1 ମୁଃଡ଼ି ଗରିବ୍‌ ନିଜର୍‌ ଇକ୍‌ଚାରେ ଅଲେଙ୍ଗ୍‌ଏ, ମେଁ କୁଟ୍‌ ସାମୁଆଁ ବାସଙ୍ଗ୍‌ନେ ତୁମୁଆଃ ଆରି ମୁର୍କ ରେମୁଆଁ ବାନ୍‌ ନିମାଣ୍ଡାଃ । 2 ଆରି ବୁଦି ଆଲାଏଃକ୍ନେ ରେମୁଆଁ ନିମାଣ୍ଡାଃ ଣ୍ଡୁ; ବାରି, ଜା ଦାପ୍ରେ ଦାପ୍ରେ ଞ୍ଚ ତ୍ଲାଗ୍‌ଏ, ମେଁ ପାପ୍‌ ଡିଂଏ । 3 ରେମୁଆଁନେ ମୁର୍କ ବୁଦି ମେଁନେ ଗାଲି ଉଲ୍‌ଟା ଆଃଡିଂବିଃଏ, ବାରି, ମେଁନେ ମନ୍‌ ମାପ୍‌ରୁନେ ବିରଦ୍‌ରେ ରିସା ଡିଂଏ । 4 ସାକାର୍‌ ରେମୁଆଁ ଜାବର୍‌ ସାଙ୍ଗ ବାଏ; ମାତର୍‌ ଗରିବ୍‌ ରେମୁଆଁ ନିଜର୍‌ ସାଙ୍ଗବାନ୍‌ ବିନେ ଡିଂଏ । 5 ମିଚ୍‌ ସାକି ବିଃଣ୍ଡ୍ରେ ଡଣ୍ଡ୍‌ ମାବାଚେଃ ଆଲେଃ ଣ୍ଡୁ; ବାରି, ନାଲେ ସାମୁଆଁ ବାସଙ୍ଗ୍‌ଣ୍ଡ୍ରେ ରକ୍ୟା ଆବା ଣ୍ଡୁ । 6 ଗୁଲୁଏ ରେମୁଆଁ ମୁଇଂ ସାଇଜ ବାନ୍‌ସାଃ ସାଇଜ ଡିଂଣ୍ଡ୍ରେ ଆଡ଼ାତ୍ରା ଆସା ଡିଂଆର୍‌ଏ, ବାରି, ସାପାରେ ଦାନ୍‌ ବିଃନେ ରେମୁଆଁନେ ସାଙ୍ଗ ଡିଂଆର୍‌ଏ । 7 ଗରିବ୍‌ନେ ସର୍‌ତେ ବୟାଁ ଆମେକେ ଗ୍ରୁନା ଡିଂଆର୍‌ଏ; ମେଁନେ ସାଙ୍ଗଡ଼େଇଂ ମେଁବାନ୍‌ ଉଃଡ଼ି ଜାବର୍‌ ସ୍ଲ ଆୱେଆର୍‌ ! ମେଁ ବାଃଲିର୍‌ନେ ଚେସ୍‌ଟା ଡିଂଏ, ମାତର୍‌ ମେଇଂ ଆଲେଃଆର୍‌କେ । 8 ମୁଃଡ଼ି ରେମୁଆଁ ବୁଦି ଲାବ୍‌ ଡିଂଏ, ମେଁ ନିଜର୍‌ ପାରାନ୍‌କେ ଆଲାଦ୍‌ ଡିଂଏ; ଜା ନିମାଣ୍ଡାଃ ଆରି ଦଦ୍ୟା ମ୍ୟାଃଏ, ମେଁ ମଙ୍ଗଲ୍‌ ବାଏ । 9 ମିଚ୍‌ ସାକି ବିଃଣ୍ଡ୍ରେ ଡଣ୍ଡ୍‌ ବାଏ; ବାରି, ନାଲେଣ୍ଡ୍ରେ ବିନାସ୍‌ ଡିଂଏ । 10 ମୁର୍କ ରେମୁଆଁ ସୁକ୍‌ ବାନେ ନିମାଣ୍ଡାଃ ଣ୍ଡୁ; ମ୍ନାଃ ରେମୁଆଁଇଂନେ ଆଡ଼ାତ୍ରା ଚାକର୍‌ ସାସନ୍‌ ଡିଂନେ ଜାବର୍‌ ନିମାଣ୍ଡାଃ ଣ୍ଡୁ । 11 ରେମୁଆଁନେ ନିମାଣ୍ଡାଃ ବୁଦି ଆମେକେ ଲେଃଗା ରିସା ଆଃଡିଂଏ; ବାରି, ମେଁନେ ପାପ୍‌ ଆନ୍ତାର୍‌ବିଃନେ ମେଁ ନ୍‌ସାଃ ନିମାଣ୍ଡାଃ । 12 ଇଃସାଙ୍ଗ୍‌ନେ ରିସା ସିଂଅଁ ଅଃନେ ରକମ୍‌; ମାତର୍‌ ମେଁନେ ଦୟା ଚେଃମୁଆଁ ଆଡ଼ାତ୍ରା ଲାଏଃକ୍ନେ ଅଁସ୍‌ଡ଼୍ୟାଃ ରକମ୍‌ । 13 ମୁର୍କ ଗଡ଼େଅ ମେଁନେ ଆବା ଆତ୍ଲା ଦୁକ୍‌ ବିଃନେ ସାମୁଆଁ; ବାରି, ସେଲାମ୍ବୁଏଃନେ ୱିଙ୍ଗ୍‌ଆଃ ଡଙ୍ଗ୍‌ନେ ଣ୍ଡିଆଃ ରକମ୍‌ । 14 ଡୁଆ ଆରି ଦନ୍‌ ଆବା - ଇୟାଙ୍ଗ୍‌ନେବାନ୍‌ ବାକ୍ନେ ଅଦିକାର୍‌; ମାତର୍‌ ବୁଦି ଲାଏଃକ୍ନେ ସେଲାମ୍ବୁଏଃ ମାପ୍‌ରୁନେବାନ୍‌ ବାଡିଂଏ । 15 ଅଲ୍‌ସୁଆ ରେମୁଆଁ ବାନ୍‌ ଜାବର୍‌ ଲେମୁଆଃ ପାଙ୍ଗ୍‌ଏ; ବାରି, ଅଲ୍‌ସୁଆ ରେମୁଆଁ କିଡ଼େସଃ ଲେଃଏ । 16 ପର୍‌ମେସର୍‌ନେ ଆଦେସ୍‌ ପାଲନ୍‌ ଡିଂଣ୍ଡ୍ରେ ନିଜର୍‌ ପାରାନ୍‌ ରକ୍ୟା ଡିଂଏ; ମାତର୍‌ ନିଜର୍‌ ଗାଲି ବିସ‍ଏରେ ଜା ତରକ୍‌ ଆଡିଂ ଣ୍ଡୁ, ମେଁ ଗୁଏଃଏ । 17 ଜା ଗରିବ୍‌କେ ଲିବିସଃ ଡିଂଏ, ମେଁ ମାପ୍‌ରୁକେ ରୁନ୍‌ ବିଃଏ; ବାରି, ମେଁ ମେଁନେ ନିମାଣ୍ଡାଃ କାମ୍‌ନେ ରୁନ୍‌ ସୁଜେଏ । 18 ନିଜର୍‌ ଉଙ୍ଗ୍‌କେ ସାସନ୍‌ ଡିଂ, ମେଃଡାଗ୍‌ଲା ଆସା ଲାଏଃକେ; ବାରି, ନାନେ ମନ୍‌ ମେଁନେ ବିନାସ୍‌ ଡିଙ୍ଗ୍‌ନ୍‌ସାଃ ଇକ୍‌ଚା ଆଡିଂଲେଃ । 19 ଜାବର୍‌ ରିସା ଡିଂଣ୍ଡ୍ରେ ସାସ୍ତି ବାଏ, ମେଃଡାଗ୍‌ଲା ନା ଆମେକେ ମୁଇଂତର୍‌ ରକ୍ୟା ନାଡିଂଲା, ଆତେନ୍‌ ଆନାକେ ବାର୍‌ମୁଇଂତର୍‌ ଡିଂନ୍‌ସାଃ ପଡ଼େଏ । 20 ସାରାସାରି ବେଲା ନା ଡିରକମ୍‌ ଗିଆନ୍‌ ନାବାଏ, ଆକେନ୍‌ସାଃ ସାମୁଆଁ ଦ୍ରିଗ୍‌ ଆରି ସିକ୍ୟା ବାନେ ସାମୁଆଁ ସାଃ । 21 ରେମୁଆଁନେ ମନ୍‌ଅରିଆ ବିନ୍‌ ବିନ୍‌ ଇକ୍‌ଚା ଲେଃଏ, ମାତର୍‌ ମାପ୍‌ରୁନେ ଜଜ୍‌ନା କାଲାଆଃ ନ୍‌ସା ଲେଃଏ । 22 ମୁଇଂ ରେମୁଆଁନେ ଇକ୍‌ଚା ମେଁନେ ଲିବିସଃ ରକମ୍‌ ଆରି ନାଲେଣ୍ଡ୍ରେବାନ୍‌ ଗରିବ୍‌ ରେମୁଆଁ ମ୍ନାଃ । 23 ମାପ୍‌ରୁନେ ସାମୁଆଁକେ ବୁଟଚେଃ ବ୍ରୁଆଲା ଜିବନ୍‌ ବା ଡିଙ୍ଗ୍‌ଏ, ଆତେନ୍‌ ମୁଃଡ଼ିନେ ରେମୁଆଁଅରିଆ ଲେଃଏ, ମେଁ ସାନ୍ତିରେ ବ୍ରୁଆଏ; ବିପଦ୍‌ ମେଁଡାଗ୍ରା ବିଃଚେଃ ଆୱେ ଣ୍ଡୁ । 24 ଅଲ୍‌ସୁଆ ନିଜର୍‌ ତାଲିଅରିଆ ନ୍ତି ବଲା, ଆରି ମୁଇଂତର୍‌ ଆତେନ୍‌ ନିଜର୍‌ ତୁମୁଆଃଅରିଆ ରାଙ୍ଗ୍‌ୱେନେ ଡିଗ୍‌ ଇକ୍‌ଚା ଆଡିଂ ଣ୍ଡୁ । 25 ନିନ୍ଦା ଡିଂଣ୍ଡ୍ରେକେ ବଗ୍‌ଲା, ଦରମ୍‌ ରେମୁଆଁ ତରକ୍‌ ଡିଂନେ ସିକ୍ୟା ବିଃଏ; ବାରି, ବୁଦିମାନ୍‌କେ ୱିଙ୍ଗ୍‌ଲା, ମେଁ ଗିଆନ୍‌ ବାଏ । 26 ମୁଃଡ଼ି ଉଙ୍ଗ୍‌ ନିଜର୍‌ ଆବାନେ ଦନ୍‌ ନସ୍‌ଟ ଆଃଡିଂଏ, ବାରି, ନିଜର୍‌ ଇୟାଙ୍ଗ୍‌କେ ନୁଆଁ ବିଃଏ, ମେଁ ଗିଆସଃ ଆରି ଅପମାନ୍‌ ବାଏ । 27 ଅ ନେଙ୍ଗ୍‌ନେ ଉଙ୍ଗ୍‌, ମୁଃଡ଼ିନେ ଉପଦେସ୍‌ ଗିଆନ୍‌ନେ ସାମୁଆଁବାନ୍‌ ଆନାକେ ଆଃବାୟାଏ, ଆତେନ୍‌ ଦ୍ରିଗ୍‌ନେବାନ୍‌ ନ୍ଲୂଗ୍‌ ଆବିଗେ । 28 ମିଚ୍‌ ସାକି ସତ୍‌ ବିଚାର୍‌କେ ନିନ୍ଦା ଡିଂଏ ଆରି ଦୁସ୍‌ଟନେ ତୁମୁଆଃ କାରାପ୍‌ ସାମୁଆଁକେ ଇକ୍‌ଚା ଡିଂମ୍ୟାଃକେ । 29 ନିନ୍ଦା ଡିଂଣ୍ଡ୍ରେ ଆତ୍‌ଲା ଡଣ୍ଡ୍‌ ଲେଃକେ ଆରି ମୁର୍କ‍ଇଂନେ ଗୁଗ୍‌ଡ୍ୟା ନ୍‌ସାଃ ମାଡ଼୍‌ ତିଆର୍‌ ଡିଂଚେଃ ଲାଏଃକେ ।