୧ କରିନ୍‌ତିୟ 4

କ୍ରିସ୍ଟ ବେବକ୍ନେ ସିସ୍‌

1 ପେ ଆନେକେ କିସ୍‌ଟନେ ଜତନ୍‌ ଡିଙ୍ଗ୍‌ଣ୍ଡ୍ରେ ଡାଗ୍‌ଚେ ବାବେନେ ଦର୍‌କାର୍ । ଇସ୍‌ପର୍ ଆନେକେ ଆଡ଼ାତ୍ରାନେ ତାଡ଼୍‍ତେ ସାମୁଆଁକେ ସାମାଲେନ୍‍ସା ମୁଇଙ୍ଗ୍ ଗୁମୁସ୍ତାକେ ବକେ । 2 ଦେକ୍ ରକମ୍‌ ଦାଇତ୍‌ ବାଲେଃକ୍ନେ ରେମୁଆଁ ନିଜର୍ ମାପ୍‌ରୁନେ ଆଡ଼ାତ୍ରା ବିସ୍‌ବାସ୍‌ ବନେ ଜାବର୍‌ ଦର୍‌କାର୍‌ । 3 ଏନ୍‌ ବିସୟ୍‌ରେ ପେ ବାନ୍ ଣ୍ଡୁଲା ଜା ଡିଙ୍ଗ୍‌ଲେ ରେମୁଆଁ ବିଚାର୍‍ନାନ୍ନିଆ ବିଚାର୍‌ ଡିଙ୍ଗ୍‍ ନ୍‌ସା ଆନେଙ୍ଗ୍ ଚିନ୍ତା ଣ୍ଡୁ ଦେକ୍‌ରକମ୍ କି ନେଙ୍ଗ୍ ନିଜେ ଡିଗ୍ ନିଜେନେ ବିଚାର୍ ଡିଙ୍ଗ୍‍ନାଡିଙ୍ଗ୍‌କେ ଣ୍ଡୁ । 4 ନେଙ୍ଗ୍ ବିରଦ୍‌ରେ ମେଃଡିଗ୍‌ ବିସୟ୍ ଲେଃନେ ସାମୁଆଁ ନେଙ୍ଗ୍ ନ୍ନାମ୍ୟାକେ ଣ୍ଡୁ । ଏଲେଡିଗ୍ ଆକ୍‌ମେନେ ଅର୍‌ତ ଣ୍ଡୁ ଜେ ନେଙ୍ଗ୍ କ୍ଲିଗ୍‌ଡା ବାବ୍‌ରେ ଦସି ଣ୍ଡୁ । ମାତର୍‌ ମାପ୍‌ରୁ ନିଜେ ନେଙ୍ଗ୍‌ନେ ବିଚାର୍‌ ଡିଙ୍ଗ୍‌ଣ୍ଡ୍ରେ । 5 ତେସା ଆର୍ମେ ବକ୍ନେ ବେଲା ସିସେବାନ୍ ପେ ଜାନେ ଡିଗ୍‍ ବିଚାର୍ ଆଡିଙ୍ଗ୍‌ପା । ସାରସାରି ବିଚାର୍ ମାପ୍‌ରୁ ପାଙ୍ଗ୍‍ନେ ବେଲା ଡିଙ୍ଗ୍‌ଏ । ମେଁ ତାଙ୍ଗ୍‍କିଗ୍‍ନେ ବୁଡ଼େଲେଃକ୍ନେ ସାମୁଆଁ ସାପା ତାର୍‍କିଗ୍‍ନ୍ନିଆ ଡୁଙ୍ଗ୍‍ପାଙ୍ଗ୍‍ଏ । ରେମୁଆଁଇଂନେ ମନ୍‍ଅରିଆ ବୁଡ଼ିଲେଃକ୍ନେ ବାବ୍‍ନା ସାପା ବାସଙ୍ଗ୍ଏ । ଆତେନ୍‌‍ବେଲା ସାପାରେ ଇସ୍‌ପର୍ ଡାଗ୍ରାବାନ୍ ନିଜେ ନିଜେନେ ଡିଲାଡିଗ୍‌ ପ୍ରସଂସା ବାଆର୍‌ଏ ।

6 ବୟାଁ ବାରି ତନାଇଂ ମାତର୍‌ ପେନେ ମଙ୍ଗଲ୍‌ ନ୍‌ସା ନେଙ୍ଗ୍ ଆପଲ୍ଲ ବାରି ନେଙ୍ଗ୍ ବିସୟ୍‌ରେ ଏନ୍‌ ସାପା ସାମୁଆଁ ବାସଙ୍ଗ୍‌ମ୍ୱକେ । ଆନେ ମ୍ୱାୟାକେ ଉଦାଅରନ୍‌ ରକମ୍‌ ମନେ ଡିଂଚେ ପେ ସିକେନେ ଦର୍‌କାର୍ ଜେ "ସାସ୍ତର୍‌ନ୍ନିଆ ମେଁନେ ଗୁଆର୍ ବକେ ଆମେକେ ଆନ୍ତାର୍‍ଚେ ବାରି ଜାବର୍‌ ବାଏରେ ୱେନେ ବଲ୍ ଣ୍ଡୁ ।" ପେ ବିତ୍ରେବାନ୍ ଆଜାକେ ଡୁଂୱେଚେ ବଡ଼୍‌ପନ୍‌ ଆରାସୁଏଲେ ବା ଆଜାକେ ଆଉର୍‌ଲେ । 7 ବିନ୍ ବାନ୍ ଆପେକେ ଜାଣ୍ଡେ ମ୍ନା ଆଡିଙ୍ଗ୍ ବକେ ? ପେନେ ସାପା ମେଁନେ ଇସ୍‌ପର୍‌ନେ ଦାନ୍ ଣ୍ଡୁ ? ତେଲା ପେନେ ମେଃ ଲେଃକେ, ଆତେନ୍‌ ଦାନ୍ ରକମ୍‌ ବାମାଲେଃକେ ରକମ୍‌ ବଡ଼୍‌ପନ୍‌ ଡିଙ୍ଗ୍‌ପେଡିଙ୍ଗ୍‌କେ ମେଃସାଃ ?

8 ପେନେ ଦର୍‌କାର୍‌ ଲେଃକ୍ନେ ସାପା ବିସୟ୍ ବା ପେଲେକେ କି ? ପେ ମେଃମେଃନେ ସାକାର୍‌ ଡିଙ୍ଗ୍‌ପେଲେଃକେ ? ପେ ମେଁନେ ମୁଇଂ ମୁଇଂ ଇଃସାଙ୍ଗ୍‌ ଡିଙ୍ଗ୍ ପେଲେକେ ଜଦି ନେ ଡିଙ୍ଗ୍ ନେୟାକେ ? ସତେଆ ପେଇଂ ଇଃସାଙ୍ଗ୍‌ ଡିଙ୍ଗ୍ ପେଲେଃକେ ? ତେଲା ନେ ପେନେ ଆତେନ୍‌ ଇଃସାଙ୍ଗ୍‌ ପଦ୍‌ ବାନ୍ ନେପାକୁଡ଼େ । 9 ସତ୍ ସାମୁଆଁ ବାସଙ୍ଗ୍‌ନେ ୱେଲା ଆନେଙ୍ଗ୍ ମନେ ଲେଃକେ ଜେ ନେନେ ରକମ୍ ପ୍ରେରିତ୍‌ ସିସ୍ଇଂକେ ଇସ୍‌ପର୍ ସାପାରେକେ ପ୍ଲା ବକେ । ରେମୁଆଁ ସାମ୍‌ନା ଗୁଏନେ ଡଣ୍ଡ୍‍ ବାଚେ ସାପା ଦର୍ତନିନେ ରେମୁଆଁ ବାରି ଦେବ୍ ଦୁତ୍‍ଇଂ ଡାଗ୍ରା ଉପହାସ୍‌ନେ ପାତ୍ର ରେମୁଆଁଇଂନେ ରକମ୍ ଆନେକେ ମେଁ ବକେ । 10 ନେ କିସ୍‌ଟନେ ନ୍‌ସା ବୁଦି ଣ୍ଡୁ ଡାଗ୍‌ଚେ ସ୍ନାମୁଆଁ ନେଲେଃକେ ମାତର୍‌ କିସ୍‍ଟ ଏତେ ମିସୁପେଲାଗେସା ପେ ଜ୍ଞାନି । ନେ ଅସକ୍‍ତ୍ୟା, ମାତର୍‌ ପେ ଡାଟ୍ । ନେ ଅମାନି ରେମୁଆଁ, ମାତର୍‌ ପେ ସନ୍‍ମାନ୍‍ଣ୍ଡ୍ରେ । 11 ଏବେ ଡିଗ୍ କେଡ଼େସଃ ନେଲେଃକେ ଉଗ୍‍ଡ୍ୟାଃ ଡଡିଂକେ ତେକ୍‍ପ୍ୟାଃକ୍ନେ ପାଟାଇ ସଃନ୍ଲେଃକେ ମାଡ୍‍ ଚଙ୍ଗ୍‍ନ୍ଲେଃକେ ବାରି ଆନେଙ୍ଗ୍ ଡୁଆ ଣ୍ଡୁ । 12 ଜାବର୍ କାମ୍ ଡିଙ୍ଗ୍‌ଚେ ନେ ଦିନ୍‌କେ ଦିନ୍ ଲାକାଃ ୱେ ନେଲେକେ । ଜାଣ୍ଡେ ଆନେକେ ଅବିସାପ୍ ବିଲା ନେ ଆମେକେ ଆସିର୍ବାଦ୍ ନେଡିଙ୍ଗ୍‌ଏ । କସ୍ଟ ପାଙ୍ଗ୍‌ଲା ସାମ୍ୱାଲେ ନେୱେଏ । 13 ଅପମାନ୍‌ ଡିଙ୍ଗ୍‌ଚେ ମିସୁନେ ସାମୁଆଁ ବାସଙ୍ଗ୍‌ନେଡିଙ୍ଗ୍‌; ଏଃ ଜାକ ଡିଗ୍ ନେ ମଞ୍ଚ୍‌ପୁର୍‌ନେ କାଚ୍‌ରା, ସାପାରେନେ ଚିନ୍‌ ରକମ୍‌ ଡିଙ୍ଗ୍‌ନେଲେଃକେ ।

14 ନେଙ୍ଗ୍ ଆପେକେ ଗିଆସ ଆଡିଙ୍ଗ୍ ନ୍‌ସା ଏନ୍‌ ସାପା ବିସୟ୍ ଗୁଆର୍‌ନ୍ନାଡିଂକେ ଣ୍ଡୁ ମାତର୍‌ ନେଙ୍ଗ୍‌ନେ ନିଜର୍‌ ଉଙ୍ଗ୍‌ଡେ ଡାଗ୍‌ଚେ ମନେ ଡିଙ୍ଗ୍‌ଚେ ଆପେକେ ତରକ୍ ଆଡିଙ୍ଗ୍ ନ୍‌ସା ଏନ୍‌ ସାପା ଗୁଆର୍‌ ଣ୍ଡିଙ୍ଗ୍ । 15 କ୍ରିସ୍ଟାନ୍‌ ପାରାନ୍‌ନ୍ନିଆ ପେନେ ଗୁଲୁଏ ଦରମ୍‌ ଗୁରୁ ଲେଃଆର୍‌ଏ । ମାତର୍‌ ପେନେ ଆବା ମୁଇଙ୍ଗ୍ । ପେନେ ଡାଗ୍ରା ମାପ୍‍ରୁ ସାମୁଆଁ ମ୍ୱାସଙ୍ଗ୍‍କେ ବାରି ଜିସୁ କିସ୍‌ଟକେ ପେ ପେସାକେ ଆତ୍‌ବା ନେଙ୍ଗ୍ ପେନେ ଆବା ରକମ୍‌ ଡିଙ୍ଗ୍ ନ୍‌ଲେଃକେ । 16 ✝୪:୧୬ ୧ କରିନ୍‌ତିୟ ୧୧:୧; ପିଲିପିୟ ୩:୧୭.ଏନ୍‌ସାଃ ନିଏକେ ସାର୍ଲ ଣ୍ଡିଂକେ, ପେଇଂ ନିଂ ପ୍ଲାଃ ପାଙ୍ଗ୍‌ଲାପା । 17 କିସ୍‌ଟିୟାନ୍‌ ପାରାନ୍‌ନ୍ନିଆ ନେଙ୍ଗ୍‌ନେ ନିଜର୍ ବାରି ବିସ୍‌ବାସ୍‌‍ରେ ଲେଃକ୍ନେ ନେଉଂ ତିମତିକେ ପେ ଡାଗ୍‍ରା ବେଣ୍ଡିଂକେ । ନେଙ୍ଗ୍ ମାପ୍‌ରୁ କିସ୍‍ଟନେ ଡାଗ୍‍ରା ଲେଃଚେ ଆଣ୍ଡିନେ ତ୍ମି ପାରାନ୍ ବ୍ରୁଆ ଡିଙ୍ଗ୍‌ଣ୍ଡିଂକେ ବାରି ସାପା ସାପାନେ ମଣ୍ଡଲି ଡାଗ୍ରା ଆଣ୍ଡିନେ ସାପା ବୁଦି ବିଃଣ୍ଡିଂକେ, ଆତେନ୍‌ ମେଁ ଆପେକେ ଚେତ୍‌ନା ଆଡିଙ୍ଗ୍ ବିଏ ।

18 ନେଙ୍ଗ୍ ପେଇଂନେ ଡାଗ୍ରା ନ୍ନାୱେ ଡାଗ୍‌ଚେ ବାବେଚେ ଜାଣ୍ଡେ ଜାଣ୍ଡେ ଗର୍ବ ଡିଙ୍ଗ୍‍ଆର୍‍ଡିଂକେ । 19 ଇସ୍‌ପର୍ ଇକ୍‌ଚା ଡିଙ୍ଗ୍‌ଲା ନେଙ୍ଗ୍ ଜିଆ ପେ ଡାଗ୍ରା ଙ୍ଗୁଏଃଏ ଆତେନ୍‌ ବେଲା ଏନ୍‌ ତିଆର୍‌ ଡିଙ୍ଗ୍‍ଲେଃକ୍ନେ ରେମୁଆଁଇଂନେ ସାମୁଆଁ ମାତର୍‌ ନାଅଁ ଣ୍ଡୁ ସତେଆ ମେଁଇଂନେ ଉଡ଼ି ବପୁ ଲେଃକେ ଆତେନ୍‌ ନେଙ୍ଗ୍ ଙ୍କେଏ । 20 ଡାଗ୍ଲା ଇସ୍‌ପର୍‌ନେ ରାଇଜ୍ ମାତର୍‌ ବ୍ନାଲିର୍‌ନେ ବିସୟ୍‌ରେ ଣ୍ଡୁ ମାତର୍‌ ବପୁନେ ବିସୟ୍‌ରେ ତ୍ନାଏ । 21 ପେ ମେଃମେଃନେ ଚାଏଁପେଡିଂକେ ? ନେଙ୍ଗ୍ ମେଃମେଃନେ ଆପେକେ ସାସନ୍‌ ଡିଙ୍ଗ୍‌ନ୍‌ସା ଚାବୁକ୍‌ ଡୁଙ୍ଗ୍‌ ମ୍ପାଙ୍ଗ୍‌ଏ ? ଣ୍ଡୁ ଆଲାଦ୍ ବାରି ସାର୍ଦା ମନ୍ ଡିଙ୍ଗ୍‌ଚେ ଙ୍ଗୁଏଃଏ ?