1 ଅଙ୍ଗୁର୍‌ ରସ୍‌ ନିନ୍ଦା ଡିଂଣ୍ଡ୍ରେ ରକମ୍‌, ସାଗ୍ରା ୱିଙ୍ଗ୍‌ଆଃଣ୍ଡ୍ରେ ରକମ୍‌; ଜାଡିଗ୍‌ ତେନ୍‌ବାନ୍‌ ବାୟା ଡିଂଏ, ମେଁ ବୁଦିମାନ୍‌ ଣ୍ଡୁ । 2 ଇଃସାଙ୍ଗ୍‌ନେ ରିସା ସିଂଅଁ ଅଃନେ ରକମ୍‌; ଜା ମେଁନେ ରିସା ଆଃତାର୍‌ଏ, ମେଁ ନିଜର୍‌ ପାରାନ୍‌ ବିରୁଦ୍‌ରେ ପାପ୍‌ ଡିଂଏ । 3 ୱିଙ୍ଗ୍‌ଆଃବାନ୍‌ ବିନେ ଡିଂନେ ରେମୁଆଁନେ ଗଉରବ୍‌; ମାତର୍‌ ସର୍‌ତେ ଅଗ୍ୟାନ୍‌ ରେମୁଆଁ ୱିଙ୍ଗ୍‌ଆଃ ଡିଂମ୍ୟାଃଆର୍‌କେ । 4 ଅଲ୍‌ସୁଆ ରାସଃ ନ୍‌ସାଃ ଲିଜ ଆସି ଣ୍ଡୁ; ଏନ୍‌ସାଃ ୱେଃ ବେଲା ମେଁଁ ତୁର୍‌ଲା ଡିଗ୍‌ ମେଃଡିଗ୍‌ ଆବା ଣ୍ଡୁ । 5 ରେମୁଆଁନେ ମନ୍‌ନେ ଜଜ୍‌ନା ସ୍ରିଡ଼୍ୟାଃ ରକମ୍‌, ମାତର୍‌ ବୁଦିମାନ୍‌ ରେମୁଆଁ ଆତେନ୍‌ ଜଗ୍‌ ଆଃତାର୍‌ଏ । 6 ଜାବର୍‌ ରେମୁଆଁ ନିଜର୍‌ ନିଜର୍‌ ଲିବିସଃ ସାମୁଆଁ ବାସଙ୍ଗ୍‌ମ୍ୟାଃଆର୍‌କେ; ମାତର୍‌ ବିସ୍‌ବାସ୍‌ ରେମୁଆଁ ଜାଣ୍ଡେଃ ବା ୟାଏ ? 7 ମୁଃଡ଼ିନେ ଦରମ୍‌ ରେମୁଆଁ ନିଜର୍‌ ଦରମ୍‌ ଗୁନ୍‌ ଏଃତେ ବେବ‍ଆର୍‌ ଡିଂଏ, ମେଁ ଇଡ଼ିଂ ମେଁନେ ଉଙ୍ଗ୍‌ଡେଇଂ ଆସିର୍‌ବାଦ୍‌ ବାଆର୍‌ଏ । 8 ମୁଃଡ଼ି ଇଃସାଙ୍ଗ୍‌ ବିଚାର୍‌ ଡିଂନେ କୁର୍ଚିଅରିଆ କ‍ଏ, ମେଁ ନିଜର୍‌ ମ୍‌ମୁଆଃ ବାନ୍‌ ଦଦ୍ୟା ସାମୁଆଁ ସାପା ଆଃୱାଲେଃ ବିଃଏ । 9 ନେ ନିଜର୍‌ ମନ୍‌ ପର୍‌ଚଲ୍‌ ଆଃଡିଂନେବକେ, ନେ ନିଜର୍‌ ପାପ୍‌ବାନ୍‌ ପର୍‌ଚଲ୍‌ ନେଲାଏଃକେ, ଆକେନ୍‌ ଜାଣ୍ଡେଃ ବାସଙ୍ଗ୍‌ ୟାଆର୍‌ଏ ? 10 ବିନ୍‌ ବିନ୍‌ ରକମ୍‌ନେ କିଜିଗୁଣ୍ଡୁ ଆରି ବିନ୍‌ ବିନ୍‌ ରକମ୍‌ନେ ମାପେନେ ମ୍ବାକ୍ଲିଗ୍‌ ସମାନ୍‌ ବାବ୍‌ରେ ମାପ୍‌ରୁନେ ଗ୍ରୁନାନେ ସାମୁଆଁ । 11 ନିଜର୍‌ କାମ୍‌ ପର୍‌ଚଲ୍‌ ଆରି ନିମାଣ୍ଡାଃ ଲେଃ ଣ୍ଡୁ, ଆକେନ୍‌ ମୁଇଂ ଗଡ଼େଅ ଡିଗ୍‌ ନିଜର୍‌ କାମ୍‌ ବାନ୍‌ ନିଜର୍‌ ବିସ‍ଏରେ ବାସଙ୍ଗ୍‌ଏ । 12 ଦ୍ରିଗ୍‌ନେ ନ୍ଲୁଗ୍‌ ଆରି କିକେନେ ମ୍‌ମୁଆଃ, ଆକେନ୍‌ ମ୍ବାୟାକେ ମାପ୍‌ରୁ ଆଃରେବକେ । 13 ଲେମୁଆଃକେ ବଲ୍‌ ଆବାଗେପା, ଣ୍ଡୁଲା ନା ଗରିବ୍‌ ନାଡିଂଏ; ନାନେ ମ୍‌ମୁଆଃ କେଲେଃ, ତେଲା ନା କାଦିବାନ୍‌ ସାନ୍ତି ନାବାଏ । 14 ବିଆର୍‌ନେ ରେମୁଆଁ ବାସଙ୍ଗ୍‌ଏ, "ନିମାଣ୍ଡାଃ ଣ୍ଡୁ, ନିମାଣ୍ଡାଃ ଣ୍ଡୁ," ମାତର୍‌ ନିଜର୍‌ ଗାଲିଅରିଆ ୱେନେ ବେଲା ଗର୍ବ ଡିଂଏ । 15 ସୁନା ଲାଏଃକେ ଆରି ଗୁଲୁଏ ମୁକ୍ତା ଡିଗ୍‌ ଲାଏଃକେ, ମାତର୍‌ ଗିଆନ୍‌ ଲାଏଃକ୍ନେ ତୁମୁଆଃ ଅମୁଲ୍ୟ ରତ୍ନ । 16 ମାସ୍ନାମୁଆଃ ରେମୁଆଁ ଆତ୍‌ଲା ଜା ଦାଇ ଡିଂଏ, ମେଁନେ ସକାପାଟାଇ ଡୁଙ୍ଗ୍‌ଡଲା; ବାରି, ଜାଡିଗ୍‌ ବିଦେସି ରେମୁଆଁନେ ନ୍‌ସାଃ ଦାଇ ଡିଂଏ, ଆମେକେ ବାନ୍ଦା ବପା । 17 ନାଲେଚେଃ ଆର୍ଜେକ୍ନେ କାଦି ରେମୁଆଁକେ ମ୍ବ୍ରେ ଲାଗେଏ; ମାତର୍‌ ଇଡ଼ିଂ ମେଁନେ ତୁମୁଆଃଅରିଆ ଚୁରେଃବାର୍‌ ବର୍ତି ଡିଂଏ । 18 ଜଜ୍‌ନା ବାନ୍‌ ସର୍‌ତେ ଇକ୍‌ଚା ପୁରନ୍‌ ଡିଂଏ; ବାରି, ନା ନିମାଣ୍ଡାଃ ବୁଦି ସାଃଚେଃ ଜୁଜ୍‌ ଡିଂ । 19 ଜା ସତ୍‌ ମିଚ୍‌ ଆଃମିସୁଃଚେଃ ବାସଙ୍ଗ୍‌ ଅଲେଙ୍ଗ୍‌ଏ, ମେଁ ବୁଃଡ଼ିଲାଏଃକ୍ନେ ସାମୁଆଁ ବାସଙ୍ଗ୍‌ଏ; ଆକେନ୍‌ସାଃ ଜା ନିଜର୍‌ ତୁମୁଆଃ ମେଲା ବ‍ଏ, ମେଁ ଏଃତେ ଆମିସୁଃଗେ । 20 ଜା ନିଜର୍‌ ଆବା କି ନିଜର୍‌ ଇୟାଙ୍ଗ୍‌କେ ଅବିସାପ୍‌ ବିଃଏ, ଜାବର୍‌ ତାଙ୍ଗ୍‌କିଗ୍‌ଅରିଆ ମେଁନେ କୁପିସ ଆଃଲିଗ୍‌ବିଃଏ । 21 ପର୍‌ତୁମ୍‌ ମେଃଡିଗ୍‌ ଅଦିକାର୍‌ ମାର୍ୟାଃତୁଗ୍‌ ମିଲେ ୟାଏ; ମାତର୍‌ ଆତ୍‌ନେ ସାରାସାରି ଆସିର୍ବାଦ୍‌ ଆମିସୁଃ ଣ୍ଡୁ । 22 "ନେ କରାପ୍‌ କାମ୍‌ନେ ଚୁଚୁ ନେବିଃଏ," ନା ଦେକ୍‌ରକମ୍‌ ସାମୁଆଁ ଆବାସଙ୍ଗ୍‌ଗେ, ମାପ୍‌ରୁଅରିଆ ମିସୁଃଚେଃ ଲାଃଲା, ମେଁ ଆନାକେ ରକ୍ୟା ଡିଂଏ । 23 ବିନ୍‌ବିନ୍‌ ରକମ୍‌ କିଜିଗୁଣ୍ଡୁ ମାପ୍‌ରୁନେ ଡାଗ୍ରା ଗ୍ରୁନାନେ ସାମୁଆଁ, ବାରି, କରାପ୍‌ କିଜି ନିମାଣ୍ଡାଃ ଣ୍ଡୁ । 24 ମାପ୍‌ରୁନେବାନ୍‌ ରେମୁଆଁନେ ଞ୍ଚ ଅଲେଙ୍ଗ୍‌ଏ; ତେସାଃ ରେମୁଆଁ ନିଜର୍‌ ଗାଲି ଡିରକମ୍‌ ବୁଜେ ୟାଏ ? 25 ଆକେନ୍‌ ପବିତ୍ର ଡାଗ୍‌ଚେଃ ମାର୍ୟାଃତୁଗ୍‌ ବାସଙ୍ଗ୍‌ନେ ଆରି ମାନତ ଡିଂକ୍ନେ ଇଡ଼ିଂ ବିଚାର୍‌ ଡିଂନେ, ରେମୁଆଁ ଡାଗ୍ରା ବ୍ନେଗ୍‌ ରକମ୍‌ । 26 ଜ୍ଞାନି ଇଃସାଙ୍ଗ୍‌ ଦୁସ୍‌ଟ‍ଇଂକେ ଗଙ୍ଗ୍‌ ଜଗ୍‌ତ୍ଲାଗ୍‌ଚେଃ ମେଇଂନେ ଆଡ଼ାତ୍ରା ଚକ୍‌ ଆଃକିର୍‌ଏ । 27 ରେମୁଆଁନେ ଆତ୍ମା ମାପ୍‌ରୁନେ କୁପିସ, ଆତେନ୍‌ ମନ୍‌ ବିତ୍ରେ ଲାଏଃକ୍ନେ ସାପା ସାମୁଆଁ ତୁର୍‌ଏ । 28 ଲିବିସଃ ଆରି ସତ୍‌ ଗୁନ୍‌ ଇଃସାଙ୍ଗ୍‌କେ ରକ୍ୟା ଡିଂଏ; ବାରି, ଲିବିସଃ ବାନ୍‌ ମେଁନେ କୁର୍ଚି ସାମ୍ବାଲେଏ । 29 ଙ୍ଗିରେଇଂନେ ବପୁ ମେଇଂନେ ଲୁଗଃନେ ତ‍ଅଁ ରକମ୍‌, ଆରି ଡକ୍ରାଇଂନେ ବ୍ଲେକ୍ନେ ଉଗ୍‌ବଃ ମେଇଂନେ ସବା ରକମ୍‌ । 30 ଚିନାବାନାକ୍ନେ ମାଡ଼୍‌ ପାପ୍‌ ପର୍‌ଚଲ୍‌ ଆଃଡିଂଏ, ବାରି, ଡଣ୍ଡ୍ ବିଃକ୍ନେ ଚିନା ବାନା ମନ୍‌ଅରିଆ ଗାଏ ।