1 କିରମର ଡିଙ୍ଗ୍‌ନେ ବଜିନିଆ ବର୍‌ତି ଡିଙ୍ଗ୍‌ଲେକ୍ନେ ଡୁଆ ବାଦୁଲ୍‌ ସାନ୍‌ତିରେ ସ୍ନୁଆର୍‌କ୍ନେ ରୁଟି ଚଙ୍ଗ୍‌ନେ ନିମାଣ୍ଡା । 2 ମୁଃଡ଼ି ଚାକର୍‌ ବୁଦିରେ କାମ୍‌ ଡିଙ୍ଗ୍‌ଏ, ମେଁ ଗିଆସଃ ବିଃନେ ଉଙ୍ଗ୍‌ ଆଡ଼ାତ୍ରା ସାସନ୍‌ ଡିଂଏ, ବାରି, ବୟାଁଇଂ ଏଃତେ ଅଦିକାର୍‌ନେ ବାଗ୍‌ ବାଏ । 3 ସୁନା ଆରି ରୁପାକେ ସୁଆ ଏଃତେ ପରିକ୍ୟା ଡିଂଏ; ମାତର୍‌ ମାପ୍‌ରୁ ମନ୍‌ ପାରାନ୍‌କେ ପରିକ୍ୟା ଡିଂମ୍ୟାଃକେ । 4 ପାପ୍‌ କାମ୍‌ ଡିଂନେ ରେମୁଆଁ ଦୁସ୍‌ଟ ତୁମୁଆଃନେ ସାମୁଆଁ ଦ୍ରିଗ୍‌ଏ, ବାରି, ନାଲେ ବାସଙ୍ଗ୍‌ନେ ରେମୁଆଁ କରାପ୍‌ ସାମୁଆଁଅରିଆ ଆଃନ୍ୟାଲୁଗ୍‌ଏ । 5 ମୁଃଡ଼ି ରେମୁଆଁ ଗରିବ୍‌କେ ଲୁଆଃଏ, ମେଁ ମେଁନେ ଆଃରେଣ୍ଡ୍ରେକେ ନିନ୍ଦା ଡିଂଏ; ବାରି, ବିପଦ୍‌ ବେଲା ଜା ସାର୍ଦା ଡିଂଏ, ମେଁ ଡଣ୍ଡ୍‌ ମାବାଚେଃ ଆଲେଃ ଣ୍ଡୁ । 6 ଉଙ୍ଗ୍‌ଡେଇଂନେ ଉଙ୍ଗ୍‌ଡେଇଂ ଡକ୍ରା ରେମୁଆଁଇଂନେ ମୁକୁଟ୍‌; ବାରି, ଉଙ୍ଗ୍‌ଡେଇଂନେ ମହିମା ମେଇଂନେ ଆବାଡିୟାଇଂ । 7 ମୁର୍‌କ ରେମୁଆଁ ଆଡ଼ାତ୍ରା ନିମାଣ୍ଡା ସାମୁଆଁ ବାସଙ୍ଗ୍‌ନେ ବଲ୍‌ ଣ୍ଡୁ । ସାସନ୍‌ ଡିଙ୍ଗ୍‌ନେ ରେମୁଆଁ ମେ ବାନ୍‌ ବେସି ନାଲେ ସାମୁଆଁ ବାସଙ୍ଗ୍‌ନେ ମେ ବାନ୍‌ ଗଣ୍ଡା । ସନ୍‌ମାନ୍‌ ବାନେ ରେମୁଆଁଇଂ ନାଲେ ସାମୁଆଁ ବାସଙ୍ଗ୍‌ଆମ୍ୟାଃଆର୍‌କେ, ସାସନ୍‌ ଡିଂନେ ରେମୁଆଁ ଉଃଡ଼ି ଜାବର୍‌ ନାଲେ ସାମୁଆଁ ବାସଙ୍ଗ୍‌ଡିଂଆର୍‌କେ । 8 ଲାଞ୍ଚ୍‌ ବିଃମ୍ୟାଃକ୍ନେ ରେମୁଆଁନେ ମୁଆଃନ୍ନିଆ ଲାଞ୍ଚ୍‌ ମୁଇଂ ଜାବର୍ ଦାମ୍‌ନେ ବ୍ରି ରକମ୍‌, ମେଇଂ ଆଣ୍ଡିପାକା ଅଲେଙ୍ଗ୍‌ଆର୍‌ଏ ଆତ୍‌ଅରିଆ ମେଇଂ ସପଲ୍‌ ବାଆର୍‌ଏ । 9 ଜା ପାପ୍‌ କେମା ଡିଂଏ, ମେଁ ଆଲାଦ୍‌ ତୁର୍‌ଏ; ମାତର୍‌ ଜା ପ୍ରେକ୍‌ ପ୍ରେକ୍‌ ମୁଇଂ ସାମୁଆଁ ଆଃତାର୍‌ଏ, ମେଁ ନିଜର୍‌ ସାଙ୍ଗ‍ଇଂକେ ବିନେ ଆଃଡିଂଏ । 10 ମୁର୍କକେ ଶହେ ମାଡ଼୍‌ ବାନ୍‌ ବୁଦିମାନ୍‌କେ ମୁଇଂ ପଦ୍‌ ୱିଙ୍ଗ୍‌ନେ ଜାବର୍‌ ଆଃସିଏ । 11 ଦଦ୍ୟା ରେମୁଆଁ ଜୁଦ୍‌ ତୁର୍‌ଏ, ଆକେନ୍‌ସାଃ ମେଁନେ ବିରୁଦ୍‌ରେ ଦୟା ଆଲେକ୍ନେ କବର୍‌ ବିଃନେ ଦୁତ୍‌କେ ବେଏ । 12 ମୁର୍କ ବୁଦି ବର୍ତି ଡିଂଲାଏଃକ୍ନେ ମୁର୍କକେ ମିସୁଃନେ ବାଦୁଲ୍‌ ମୁଇଂ ଉଙ୍ଗ୍‌ ବଃୱେଲାଏଃକ୍ନେ ଡିଆବେକେ କୁଡ଼େଃନେ ନିମାଣ୍ଡାଃ । 13 ମୁଃଡ଼ି ରେମୁଆଁ ନିମାଣ୍ଡାଃ ବାଦୁଲ୍‌ କରାପ୍‌ ଡିଂଏ, ମେଁନେ ଡୁଆକେ କରାପ୍‌ ଅଃନାଡିଗ୍‌ ଆଆନ୍ତାର୍‌ ଣ୍ଡୁ । 14 ୱିଙ୍ଗ୍‌ଆଃନେ ଆରାମ୍‌ ଜାଡିଗ୍‌ ବନ୍ଦ୍‌ଡ଼୍ୟାଃ ଆନ୍ତାର୍‌ବିଃନେ ରକମ୍‌; ଏନ୍‌ସାଃ କିରମର ଡିଂନେ ସେନୁଗ୍‌ କିର ଆନ୍ତାର୍‌ । 15 ଜା ଦୁସ୍‌ଟକେ ନିର୍ଦସ୍‌ ଡିଂଏ ଆରି ଜା ଦାର୍ମିକ୍‌କେ ଦସି ଆଃଡିଂଏ, ମେଁ ମ୍ବାୟା ମାପ୍‌ରୁ ଡାଗ୍ରା ସମାନ୍‌ ବାବ୍‌ରେ ଗ୍ରୁନା ବାଆର୍‌ଏ । 16 ଗିଆନ୍‌ ବିଆର୍‌ନେ ନ୍‌ସାଃ ମୁର୍କନେ ନ୍ତିଅରିଆ ମେଃନ୍‌ସାଃ ଦନ୍‌ ଲେଃଏ ? ମେଁନେ ତ ବୁଦି ଣ୍ଡୁ । 17 ସାଙ୍ଗ କାଲାଆଃ ଆଲାଦ୍‌ ଡିଂଏ, ବାରି ବୟାଁ କରାପ୍‌ ଦିନ୍‌କେଲା ତୁଆଁଏ । 18 ମୁର୍କ ରେମୁଆଁ ନ୍ତି ଆଃଚ୍ଲେଚେଃ ନିଜର୍‌ ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେ ଡାଗ୍ରା ରକ୍ୟା ଡିଂଣ୍ଡ୍ରେ ଡିଂଏ । 19 ଜା ୱିଙ୍ଗ୍‌ଆଃ ଆଲାଦ୍‌ ଡିଂଏ, ମେଁ ପାପ୍‌କେ ଆଃ ଆଲାଦ୍‌ ଡିଂଏ; ବାରି, ଜାଡିଗ୍‌ ନିଜର୍‌ କାପାଟ୍‌ ତିଆର୍‌ ଆଃଡିଂଏ, ମେଁ ବିନାସ୍‌ ତୁର୍‌ଏ । 20 ଜାନେ କୁଟ୍‌ ମନ୍‌ ଲାଏଃକେ, ମେଁ ମଙ୍ଗଲ୍‌ ଆବା ଣ୍ଡୁ; ବାରି, ଜାନେ ନ୍ଲିୟା ଉଲ୍‌ଟା ପାଲ୍‌ଟା ଡିଂଏ, ମେଁ ବିପଦ୍‌ଅରିଆ ଲଃଏ । 21 ମୁର୍କକେ ଜନମ୍‌ ବିଃଣ୍ଡ୍ରେ ନିଜେ ଦୁକ୍‌ ବାଏ; ବାରି, ମୁର୍କନେ ଆବା ସାର୍ଦା ଆବା ଣ୍ଡୁ । 22 ସାର୍ଦା ମନ୍‌ ନିମାଣ୍ଡାଃ ସିର; ମାତର୍‌ ପାକ୍‌ଚିଃକ୍ନେ ଆତ୍ମା ଞ୍ଚିୟା ସାପାକେ ଆଃନ୍‌ସୁଆର୍‌ଏ । 23 ଦୁସ୍‌ଟ ରେମୁଆଁ ବିଚାର୍‌ନେ ଗାଲି ବାଙ୍ଗ୍‌ଟୁଏଃ ଆଃଡିଂନ୍‌ସାଃ ନ୍‌ସାଃବାନ୍‌ ଲାଞ୍ଚ୍‌ ରାଙ୍ଗ୍‌ଡ‍ଏ । 24 ବୁଦିମାନ୍‌ନେ ସେଃମଁ ଗିଆନ୍‌ ଲେଃଏ, ମାତର୍‌ ମୁର୍କନେ ମ୍‌ମୁଆଃ ମଞ୍ଚ୍‌ପୁର୍‌ନେ ସାରାସାରି ଜାକ ଲେଃଏ । 25 ମୁର୍କ ଉଙ୍ଗ୍‌ ନିଜର୍‌ ଆବାନେ ଅଃନେ ଆରି ନିଜର୍‌ ଇୟାଙ୍ଗ୍‌ନେ ଦୁକ୍‌ନେ କାରନ୍‌ ଡିଂଏ । 26 ଦାର୍ମିକ୍‌କେ ସାସ୍ତି ବିଃନେ ଣ୍ଡୁଲା ମ୍ନାଃ ପଦ୍‌ଅରିଆ ଲାଏଃକ୍ନେ ରେମୁଆଁକେ ମେଇଂନେ ଦରମ୍‌ ନ୍‌ସାଃ ବଗ୍‌ନେ ଟିକ୍‌ ଣ୍ଡୁ । 27 ଜା ଗଣ୍ଡାଃ ସାମୁଆଁ ବେବ‍ଆର୍‌ ଡିଂଏ, ମେଁନେ ଗିଆନ୍‌ ଲେଃଏ; ବାରି, ଜାନେ ସାନ୍ତି ଆତ୍ମା, ମେଁ ବୁଦିମାନ୍‌ । 28 ଅଗ୍ୟାନ୍‌ ରେମୁଆଁ ବୁଙ୍ଗ୍‌ଲା, ଗିଆନ୍‌ ରେମୁଆଁ ଡାଗ୍‌ଚେଃ ଏଜାଏ; ବାରି, ମେଁ ନିଜର୍‌ ତୁମୁଆଃ ବନ୍ଦ୍‌ ଆଃଡିଂଲା, ବୁଦିମାନ୍‌ ଡାଗ୍‌ଚେଃ ଏଜାଏ ।