ୍ଗ୍ ଣ୍ଡୁ ସଅଜ୍‍ରେ ଆଗ୍‌ସେ ଣ୍ଡୁ ଆଲାଦ୍‌ ଅଃନାଡିଗ୍ ମେଁ ଆଡ଼ାତ୍ରା ବଲ୍ ଆଡିଙ୍ଗ୍‌ବକ୍ନେ କାମ୍ ମନେ ଆବ ଣ୍ଡୁ । 6 ଆଲାଦ୍‌ ଅଦର୍ମନ୍ନିଆ ସାର୍ଦା ଆଡିଙ୍ଗ୍ ଣ୍ଡୁ ସତ୍‌ନ୍ନିଆ ମେଁନେ ସାର୍ଦା । 7 ଆଲାଦ୍‌ ସାପା ସମ୍ୱାଲେଏ ସାପା ବିସ୍‌ବାସ୍ ଡିଙ୍ଗ୍‌ଏ ସାପା ବିସୟ୍‌ରେ ସାଆସ୍‌ ସାଃଚେ ଲେଃଏ ।

8 ଆଲାଦ୍ ଅଃନା ଆଡା ଣ୍ଡୁ; ମାତର୍‌ ଜଦି ଇସ୍‌ପର୍ ଡାଗ୍ରାବାନ୍ ସାମୁଆଁ ବାସଙ୍ଗ୍‌ନେ ବପୁ ବଃ ୱେଏ; ବିନ୍ ବ୍ନାସାରେ ବାସଙ୍ଗ୍‌ନେ ବପୁ ବଃ ୱେଏ, ରେମୁଆଁନେ ଗିଆନ୍‍ ବଃ ୱେଏ । 9 ମେଃଡାଗ୍ଲା ନେନେ ଗିଆନ୍‍ ବିଃନେ ଦାନ୍ ବାରି ନେ ଇସ୍‌ପର୍‌ନେ ସାମୁଆଁ ବାସଙ୍ଗ୍‌ନେ ଦାନ୍ ଆଡା ଣ୍ଡୁ । 10 ମାତର୍‌ ସାପା ବିସୟ୍‌ନେ ସମାନ୍‍ ବାବ୍‌ରେ ପାଙ୍ଗ୍‌ଲା ଏନ୍‌ ସାପା ବିସୟ୍ ଡା ୱେଏ ।

11 ନେଙ୍ଗ୍ ଚିର୍ଲାଃଅ ଲେଃକେଲା ନେଙ୍ଗ୍‌ନେ ବାଲିର୍‌ବାତା ମ୍ନାନେ ବାରି ଚିନ୍ତାଡିଂନେ ଚିର୍ଲାଃଅ ରକମ୍ ଲେଃଗେ । ମାତର୍‌ ମ୍ନାଲା ନେଙ୍ଗ୍ ବାରି ଚିର୍ଲାଃଅ ରକମ୍ ବାଃଲିର୍‌ବାଃତା ଡିଙ୍ଗ୍‍ନାଡିଙ୍ଗ୍‍କେ । 12 ଦେତ୍‌ ରକମ୍‌ ନେ ମୁଇଙ୍ଗ୍ ଦାର୍‌ପନ୍‌ ଏତେ କେନେଡିଙ୍ଗ୍‌କେ, ମାତର୍‌ ଆତେନ୍‌ ବେଲା ନେ ନିମାଣ୍ଡା ବାବ୍‌ରେ ନେକେଏ । ନେଙ୍ଗ୍ ଏବେ ମାତର୍‌ ମେଃନେ ମ୍ୟାନ୍ଲେଃକେ ମାତର୍‌ ଆତେନ୍‌ ବେଲା ପର୍‌ମେସର୍‌ ଆନେଙ୍ଗ୍ ଡିରକମ୍ ମ୍ୟାଲେଃକେ ଦେତ୍‍ରକମ୍‌ ନେଙ୍ଗ୍ ନିମାଣ୍ଡା ବାବ୍‌ରେ ମ୍‌ମ୍ୟାଃଏ ।

13 ବିସ୍‌ବାସ୍‌ ଆସା ବାରି ଆଲାଦ୍ ଏନ୍‌ ଞ୍ଜିକ୍ଲିଗ୍‌ ଲେଃକ୍ନେ ବିସୟ୍ ବିତ୍ରେ ଆଲାଦ୍ ଆଃ ମ୍ନା ।