1 କରାପ୍‌ ଲାଏଃକ୍ନେ କିଜି ମାପ୍‌ରୁ ଗ୍ରୁନା ଡିଙ୍ଗ୍‌ଏ । ମାତର୍‌ ନିମାଣ୍ଡାଃ ଲାଏଃକ୍ନେ କିଜିଗୁଣ୍ଡୁ ମେଁନେ ଇକ୍‌ଚା । 2 ଆଂକାର୍‌ ପାଙ୍ଗ୍‌ଲା ଗିଆସଃ ପାଙ୍ଗ୍‌ଏ; ମାତର୍‌ ଦରମ୍‌ ରେମୁଆଁଅରିଆ ଗିଆନ୍‌ ଲେଃଏ । 3 ଦରମ୍‌ ରେମୁଆଁଇଂନେ ବୁଦି ଆମେଇଂକେ ଗାଲି ଆଃସୁଏଃଏ, ମାତର୍‌ କୁଟ୍‌ ଡିଂଣ୍ଡ୍ରେଇଂନେ କୁଟ୍‌ କାମ୍‌ ଆମେଇଂକେ ବିନାସ୍‌ ଆଃଡିଂଏ । 4 ରିସାନେ ଦିନା ଦନ୍‌ ବେକାର୍‌ ଡିଙ୍ଗ୍‌ଏ, ମାତର୍‌ ଦରମ୍‌ କାମ୍‌ ଗୁଗୁଏଃନେବାନ୍‌ ରକ୍ୟା ଡିଂଏ । 5 ଦରମ୍‌ ରେମୁଆଁନେ ଦରମ୍‌ ସାମୁଆଁ ମେଁନେ ଗାଲି ଆଃସୁଏଃଏ, ମାତର୍‌ ଦୁସ୍‌ଟ ନିଜର୍‌ ଦୁସ୍‌ଟ କାମ୍‌ଅରିଆ ଗୁଏଃଏ । 6 ଦରମ୍‌ ରେମୁଆଁନେ ଦରମ୍‌ ସାମୁଆଁ ଆମେଇଂକେ ରକ୍ୟା ଡିଂଏ, ମାତର୍‌ ବିସ୍‌ବାସ୍‌ଅରିଆ ବିସ୍‌ ବିଃଣ୍ଡ୍ରେଇଂ ନିଜର୍‌ ନିଜର୍‌ କାରାପ୍‌ ଅବ୍ୟାସ୍‌ବାନ୍‌ ଦାରା ପଡ଼େଆର୍‌ଏ । 7 ଦୁସ୍‌ଟ ଗୁଏଃଲା, ମେଁନେ ଆସା ନସ୍‌ଟ ଡିଂଏ ଆରି ଅଦରମ୍‌ ରେମୁଆଁଇଂନେ ଆସା ବିନାସ୍‌ ଡିଂଏ । 8 ଦରମ୍‌ ରେମୁଆଁ ଦୁକ୍‌ବାନ୍‌ ରକ୍ୟା ବାଏ, ବାରି ଦୁସ୍‌ଟ ଆତେନ୍‌ ବାଦୁଲ୍‌ ଆତ୍‌ଅରିଆ ପାଙ୍ଗ୍‌ଏ । 9 ଦରମ୍‌ ଆଲେଃକ୍ନେ ରେମୁଆଁ ନିଜର୍‌ ତୁମୁଆଃଅରିଆ ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେକେ ବିନାସ୍‌ ଆଃଡିଂଏ, ମାତର୍‌ ଦର୍ମ ରେମୁଆଁ ଗିଆନ୍‌ଅରିଆ ରକ୍ୟା ବାଏ । 10 ଦରମ୍‌ ରେମୁଆଁନେ ମଙ୍ଗଲ୍‌ ଡିଂଲା, ଇନି ସାର୍ଦା ଡିଂଏ; ବାରି, ଦୁସ୍‌ଟନେ ବିନାସ୍‌ ଡିଂଲା, ଜୟ୍‌ ଜୟ୍‌ ଡିଂଏ । 11 ଦରମ୍‌ ରେମୁଆଁନେ ଆସିର୍ବାଦ୍‌ରେ ଇନି ଉନ୍ନତି ଡିଂଏ, ମାତର୍‌ ଦୁସ୍‌ଟ ରେମୁଆଁନେ ତୁମୁଆଃଅରିଆ ମେଁନେ ବିନାସ୍‌ ଡିଂଏ । 12 ଜା ନିଜର୍‌ ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେକେ ଗ୍ରୁନା ଡିଂଏ, ମେଁ ମୁର୍କ; ମାତର୍‌ ବୁଦିମାନ୍‌ ରେମୁଆଁ ବୁଙ୍ଗ୍‌ଲେଃଏ । 13 ଜା ବେକାର୍‌ ସାମୁଆଁ ବାସଙ୍ଗ୍‌ଚେ ଅଲେଙ୍ଗ୍‌ଏ, ମେଁ ବୁଃଡ଼ିକ୍ନେ ସାମୁଆଁ ବାସଙ୍ଗ୍‌ଏ, ମାତର୍‌ ଜାନେ ଦରମ୍‌ ମନ୍‌, ମେଁ ସାମୁଆଁ ବୁଃଡ଼ିଏ । 14 ନିମାଣ୍ଡା ବୁଦି ସାମୁଆଁ ଅବାବ୍‌ ଡିଂଲା ରେମୁଆଁଇଂ ଗୁଏଃମ୍ୟାଃଆର୍‌କେ, ବାରି ମନ୍ତ୍ରି‍ଇଂନେ ନ୍ତିବାନ୍‌ ପାରାନ୍‌ ରକ୍ୟା ଡିଂମ୍ୟାଃକେ । 15 ମାସ୍ନାମୁଆଃ ରେମୁଆଁ ନ୍‌ସାଃ ଜା ମଜେ ଡିଂଏ, ମେଁ ଡିଲାଡିଗ୍‌ କସ୍‌ଟ ବାଏ; ମାତର୍‌ ମଜେ ଡିଂନ୍‌ସାଃ ଜା ଗ୍ରୁନା ଡିଂଏ, ମେଁ ସାନ୍‌ତିରେ ଲେଃଏ । 16 ଅନୁଗ୍ରହ ବାଲେଃକ୍ନେ ସେଲାମ୍ବୁଏଃ ସନ୍‌ମାନ୍‌ ସାଃଚେଃ ବ‍ଏ, ବାରି ଜାଅରିଆ ଦୟା ଣ୍ଡୁ ଆତେନ୍‌ ରେମୁଆଁ ଦନ୍‌ସମ୍ପତି ସାଃଚେଃ ବ‍ଏ । 17 ଦୟା ରେମୁଆଁ ନିଜର୍‌ ପାରାନ୍‌କେ ନିମାଣ୍ଡା ଆଃଡିଂଏ; ମାତର୍‌ ଜାଅରିଆ ଦୟା ଣ୍ଡୁ, ମେଁ ନିଜର୍‌ ଗାଗ୍‌ଡ଼େକେ ଦୁକ୍‌ ବିଃଏ । 18 ଦୁସ୍‌ଟ ରେମୁଆଁ ମିଚ୍‌ ଆର୍ଜେଏ, ମାତର୍‌ ଜା ଦରମ୍‌ ସାମୁଆଁ ବାସଙ୍ଗ୍‌ ଅଲେଙ୍ଗ୍‌ଏ, ମେଁନେ ଡିଲାଡିଗ୍‌ ଇନାମ୍‌ ଲାଏଃକେ । 19 ମୁଃଡ଼ି ରେମୁଆଁ ଦରମ୍‌ ସାମୁଆଁଅରିଆ ଲାଗେ ଲେଃଏ, ମେଁ ଜିବନ୍‌ ବାଏ; ବାରି, କାରାପ୍‌ କାମ୍‌ନେ ପ୍ଲାଃ ଜା ୱିର୍‌ଏ, ମେଁ ନିଜର୍‌ ମରନ୍‌ ଆଃଗଟେଏ । 20 ଜିଦିଆ ରେମୁଆଁ ମାପ୍‌ରୁନେ ଗ୍ରୁନାନେ ରେମୁଆଁ, ମାତର୍‌ ଦରମ୍‌ରେ ଅଲେଙ୍ଗ୍‌ନେ ରେମୁଆଁଇଂ ମେଁ ଡାଗ୍ରା ସାର୍ଦା ବାଏ । 21 ଦଦ୍ୟା ରେମୁଆଁ ନ୍ତି ସାଃଲା ଡିଗ୍‌ ଡଣ୍ଡ୍‌ ବାଏ, ମାତର୍‌ ଦାର୍ମିକ୍‌ନେ ବଂସ ରକ୍ୟା ବାଏ । 22 ଗୁବୁଗ୍‌ନେ ତୁମୁଆଃଅରିଆ ସୁନାନେ ଚ୍ନଗ୍‌ମୁ ଡିରକମ୍‌, ଦେତ୍‌ରକମ୍‌ ନିମାଣ୍ଡାଃ ଚିନ୍ତା ଆନ୍ତାର୍‌ନେ ଜବର୍‌ ସବାକ୍ନେ ସେଲାମ୍ବୁଏଃ ଦେତ୍‌ରକମ୍‌ । 23 ଦାର୍ମିକ୍‌ଇଂନେ ଆସାନେ ଚୁଚୁ ନିମାଣ୍ଡା, ମାତର୍‌ ଦୁସ୍‌ଟ‍ଇଂନେ ଆସାନେ ଚୁଚୁ ରିସା । 24 ଜାଣ୍ଡେଃ ଜାଣ୍ଡେଃ ଦାନ୍‌ ବିଃଚେ ମ୍ନାଃଆର୍‌ଏ, ବାରି ଜାଣ୍ଡେଃ ଜାଣ୍ଡେଃ ସତ୍‌ ଦାନ୍‌ ବିଃଲା ଡିଗ୍‌ ଆତ୍‌ବାନ୍‌ ଅବାବ୍‌ ଗଟେଏ । 25 ଦାନ୍‌ ବିଃମ୍ୟାଃକ୍ନେ ରେମୁଆଁ ସାନ୍ତି ବାଏ, ଆରି, ଣ୍ଡିଆଃ ଉର୍‌ଚିଗ୍‌ଣ୍ଡ୍ରେ ମେମନ୍‌କେ ଡିଗ୍‌ ଣ୍ଡିଆଃଅରିଆ ଆଃଉର୍‌ଚିଗ୍‌ଏ । 26 କିଆଉଁଆଃକେ ଜା ସାଃଚେ ବ‍ଏ, ଆମେକେ ରେମୁଆଁଇଂ ଅବିସାପ୍‌ ବିଃଆର୍‌ଏ, ମାତର୍‌ ମୁଃଡ଼ି ରେମୁଆଁ ଆତେନ୍‌ ସ‍ଏ, ମେଁନେ ବାଆଃଅରିଆ ଆସିର୍ବାଦ୍‌ ଜାର୍‌ଏ । 27 ମୁଃଡ଼ି ରେମୁଆଁ ଜତନ୍‌ରେ ନିମାଣ୍ଡା କାମ୍‌ ଡିଙ୍ଗ୍‌ସା ଚେସ୍‌ଟା ଡିଂଏ, ମେଁ ଅନୁଗ୍ରହ ବାଏ, ବାରି ଜା ବିନ୍‌ରେନେ ଦଦ୍ୟା ଡିଂନ୍‌ସାଃ ତୁର୍‌ଏ, ମେଁ ଆଡ଼ାତ୍ରା ଆତେନ୍‌ ଆଃ ଗଟେଏ । 28 ନିଜର୍‌ ଦନ୍‌ଅରିଆ ଜା ଆସା ବ‍ଏ, ମେଁ ବିନାସ୍‌ ଡିଂଏ; ମାତର୍‌ ଦରମ୍‌ ରେମୁଆଁ ପଃଡିଂକ୍ନେ ଉଲିଆଃ ରକମ୍‌ ସାର୍ଦା ଡିଙ୍ଗ୍‌ଏ । 29 ନିଜର୍‌ ପରିବାର୍‌କେ ଜା ଦୁକ୍‌ ବିଃଏ, ମେଁ ୱେଡ଼୍ୟାଃ ରକମ୍‌ ଅଦିକାର୍‌ ବାଏ; ବାରି, ଅଗ୍ୟାନ୍‌ ରେମୁଆଁ ଗିଆନ୍‌ ରେମୁଆଁନେ ଚାକର୍‌ ଡିଂଏ । 30 ଦାର୍ମିକ୍‌ନେ ଚୁଚୁ ଡିଂଡିଂକେ ଜିବନ୍‌ ବିଃନେ ସ୍ଲାଃ, ବାରି ଜା ବୁଦି ରେମୁଆଁ, ମେଁ ବିନ୍‌ରେନେ ଆତ୍ମା ଲାବ୍‌ ଡିଂଏ । 31 କେଲା, ମଞ୍ଚ୍‌ପୁର୍‌ଅରିଆ ଦାର୍ମିକ୍‌ଇଂ ଆଃ କାମ୍‌ ଡିଙ୍ଗ୍‌କ୍ନେ ଚୁଚୁ ବାମ୍ୟାଃଆର୍‌କେ, ତେଲା ଦୁସ୍‌ଟ ଆରି ପାପି‍ଇଂ ମେଃନେ ତେନ୍‌ବାନ୍‌ ଜାବର୍‌ ଆବାଆର୍‌ ଣ୍ଡୁ ?