1 ଜିସୁ ମେଁନେ ଗମ୍ବାର୍ କ୍ଲିଗ୍ ସିସ୍ଇଂକେ ୱାଚେ ଗଲିଆ ଆଃଆନ୍ତାର୍ ନ୍‌ସା ଆରି ସାପା ରକମ୍ ରଗ୍ ଦୁକ୍ ନିମାଣ୍ଡା ଆଡିଙ୍ଗ୍ ନ୍‌ସା ଆମେଇଂକେ ଅଦିକାର୍ ବିକେ । 2 ଆତେନ୍‌ ଗମ୍ବାର୍ କ୍ଲିଗ୍ ସିସ୍‌ଇଂନେ ମ୍ନି ଦେକ୍‌ରକମ୍ ଶିମୋନ ଜାଣ୍ଡେକି ପିତର୍ ଡାଗ୍‌ଚେ ଡିଙ୍ଗ୍ ବାସଙ୍ଗ୍‌ ଆଃରେ ଆରି ମେଁନେ ବୟାଁ ଆନ୍ଦ୍ରିୟ; ଜେବଦୀନେ ମ୍ବାକ୍ଲିଗ୍ ଉଙ୍ଗ୍‌ଡେ ଜାକୁବ୍‌ ଆରି ମେଁନେ ବୟାଁ ଜହନ୍‌; 3 ଫିଲିପ୍‌ ବାର୍ଥଲମି ଥୋମା ଆରି ସିସ୍ତୁ ସାଲିଆଣ୍ଡ୍ରେ ମାତିଉ ଆଲଫିନେ ଉଙ୍ଗ୍‌ଡେ ଜାକୁବ୍‌ ଆରି ଥଦ୍ଦୀୟ 4 କିଣାନୀୟ ଶିମୋନ ଆରି ଜିସୁନେ ଆଡ଼ାତ୍ରା ବିସ୍‌ବାସ୍ ଗାତକତା ଡିଙ୍ଗ୍‌କ୍ନେ ଇଷ୍କରିୟଥ୍ ଜିଉଦା ।

5 ଜିସୁ ଗମ୍ବାର୍‌କ୍ଲିଗ୍ ସିସ୍‌ଇଂକେ ବେନେ ବେଲା ଆଦେସ୍‌ ବିଚେ ବାସଙ୍ଗ୍‌କେ, "ପେ ଅଣଜିଉଦି ଦେସ୍‌ନ୍ନିଆ ଆୱେଗେପା । ଆରି ଶମିରୋଣୀୟ ଇନିଡିଗ୍ ଆୱେଗେପା । 6 ବାରି ବଃୱେଲେଃକ୍ନେ ମେଣ୍ଡା ରକମ୍ ଇସ୍ରାଏଲ୍‍ଇଂ ଡାଗ୍ରା ୱେଲାପା । 7 ମେଁଇଂନେ ଡାଗ୍ରା ବାସଙ୍ଗ୍‌ ଡିଙ୍ଗ୍‌ଚେ ବାସଙ୍ଗ୍ ଅଲେଙ୍ଗ୍‌ପା କିତଂଇନି ତେପିଙ୍ଗ୍‌ଚାକେ । 8 ଆଃସି ଲେଃକ୍ନେ ରେମୁଆଁଇଂକେ ନିମାଣ୍ଡା ଆଡିଙ୍ଗ୍‌ପା ଗୁଏଃକ୍ନେ ରେମୁଆଁଇଂକେ ଆର୍‌ମୁଇଂତର୍‌ ଜିବନ୍‌ ଆଡିଙ୍ଗ୍‌ପା କୁଷ୍ଟରଗିଇଂକେ ରଗ୍ ବଲ୍ ଆଡିଙ୍ଗ୍‌ପା ଗଲିଆ ଆଆଁନ୍ତାର୍‌ପା ପେ ଆଣ୍ଡିନେ ସରାଃସ୍ରି ବାପେଲେକେ ଆତେନ୍‌ ବିନ୍‌ଣ୍ଡ୍ରେଇଂକେ ସରାଃସ୍ରି ଦାନ୍ ଡିଙ୍ଗ୍‌ପା । 9 ପେ ଏତେ ସୁନା ରୁପା ବା ଡାବୁ ଡୁଙ୍ଗ୍‌ଆୱେଗେପା 10 ✝ୱେନେ ବେଲା ମୁନା ଡୁଂଆୱେଗେପା । ମ୍ବାକ୍ଲିଗ୍ ସକା ଆରି ଜୁତା ଆନ୍‌ତାର୍‌ଚେ ଆରି ଅଦିକା ସକା ପାଣ୍ଡୁଏ କି ଡୁଡୁ ଣ୍ଡିଗ୍ ଡୁଙ୍ଗ୍‍ ଆୱେଗେପା । ମୁଇଙ୍ଗ୍ କାମ୍ ଡିଙ୍ଗ୍‌ଣ୍ଡ୍ରେ ମେଁନେ ଦର୍‌କାର୍ ଲେଃକ୍ନେ ଜିନିସ୍ ଡୁଂୱେନେ ଦର୍‌କାର୍ ।"

11 ଆରି ପେ ମୁଃଡ଼ିନେ ନଗର୍ ବା ଇନି ଗାନେ ବେଲା ଆତ୍‌ଅରିଆ ଜା ଆପେକେ ଜତନ୍‍ ଡିଙ୍ଗ୍‌ଏ । ଆତେନ୍‌ ତୁର୍‌ପା ଆରି ବିନ୍ ଏରିଆ ୱେ ଜାକ ଆତେନ୍‌ ଡୁଆ ଲାଲାପା । 12 ମୁଇଙ୍ଗ୍ ଡୁଆ ଗିଃଗାଃନେ ବେଲା ଆତ୍‌ଅରିଆ ଲେଃକ୍ନେ ରେମୁଆଁଇଂକେ ଆସିର୍ବାଦ୍ ଡିଙ୍ଗ୍‌ଚେ ବାସଙ୍ଗ୍‌ପା ପେଇଂନେ ସାନ୍ତି ଡିଙ୍ଗ୍‌ଲେ; 13 ଜଦି ଆତେନ୍‌ ପରିବାର୍ ରେମୁଆଁ ଜତନ୍‍ ଡିଙ୍ଗ୍ ଆର୍‌ଏ ତେଲା ଆତେନ୍‌ ପରିବାର୍ ଆଡ଼ାତ୍ରା ପେନେ ସାନ୍ତି ଡିଙ୍ଗ୍‌ଲେ ଜଦି ଆତେନ୍‌ ପରିବାର୍ ରେମୁଆଁ ଜତନ୍‍ ଆଡିଙ୍ଗ୍ ତେଲା ପେନେ ସାନ୍ତି ପେ ଡାଗ୍ରା ଆଣ୍ଡେ ପାଙ୍ଗ୍‌ଏ । 14 ✝ଜଦି ଆଣ୍ଡିନେ ଡୁଆ ଣ୍ଡୁଲା ଇନିନ୍ନିଆ ଆପେକେ ରେମୁଆଁଇଂ ଗ୍ର‍ଅନ୍‌ ଆଡିଙ୍ଗ୍ ଆର୍‌ଏ ଣ୍ଡୁ ଆତେନ୍‌ ଡୁଆ ଣ୍ଡୁଲା ଇନିକେ ପାଦ୍‌ ଞ୍ଚନେ ଦୁଲି ତାଣ୍ଡି ବିଚେ ଆତେନ୍‌ ଜାଗା ଆନ୍ତାର୍ ବିଃପା । 15 ✝✝ନେଙ୍ଗ୍ ଆପେକେ ସତ୍ ବାସଙ୍ଗ୍‌ ଣ୍ଡିଙ୍ଗ୍, ବିଚାର୍ ଦିନାକେଲା ଆକ୍‌ମେଇଂ ବାନ୍ ସଦୋମ ଆରି ଗମୋରା ଦେସ୍‌ନେ ରେମୁଆଁଇଂ ଆଡ଼ାତ୍ରା ଇସ୍‌ପର୍ ଜବର୍ ଲିବିସ ଆଃସୁଏଃଏ ।

16 ✝"କେଲାପା, ଙ୍କୁଇଂନେ ବିତ୍ରେ ମେଣ୍ଡାଇଂନେ ରକମ୍ ସୁଗୁଆ ନେଙ୍ଗ୍‍ ଆପେକେ ବେଣ୍ଡିଂକେ । ପେ ବୁବଃ ରକମ୍ ଚାଲାକି ଡିଙ୍ଗ୍‌ଚେ ଲାଲାପା ମାତର୍‌ କୁକୁର୍ୟାଃ ରକମ୍ ଦରମ୍‌ ଡିଙ୍ଗ୍‌ପା । 17 ✝ଡାଗ୍ଲା ରେମୁଆଁଇଂନେ ବାନ୍ ଚାଲାକି ଡିଙ୍ଗ୍‌ଚେ ଲାଲାପା ମାତର୍‌ ରେମୁଆଁ ଆପେକେ ସାଚେ ବିଚାର୍ କୁକପାର୍‌ନ୍ନିଆ ଡୁଂୱେଆର୍‌ଏ । ପାର୍‍ତନା ଡୁଆଇଂନ୍ନିଆ ମେଇଂ ଆମେକେ ଚାବୁକ୍ ବଗ୍‌ଆର୍‌ଏ । 18 ନେଙ୍ଗ୍‌ସା ପେ ଇଃସାଙ୍ଗ୍‌ ଆରି ସାସନ୍ ଡିଙ୍ଗ୍‍ଣ୍ଡ୍ରେନେ ସେନୁଗ୍ ଡୁଂପାଙ୍ଗ୍‍ଚେ ବିଚାର୍ ଡିଙ୍ଗ୍‌ଆର୍‌ଏ । ଆତେନ୍‌ ମେଇଂନେ ଆରି ବିଜାତିଇଂନେ ସେନୁଗ୍‌ ପେ ନେଙ୍ଗ୍ ବିସୟ୍‌ରେ ସାକି ପେଡିଙ୍ଗ୍‌ଏ । 19 ପେଇଂ ବିଚାର୍ ଡିଙ୍ଗ୍‌ନେ ବେଲା ମେଁନେ ପେବାସଙ୍ଗ୍‌ଏ ଆରି ଡିରକମ୍ ପେବାସଙ୍ଗ୍‌ଏ ଏନ୍‌ ବିସୟ୍‌ରେ ଅଃନା ଚିନ୍ତା ଆଡିଙ୍ଗ୍‌ପା । ଟିକ୍ ବେଲା ଆତେନ୍‌ ଆପେକେ ଆମ୍ୟା ବିଏ । 20 ମାତର୍‌ ପେ ନିଜେ ମେଁନେ ବାସଙ୍ଗ୍ ନ୍‌ସା ଆପଡ଼େ ଣ୍ଡୁ । ଆବା ଇସ୍‌ପର୍‌ନେ ପବିତ୍ର ଆତ୍ମା ପେ ସାର୍ମୁଆଁ ବିଚେ ସାମୁଆଁ ବାସଙ୍ଗ୍ଏ ।"

21 ✝ବୟାଁ ମେଃନେ ନିଜର୍ ବୟାଁକେ ଆବା ନିଜର୍ ଉଙ୍ଗ୍‌ଡେକେ ଗୁଏଃ ନ୍‌ସା ଆସା ବିଏ । ଉଙ୍ଗ୍‌ଡେଇଂ ନିଜର୍ ଆବା ଇୟାଙ୍ଗ୍ ବିରଦ୍‌ରେ ତଡ଼ିଆ ଆର୍‌ଏ ଆରି ଆମେଇଂକେ ବାଗୁଏ ଜଗ୍‌ତ୍ଲାଗ୍‌ ଆର୍‌ଏ । 22 ✝ନେଙ୍ଗ୍‌ନ୍‌ସା ସାପାରେ ଆପେକେ ଇଙ୍ଗ୍‌ଚେ ଆର୍‌ଏ; ମାତର୍‌ ଜାଣ୍ଡେ କି ସାରାସାରି ଜାକ ଡାଟ୍‍ରେ ଲେଃଏ, ମେଁ ଉଦାର୍ ବାଏ । 23 ମୁଇଙ୍ଗ୍ ଇନିନ୍ନିଆ ମେଇଂ ଆପେକେ କଷ୍ଟ ବିଲା ପେ ବିନ୍ ଇନିନ୍ନିଆ ଲାଗ୍‍ଡଲାପା । ନେଙ୍ଗ୍ ଆପେକେ ସତ୍ ବାସଙ୍ଗ୍‌ ଣ୍ଡିଙ୍ଗ୍ ପେଇଂ ଇସ୍ରାଏଲ୍‌ନେ ସାପା ଇନିନ୍ନିଆ କାମ୍ ମାଡାନେ ସେନୁଗ୍‌ ରେମୁଆଁ ଉଙ୍ଗ୍‌ଡେ ଆଣ୍ଡେ ପାଙ୍ଗ୍‌ଏ ।

24 ✝"ମୁଡ଼ି ସିସ୍ ଡିଗ୍ ମେଁନେ ଗୁରୁ ବାନ୍ ମ୍ନା ଣ୍ଡୁ; ସାକାର୍‌ବାନ୍ ଚାକର୍ ମ୍ନା ଣ୍ଡୁ । 25 ✝ସିସ୍ ଗୁରୁ ରକମ୍ ଆରି ଚାକର୍ ମାଲିକ୍ ରକମ୍ ଡିଙ୍ଗ୍‌ଲା ମେଇଂ ଅଃତେନ୍‌ରେ ସାର୍ଦା ଡିଙ୍ଗ୍‌ନେ ଦର୍‌କାର୍ । ମୁଇଙ୍ଗ୍ ଡୁଆଣ୍ଡ୍ରେ ସାକାର୍‌କେ ଜଦି ରେମୁଆଁ ବାଆଲ୍‌ଜିବୂଲ ଡାଗ୍‌ଚେ ୱାଆର୍‌ଏ ଡୁଆନେ ବିନ୍‌ଣ୍ଡ୍ରେଇଂକେ ଆରି ଅଦିକ୍‍ ଦଦ୍ୟା ମ୍ନି ଆୱା !"

26 ✝"ଆତେନ୍‌ସା ରେମୁଆଁଇଂକେ ଆବ୍‌ଟଗେପା । ଆଣ୍ଡିନେ ବୁଡ଼ିଚେ ଲେଃକେ, ଆତେନ୍‌ ମେସୁଆ ଣ୍ଡୁଲା ମେସୁଆ ପାଦା ତାର୍‌ଏ ବାରି ସାପା ବୁଡ଼ିକ୍ନେ ସାମୁଆଁ ପାଦା ତାର୍‌ଏ । 27 ନେଙ୍ଗ୍ ଆପେକେ ମେଃନେ ତାଂକିଗ୍‌ନିଆ ବାସଙ୍ଗ୍‌ ଣ୍ଡିଙ୍ଗ୍ ଅଃତେନ୍‍ ତାର୍‌କିଗ୍‌ନ୍ନିଆ ବାସଙ୍ଗ୍‌ପା ବାରି ଆଣ୍ଡିନେ ବୁଙ୍ଗ୍‌ନା ଅଁପେଲେକେ ଆତେନ୍‌ ଡୁଆନେ ବ୍ଲେସାଂ ଆଡ଼ାତ୍ରା କିରଚେ ବାସଙ୍ଗ୍‌ପା । 28 ଜାଣ୍ଡେଇଂ ଗାଗ୍‌ଡ଼େକେ ବାଗୁଏଃଆର୍‌ଏ, ମାତର୍‌ ଆତ୍ମାନେ ମେଃଡିଗ୍ ନଷ୍ଟ ଆଡିଙ୍ଗ୍ ଆୟାଆର୍‌ ଣ୍ଡୁ ଆମେଇଂକେ ଆବ୍ଟଗ୍‌ପା ନାମଃ । ଆତେନ୍‌ସା ଆଣ୍ଡିନେ ଇସ୍‌ପର୍ ପେନେ ଗାଗ୍‌ଡ଼େ ଆରି ଆତ୍ମା ମ୍ବାୟାକେ ନର୍କେନ୍ନିଆ ନଷ୍ଟ ଆଡିଙ୍ଗ୍‌ଏ ଆମେକେ ବୁଟପା । 29 ମ୍ବାକ୍ଲିଗ୍ କିଆପିଗ୍‌କେ ମ୍ବାର୍‌ଟାଆଁ ଡାବୁରେ ଆସ ଣ୍ଡୁ ? ମାତର୍‌ ଆବା ଇସ୍‌ପର୍‌ନେ ବିନା ଅନୁମତିରେ ମୁଇଙ୍ଗ୍ କିଆପିଗ୍ ଡିଗ୍ ବୁନ୍ଦେ ଆଲ ଣ୍ଡୁ । 30 ମାତର୍‌ ପେନେ ବାଆଃନେ ସର୍‌ତେ ଉଗ୍‌ବ ଡିଗ୍ ଏଜା ବକେ । 31 ଆବ୍‌ଟଗେପା; ପେ ଗୁଲୁଏ କିଆପିଗ୍ ବାନ୍ ମ୍ନା ।" ଇସ୍ରାଏଲ୍‌ନେ ବାୱିର୍ ବ୍ଲେସାଙ୍ଗ୍‌ନ୍ନିଆ ଆଃରେକ୍ନେ ଡୁଆ

32 ଜାଣ୍ଡେକି କୁଲାକୁଲି ବାବ୍‌ରେ ଆନେଙ୍ଗ୍ ମାପ୍‌ରୁ ଡାଗ୍‌ଚେ ବାଲିର୍‍ ଆର୍‍ଏ, ନେଙ୍ଗ୍‌ନେ କିତଂ ଆବା ଡାଗ୍ରା ଆମେକେ ନେଙ୍ଗ୍‌ନେ ସିସ୍‌ ଡାଗ୍‌ଚେ ନେଙ୍ଗ୍ ମ୍ବାସଙ୍ଗ୍‍ଏ । 33 ✝ଡାଗ୍ଲା ଜାଣ୍ଡେକି ରେମୁଆଁନେ ସାମ୍‌ନାନ୍ନିଆ ଆନେଙ୍ଗ୍ ଅବିସ୍‌ବାସ୍‌ ଡିଙ୍ଗ୍‌ଏ ନେଙ୍ଗ୍ ଆମେକେ ଡିଗ୍ ନେଙ୍ଗ୍‌ନେ କିତଂନେ ଆବାନେ ସାମ୍‌ନାନ୍ନିଆ ଅବିସ୍‌ବାସ୍‌ ଣ୍ଡିଙ୍ଗ୍‌ଏ ।

34 "ନେଙ୍ଗ୍ ମଞ୍ଚ୍‌ପୁର୍‌ନ୍ନିଆ ସାନ୍ତି ବିଃନ୍‌ସା ପାଙ୍ଗ୍‌ନ୍ଲେକେ, ଡାଗ୍‌ଚେ ମନେ ଆଡିଙ୍ଗ୍‌ପା । ନେଙ୍ଗ୍ ସାନ୍ତି ବିଃନ୍‌ସା ପାଙ୍ଗ୍ ନାଲେଃକେ ଣ୍ଡୁ କାଣ୍ଡା ବିଃନ୍‌ସା ପାଙ୍ଗ୍ ନ୍‌ଲେଃକେ । 35 ନେଙ୍ଗ୍‌ନ୍‌ସା ଉଙ୍ଗ୍‌ଡେ ଆବାକେ ବିରଦ୍ ଡିଙ୍ଗ୍‌ଏ ଗଡ଼େଅ ଇୟାଙ୍ଗ୍‌କେ ବିରଦ୍ ଡିଙ୍ଗ୍‌ଏ ବାରି ଆତାଡ଼େ ବିରଦ୍‌ରେ ମାଚୁଆ ତାର୍‌ଏ 36 ନିଜର୍ ପରିବାର୍‌ନେ ରେମୁଆଁ ମୁଇଂଜାନେ ସତ୍ରୁ ଡିଙ୍ଗ୍‌ଏ ।"

37 "ଜାଣ୍ଡେକି ନିଜର୍ ଆବା କି ଇୟାଙ୍ଗ୍‌କେ ନେଙ୍ଗ୍ ବାନ୍ ଜାବର୍ ବଲ୍ ବାଏ ମେଁ ନେଙ୍ଗ୍‌ନେ ସିସ୍‌ ଡିଙ୍ଗ୍ ଆୟା ଣ୍ଡୁ । ଜାଣ୍ଡେକି ନିଜର୍ ଉଙ୍ଗ୍‌ଡେ କି ଗଡ଼େଅ ଆଡ଼ାତ୍ରା ଜାବର୍ ବଲ୍ ବାଏ । ମେଁ ନେଙ୍ଗ୍‌ନେ ସିସ୍‌ ଡିଙ୍ଗ୍ ଆୟା ଣ୍ଡୁ । 38 ✝ଜାଣ୍ଡେକି ନିଜର୍ କୁରୁସ୍‍ ଡୁଙ୍ଗ୍‌ଚେ ନେଙ୍ଗ୍ ପ୍ଲା ଆପାଙ୍ଗ୍‌ ଣ୍ଡୁ ମେଁ ନେଙ୍ଗ୍‌ନେ ସିସ୍‌ ଡିଙ୍ଗ୍‌ନେ ଜଗ୍ୟ ଣ୍ଡୁ । 39 ✝ଜାଣ୍ଡେକି ନିଜର୍ ଜିବନ୍‌ ରକ୍ୟା ଆଡିଙ୍ଗ୍ ନ୍‌ସା ଚେସ୍‌ଟା ଡିଙ୍ଗ୍‌ଏ, ମେଁ ଆତେନ୍‌ ଆନ୍ତାର୍‌ଏ; ବାରି ଜାଣ୍ଡେ ନେଙ୍ଗ୍‌ନ୍‌ସା ନିଜର୍ ପାରାନ୍ ଆନ୍ତାର୍‌ଏ ମେଁ ଆତେନ୍‌ ଆମ୍ବ୍ର‍ଏ ।"

40 ✝"ଜାଣ୍ଡେ ଆପେକେ ଗ୍ର‍ଅନ୍‌ ଡିଙ୍ଗ୍‌ଏ ମେଁ ଆନେଙ୍ଗ୍ ଗ୍ର‍ଅନ୍‌ ଡିଙ୍ଗ୍‌ଏ ଜାଣ୍ଡେ ଆନେଙ୍ଗ୍ ଗ୍ର‍ଅନ୍‌ ଡିଙ୍ଗ୍‌ଏ ମେଁ ଆନେଙ୍ଗ୍ ବେବକ୍ନେ କର୍ତ୍ତାକେ ଗ୍ର‍ଅନ୍‌ ଡିଙ୍ଗ୍‌ଏ । 41 ଜାଣ୍ଡେକି ମୁଇଙ୍ଗ୍ ବାବବାଦିକେ ଇସ୍‌ପର୍‌ନେ ଦୁତ୍ ଡାଗ୍‌ଚେ ସାର୍ଲ‍ଏ ମେଁ ଆତେନ୍‌ ବାବବାଦିନେ ପୁରସ୍‌କାର୍‌ନ୍ନିଆ ବାଗ୍ ଡିଂଏ; ଆରି ଜାଣ୍ଡେକି ମୁଇଙ୍ଗ୍ ସାଦୁ ରେମୁଆଁ ମେଁନେ ସାଦୁ କେଚେ ଗୁର୍‌ନା ଡିଙ୍ଗ୍‌ଏ ଆତେନ୍‌ ରେମୁଆଁନେ ପୁରସ୍‌କାର୍‌ରେ ମେଁ ବାଗ୍‌ ବାଏ । 42 ଜାଣ୍ଡେକି ନେଙ୍ଗ୍‌ନେ ସାପାବାନ୍‍ ଡାଆଁ ସିସ୍‍କେ ମୁଇଙ୍ଗ୍ ଗିନାନ୍ନିଆ ଚୁଇଡ଼ିଆକ୍ନେ ଣ୍ଡିଆ ଉଗ୍‍ନେ ବିଏ, ନେଙ୍ଗ୍ ଆପେକେ ସତ୍ ବାସଙ୍ଗ୍‌ ଣ୍ଡିଙ୍ଗ୍‍, ମେଁ ଡି ବାବ୍‌ରେ ଡିଗ୍ ପୁରସ୍‌କାର୍ ବାଏ ।"