1 ତନା ବାରି ବୟାଁଇଂ ନେଙ୍ଗ୍ ମୁଡ଼ି ନିମାଣ୍ଡା ବ୍ନାଲିର୍ ପେଇଂନେ ଡାଗ୍ରା ବାସଙ୍ଗ୍‌ ଡିଙ୍ଗ୍‌ମ୍ୱକେ ଆଣ୍ଡିନେ ପେଇଂ ସାଃପେବକେ ବାରି ଜାଣ୍ଡେନେ ଆଡ଼ାତ୍ରା ପେଇଂନେ ବିସ୍‌ବାସ୍‌ ଲେଃକେ ଆତେନ୍‌ ବିସୟ୍ ଆପେକେ ଆଃ ଅଁ ବିନ୍‌ସା ନେଙ୍ଗ୍ ଚାଏଁଣ୍ଡିଂକେ । 2 ନେଙ୍ଗ୍ ପେଇଂନେ ଡାଗ୍ରା ବାସଙ୍ଗ୍‌ ଡିଙ୍ଗ୍‌ବକ୍ନେ ଆତେନ୍‌ ବଲ୍ ବ୍ନାଲିର୍ ଆଃ ନିମାଣ୍ଡା ସାମୁଆଁ । ପେଇଂ ଆତେନ୍‌ ନିମାଣ୍ଡା ସାମୁଆଁନ୍ନିଆ ଡାଟ୍‌ ବିସ୍‌ବାସ୍‌ ଡିଙ୍ଗ୍‌ଚେ ପେଲେଃଲା ଉଦାର୍ ପେବାଏ । ଣ୍ଡୁଲା ପେଇଂନେ ବିସ୍‌ବାସ୍‌ ସରା ଡିଙ୍ଗ୍‌ଏ ।

3 ନେଙ୍ଗ୍ ବାଲେଃକ୍ନେ ମୁଇଙ୍ଗ୍ ଗ୍ୟାନ୍ ଆପେକେ ଆମ୍ୟାଣ୍ଡିଙ୍ଗ୍‍କେ । ଆତେନ୍‌ ସାପା ବାନ୍ ଦର୍‌କାର୍ । ଆତେନ୍‌ ଡିଙ୍ଗ୍‌ଡିଙ୍କେ ଦର୍ମ ସାସ୍ତର୍‌ନ୍ନିଆ ଗୁଆର୍‌ବକେ ଇସାବ୍‌ରେ କିସ୍‌ଟ ନେନେ ପାପ୍ ନ୍‌ସା ଗୁଏଃକେ । 4 ✝ମେଁ ଗୁଏକେ ବାରି ସାସ୍ତର୍‌ ଅନୁସାରେ ଜିର୍‍ସି ବିତ୍ରେ ତଡ଼୍ୟାକେ । 5 ମେଁ ପିତର୍ ବାରି ଇଡ଼ିଙ୍ଗ୍ ମେଁନେ ଗୁଆକ୍ଲିଗ୍‌ ସିସ୍‌କେ ମୁସୁଡ଼ିଙ୍ଗ୍‍ ବିକେ । 6 ତେନ୍ଇଡ଼ିଂ ମେଁ ମୁଇଂ ମାଡ୍‍ରେ ମେଁନେ ମାଲ୍‌ସ ବାନ୍ ଜାବର୍ ମେଁ ପ୍ଲା ୱେଣ୍ଡ୍ରେଇଂକେ ମୁସୁଃଡ଼ିଙ୍ଗ୍‍ ବିବଗେ । ମେଁଇଂନେ ବିତ୍ରେ ଉଡ଼ିରୁଆ ଏବେ ମଞ୍ଚ୍‌ପୁର୍‌ନ୍ନିଆ ଣ୍ଡୁ ମାତର୍‌ ବାଃଗା ଉଡ଼ିରୁଆ ଜିବନ୍ ଲେଃଆର୍‌କେ । 7 ଏନ୍‌ ଇଡ଼ିଙ୍ଗ୍ ମେଁ ଜାକୁବ୍‌ ବାରି ସାପା ସିସ୍ଇଂକେ ମୁସୁଡ଼ିଙ୍ଗ୍‍ ବିକେ ।

8 ✝ସାପାନେ ଇଡ଼ିଙ୍ଗ୍‌ ମେଁ ନେଙ୍ଗ୍ ରକମ୍‌ ମୁଇଙ୍ଗ୍ ଅକାଲ୍‌ ଜନମ୍‍କେ ଡିଙ୍ଗ୍ ଦର୍ସନ୍‌ ବିଃବକେ । 9 ✝ନେଙ୍ଗ୍ ସାପା ସିସ୍‍ଇଂନେ ବାନ୍ ଡାଆଁ । ଦେକ୍‌ରକମ୍‌କି ନେଙ୍ଗ୍‌ନେ ବେବକ୍ନେ ଡାଗ୍‌ଚେ ୱାନେ ଡିଗ୍ ବପୁ ଣ୍ଡୁ ଡାଗ୍ଲା ନେଙ୍ଗ୍ ଅଃସେବାନ୍ ପର୍‌ମେସର୍‌ନେ ମଣ୍ଡଲିନ୍ନିଆ କସ୍ଟ ଡିଙ୍ଗ୍‌ମ୍ୱକେ । 10 ମାତର୍‌ ଏବେ ନେଙ୍ଗ୍ ମେଁନେ ଡିଙ୍ଗ୍‌ନ୍ଲେକେ ଆତେନ୍‌ ଇସ୍‌ପର୍‌ନେ ଆସିର୍ବାଦ୍‌ବାନ୍ ଡିଙ୍ଗ୍‍ଲେଃକେ ବାରି ନେଙ୍ଗ୍ ଆଡ଼ାତ୍ରା ମେଁନେ ଲିବିସ ଦଦ୍ୟା ଆଡିଙ୍ଗ୍‌କେ ଣ୍ଡୁ । ବାରି ବିନ୍‌ବିନ୍ ସାପା ବେବକ୍ନେ ସିସ୍ଇଂନେ ବାନ୍ ନେଙ୍ଗ୍ ଜାବର୍ କସ୍ଟ ଡିଙ୍ଗ୍‌ମ୍ୱକେ । ସତେଆ ଏନ୍‌ ସାପା ନେଙ୍ଗ୍ ନାଡିଙ୍ଗ୍‌କେ ଣ୍ଡୁ । ମାତର୍‌ ନେଙ୍ଗ୍ ଆଡ଼ାତ୍ରା ଇସ୍‌ପର୍‌ନେ ଲିବିସଃ ଲେଃକେସା ଏନ୍‌ ପୁରନ୍‌ ଡିଙ୍ଗ୍‌ଲେକେ । 11 ତେସା ନେଙ୍ଗ୍ ଡିଙ୍ଗ୍‌ଲେ ବା ମେଇଂ ଡିଙ୍ଗ୍‌ଲେଃ ନେ ସାପାରେ ଆତେନ୍‌ ମୁଇଙ୍ଗ୍ ସାମୁଆଁ ବାସଙ୍ଗ୍‌ ଡିଙ୍ଗ୍‌ନେଡିଙ୍ଗ୍‌ ବାରି ପେଇଂ ଆତ୍‌ଅରିଆ ବିସ୍‌ବାସ୍‌ ଡିଙ୍ଗ୍‌ପେଡିଙ୍ଗ୍‌କେ ।

12 କିସ୍‌ଟ ଗୁଏଃକ୍ନେ ବାନ୍ ତଡ଼୍ୟାଲେଃକେ । ଆକେନ୍‍ ଆଃ ନେ ବାସଙ୍ଗ୍‌ନେ ମ୍ନା ସାମୁଆଁ । ତେଲାଡିଗ୍‍ ଏବେ ପେ ବିତ୍ରେବାନ୍ ଜାଣ୍ଡେ ଜାଣ୍ଡେ ଗୁଏଃକ୍ନେ ରେମୁଆଁଇଂ ଆତଃଡ଼୍ୟାଆର୍‍ ଣ୍ଡୁ ଡାଗ୍‌ଚେ ଡିରକମ୍ ବାସଙ୍ଗ୍‌ପେଡିଂକେ ? 13 ଜଦି ଗୁଏକ୍ନେଣ୍ଡ୍ରେନେ ଆତଃଡ଼୍ୟାଲା କିସ୍‌ଟ ଗୁଏକ୍ନେବାନ୍‍ ଆଃତଡ଼୍ୟାକେ ଣ୍ଡୁ । 14 ଜଦି କିସ୍‌ଟ ଗୁଏକ୍ନେବାନ୍‌ ଆଃତଡ଼୍ୟାକେ ତେଲା ନେନେ ବାସଙ୍ଗ୍‍ ଅଲେଙ୍ଗ୍‍ନେ ସାମୁଆଁ ସରାଃ ବାରି ପେନେ ବିସ୍‌ବାସ୍ ଡିଗ୍ ସରାଃ । 15 ଜାବର୍‌ ନେନେ ଇସ୍‌ପର୍‌ନେ ବିସୟ୍‌ରେ ନାଲେ ବାସଙ୍ଗ୍‌କ୍ନେ ରକମ୍ ଡିଙ୍ଗ୍‌ଏ ମେଃଡାଗ୍‌ଲା ନେ ବାସଙ୍ଗ୍‍ନେଡିଙ୍ଗ୍‍କେ ଜେ ମେଁ କିସ୍‌ଟକେ ଗୁଏକ୍ନେବାନ୍‍ ଆତଡ଼ିଆବକେ । ମାତର୍‌ ଜଦି ସତ୍‍ରେ ଗୁଏକ୍ନେଣ୍ଡ୍ରେଇଂ ଆଃତଡ଼୍ୟାଆର୍‌ଏ ତେଲା ଇସ୍‌ପର୍ କିସ୍‌ଟକେ ଗୁଏକ୍ନେବାନ୍‍ ଆଃତଡ଼୍ୟା ଆବକେ ଣ୍ଡୁ । 16 ଗୁଏକ୍ନେଣ୍ଡ୍ରେ ବାର୍‌ମୁଇଂତର୍‌ ତଡ଼ିଆ ଆୟାଲା କିସ୍‌ଟ ଡିରକମ୍ ତଃଡ଼୍ୟାଏ ? 17 ଜଦି କିସ୍‌ଟ ଗୁଏକ୍ନେବାନ୍‌ ତଡ଼ିଆ ଆଲେଃକେ ତେଲା ପେଇଂନେ ବିସ୍‌ବାସ୍‌ ମିଚ୍ ବାରି ପେଇଂ ଏବେ ଡିଗ୍ ପାପ୍‌ନ୍ନିଆ ଲଃପେଲେଃକେ । 18 ବାରି ଏନ୍‌ ଅର୍‌ତ ଡିଙ୍ଗ୍‌ଏ ଜେ ଗୁଏ ଲେଃକ୍ନେ କିସ୍‌ଟ ବିସ୍‌ବାସିଇଂ ଡିଗ୍ ନସ୍ଟ ଡିଂୱେଆର୍‌ଏ । 19 ଜଦି କିସ୍‌ଟ ଡାଗ୍ରା ନେନେ ଆସା ଲେଃଏ ଆକେନ୍ ଜିବନ୍‍ ନ୍‍ସା ଦର୍‌କାର୍, ତେଲା ବିନ୍ ସାପାରେବାନ୍‍ ନେନେ ଅବସ୍ତା ଅଦିକ୍‍ ଡଣ୍ଡ୍‍ ବାଡିଙ୍ଗ୍‌ଏ ।

20 ମାତର୍‌ ସତ୍‌ ବାବ୍‌ରେ କିସ୍‌ଟ ଗୁଏଃକେ ରକମ୍‍ ଡୁଲେଗ୍‍ ଲେଃକ୍ନେ ରେମୁଆଁଇଂନେ ତଃଡ଼୍ୟାନେ ଡିଲାଡିଗ୍ ଆଃସୁଏନ୍‌ସା ମେଁଇଙ୍ଗ୍‌ନେ ବିତ୍ରେବାନ୍ ନିଜେ ସାପାବାନ୍‍ ପର୍‍ତୁମ୍‍ ଗୁଏକ୍ନେବାନ୍‍ ତଡ଼ିଆ ଲେଃକେ । 21 ମୁଇଂଜା ଆତ୍‍ଲା ଗୁଏନେ ମଞ୍ଚ୍‌ପୁର୍‍ନ୍ନିଆ ଗାକେ । ଦେତ୍‌ରକମ୍ ମୁଇଙ୍ଗ୍‌ଡା ନ୍‌ସା ଗୁଏଣ୍ଡ୍ରେଇଂନେ ତଃଡ଼୍ୟାନେ ସ‍ଅଜ୍‌ ଡିଙ୍ଗ୍‍ଲେଃକେ । 22 ଆଦମ ଏତେ କୁଡ଼େ ଲେଃଗ୍‍ସା ସାପା ରେମୁଆଁ ଗୁଏକେ । ଦେତ୍‌ରକମ୍ କିସ୍‌ଟ ଏତେ କୁଡ଼େଲେଃଗ୍‍ସା ସାପା ରେମୁଆଁ ତଡ଼ିଆ ଆର୍‌ଏ । 23 ମାତର୍‌ ସାପା ଆର୍ମେକ୍ନେ ବେଲା ତଡ଼ିଆ ଆର୍‌ଏ । ସାପାବାନ୍‍ ସିସେ କିସ୍‌ଟ ଗୁଏକ୍ନେ ବାନ୍ ତଡ଼ିଆ ଲେଃକେ । 24 ଏନ୍‌ ଇଡ଼ିଙ୍ଗ୍‌ ଜୁଗ୍‌ ପିଙ୍ଗ୍‌ଚାଏ କିସ୍‌ଟ ସାପା ଦଦ୍ୟା ଆତ୍ମାକେ ବାରି ଜା ଆଡ଼ାତ୍ରା ସାସନ୍‍ ଡିଙ୍ଗ୍‍ଏ ଅଦିକାର୍ ବାରି ମ୍ନା ବପୁରେ ଆଡାଚେ ଆବା ଇସ୍‌ପର୍‌କେ ଆକେନ୍ ରାଜ୍ୟ ସର୍‍ପେ ବିଏ । 25 ଇସ୍‌ପର୍ ମେଁନେ ସାପା ସତ୍ରୁକେ ଆଃଆରେଚେ କିସ୍‍ଟନେ ଞ୍ଚ ଆଲ ଆଡିଙ୍ଗ୍ ଜାକ କିସ୍‌ଟ ସାସନ୍‍ ଡିଙ୍ଗ୍‌ଏ । 26 ସାପାବାନ୍‍ ସାରାସାରି ସତ୍ରୁ ମେଁ ଗୁଏଃନେ ଡିଗ୍ ଆରେ ୱେଏ । 27 ଡାଗ୍ଲା ଦରମ୍‌ ସାସ୍ତର୍‌ନ୍ନିଆ ଗୁଆର୍ ବକେ "ଇସ୍‌ପର୍ ସାପା ବିସୟ୍ କିସ୍‌ଟନେ ଞ୍ଚ ବୁନ୍ଦେ ଆଡିଙ୍ଗ୍‌ଏ ।" ଏଲେଡିଗ୍‌ ଇସ୍‌ପର୍ ଏନ୍‌ ସାପା ବିସୟ୍‌ନେ ଆକୁଡ଼େକେ ଣ୍ଡୁ ମେଃଡାଗ୍‌ଲା ମେଁ ସାପା ବିସ‍ଏକେ କିସ୍‌ଟନେ ଞ୍ଚ ବୁନ୍ଦେ ଆଡିଙ୍ଗ୍‌ଏ । 28 ସାପା ବିସୟ୍ କିସ୍‌ଟ ସାସନ୍‍ ଡିଙ୍ଗ୍‍କ୍ନେ ଇଡ଼ିଙ୍ଗ୍ କିସ୍‌ଟ ଜେ ଆବା ଇସ୍‍ପର୍‍ନେ ଆଲ ଡିଙ୍ଗ୍‌ଏ ବାରି ସାପା ଦର୍‌ତନି ଆଡ଼ାତ୍ରା ଇସ୍‌ପର୍‌ନେ ସାସନ୍‍ ଡାଏ ।

29 ଗୁଏଃ ଲେଃଆର୍‍ଡିଂଗେସା ଜାଣ୍ଡେଇଂ ଣ୍ଡିଆଦିକ୍ୟା ବା ଆର୍‌ଏ ମେଁଇଂନେ ବିସୟ୍‌ରେ ମେଁନେ ନେବାସଙ୍ଗ୍‍ ? ଉଡ଼ିରୁଆନେ ଇକ୍‌ଚା ଇସାବ୍‌ରେ ଜଦି ଗୁଏଃକ୍ନେ ରେମୁଆଁ ବାର୍‌ମୁଇଂତର୍‌ ଆରାଃତଡ଼୍ୟା ଣ୍ଡୁ । ମେଇଂନେ ଆତ୍‌ଲା ବିନ୍‌ଣ୍ଡ୍ରେକେ ମେନ୍‌ସା ଣ୍ଡିଆଦିକ୍ୟା ବିଏ ? 30 ବାରି ନେ ମେଃନ୍‌ସା କାଲାଆଃ ବିପଦ୍‍ ଆପଦ୍‍ନ୍ନିଆ ଜୁଜ୍‌ ଡିଙ୍ଗ୍‍ନେଡିଙ୍ଗ୍‍କେ ? 31 ବୟାଁଇଂ ନେନେ ଜିବନ୍ ମାପ୍‌ରୁ ଜିସୁ କିସ୍‌ଟ ଏତେ ମିସୁ ଲେଃଗେସା, ପେ ଆତ୍‍ଲା ନେଙ୍ଗ୍‌ନେ ମୁଡ଼ି ଗର୍ବ ଆତ୍‌ଅରିଆ ପାର୍‌ମାନ୍ ଡିଙ୍ଗ୍‌ଚେ ବାସଙ୍ଗ୍‌ଣ୍ଡିଂ ନେଙ୍ଗ୍ କାଲାଆଃ ଗୁଏଣ୍ଡିଙ୍ଗ୍‍କେ । 32 ଜଦି ନେଙ୍ଗ୍ ନର୍‍ନେ ଇକ୍‌ଚା ଡୁଙ୍ଗ୍‍ୱେଚେ ଏଫିସିୟନ୍ନିଆ କଣ୍ଡା ଜନ୍ତୁଇଂ ସୁଗୁଆ ରେମୁଆଁଇଂନେ ଏତେ ରିଙ୍ଗ୍‍ନ୍ଲେଗେ ତେଲା ନେଙ୍ଗ୍‌ନେ ମେଁ ଲାବ୍‍ ଡିଙ୍ଗ୍‌କେ ? ଜଦି ଗୁଏକ୍ନେ ରେମୁଆଁଇଂ ଆଃତଡ଼୍ୟାଆର୍‌ଏ ତେଲା ବ୍ନାଲିର୍‍ ଇସାବ୍‌ରେ "ଏଲାପା, ଚଙ୍ଗ୍‍ଉଗ୍‌ଚେଃ ବେଲା ନେକାଟେପା ମେଃଡାଗ୍‌ଲା ଞ୍ଜଃଡ଼େ ନେଃ ନେଃଗୁଏଃ ।"

33 ପେ ମୁର୍କ ରକମ୍‌ ବେବ‍ଆର୍ ଆଡିଙ୍ଗ୍‌ପା । "ଦଦ୍ୟା ସାଙ୍ଗଇଂ ନିମାଣ୍ଡା ଅବ୍ୟାସ୍‍ଇଂକେ ନସ୍ଟ ଆଡିଙ୍ଗ୍‌ବିଏ ।" 34 ତେସା ତରକ୍ ଡିଙ୍ଗ୍‌ପା ପାପ୍ ଆଡିଙ୍ଗ୍‌ପା । ପେଇଂନେ ବିତ୍ରେ ମୁଇଙ୍ଗ୍ ଗିଆସମାଲାନେ ବିସୟ୍ ଆକ୍‌ଅରିଆ ବାସଙ୍ଗ୍‌ ବ ଣ୍ଡିଂକେ ପେଇଂନେ ବିତ୍ରେବାନ୍‍ ଉଡ଼ିରୁଆ ଇସ୍‌ପର୍‌କେ ଆମ୍ୟାଆର୍‌କେ ଣ୍ଡୁ !

35 ଜାଣ୍ଡେ ଡିଙ୍ଗ୍‌ଏତ ସାଲ୍ୟାକୁଆର୍‌ଏ, "ଗୁଏକ୍ନେ ରେମୁଆଁ ଡିରକମ୍ ବାର୍‌ମୁଇଂତର୍‌ ଜିବନ୍‌ ଡିଙ୍ଗ୍‌ଏ ?" ମେଇଂ ଡିରକମ୍ ଗାଗ୍‌ଡ଼େ ସାଃଲେଆର୍‌ଏ ? 36 ପେଇଂ ଉଡ଼ି ମୁର୍କ । ଅଃକେନ୍ ମେଃନେ ପେମ୍ୟାକେ ଣ୍ଡୁ, ଆଣ୍ଡିନେ ମୁଞ୍ଜି ବିଗ୍‌ଆର୍‌ଏ ଆତେନ୍‌ ଆଃଗୁଏଲା ଆପଡ଼୍ୟା ଣ୍ଡୁ ? 37 ଆରି, ଆଣ୍ଡିନେ ସ୍ଲା ପଡ଼୍ୟାଏ ପେ ଆମେକେ ବିଗ୍‌ ପେବଣ୍ଡୁ । ପେ ବିଗ୍‌ପେବ ଣ୍ଡୁ, ଗହମ୍‌ ଣ୍ଡୁଲା ବିନ୍ ମେଃଡିଗ୍ କିଆନେ ମୁଇଙ୍ଗ୍ ମୁଞ୍ଜି ମାତର୍‌ । 38 ମାତର୍‌ ଇସ୍‌ପର୍ ନିଜର୍ ଇକ୍‌ଚା ରକମ୍‌ ମେଁନେ ଗାଗ୍‌ଡ଼େ ଆବଦ୍‌ଲେ ବିଏ ବାରି ସାପା ମୁଞ୍ଜିକେ ମେଁ ମେଁନେ ନିଜେନେ ରୁପ୍‍ ବିଏ ।

39 ସାପା ଗାଗ୍‌ଡ଼େ ମୁଇଂ ରକମ୍‌ ଗାଗ୍‌ଡ଼େ ଣ୍ଡୁ ରେମୁଆଁ ଗାଗ୍‌ଡ଼େ ମୁଇଙ୍ଗ୍ ରକମ୍‌ ପୁସୁନେ ଗାଗ୍‌ଡ଼େ ବିନ୍ ରକମ୍‌ । ପ୍ଲିଗ୍‌ ବାରି ଆଡ଼ନେ ଗାଗ୍‌ଡ଼େ ବିନ୍ ରକମ୍‌ ।

40 କିତଂ ବିସୟ୍‍ନେ ଗାଗ୍‌ଡ଼େ ଲେଃକେ ମଞ୍ଚ୍‌ପୁର୍‌ ବିସୟ୍‍ନେ ଗାଗ୍‌ଡ଼େ ଡିଗ୍ ଲେଃକେ ମାତର୍‌ କିତଂନେ ଗାଗ୍‌ଡ଼େ ମୁଇଙ୍ଗ୍ ରକମ୍‌ ସବା ବାରି ମଞ୍ଚ୍‌ପୁର୍‌ନେ ଗାଗ୍‌ଡ଼େ ବିନ୍‌ରକମ୍‌ ସବା । 41 ସ୍ନିନେ ମୁଇଙ୍ଗ୍ ରକମ୍‌ ତାର୍କିଗ୍ ଆର୍କେନେ ବିନ୍‌ରକମ୍‌ ତାର୍କିଗ୍ ବାରି ଚାଙ୍କୁଆନେ ବିନ୍‌ରକମ୍‌ ତାର୍କିଗ୍; ଡାଗ୍ଲା ତାର୍କିଗ୍‌ନ୍ନିଆ ମୁଇଙ୍ଗ୍ ଚାଙ୍କୁଆ ବିନ୍ ଚାଙ୍କୁଆ ବାନ୍ ବିନେ ।

42 ଗୁଏକ୍ନେଣ୍ଡ୍ରେ ତଡ଼୍ୟାନେ ବିସୟ୍‌ରେ ଡିଗ୍ ଏନ୍‌ ସାମୁଆଁ ଦର୍‌କାର୍ । ଆତିବିକ୍ନେ ଗାଗ୍‌ଡ଼େ ନସ୍ଟ ଡିଙ୍ଗ୍‌ଏ । ମାତର୍‌ ତଡ଼୍ୟାନେ ଗାଗ୍‌ଡ଼େ ନସ୍ଟ ଆଡିଙ୍ଗ୍‌ ଣ୍ଡୁ । 43 ଆତିବିକ୍ନେ ଗାଗ୍‌ଡ଼େ ସବାଣ୍ଡୁ ବାରି ଅସକ୍‌ତିଆ । ମାତର୍‌ ବାର୍‌ମୁଇଂତର୍‌ ତଡ଼୍ୟାକ୍ନେ ଗାଗ୍‌ଡ଼େ ସୁନ୍ଦର୍‌ ବାରି ବପୁ ଲେଃଏ । 44 ଆତି ବକେଲା ଗାଗ୍‌ଡ଼େ ମ୍ବ୍ର ଲେଃଏ; ମାତର୍‌ ବାର୍‌ମୁଇଂତର୍‌ ଜିବନ୍‌ ଡିଙ୍ଗ୍‌ବେଲା ଆତେନ୍‌ ଆତ୍ମିକ ଗାଗ୍‌ଡ଼େ । ଜିବନ୍‌ ଗାଗ୍‌ଡ଼େ ନ୍‌ଚ୍ୟା ଲେଃଲା ଆତ୍ମା ଗାଗ୍‌ଡ଼େ ଡିଂଡିଙ୍ଗ୍‌କେ । 45 ଦର୍ମ ସାସ୍ତର୍‌ନ୍ନିଆ ଗୁଆର୍‌ବକେ; "ପର୍‍ତୁମ୍‍ ରେମୁଆଁ ଆଦମ ମୁଇଙ୍ଗ୍ ଜିବନ୍ ପ୍ରାନି ରକମ୍‌ ତିଆର୍ ଡିଙ୍ଗ୍‌ଲେକେ ।" ସାରାସାରି ଆଦମ ଲେଃକେ ଜିବନ୍ ବିଃନେ ଆତ୍ମା । 46 ସେନୁଗ୍‌ବାନ୍‌ ଆତ୍ମିକ ବିସୟ୍ ଆଲେଃଗେ ଣ୍ଡୁ । ସିସେ ମେଃମେଃନେ ଲେଃକେ ସତ୍‌ ଏନ୍‌ ଇଡ଼ିଙ୍ଗ୍ ପାଙ୍ଗ୍‌କେ ଆତ୍ମିକ ବିସୟ୍ । 47 ସେନୁଗ୍‌ ରେମୁଆଁ ଆଦମ ଲେଃକେ ମଞ୍ଚ୍‌ପୁର୍‌ନେ ତୁବଃ ବାନ୍ ତିଆର୍; ମାତର୍‌ ମ୍ୱାକ୍ଲିଗ୍‌ ଆଦମ କିତଂବାନ୍‌ ପାଙ୍ଗ୍‌ଲେଃକେ । 48 ମଞ୍ଚ୍‌ପୁର୍‌ନେ ରେମୁଆଁଇଂ ସାପାରେ ଆତେନ୍‌ ତୁବବାନ୍‌ ଆଃରେକ୍ନେ ରେମୁଆଁ ରକମ୍‌ । ମାତର୍‌ କିତଂନେ ଗୁନ୍‌ ରକମ୍‌ ରେମୁଆଁଇଂ ଆତେନ୍‌ କିତଂନେ ନର୍‍ ରକମ୍‌ । 49 ନେ ମଞ୍ଚ୍‌ପୁର୍‌ନେ ରେମୁଆଁ ରକମ୍‌ ଆଃରେ ନେଡିଂକେ । ମାତର୍‌ ନେନେ ଡିଗ୍ କିତଂନେ ରେମୁଆଁ ରକମ୍‌ ମୁର୍ତି ନେଃଡିଂପା ।

50 ତନା ବାରି ବୟାଁଇଂ ନେଙ୍ଗ୍ ଆପେକେ ବାସଙ୍ଗ୍‌ନେ ଚାଏ ଣ୍ଡିଙ୍ଗ୍ ଜେ ମ୍ୟା ଚିଲି ଗାଗ୍‌ଡ଼େ ସାଚେ ନେ ଇସ୍‌ପର୍‌ନେ ରାଜିନ୍ନିଆ ଅଦିକାର୍ ଡିଙ୍ଗ୍ ନେୟା ଣ୍ଡୁ ଡାଗ୍ଲା ବକ୍ନେ ଜିନିସ୍‌ ଆତ୍ନା ଣ୍ଡୁ ।

51 ✝ମାତର୍‌ ଅଁପା ନେଙ୍ଗ୍ ଆପେକେ ମୁଇଙ୍ଗ୍ ସତ୍‌ ସାମୁଆଁ ବାସଙ୍ଗ୍‌ଣ୍ଡିଂ ନେ ବିତ୍ରେ ସାପାରେ ନେଗୁଏଃଏ ଣ୍ଡୁ ମାତର୍‌ ନେଃ ସାପାରେ ବଦ୍ଲେ ନେୱେପା । 52 ଏନ୍‌ ମାତର୍‌ ସାମ୍‍ନାରେ ମ୍ମୁଆଃ ମିଟ୍‌କେ ବିଃଲା ସାରାସାରି ପ୍ନିଃ ନ୍ନାଙ୍ଗ୍‍ନେ ବେଲା ଗଟେଏ । ଉଡ଼ିବେଲା ପ୍ନିଃ ନ୍ନାଂଏ ବାରି ଉଡ଼ିସାପା ବିସ୍‌ବାସି ଗୁଏଃ ଲେଃଆର୍‌କେ ମେଇଂ ଗୁଏକ୍ନେବାନ୍‌ ମାଡାନେ କାଲ୍ ନ୍‌ସା ତଡ଼୍ୟାଆର୍‌ଏ ବାରି ମେଇଂ ବଦ୍ଲେ ଆର୍‌ଏ । 53 ମାତର୍‌ ଏନ୍‌ ନସ୍ଟ ଗାଗ୍‌ଡ଼େ ମାଡାନେ ରୁପ୍‌ ପାଟାଇ ୱାଡ଼େଗ୍‍ନେ ଡିଙ୍ଗ୍‌ଏ ବାରି ଏନ୍‌ ଗୁଏଃକ୍ନେ ଗାଗ୍‌ଡ଼େ ମାଗୁଏନେ ପାଟାଇ ୱାଡ଼େଗ୍ ଡିଙ୍ଗ୍‌ଏ । 54 ମାତର୍‌ ଏନ୍‌ ରୁବୁଗ୍‌ନେ ଗାଗ୍‌ଡ଼େ ମାର୍ବୁଗ୍‌ନେ ରକମ୍‌ ସକାପାଟାଇ ଆରି ଏନ୍‌ ଗୁଏଃନେ ଗାଗ୍‌ଡ଼େ ମାଗୁଏଃନେ ରକମ୍‌ ସକାପାଟାଇ ୱାଡ଼େଗ୍‌କ୍ନେ ଇଡ଼ିଙ୍ଗ୍ ଏନ୍‌ ଗୁଆର୍‌କ୍ନେ ସାମୁଆଁ ପୁରନ୍‌ ଡିଙ୍ଗ୍‌ଏ, "ମରନ୍ ଆରେ ଲାଏଃକେ, ଜିତେନେ ପୁରନ୍ ଡିଂଲାଏଃକେ ।

55 ରେ ଗୁଏଃରେ, ଆଣ୍ଡିକା ନାନେ ଜୟ୍‌ ?

ରେ ଗୁଏଃରେ ଆଣ୍ଡିକା ନାନେ ଚିନା ବପୁ ?"

56 ଚିନା ଆଡିଙ୍ଗ୍‌ନେ ବପୁ ଗୁଏନେ ପାପ୍‍ବାନ୍‍ ବାଲେଃଏ ବାରି ନିୟମ୍‍ବାନ୍‍ ପାପ୍ ବପୁ ବାଏ । 57 ମାତର୍‌ ଆଣ୍ଡିନେ ଇସ୍‌ପର୍ ଆନେକେ ମାପ୍‌ରୁ ଜିସୁ କିସ୍‌ଟବାନ୍ ଆନେକେ ଆଃଜିତେବକେ ମେଁନେ ଦନ୍ୟବାଦ୍‍ ଡିଙ୍ଗ୍‌ଲେଃ ।

58 ଏଲେଡିଗ୍ ଅ ନେଙ୍ଗ୍‌ନେ ନିଜର୍ ବୟାଁ ଆରି ତନାଇଂ ମାପ୍‌ରୁନେ ସେବାନ୍ନିଆ ପେଇଂନେ କସ୍ଟ ବେକାର୍‌ ଆଡିଙ୍ଗ୍‍ଣ୍ଡୁ ଏନ୍‌ ମ୍ୟାଚେ ମାପ୍‌ରୁନେ ସ୍ଲେନ୍ନିଆ ସାନ୍ତିରେ ଲାଗେଡ଼ିଆ ଲାଲାପା । ବାରି କାଲାଆଃ ଅଦିକ୍‍ ଅଦିକ୍‍ଆ ମ୍ନାପା ।