ଇତପଦେସ୍‌ 27

1 ନାଁ ଞ୍ଜଃଡ଼େ ବିସ‍ଏରେ ଗର୍ବ ସାମୁଆଁ ଆବାସଙ୍ଗ୍‌ଗେ; ମେଃଡାଗ୍‌ଲା ମେଃସୁଆ ମେଃନେ ଗଟେଏ, ଆତେନ୍‌ ଆନାକେ ଜାନା ଣ୍ଡୁ । 2 ବିନ୍‌ ରେମୁଆଁ ନାନେ ପ୍ରସଂସା ଡିଂଲେଃ, ମାତର୍‌ ନାନେ ନିଜର୍‌ ତୁମୁଆଃ ଆତେନ୍‌ ଆଡିଂଲେଃ; ବିନ୍‌ ରେମୁଆଁ ଡିଂଲେଃ, ମାତର୍‌ ନାନେ ନିଜର୍‌ ତୁମୁଆଃ ଆତେନ୍‌ ଆଡିଂଲେଃ । 3 ବ୍ରି ଆରି ବାଲି ଲିଗିଙ୍ଗ୍‌; ମାତର୍‌ ଅଗ୍ୟାନ୍‌ ରେମୁଆଁନେ ରିସା, ତେନ୍‌ ମ୍ବାକ୍ଲିଗ୍‌ବାନ୍‌ ଡିଗ୍‌ ଲିଗିଙ୍ଗ୍‌ । 4 ରିସା ଲିବିସଃ ମାଲେଃନେ ମନ୍‌ ଆରି ରିସା ବୁରାଣ୍ଡିଆଃ ରକମ୍‌; ମାତର୍‌ ଇର୍ସା ସେଃମଁ ଜାଣ୍ଡେଃ ତୁଆଁ ୟାଏ ? 5 ବୁଃଡ଼ି ବୁଃଡ଼ିଚେଃ ଆଲାଦ୍‌ ଡିଂନେ ବାଦୁଲ୍‌ ସାପାରେ ସେଃମଁ ୱିଙ୍ଗ୍‌ନେ ନିମାଣ୍ଡାଃ । 6 ଆଲାଦ୍‌ ଡିଂଣ୍ଡ୍ରେନେ ମାଡ୍‌ ବିସ୍‌ବାସ୍‌ ଡିଂୟାଡିଂଏ, ମାତର୍‌ ସତ୍ରୁନେ ବୈନ୍ତା‍ଅରିଆ କୁଟ୍‌ ଲେଃଏ । 7 ସୁଲୁଏଃ ବିସେ ଲାଏଃକ୍ନେ ରେମୁଆଁ ଞ୍ଜୁଙ୍ଗ୍‌ ଟାଟାକେ ଗ୍ରୁନା ଡିଂଏ; ମାତର୍‌ କିଡ଼େସଃ ରେମୁଆଁକେ ବିସେଃ ଜିନିସ୍‌ ସାପା ମ୍ବ୍ରେ । 8 ମୁଃଡ଼ି ରେମୁଆଁ ନିଜର୍‌ ଜାଗା ଆନ୍ତାର୍‌ଚେଃ ଅଲେଙ୍ଗ୍‌ଏ, ମେଁ ଉଙ୍ଗ୍‌ଚ୍ୟାଃବାନ୍‌ ୱାଲେଃ ଅଲେଙ୍ଗ୍‌ନେ ପ୍ଲିଗ୍‌ ରକମ୍‌ । 9 ଞ୍ଚୁ ଆରି ନିମାଣ୍ଡାଃ ବାସ୍‌ନାକ୍ନେ ଦୁପ୍‌ ମନ୍‌କେ ସାର୍ଦା ଆଃଡିଂଏ, ସାଙ୍ଗନେ ମନ୍‌ବାନ୍‌ ତାର୍‌ଡିଂକ୍ନେ ସାମୁଆଁ ମ୍ବ୍ରେ ଲାଗେଏ । 10 ନିଜର୍‌ ସାଙ୍ଗକେ ଆରି ଆବାନେ ସାଙ୍ଗକେ ଆଆନ୍ତାର୍‌ଗେ; ବାରି, ନାନେ ବିପଦ୍‌ ବେଲା ନିଜର୍‌ ବୟାଁନେ ଡୁଆ ଆୱେଗେ; ସ୍ଲ ଲାଏଃକ୍ନେ ବୟାଁବାନ୍‌ ଡାଗ୍ରା ଡୁଆନେ ବୟାଁ ନିମାଣ୍ଡାଃ । 11 ଅ ନିଂନେ ଉଙ୍ଗ୍‌, ଜ୍ଞାନବାନ୍‌ ଡିଂ ଆରି ନିଂନେ ମନ୍‌କେ ସାର୍ଦା ଆଃଡିଂ; ତେଲା ନିଂ ନିଜର୍‌ ନିନ୍ଦା ଡିଂଣ୍ଡ୍ରେକେ ଉତର୍‌ ବିଃଇଁୟାଏ । 12 ଚତୁର୍‌ ରେମୁଆଁ ବିପଦ୍‌ କେଚେଃ ନିଜ୍‌କେ ବୁଃଡ଼ିମ୍ୟାଃକେ; ମାତର୍‌ ଦରମ୍‌ ରେମୁଆଁ ସିସେ ୱେଚେଃ ଡଣ୍ଡ୍‌ ବାଏ । 13 ମାସ୍ନାମୁଆଃ ରେମୁଆଁ ନ୍‌ସାଃ ଜା ଦାଇ ଡିଂଏ, ମେଁନେ ସକାପାଟାଇ ରାଙ୍ଗ୍‌ଡଲା; ବାରି, ଜା ବିନ୍‌ରେନେ ସେଲାମ୍ବୁଏଃ ନ୍‌ସାଃ ଜାମିନ୍‌ ଡିଂଏ, ଆମେକେ ବାନ୍ଦା ବ । 14 ମୁଃଡ଼ି ରେମୁଆଁ ଜାବର୍‌ ଞ୍ଜିର୍‌ନୁଗ୍‌ ତଃଡ଼୍ୟାଚେଃ ନିଜର୍‌ ସାଙ୍ଗକେ କିରଚେଃ ଆସିର୍ବାଦ୍‌ ଡିଂଏ, ମେଁନେ ଆତେନ୍‌ କାମ୍‌ ମେଁ ଆଡ଼ାତ୍ରା ଅବିସାପ୍‌ ରକମ୍‌ ଡିଂଏ । 15 ଜାବର୍‌ ଣ୍ଡିଆଃ ଗୁର୍‌ନେ ଦିନା ଜାବର୍‌ ଲଃଡ଼୍ୟାଃ ଆରି ୱିଙ୍ଗ୍‌ଆଃ ଡିଂମ୍ୟାଃକ୍ନେ ସେଲାମ୍ବୁଏଃ, ଏନ୍‌ ମ୍ବାୟା ସମାନ୍‌ । 16 ଜା ଆମେକେ ଆଃଅଟ୍‌କେ, ମେଁ ୱେଡ଼୍ୟାଃକେ ଆଃଅଟ୍‌କେକେ ରକମ୍‌, ଆରି ମେଁନେ ଇଞ୍ଚଙ୍ଗ୍‌ତି ଞ୍ଚୁ ସାଃନେ ରକମ୍‌ । 17 ଡିରକମ୍‌ ଲୁଆ ଲୁଆକେ ଆଃଡିଗ୍‌ଏ, ଦେତ୍‌ରକମ୍‌ ରେମୁଆଁ ନିଜର୍‌ ସାଙ୍ଗନେ ସାର୍ମୁଆଃ ସାର୍ଦା ଆଃଡିଂଏ । 18 ଜାଡିଗ୍‌ ଲିୱା ସ୍ଲାଃ ଜତନ୍‌ ଡିଂଏ, ମେଁ ଆତ୍‌ନେ ଚୁଚୁ ଚଙ୍ଗ୍‌ଏ; ବାରି, ଜା ନିଜର୍‌ ସାକାର୍‌ନେ ସାମୁଆଁ ମାନେଃଏ, ମେଁ ସନ୍‌ମାନ୍‌ ବାଏ । 19 ଡିରକମ୍‌ ଣ୍ଡିଆଃଅରିଆ ସାର୍ମୁଆଃ ତ୍ନାଏ, ଦେତ୍‌ରକମ୍‌ ମନ୍‌ ଆଃ ରେମୁଆଁନେ ଗୁନ୍‌କେ ଆଃସୁଏଃଏ । 20 ଡିରକମ୍‌ ଉଃଡ଼ିବେଲା ପାତାଲ୍‌ ଆରି ବିନାସ୍‌ ଜାଗା ସାନ୍ତି ଆଡିଂ ଣ୍ଡୁ, ଦେତ୍‌ରକମ୍‌ ଅଃତେନ୍‌ବେଲା ରେମୁଆଁନେ ମ୍‌ମୁଆଃ ସାନ୍ତି ଆଡିଂ ଣ୍ଡୁ । 21 କୋୟିରେ ରୁପା, ଉହ୍ମାଇରେ ସୁନା, ପ୍ରସଂସା‍ଅରିଆ ରେମୁଆଁ ପରିକ୍ୟା ବାଏ । 22 ନା କିଆଉଁଆଃ ଏଃତେ ଅଗ୍ୟାନ୍‌ ରେମୁଆଁକେ ଡିକିଡାଗ୍ରା ତଲା ଡିଗ୍‌ ମେଁନେ ମୁର୍କ ବୁଦି ଆୱେ ଣ୍ଡୁ । 23 ନା ନିଜର୍‌ ମେଣ୍ଡା ରାସିନେ ଅବସ୍ତା ମ୍ୟାଃନ୍‌ସାଃ ଜତନ୍‌ ଡିଂନାମ୍ୟାଃକେ, ବାରି ନିଜର୍‌ ପସୁ ରାସି ବିସ‍ଏରେ ନିମାଣ୍ଡାଃ ବାବ୍‌ରେ ଦିଆନ୍‌ ଡିଂ । 24 ମେଃଡାଗ୍‌ଲା ସମ୍ପତି ମାଡାନେ କାଲ୍‌ ଜାକ ଆଲେଃ ଣ୍ଡୁ ଆରି ମୁକୁଟ୍‌ ମେଃନେ ଜୁଗ୍‌ ଜୁଗ୍‌ ଜାକ ଲେଃଏ ? 25 ଚେଃମୁଆଁ ଗୁଆଃଲା କ‍ଅଁଲ୍‌ ଚେଃମୁଆଁ ତ୍ନାଏ, ଆରି କଣ୍ଡାନେ ଚେଃମୁଆଁଇଂ ମୁଇଂଅରିଆ ରିସିଙ୍ଗ୍‌ଏ । 26 ମେଣ୍ଡାନେ ଉଙ୍ଗ୍‌ଡେଇଂ ଆନାକେ ସକାପାଟାଇ ବିଃଆର୍‌ଏ; ବାରି, ଗିମିଃ ନାଁ ଲିଜନେ ମୁଲ୍ୟ ରକମ୍‌ । 27 ବାରି, ଗିମିଃ ତ୍ରାଃଡ଼୍ୟାଃ ନାନେ ଆରି ନାଁ ଡୁଆନେ କାଦି ଆତ୍‌ଲା ସମାନ୍‌ ଡିଂଏ; ଆରି, ନାନେ ଚାକର୍‌ଇଂ ଆତ୍‌ଲା ବ୍ରୁଆଡିକେଃ ନ୍‌ସାଃ ଡିଗ୍‌ ଡିଂଏ ।