1 ଜାବର୍‌ ଦନ୍‌ ବାଦୁଲ୍‌ ମ୍ନି ଆର୍ଜେନେ ନିମାଣ୍ଡାଃ, ବାରି, ରୁପା ଆରି ସୁନା ବାଦୁଲ୍‌ ଆଲାଦ୍‌ ବିଃନେ ଅନୁଗ୍ରହ ନିମାଣ୍ଡାଃ । 2 ସାକାର୍‌ ଆରି ଗରିବ୍‌ ମୁଇଂଅରିଆ ମିସୁଃମ୍ୟାଃଆର୍‌କେ; ମାପ୍‌ରୁ ତେନ୍‌ ସାପାରେନେ ଆଃରେଣ୍ଡ୍ରେ । 3 ଚତୁର୍‌ ରେମୁଆଁ ବିପଦ୍‌ କେଚେଃ ନିଜେକେ ବୁଃଡ଼ିଏ; ମାତର୍‌ ଦରମ୍‌ ରେମୁଆଁଇଂ ସିସେ ୱେଚେଃ ସାସ୍ତି ବାଆର୍‌ଏ । 4 ଦରମ୍‌ରେ ଲେଃନେ ଆରି ମାପ୍‌ରୁନେ ବିସ‍ଏରେ ବୁଟନେ ଇନାମ୍‌ ଦନ୍‌, ସନ୍‌ମାନ୍‌ ଆରି ଜିବନ୍‌ । 5 କୁଟ୍‌ ଡିଂନେ ରେମୁଆଁଇଂନେ ଗାଲିଅରିଆ ଗ୍ରେଃ ଆରି ବ୍ନେଗ୍‌ ଲେଃଏ; ଜା ନିଜର୍‌ ପାରାନ୍‌ ରକ୍ୟା ଡିଂଏ, ମେଁ ତେନ୍‌ ସାପାବାନ୍‌ ସ୍ଲ ଲେଃଏ । 6 ଗଡ଼େଅନେ ଟିକ୍‌ ଗାଲିଅରିଆ ଆମେକେ ସିକିତ୍‌ ଆଃଡିଂପା; ତେସାଃ ମେଁ ଡକ୍ରା ଡିଂଲା ଡିଗ୍‌ ଆତ୍‌ବାନ୍‌ ଆଗୁଚେ ଣ୍ଡୁ । 7 ସାକାର୍‌ ଗରିବ୍‌ ଆଡ଼ାତ୍ରା ସାସନ୍‌ ଡିଂଏ, ବାରି, ରୁନ୍‌ ରାଙ୍ଗ୍‌ଡକ୍ନେ ରେମୁଆଁ ରୁନ୍‌ ବିଃନେ ରେମୁଆଁନେ ଚାକର୍‌ ଡିଂଏ । 8 ଜା ଅଦରମ୍‌ ମୁଞ୍ଜି ବିଗ୍‌ଏ, ମେଁ ବିପଦ୍‌ ରକମ୍‌ନେ କିଆଉଁଆଃ ୱେଃଏ ଆରି ମେଁନେ ରିସା ରକମ୍‌ନେ ଡୁଡୁ ପାକ୍‌ଚିଃୱେଏ । 9 ଜାନେ ଲିବିସଃ ମ୍‌ମୁଆଃ ଲାଏଃକେ, ମେଁ ଆସିର୍ବାଦ୍‌ ବାଏ; ମେଃଡାଗ୍‌ଲା ମେଁ ନିଜର୍‌ କାଦିବାନ୍‌ ଗରିବ୍‌ ରେମୁଆଁକେ ବାଟାଏ । 10 ନିନ୍ଦା ଡିଂଣ୍ଡ୍ରେକେ ଆଃତାର୍‌ ବିଃପା, ଆତ୍‌ବାନ୍‌ ୱିଙ୍ଗ୍‌ଆଃ ତାର୍‌ୱେଏ; ବାରି, ବିରଦ୍‌ ଆରି ଅପମାନ୍‌ ବନ୍ଦ୍‌ ଡିଂୱେଏ । 11 ମୁଃଡ଼ି ରେମୁଆଁ ମନ୍‌ନେ ପର୍‌ଚଲ୍‌ ଗୁନ୍‌କେ ଆଲାଦ୍‌ ଡିଂଏ, ଜାନେ ତୁମୁଆଃ ଅନୁଗ୍ରହ ଲାଏଃକେ, ଇଃସାଙ୍ଗ୍‌ ମେଁନେ ସାଙ୍ଗ ଡିଂଏ । 12 ମାପ୍‌ରୁନେ ମ୍‌ମୁଆଃ ଗିଆନ୍‌ ବାଲାଏଃକ୍ନେ ରେମୁଆଁକେ ରକ୍ୟା ଡିଂଏ; ମାତର୍‌ ବିସାସ୍‌ଗାତକ୍‌ନେ ସାମୁଆଁ ମେଁ ଆଃଉଲ୍‌ଟେ ବିଃଏ । 13 ଅଲ୍‌ସୁଆ ରେମୁଆଁ ବାସଙ୍ଗ୍‌ଏ, ବାଏରେ ସିଂଅଁ ଲାଏଃକେ; ନିଂ ଗାଲିବଃ ଙ୍ଗୁଏଃଏ । 14 ବେଶ୍ୟା ସେଲାମ୍ବୁଏଃନେ ତୁମୁଆଃ ସ୍ରି କୁରୁ, ମାପ୍‌ରୁନେ ଗ୍ରୁନା ବାକ୍ନେ ରେମୁଆଁ ଆତ୍‌ଅରିଆ ଲଃଏ । 15 ଗଡ଼େଅନେ ମନ୍‌ଅରିଆ ଅଗ୍ୟାନ୍‌ ବନ୍ଦ୍ ଲେଃଏ, ବାରି, ସାସନ୍‌ ଡୁଡୁ ଆତେନ୍‌ ଆଃତାର୍‌ଚେଃ ମେଁବାନ୍‌ ସ୍ଲ ଆଃଡିଂବିଃଏ । 16 ମୁଃଡ଼ି ରେମୁଆଁ ନିଜର୍‌ ଦନ୍‌ ଜାବର୍‌ ଆଃଡିଂନ୍‌ସାଃ ଗରିବ୍‌ ଆଡ଼ାତ୍ରା କାରାପ୍‌ ବେବ‍ଆର୍‌ ଡିଂଏ; ବାରି, ଜା ସାକାର୍‌କେ ଦାନ୍‌ ଡିଂଏ, ଆମେକେ ସରାଃ ଅବାବ୍‌ ଗଟେଏ ।

17 ନା ନିଜର୍‌ ନ୍ଲୁଗ୍‌ ଡେରେଚେଃ ଗିଆନ୍‌ ବାଲାଏଃକ୍ନେ ରେମୁଆଁଇଂନେ ସାମୁଆଁ ଦ୍ରିଗ୍‌; ବାରି, ନିଂନେ ସିକ୍ୟାଅରିଆ ମନ୍‌ ବିଃ । 18 ମେଃଡାଗ୍‌ଲା ନା ଆତେନ୍‌ ମନ୍‌ଅରିଆ ନାବଲା ଆରି ନାନେ ତୁମୁଆଃ ଏଃତେ ଆତେନ୍‌ ମୁଇଂଅରିଆ ମିସୁଃଲା, ତେଲା ପେ ସାର୍ଦା ପେଡିଂଏ 19 ମାପ୍‌ରୁଅରିଆ ଡିରକମ୍‌ ନାନେ ଆସା ଲେଃଏ, ଆକେନ୍‌ସାଃ ନିଂ ଏଃକେ ଆନାକେ ଆକେନ୍‌ ସାପା ସାମୁଆଁ ଣ୍ଡ୍ରାଃମ୍ୟାଃକେ । 20 ଆନାକେ ସତ୍‌ ରକମ୍‌ନେ ସାମୁଆଁ ଡିଲାଡିଗ୍‌ ଆନାକେ ଆଃମ୍ୟାଃ ନ୍‌ସାଃ, ବାରି, ଜାଜା ଆନାକେ ବେମ୍ୟାଃଆର୍‌କେ, 21 ନା ଡିରକମ୍‌ ଆମେଇଂକେ ସତ୍‌ ଉତର୍‌ ବିଃ ନାୟାଏ, ଆକେନ୍‌ସାଃ ନିଂ ମେଃନେ ନା ଆଡ଼ାତ୍ରା ସତ୍‌ ଆରି ସିକ୍ୟା ଏଃତେ ସାର୍ଦା ଡିଂନେ ସାମୁଆଁ ନ୍ନାଗୁଆର୍‌କେ ? 22 ଗରିବ୍‌ ରେମୁଆଁକେ ଗରିବ୍‌ ମ୍ୟାଃଚେଃ ମେଁନେ ଜିନିସ୍‌ ଆଡଙ୍ଗାଗେ, ବାରି, ଇନିନେ ଗାଲିବଃ ଦୁକ୍‌ ରେମୁଆଁ ଆଡ଼ାତ୍ରା କାରାପ୍‌ ବେବ‍ଆର୍‌ ଆଡିଂଗେ । 23 ମେଃଡାଗ୍‌ଲା ମାପ୍‌ରୁ ମେଇଂନେ ସାପଟ୍‌ରେ ବାଃଲିର୍‌ଏ, ବାରି, ଜାଜା ମେଇଂନେ ଜିନିସ୍‌ ଡଙ୍ଗା‍ଆର୍‌ଏ, ମେଁ ମେଇଂନେ ପାରାନ୍‌ ଡଙ୍ଗାଏ । 24 ରିସା ଡିଂନେ ରେମୁଆଁ ଏଃତେ ସାଙ୍ଗ ଆଡିଂଗେ, ବାରି, ଦାପ୍ରେ ରିସା ଡିଂନେ ରେମୁଆଁ ଏଃତେ ଆ‍ଅଲେଙ୍ଗ୍‌ଗେ । 25 ଦେତ୍‌ରକମ୍‌ ପେଡିଂଲା, ନା ଡିଗ୍‌ ମେଁନେ ଗାଲି ନିଜର୍‌ ପାରାନ୍‌ ନ୍‌ସାଃ ବ୍ନେଗ୍‌ ନାରାଃରେଏ । 26 ଜାଜା ବାଦ୍‌ ବଗ୍‌ଆର୍‌ଏ ଆରି ରୁନ୍‌ ରେମୁଆଁନେ ସାକି ଡିଂଆର୍‌ଏ, ମେଇଂନେ ବିତ୍ରେ ନା ମୁଇଂଡା ଆଡିଂଗେ । 27 ଅଃନା ରୁନ୍‌ ସୁଜେନେ ନ୍‌ସାଃ ନାନେ ମେଃଡିଗ୍‌ ଆଲେଃ, ତେଲା ମେଁ ମେଃନ୍‌ସାଃ ନା ଆଲବାନ୍‌ ନାନେ ସିଙ୍ଗ୍‌ଲାଃ ରାଙ୍ଗ୍‌ଡ‍ଏ ? 28 ନାନେ ନ୍ତାଞ୍ଜାଃଇଂ ମୁଃଡ଼ିନେ ବାୱିର୍‌ ସୀମା ଆଃରେବ‍ଆର୍‌କେ, ଆତେନ୍‌ ଆରାଃଗୁଚେଗେ । 29 ନା କି ମେଃଡିଗ୍‌ ରେମୁଆଁକେ ନିଜର୍‌ ବେପାର୍‌ଅରିଆ ତାନ୍ଦ୍ରା କିକେନାଡିଂକେ ? ମେଁ ଇଃସାଙ୍ଗ୍‌ଇଂନେ ସେଃମଁ ତୁଆଁଏ । ମେଁ ଡାଆଁ ରେମୁଆଁଇଂନେ ସିସେ ଆତୁଆଁ ଣ୍ଡୁ ।