1 ଅ ନିଂନେ ଉଙ୍ଗ୍‌ଇଂ, ଆବାନେ ନିମାଣ୍ଡା ସାମୁଆଁ ଦ୍ରିଗ୍‌ ଆରି ନିମାଣ୍ଡାଃ ବିଚାର୍‌ ରକମ୍‌ ଗିଆନ୍‌ଅରିଆ ମନ୍‌ ବିଃପା । 2 ମେଃଡାଗ୍‌ଲା ନିଂ ଆପେକେ ନିମାଣ୍ଡାଃ ସିକ୍ୟା ବିଃଣ୍ଡିଂକେ, ନିଂନେ ଆଦେସ୍‌ ଆଆନ୍ତାର୍‌ଗେପା । 3 ନିଂ ନିଜର୍‌ ଆବାନେ ମୁଇଂ ଆଲାଦ୍‌ ଗଡ଼େଅ ନ୍‌ଲେଃଗେ, ବାରି ଇୟାଙ୍ଗ୍‌ନେ ମୁଆଃଅରିଆ ଚିର୍‌ଲାଃଅ ନ୍ଲେଗେ ଆରି ମୁଇଂ ମାତର୍‌ ଆଲାଦ୍‌ନେ ଗଡ଼େଅ ନ୍‌ଲାଏଃଗେ । 4 ଆବା ଆନିଂକେ ସିକ୍ୟା ବିଃଚେଃ ବାସଙ୍ଗ୍‌କେ, ନାନେ ମନ୍‌ ନିଂନେ ସାମୁଆଁ ରକ୍ୟା ଡିଂଲେଃ, ନିଂନେ ଆଦେସ୍‌ ସାପା ପାଲନ୍‌ ଡିଂଚେଃ ବ୍ରୁଆପା । 5 ଗିଆନ୍‌ ଆର୍ଜେପା, ନିମାଣ୍ଡାଃ ଚିନ୍ତା ଡିଂପା, ଆତେନ୍‌ ଆଆବଃଗ୍‌ପା; ବାରି, ନିଂ ତୁମୁଆଃନେ ସାମୁଆଁବାନ୍‌ ସାର୍ମୁଆଃ ଆବୁଃଡ଼ିଗେ । 6 ଆମେକେ ଆଆନ୍ତାର୍‌ଗେ; ତେଲା ଆଃ ମେଁ ଆନାକେ ପାଲନ୍‌ ଡିଂଏ; ଆମେକେ ଆଲାଦ୍‌ ଡିଂ, ତେଲା ମେଁଁ ଆନାକେ ରକ୍ୟା ଡିଂଏ । 7 ଗିଆନ୍‌ ସାପାଟୁ ମ୍ନାଃ ସାମୁଆଁ, ଏନ୍‌ସାଃ ଗିଆନ୍‌ ବା; ବାରି, ନାନେ ସାପା ଲାବ୍‌ ବିତ୍ରେ ନିମାଣ୍ଡାଃ ବିଚାର୍‌ ଡିଂ । 8 ଆମେକେ ଆଲାଦ୍‌ ଡିଙ୍ଗ୍‌ପା, ତେଲା ମେଁ ଆନାକେ ମ୍ନାଃ ଆଃଡିଂଏ; ଆମେକେ କଣ୍ଡଲା, ମେଁ ଆନାକେ ସନ୍‌ମାନ୍‌ ଡିଂଏ । 9 ମେଁ ନାନେ ବାଆଃଅରିଆ ଦୟାନେ ସାଜ ବିଃଏ; ମେଁ ଆନାକେ ସବାକ୍ନେ ମୁକୁଟ୍‌ ବିଃଏ । 10 ଅ ନିଂନେ ଉଙ୍ଗ୍‌, ଦ୍ରିଗ୍‌, ନିଂ ସାମୁଆଁ ସାଃ; ତେଲା ନାନେ ମ୍ବ୍ରନେ ମୁଆଁ ଜାବର୍‌ ଡିଂଏ । 11 ନିଂ ଆନାକେ ଗିଆନ୍‌ନେ ଗାଲିଅରିଆ ସିକ୍ୟା ବିଃଣ୍ଡିଂକେ, ନିଂ ସତ୍‌ ଗାଲିଅରିଆ ଆନାକେ ଆଃଅଲେଙ୍ଗ୍‌ମ୍ବକେ । 12 ନା ଅଲେଙ୍ଗ୍‌ନେ ବେଲା ନାନେ ଞ୍ଚ ମେଃଡିଗ୍‌ କସ୍‌ଟ ଆଡିଂ ଣ୍ଡୁ; ବାରି, ୱିର୍‌ନେ ବେଲା ନା ନାଟେପ୍‌ଲଃ ଣ୍ଡୁ । 13 ନିମାଣ୍ଡା ସାମୁଆଁକେ ଡାଟ୍‌ ବାବ୍‌ରେ ସାଃଚେ ବ; ଆମେକେ ଆନ୍ତାର୍‌ ଆବିଃଗେ; ଆମେକେ ବ; ମେଃଡାଗ୍‌ଲା ଆତେନ୍‌ ନାନେ ଜିବନ୍‌ । 14 କରାପ୍‌ ରେମୁଆଁଇଂନେ ଗାଲି ବିତ୍ରେ ଆଗାଗେ ଆରି ଦୁସ୍‌ଟ‍ଇଂନେ ଗାଲିଅରିଆ ଆ‍ଅଲେଙ୍ଗ୍‌ଗେ । 15 ଆତେନ୍‌ ଆନ୍ତାର୍‌ ବିଃପା, ଆତ୍‌ ଡାଗ୍ରା ବିଃଚେ ଆୱେଗେ; ଆତ୍‌ବାନ୍‌ ସାର୍ମୁଆଃ ବିନ୍‌ ପାକା ଆଃଡିଂଚେଃ ଅଲେଙ୍ଗ୍‌ ୱେଲା । 16 ମେଃଡାଗ୍‌ଲା ଦଦ୍ୟା କାମ୍‌ ଆଡିଂଲା ମେଇଂ ଆଡୁଲେଗ୍‌ ଣ୍ଡୁ, ବାରି ଆଜାକେ ଡିଗ୍‌ ବିନାସ୍‌ ଆଡିଙ୍ଗ୍‌ଲା ଆମେଇଂକେ ଲେମୁଆଃ ଆପାଙ୍ଗ୍ ଣ୍ଡୁ । 17 ମେଃଡାଗ୍‌ଲା ମେଇଂ ଦୁଷ୍ଟରେ ରକମ୍‌ କାଦି ଚଙ୍ଗ୍‌ମ୍ୟାଃଆର୍‌କେ; ବାରି ଇଂସାରେନେ ଅଙ୍ଗୁର୍‌ ରସ୍‌ ଉଗ୍‌ମ୍ୟାଃଆର୍‌କେ । 18 ମାତର୍‌ ଦାର୍ମିକ୍‌ଇଂନେ ଗାଲି ଞ୍ଜିର୍‌ନେ ତାର୍କିଗ୍‌ ରକମ୍‌, ଆଣ୍ଡିନେ କି ସ୍ମି ଜାକ ଆରି ଆରି ତାର୍କିଗ୍‌ ଡିଂଏ । 19 ବାରି, ଦୁସ୍‌ଟ‍ଇଂନେ ଗାଲି ତାଙ୍ଗ୍‌କିଗ୍‌ ରକମ୍‌; ମେଇଂ ଆଣ୍ଡିଅରିଆ ଟେପ୍‌ଲଃ ଲଃଆର୍‌ଏ, ଆତେନ୍‌ ଆମ୍ୟାଃଆର୍‌ ଣ୍ଡୁ । 20 ଅ ନିଂନେ ଉଙ୍ଗ୍‌, ନିଂ ସାମୁଆଁଅରିଆ ମନ୍‌ ବିଃ; ନିଂ ସାମୁଆଁଅରିଆ ନ୍‌ଲୁଗ୍‌ ଆଃନ୍ୟାଲୁଗ୍‌ । 21 ଆତେନ୍‌ ସାପା ନାନେ ମ୍‌ମୁଆଃବାନ୍‌ ଆୱେଲେଃ; ଆତେନ୍‌ ସାପା ନାନେ ହୃଦୟ ବିତ୍ରେ ଜତନ୍‌ ଡିଂଚେଃ ବ । 22 ମେଃଡାଗ୍‌ଲା ଆତେନ୍‌ ଜାଜା ବାଆର୍‌ଏ, ମେଇଂନେ ଆଡ଼ାତ୍ରା ଆତେନ୍‌ ଜିବନ୍‌ ଆରି ସର୍‌ତେ ଗାଗ୍‌ଡ଼େ ନ୍‌ସା ନିମାଣ୍ଡା । 23 ନାନେ ମନ୍‌ ଜାବର୍‌ ଜତନ୍‌ ଡିଂଚେଃ ବ: ମେଃଡାଗ୍‌ଲା ଆତ୍‌ବାନ୍‌ ଜିବନ୍‌ ତାର୍‌ଏ । 24 ନିଜର୍‌ବାନ୍‌ କୁଟ୍‌ ସାମୁଆଁ ବାସଙ୍ଗ୍‌ନେ ତୁମୁଆଃ ସ୍ଲ ଆଃଡିଂ ଆରି ମୁଇଂଜାକେ ଚୁକ୍‌ଲି ଆଃଡିଙ୍ଗ୍‌ନେ ସାମୁଆଁ ବାନ୍‌ ନାନେ ତୁମୁଆଃକେ ଜାବର୍‌ ସ୍ଲ ବ । 25 ନାନେ ମ୍‌ମୁଆଃ ସେଃମଁ କେଲେଃ ଆରି ନାନେ ମ୍‌ମୁଆଁନେ ପତା ନାନେ ସେଃମଁ ସିଦା କେଲେଃ । 26 ନା ନିଜର୍‌ ଞ୍ଚ ସିଦା ଆଃଡିଂ ଆରି ନାନେ ସାପା ଗାଲି ସାନ୍ତି ଡିଂଲେଃ । 27 ଇଞ୍ଚଙ୍ଗ୍‌ତି କି ବେଃସ୍ୟାଃତି ପାକା ଆଆଣ୍ଡେଗେ, ନାନେ ଞ୍ଚ ଦଦ୍ୟାବାନ୍‌ ସ୍ଲ ଆଃଡିଂ ।