1 ଜା ନିଜେକେ ବିନ୍‌ରେବାନ୍‌ ବିନେ ଆଃଡିଂଏ, ମେଁ ନିଜର୍‌ ନିମାଣ୍ଡାଃ ନ୍‌ସାଃ ଚିନ୍ତା ଡିଂଏ ଆରି ସାପା ରକମ୍‌ ନିମାଣ୍ଡାଃ ଗିଆନ୍‌ ବିରୁଦ୍‌ରେ ୱିଙ୍ଗ୍‌ଆଃଏ । 2 ମୁର୍କ ରେମୁଆଁ ବୁଦିରେ ସାନ୍ତି ଆବା ଣ୍ଡୁ, ମାତର୍‌ ନିଜର୍‌ ମନ୍‌ନେ ସାମୁଆଁ ବାସଙ୍ଗ୍‌ନେଅରିଆ ସାନ୍ତି ବାଏ । 3 ଦୁସ୍‌ଟ ପାଙ୍ଗ୍‌ଲା ଗିଆସଃ ପାଙ୍ଗ୍‌ଏ, ବାରି, ଅପମାନ୍‌ ଏଃତେ ନିନ୍ଦା ପାଙ୍ଗ୍‌ଏ । 4 ରେମୁଆଁନେ ତୁମୁଆଃନେ ସାମୁଆଁ ସ୍ରିଡ଼୍ୟାଃ ରକମ୍‌, ବାରି, ଗିଆନ୍‌ ତାର୍‌ନେ ଜାଗା ଜର୍‌ନାଡ଼୍ୟାଃ ରକମ୍‌ । 5 ଦୁସ୍‌ଟନେ ସାପଟ୍‌ ଡିଂନେ କି ବିଚାର୍‌ଅରିଆ ଦରମ୍‌ ରେମୁଆଁ ଆଡ଼ାତ୍ରା ଅନ୍ୟାୟ୍‌ ଡିଂନେ ନିମାଣ୍ଡାଃ ଣ୍ଡୁ । 6 ମୁର୍କନେ ବିନାସ୍‌ ମେଁନେ ତୁମୁଆଃବାନ୍‌ ଡିଂଏ, ବାରି, ମେଁନେ ତୁମୁଆଃ ମାଡ଼୍‌ ଚଙ୍ଗ୍‌ନେ ୱାଏ । 7 ମୁର୍କନେ ତୁମୁଆଃ ମେଁନେ ବିନାସ୍‌ନେ କାରନ୍‌, ବାରି, ମେଁନେ ତୁମୁଆଃ ନିଜର୍‌ ପାରାନ୍‌ନେ ବ୍ନେଗ୍‌ ରକମ୍‌ । 8 ପ୍ରେଗ୍‌ ପ୍ରେଗ୍‌ ବାସଙ୍ଗ୍‌ନେ ରେମୁଆଁନେ ସାମୁଆଁ ଅମ୍ରୁତ୍‌ ରକମ୍‌, ଆତେନ୍‌ ମନ୍‌ ବିତ୍ରେ ୱେଏ । 9 ନିଜର୍‌ କାମ୍‌ଅରିଆ ଜା ଅଲ୍‌ସୁଆ ଡିଂଏ, ମେଁ ବିନାସ୍‌ ଆଃଡିଂନେ ବୟାଁ । 10 ମାପ୍‌ରୁନେ ମ୍ନି ଡାଟ୍‌ ତିଆର୍‌ ଡୁଆ; ଦରମ୍‌ ରେମୁଆଁ ଆତ୍‌ଅରିଆ ଡଚେଃ ରକ୍ୟା ବାଏ । 11 ସାକାର୍‌ନେ ଦନ୍‌ ମେଁନେ ଡାଟ୍‌ ସହର୍‌, ବାରି, ମେଁନେ ବାବ୍‌ନା ତିଆର୍‌ କାନ୍ତି ରକମ୍‌ । 12 ବିନାସ୍‌ ସେଃମଁ ରେମୁଆଁନେ ମନ୍‌ ଗର୍ବ ଡିଂଏ, ବାରି, ସନ୍‌ମାନ୍‌ ବାନେ ସେନୁଗ୍‌ ଦରମ୍‌ ଡିଂଏ । 13 ଜା ଦ୍ରିଗ୍‌ନେ ସେନୁଗ୍‌ ଉତର୍‌ ବିଃଏ, ଆତେନ୍‌ ମେଁ ନ୍‌ସାଃ ଅଗ୍ୟାନ୍‌ ବୁଦି ଆରି ଗିଆସଃନେ ସାମୁଆଁ । 14 ରେମୁଆଁନେ ଆତ୍ମା ମେଁନେ ଦୁକା ସମ୍ବାଲେ ୟାଏ; ମାତର୍‌ ପାକ୍‌ଚିଃକ୍ନେ ଆତ୍ମାକେ ଜାଣ୍ଡେଃ ସମ୍ବାଲେ ୟାଏ ? 15 ବୁଦିମାନ୍‌ନେ ମନ୍‌ ଗିଆନ୍‌ ଆର୍ଜେଏ; ବାରି, ଜ୍ଞାନିନେ ନ୍ଲୁଗ୍‌ ଗିଆନ୍‌ ତୁର୍‌ଏ । 16 ରେମୁଆଁନେ ପୁରୁସ୍‌କାର୍‌ ମେଁ ଆତ୍‌ଲା ଗାଲି ପର୍‌ଚଲ୍‌ ଆଃଡିଂଏ, ବାରି, ମ୍ନାଃ ରେମୁଆଁଇଂନେ ଡାଗ୍ରା ଆମେକେ ଡୁଙ୍ଗ୍‌ପାଙ୍ଗ୍‌ଏ । 17 ମୁଃଡ଼ି ରେମୁଆଁ ପର୍‌ତୁମ୍‌ ନିଜର୍‌ ୱିଙ୍ଗ୍‌ଆଃ ଆଃମ୍ୟାଃଏ, ମେଁ ଦାର୍ମିକ୍‌ ତ୍ନାଏ, ମାତର୍‌ ମେଁନେ କୁଟୁମ୍‌ ପାଙ୍ଗ୍‌ଚେଃ ଆମେକେ ପରିକ୍ୟା ଡିଂଏ । 18 ଚିଟି ତ୍ଲାଗ୍‌ନେ ବାନ୍‌ ୱିଙ୍ଗ୍‌ଆଃ ବନ୍ଦ୍‌ ଡିଂଏ ଆରି ବପୁ ରେମୁଆଁଇଂକେ ବିନେ ଆଃଡିଂଏ । 19 ନା ଡୁଆ ଡାଗ୍ରାଣ୍ଡ୍ରେକେ ସାଇଜ ଡିଙ୍ଗ୍‌ ମେଇଂ ଆନାକେ ମୁଇଂ ଇନିନେ କାନ୍ଥ ରକମ୍‌ ରକ୍ୟା ଡିଙ୍ଗ୍‌ଏ । ଜଦି ପେ ମେଇଙ୍ଗ୍‌ ଏଃତେ କିରମର ପେଡିଙ୍ଗ୍‌ଏ । ମେଇଂ ନା ଆତ୍ଲା କାପାଟ୍‌ନେ ଗାଡ଼ା ବନ୍ଦ୍‌ ଆଃଡିଙ୍ଗ୍‌ଏ । 20 ରେମୁଆଁନେ ସୁଲୁଏଃ ମେଁନେ ତୁମୁଆଃନେ ସାମୁଆଁଅରିଆ ବର୍ତି ଡିଂଏ, ବାରି, ମେଁ ନିଜର୍‌ ତୁମୁଆଃରେ ଆର୍ଜେନେବାନ୍‌ ସାନ୍ତି ଡିଂଏ । 21 ମରନ୍‌ ଆରି ଜିବନ୍‌ ନ୍ଲିୟାନେ ଅଦିକାର୍‌; ଜାଜା ଆମେକେ ନିମାଣ୍ଡାଃ ମ୍ୟାଃଲେଃଆର୍‌କେ, ମେଇଂ ମେଁନେ ଚୁଚୁ ବାଆର୍‌ଏ । 22 ମୁଃଡ଼ି ରେମୁଆଁ କୁନୁଏଃ ବାଏ, ମେଁ ନିମାଣ୍ଡାଃ ଜିନିସ୍‌ ବାଏ ଆରି ମାପ୍‌ରୁନେବାନ୍‌ ଅନୁଗ୍ରହ ବାଏ । 23 ଗରିବ୍‌ ରେମୁଆଁ ଗୁଆରି ଡିଂଏ; ମାତର୍‌ ସାକାର୍‌ ରେମୁଆଁ ସେଃଗୁଆଃ ସାମୁଆଁ ବାସଙ୍ଗ୍‌ଏ । 24 ଜା ଗୁଲୁଏ ସାଙ୍ଗ ଆଃଡିଂଏ, ମେଁ ନିଜର୍‌ ବିନାସ୍‌ ନ୍‌ସାଃ ଆତେନ୍‌ ଡିଂଏ; ମାତର୍‌ ମୁଇଂଡା ଆଲାଦ୍‌ ଡିଂଣ୍ଡ୍ରେ ଲାଏଃକେ, ଜା ବୟାଁ ବାନ୍‌ ବେସି ଡାଗ୍ରା ଲିଗ୍‌ଚେଃ ଲେଃଏ ।