1 ଜ୍ଞାନବାନ୍‌ ଉଙ୍ଗ୍‌ ନିଜର୍‌ ଆବାନେ ସାମୁଆଁ ଦ୍ରିଗ୍‌ଏ; ମାତର୍‌ ନିନ୍ଦା ଡିଂଣ୍ଡ୍ରେ ସାମୁଆଁ ଆଦ୍ରିଗ୍‌ ଣ୍ଡୁ । 2 ରେମୁଆଁ ନିଜର୍‌ ତୁମୁଆଃନେ ସାମୁଆଁ ବାନ୍‌ ମଙ୍ଗଲ୍‌ ବିଷୟ୍‌ ବାଏ; ମାତର୍‌ ବିସ୍‌ବାସ୍‌ଅରିଆ ବିସ୍‌ ବିଃନେ ରେମୁଆଁନେ ପାରାନ୍‌ କସ୍‌ଟ ବାଏ । 3 ମୁଃଡ଼ି ରେମୁଆଁ ନିଜର୍‌ ତୁମୁଆଃଅରିଆ ଚିନ୍ତା ଡିଙ୍ଗ୍‌ଚେ ବାସଙ୍ଗ୍‌ଏ, ମେଁ ନିଜର୍‌ ପାରାନ୍‌ ରକ୍ୟା ଡିଂଏ; ମାତର୍‌ ଜାଡିଗ୍‌ ନିଜର୍‌ ତୁମୁଆଃ ମ୍ନାଃ ଆଃଡିଂଚେଃ ଗାଃଟାଏ, ମେଁନେ ବିନାସ୍‌ ଡିଂଏ । 4 ଅଲ୍‌ସୁଆ ମନ୍‌ଅରିଆ ଆସା ଡିଂଲା ଡିଗ୍‌ ମେଃଡିଗ୍‌ ଆବା ଣ୍ଡୁ, ମାତର୍‌ ସ୍ଲେରେ ମେଃ ଇକ୍‌ଚା ଡିଙ୍ଗ୍‌ଏ ଆତେନ୍ ବାଏ । 5 ଦରମ୍‌ ରେମୁଆଁ ନାଲେକେ ଗ୍ରୁନା ଡିଂଏ; ମାତର୍‌ ଦୁସ୍‌ଟ ରେମୁଆଁ ଦଦ୍ୟା ବାସ୍‌ନା ରକମ୍‌, ଆରି ମେଁ ଗିଆସଃ ବାଏ । 6 ଦରମ୍‌ ସାମୁଆଁ ସିଦା ଗାଲି ଅଲେଙ୍ଗ୍‌ନେ ରେମୁଆଁକେ ରକ୍ୟା ଡିଂଏ; ମାତର୍‌ କରାପ୍‌ କାମ୍‌ ପାପିକେ ପାଃଲେଗ୍‌ ବିଃଏ । 7 ଜା ନିଜେକେ ସାକାର୍‌ ଆଃସୁଏଃଏ, ମାତର୍‌ ମେଁନେ ମେଃଡିଗ୍‌ ଣ୍ଡୁ; ଜାଡିଗ୍‌ ନିଜ୍‌କେ ଦରିଦ୍ର ଆଃସୁଏଃଏ, ମାତର୍‌ ମେଁନେ ମ୍ନାଃ ଦନ୍‌ ଲାଏଃକେ । 8 ରେମୁଆଁନେ ଜିବନ୍‌ ବାଦୁଲ୍‌ରେ ଦନ୍‌ ବିଃଜଗ୍‌ତ୍ଲାଗ୍‌ଏ: ମାତର୍‌ ଦରିଦ୍ର ରେମୁଆଁ ଦମକ୍‌କେ ଆଦ୍ରିଗ୍‌ ଣ୍ଡୁ । 9 ଦାର୍ମିକ୍‌ନେ ଉଜଲ୍‌ ସାର୍ଦା ଡିଂଏ; ମାତର୍‌ ଦୁସ୍‌ଟ‍ଇଂନେ ଉଜଲ୍‌ ଲିଗ୍‌ ୱେଏ । 10 ଆଂକାର୍‌ବାନ୍‌ ସରାଃ ୱିଙ୍ଗ୍‌ଆଃ ତାର୍‌ଏ; ମାତର୍‌ ନିମାଣ୍ଡାଃ ସାମୁଆଁ ସାଃନେ ରେମୁଆଁଅରିଆ ଗିଆନ୍‌ ଲାଏଃକେ । 11 ନାଲେଚେଃ ବାଲାଏଃକ୍ନେ ଦନ୍‌ ନସ୍‌ଟ ଡିଂଏ, ମାତର୍‌ ନ୍ତିବାନ୍‌ ଆର୍ଜେକ୍ନେ ଦନ୍‌ ଜାବର୍‌ ଡିଂୱେଏ । 12 ମାତର୍‌ ଆସା ଡିଙ୍ଗ୍‌କ୍ନେ ତଙ୍ଗାର୍‌ଲା ମନ୍‌ ବିତ୍‌ରେ କସ୍‌ଟ ଲାଗେଏ, ମାତର୍‌ ଆସାନେ ଇକ୍‌ଚା ପୁରା ଡିଙ୍ଗ୍‌ଲା ଜିବନ୍‌ ବିଃନେ ସ୍ଲାଃ ରକମ୍‌ ଡିଙ୍ଗ୍‌ଏ । 13 ମୁଃଡ଼ି ରେମୁଆଁ ପର୍‌ମେସର୍‌ନେ ସାମୁଆଁ ଗ୍ରୁନା ଡିଂଏ, ମେଁ ନିଜର୍‌ ଆଡ଼ାତ୍ରା ବିନାସ୍‌ ଡୁଙ୍ଗ୍‌ପାଙ୍ଗ୍‌ଏ, ମାତର୍‌ ଜା ଆଦେସ୍‌କେ ବୁଟମେଗ୍‌ଏ, ମେଁ ପୁରୁସ୍‌କାର୍‌ ବାଏ । 14 ମରନ୍‌ନେ ବ୍ନେଗ୍‌ବାନ୍‌ ଆଃଆଣ୍ଡେ ଡୁଙ୍ଗ୍‌ପାଙ୍ଗ୍‌ନ୍‌ସାଃ ଜ୍ଞାନବାନ୍‌ନେ ନିଅମ୍‌ ଡିଂଡିଂକେ ଜିବନ୍‌ନେ ଜର୍‌ନାଡ଼୍ୟାଃ ରକମ୍‌ । 15 ନିମାଣ୍ଡାଃ ବୁଦିନେ ଚୁଚୁ ଅନୁଗ୍ରହ, ମାତର୍‌ ବିସ୍‌ବାସ୍‌ଅରିଆ ବିସ୍‌ ବିଃନେ ରେମୁଆଁନେ ଗାଲି ଚୁରୁଏଃବାର୍‌ । 16 ସର୍‌ତେ ଚତୁର୍‌ ରେମୁଆଁ ବୁଦିରେ କାମ୍‌ ଡିଂଏ; ମାତର୍‌ ମୁର୍କ ରେମୁଆଁ ସାପା ସାମୁଆଁକେ ବାସଙ୍ଗ୍‌ ଅଲେଙ୍ଗ୍‌ଏ । 17 ଦୁସ୍‌ଟ କବର୍‌ ଡୁଙ୍ଗ୍‌ପାଙ୍ଗ୍‌ଣ୍ଡ୍ରେ ବିପଦ୍‌ନିଆ ଲଃଏ । ମାତର୍‌ ବିସ୍‌ବାସ୍‌ରେ କବର୍‌ ଡୁଙ୍ଗ୍‌ପାଙ୍ଗ୍‌ଣ୍ଡ୍ରେ ନିମାଣ୍ଡାଃ ଲେଃଏ । 18 ମୁଃଡ଼ି ରେମୁଆଁ ସାସନ୍‌କେ ବଲ୍‌ ଆବା ଣ୍ଡୁ, ମେଁ ଦରିଦ୍ର ଡିଙ୍ଗ୍‌ଏ ଆରି ଗିଆସଃ ବାଏ; ମାତର୍‌ ଜା ଦିଆନ୍‌ ବିଃଏ, ମେଁ ସନ୍‌ମାନ୍‌ ବାଏ । 19 ମନ୍‌ନେ ଇକ୍‌ଚା ପୁରା ଡିଙ୍ଗ୍‌ଲା ଜିବନ୍‌କେ ମ୍ବ୍ରେ ଲାଗେଏ; ବାରି, ମୁର୍କ ରେମୁଆଁ କରାପ୍‌ କାମ୍‌ ଆନ୍ତାର୍‌ନେ ଗ୍ରୁନାନେ ବିଷୟ୍‌ । 20 ଜ୍ଞାନି ରେମୁଆଁ ଏଃତେ ଅଲେଙ୍ଗ୍‌ଡାଲ୍ୟା ଡିଂପା, ତେଲା ପେ ଜ୍ଞାନି ପେଡିଂଏ; ମାତର୍‌ ମୁର୍କ‍ଇଂନେ ସାଙ୍ଗ୍‌ସାତିଇଂ ଏଃତେ କୁଡ଼େଃଲା କସ୍‌ଟ ବାଆର୍‌ଏ । 21 ପାପି‍ଇଂନେ ପ୍ଲାଃ କାରାପ୍‌ ନୁଆଁଏ; ମାତର୍‌ ଦାର୍ମିକ୍‌ଇଂକେ ମଙ୍ଗଲ୍‌ ରକମ୍‌ନେ ଇନାମ୍‌ ବିଃଏ । 22 ନିମାଣ୍ଡାଃ ରେମୁଆଁ ନିଜର୍‌ ଏଗ୍‌ଲେଣ୍ଡେ ନ୍‌ସାଃ ଅଦିକାର୍‌ ଆନ୍ତାର୍‌ୱେଏ; ମାତର୍‌ ପାପି‍ନେ ଦନ୍‌ ଦାର୍ମିକ୍‌ଇଂନେ ନ୍‌ସାଃ ଆର୍ଜେଏ । 23 ଦରିଦ୍ରନେ ଚାସ୍‌ ବାନ୍‌ କିଆଉଁଆଃ ବେସି ବାଏ, ମାତର୍‌ ଅନ୍ୟାୟ୍‌ ନ୍‌ସାଃ ଜାନେ ଜାନେ ବିନାସ୍‌ ଡିଂଏ । 24 ଜା ଡୁଡୁ ବେବ‍ଆର୍‌ ଡିଂନ୍‌ସାଃ ମନା ଡିଂଏ, ମେଁ ନିଜର୍‌ ଉଙ୍ଗ୍‌କେ ଗ୍ରୁନା ଡିଂଏ; ବାରି ଜା ଆମେକେ ଆଲାଦ୍‌ ଡିଂଏ, ମେଁ ସମାନ୍‌ ବେଲା ସାସ୍ତି ବିଃଏ । 25 ଦାର୍ମିକ୍‌ ନିଜର୍‌ ପାରାନ୍‌ ସାନ୍ତି ଡିଙ୍ଗ୍‌ ଜାକ ଚଙ୍ଗ୍‌ଏ, ମାତର୍‌ ପାପିନେ ସୁଲୁଏଃ କିଡ଼େସଃ ଲେଃଏ ।