1 ଇଃସାଙ୍ଗ୍‌ନେ ମନ୍‌ ପାରାନ୍‌ ମାପ୍‌ରୁନେ ନ୍ତିଅରିଆ ଜର୍‌ନାଡ଼୍ୟାଃ ରକମ୍‌ ଲେଃଏ; ମେଁ ଆଣ୍ଡିପାକା ଇକ୍‌ଚା, ଆନ୍ତ୍‌ପାକା ଆତେନ୍‌ ଆଃଆଣ୍ଡେଏ । 2 ରେମୁଆଁନେ ସାପା ଗାଲି ନିଜର୍‌ କିକେନେଅରିଆ ନିମାଣ୍ଡାଃ, ମାତର୍‌ ମାପ୍‌ରୁ ମନ୍‌ ପାରାନ୍‌ ସାପା ଅଜନ୍‌ ଆଃଡିଂମ୍ୟାଃକେ । 3 ବଲି ବିଃନେ ବାଦୁଲ୍‌ ନ୍ୟାୟ୍‌ ଆରି ସତ୍‌ ବିଚାର୍‌ ମାପ୍‌ରୁ ଜାବର୍‌ ଇକ୍‌ଚା ଡିଂମ୍ୟାଃକେ । 4 ଦୁସ୍‌ଟ ରେମୁଆଁଇଂନେ କୁପିସ ରକମ୍‌ ଜା ଆଂକାର୍‌ କେଏ ଆରି ମନ୍‌ ପାରାନ୍‌ଅରିଆ ଗର୍ବ ଡିଂଏ, ଆତେନ୍‌ ପାପ୍‌ । 5 ସ୍ଲେରେନେ ଜଜନା ବାନ୍‌ ଜବର୍‌ ଦନ୍‌ ବାଡିଂଏ, ମାତର୍‌ ତାନ୍ଦ୍ରା ଡିଂଚେଃ କାମ୍‌ ଡିଂଣ୍ଡ୍ରେ ଅବାବ୍‌ ପାକା ୱେଆର୍‌ଏ । 6 ନାଲେ ବାସଙ୍ଗ୍‌ନେ ତୁମୁଆଃ ବାନ୍‌ ଆର୍ଜେବ୍ନ ଦନ୍‌ ଆଙ୍କ୍‌ଆନ୍ତ୍‌ ଡିଂକ୍ନେ ଅଞ୍ଜୁଗ୍‌ ରକମ୍‌, ଜାଜା ଆତେନ୍‌ ତୁର୍‌ଆର୍‌ଏ, ମେଇଂ ମରନ୍‌ ତୁର୍‌ମ୍ୟାଃଆର୍‌କେ । 7 ଦୁସ୍‌ଟ‍ଇଂନେ କରାପ୍‌ କାମ୍‌ ଆମେଇଂକେ ଆଃୱାଲେଃ ରାଙ୍ଗ୍‌ଡ‍ଏ; ମେଃଡାଗ୍‌ଲା ମେଇଂ ସତ୍‌ କାମ୍‌ ଡିଂନ୍‌ସାଃ ମନା ଡିଂମ୍ୟାଃଆର୍‌କେ । 8 ଦସ୍‌ରେ ଲାଏଃକ୍ନେ ରେମୁଆଁନେ ଗାଲି ଜାବର୍‌ ବାଙ୍ଗ୍‌ଟୁଏଃ; ମାତର୍‌ ପବିତ୍ର ରେମୁଆଁନେ କାମ୍‌ ସିଦା । 9 ୱିଙ୍ଗ୍‌ଆଃ ଡିଂମ୍ୟାଃକ୍ନେ ସେଲାମ୍ବୁଏଃ ଏଃତେ ଅସାର୍‌ ଡୁଆ‍ଅରିଆ ବାସାନେ ବାଦୁଲ୍‌ ଚାତ୍‌ନେ ଆଡ଼ାତ୍ରା ମୁଇଂ କନେ ବାସାନେ ନିମାଣ୍ଡାଃ । 10 ଦୁସ୍‌ଟ ରେମୁଆଁନେ ମନ୍‌ ଦଦ୍ୟା ଚିନ୍ତା ଡିଂଏ, ବାରି, ମେଁନେ ମ୍‌ମୁଆଃଅରିଆ ମେଁନେ କୁଟୁମ୍‌ ମେଃଡିଗ୍‌ ଅନୁଗ୍ରହ ଆବା ଣ୍ଡୁ । 11 ନିନ୍ଦା ଡିଂଣ୍ଡ୍ରେ ଡଣ୍ଡ୍ ବିଃଲା, ଦରମ୍‌ ରେମୁଆଁ ବୁଦିମାନ୍‌ ଡିଂଏ; ବାରି, ବୁଦିମାନ୍‌କେ ଆଃବୁଜେ ବିଃଲା, ମେଁ ଜ୍ଞାନି ଡିଂଏ । 12 ଦରମ୍‌ ରେମୁଆଁ ଦୁସ୍‌ଟନେ ଡୁଆ ବିସ‍ଏରେ ଚିନ୍ତା ଡିଂଏ; ଆତେନ୍‌ ଦୁସ୍‌ଟ ରେମୁଆଁଇଂ ଡିରକମ୍‌ ଉପ୍‌ଡ଼େଚେଃ ଗୁଏଃମ୍ୟାଃଆର୍‌କେ, ଆକେନ୍‌ ନିମାଣ୍ଡାଃ ଚିନ୍ତା ଡିଂମ୍ୟାଃକେ । 13 ମୁଃଡ଼ି ରେମୁଆଁ ଗରିବ୍‌ ରେମୁଆଁନେ ୱାନେ ବାନ୍‌ ନ୍ଲୁଗ୍‌ ତାଙ୍ଗ୍‌ଡାଃଏ, ମେଁ ଡିଗ୍‌ ମନ୍‌କେ ୱାଏ, ମାତର୍‌ ଉତର୍‌ ଆବା ଣ୍ଡୁ । 14 ବୁଃଡ଼ିଚେଃ ଦାନ୍‌ ବିଃଲା ରିସା ସାନ୍ତି ଡିଂଏ, ବାରି, ନ୍‌ସାଃଅରିଆ ବିଃବ୍ନ ଲାଞ୍ଚ୍‌ ଜାବର୍‌ ରିସା ସାନ୍ତି ଆଃଡିଂମ୍ୟାଃକେ । 15 ସତ୍‌ ବେବ‍ଆର୍‌ ଦାର୍ମିକ୍‌ ରେମୁଆଁ ଡାଗ୍ରା ସାର୍ଦାନେ ସାମୁଆଁ; ମାତର୍‌ ଆତେନ୍‌ ଦଦ୍ୟା କାମ୍‌ ଡିଂଣ୍ଡ୍ରେଇଂନେ ଡାଗ୍ରା ବିନାସ୍‌ ରକମ୍‌ । 16 ମୁଃଡ଼ି ରେମୁଆଁ ବୁଦିନେ ଗାଲି ଆନ୍ତାର୍‌ଚେଃ ଅଲେଙ୍ଗ୍‌ଏ, ମେଁ ଗୁଏଃରେ ଏଃତେ ବାସାଏ । 17 ମୁଃଡ଼ି ରେମୁଆଁ ସୁକ୍‌ ଜିବନ୍‌ ବଲ୍‌ ବାଏ, ମେଁ ଗରିବ୍‌ ଡିଂଏ; ବାରି, ଜା ଅଙ୍ଗୁର୍‌ ରସ୍‌ ଆରି ଞ୍ଚୁକେ ବଲ୍‌ ବାଏ, ମେଁ ସାକାର୍‌ ଆଡିଂ ଣ୍ଡୁ । 18 ଦର୍ମ ରେମୁଆଁନେ ମୁକ୍ତି ନ୍‌ସାଃ ଦୁସ୍‌ଟ ରେମୁଆଁ ବିନାସ୍‌ ଡିଂଏ, ବାରି ଦରମ୍‌ ରେମୁଆଁନେ ବାଦୁଲ୍‌ ବିସାସ୍‌ଗାତ୍‌ ଡିଂଣ୍ଡ୍ରେ ଗୁଏଃଏ । 19 ୱିଙ୍ଗ୍‌ଆଃ ଡିଂନେ ସେଲାମ୍ବୁଏଃ ଆରି ରିସା ଡିଂନେ ସେଲାମ୍ବୁଏଃ ଏଃତେ ବାସାନେ ବାଦୁଲ୍‌ ରେମୁଆଁଗଣ୍ଡ୍‌ ଆଲେଃକ୍ନେ ଜାଗା‍ଅରିଆ ବାସାନେ ନିମାଣ୍ଡାଃ । 20 ଜ୍ଞାନିନେ ଡୁଆ‍ ଜାବର୍‌ ଦାମ୍‌ନେ ସମ୍ପତି ଆରି ଞ୍ଚୁ ଲେଃଏ; ମାତର୍‌ ମୁର୍କ ରେମୁଆଁ ଆତେନ୍‌ ନସ୍‌ଟ ଆଃଡିଙ୍ଗ୍‌ବିଃଏ । 21 ମୁଃଡ଼ି ରେମୁଆଁ ଦରମ୍‌ ଆରି ଲିବିସଃନେ ପ୍ଲାଃ ଲେଃଏ, ମେଁ ଜିବନ୍‌ ଆରି ଦାର୍ମିକତା ଆରି ସନ୍‌ମାନ୍‌ ବାଏ । 22 ଜ୍ଞାନି ରେମୁଆଁ ବପୁଣ୍ଡ୍ରେ ଲାଏଃକ୍ନେ ଇନିଅରିଆ ଡେଃଚେଃ ଗାଏ, ବାରି, ଆମେକେ ସାଆସ୍‌ ବିଃଡିଂକ୍ନେ ବପୁ ବିନାସ୍‌ ଆଃଡିଂଏ । 23 ଜା ନିଜର୍‌ ତୁମୁଆଃ ଆରି ନ୍ଲିୟା ରକ୍ୟା ଡିଂଏ, ମେଁ ଦୁକ୍‌ କସ୍‌ଟବାନ୍‌ ନିଜର୍‌ ପାରାନ୍‌ ରକ୍ୟା ଡିଂଏ । 24 ଆଂକାର୍‌ ଡିଂଣ୍ଡ୍ରେ ଆରି ଗର୍ବ ଡିଂନେ ରେମୁଆଁ ନିନ୍ଦା ଡିଂଣ୍ଡ୍ରେ ମ୍ନିରେ ସ୍ନାମୁଁଆଃ ଡିଂଏ, ମେଁ ନିଜର୍‌ କାମ୍‌କେ ଆଃ ନିମାଣ୍ଡାଃ ଡାଗ୍‌ଚେଃ କାମ୍‌ ଡିଂଏ । 25 ଅଲ୍‌ସୁଆ ଆସା ଡିଂବକ୍ନେ ସାମୁଆଁ ମେଁନେ ମରନ୍‌ ଆଃଗଟେଏ; ମେଃଡାଗ୍‌ଲା ମେଁନେ ନ୍ତି କାମ୍‌ ଡିଂନ୍‌ସାଃ ମନା ଡିଂଏ । 26 ଜାଜା ସ୍ମିସୁରେଃସି ଜାବର୍‌ ଲବ୍‌ ଡିଂଆର୍‌ଏ; ମାତର୍‌ ଦରମ୍‌ ରେମୁଆଁ ଦାନ୍‌ ଡିଂଏ, ଲବ୍ରା ଆଡିଂ ଣ୍ଡୁ । 27 ଦୁସ୍‌ଟ‍ଇଂନେ ବଲି ବିଃନେ ଗ୍ରୁନାନେ ସାମୁଆଁ, ମାତର୍‌ ମେଁ କାରାପ୍‌ ଚିନ୍ତାରେ ରାଙ୍ଗ୍‌ୱିଗ୍‌ଲା ଆତେନ୍‌ ଉଃଡ଼ି ଜାବର୍‌ ଗ୍ରୁନା ବାଏ । 28 ମିଚ୍‌ ସାକି ବିନାସ୍‌ ଡିଂଏ; ମାତର୍‌ ମୁଡ଼ି ରେମୁଆଁ ଦ୍ରିଗ୍‌ଏ, ମେଁ ନିମାଣ୍ଡା ସାମୁଆଁ ବାସଙ୍ଗ୍‌ଏ । 29 ଦୁସ୍‌ଟ ରେମୁଆଁ ନିଜର୍‌ ସାର୍ମୁଆଃ ଡାଟ୍‌ ଆଃଡିଂଏ, ମାତର୍‌ ଦରମ୍‌ ରେମୁଆଁ ନିଜର୍‌ ଗାଲି ସାନ୍ତି ଆଃଡିଂଏ । 30 ମାପ୍‌ରୁନେ ବିରୁଦ୍‌ରେ ମେଃଡିଗ୍‌ ଗିଆନ୍‌ କି ବୁଦି କି ଜଜ୍‌ନା କାମ୍‌ ଆବିଃ ଣ୍ଡୁ । 31 ଜୁଜ୍‌ ଦିନା ନ୍‌ସାଃ ଗଡ଼ା ନିମାଣ୍ଡାଃ ତିଆର୍‌ ଡିଂଏ; ମାତର୍‌ ଜିତେନେ ମାପ୍‌ରୁନେ ଇକ୍‌ଚା ଲେଃଲା ଆଃ ଜିତେ ଡିଂଏ ।