ଇତପଦେସ୍‌ 30

ଆଗୁରନେ ସାମୁଆଁ

1 ଯାକିନେ ଉଙ୍ଗ୍‌ଡେ ଆଗୁରନେ ସାମୁଆଁ ସାପା । ଆତେନ୍‌ ରେମୁଆଁ ଈଥୀୟେଲ୍‌କେ, ଡାଗ୍‌ଲା, ଈଥୀୟେଲ ଆରି ଉକଲକେ ବାସଙ୍ଗ୍‌ମ୍ୟାଃକେ, 2 ଆକେନ୍‌ ସତ୍‌ ନିଂ ରେମୁଆଁ ବାନ୍‌ ମୁର୍‌କ ରକମ୍‌, ବାରି, ନିଂଅରିଆ ରେମୁଆଁନେ ନିମାଣ୍ଡା ଚିନ୍ତା ଣ୍ଡୁ । 3 ନିଂ ଗିଆନ୍‌ ନ୍ନାସିକେକେ, କି ପବିତ୍ର ମାପ୍‌ରୁନେ ବିସ‍ଏରେ ବିଦ୍ୟା ନିଂଅରିଆ ଣ୍ଡୁ । 4 ଜାଣ୍ଡେଃ ସର୍ଗେ ୱେଚେଃ ଆତ୍‌ବାନ୍‌ ଜାର୍‌ଲାଏଃକେ ? ଜାଣ୍ଡେଃ ନିଜର୍‌ ମୁଟାରେ ୱେଡ଼୍ୟାଃକେ ମୁଇଂଅରିଆ ରାଃସିଙ୍ଗ୍‌ବକେ ? ଜାଣ୍ଡେଃ ନିଜର୍‌ ସକାପାଟାଇଅରିଆ କେଣ୍ଡିଆଃ ସାପାକେ ଗାଗ୍‌ବକେ ? ଜାଣ୍ଡେଃ ମଞ୍ଚ୍‌ପୁର୍‌ନେ ସାପା ସୀମା ଆଃରେବକେ ? ମେଁନେ ମ୍ନି ମେଃନେ ? ମେଁନେ ଉଙ୍ଗ୍‌ଡେନେ ମ୍ନି ମେଃନେ ? ଆକେନ୍‌ ଜଦି ନା ମ୍ୟାଃନାଲାଏଃକେ, ତେଲା ଆନିଂ ବାସଙ୍ଗ୍‌ । 5 ପର୍‌ମେସର୍‌ନେ ସାମୁଆଁ ସାପା ପରିକ୍ୟା ଡିଙ୍ଗ୍‌ଲାଏଃକେ; ଜାଣ୍ଡେଇଂ ମେଁ ଏଃତେ ଲେଃଆର୍‌ଏ, ମେଁ ମେଇଂନେ ରକ୍ୟା ଡିଂଏ । 6 ମେଁନେ ସାମୁଆଁଅରିଆ ଆରାଃମିସୁଃଗେ, ନାଡିଂଲା ମେଁ ଆନାକେ ୱିଙ୍ଗ୍‌ଏ, ବାରି, ନା ନାଲେଣ୍ଡ୍ରେ ଡାଗ୍‌ଚେଃ ଜାନା ନାପଡ଼େଏ । 7 ନିଂ ନାନେ ଡାଗ୍ରା ଆକେନ୍‌ ମ୍ବାକ୍ଲିଗ୍‌ ବିଷୟ୍‌ ସାଲ୍ୟାଃମ୍ବକେ, ନିଂ ଗୁଗୁଏଃନେ ସେନୁଗ୍‌ ଆତେନ୍‌ ଆନିଂକେ ବିଃନ୍‌ସାଃ ମନା ଆଡିଂଗେ । 8 ବେକାର୍‌ ଆରି ନାଲେ ସାମୁଆଁ ନିଂବାନ୍‌ ସ୍ଲ ଆଃଡିଂ; ଆନିଂକେ ଗରିବ୍‌ କି ସାକାର୍‌ ଆରାଃଡିଂଗେ; ନିଂ ବାଗ୍‌ନେ ବାଟା ବିଃଚେଃ ଆନିଂକେ ବିଃଚଙ୍ଗ୍‌ । 9 ଣ୍ଡୁଲା ନିଂନେ ଦନ୍‌ ଜାବର୍‌ ଡିଂଲା ଆନାକେ ଆନ୍ତାର୍‌ବିଃଚେଃ ମାପ୍‌ରୁ ଜାଣ୍ଡେଃ ଡାଗ୍‌ଚେଃ ମ୍ବାସଙ୍ଗ୍‌ଏ, ଆରି ଗରିବ୍‌ ଡିଂଲା ଣ୍ଡଙ୍ଗାଏ ଆରି ନିଂନେ ପର୍‌ମେସର୍‌ନେ ମ୍ନିକେ ମିଚ୍‌ ମ୍ବାସଙ୍ଗ୍‌ଏ । 10 ମେଃଡିଗ୍‌ ଚାକର୍‌କେ ମେଁନେ ସାକାର୍‌ ଡାଗ୍ରା ବିରଦ୍‌ ସାମୁଆଁ ଆବାସଙ୍ଗ୍‌ଗେ, ନାଡିଂଲା ମେଁ ଆନାକେ ଅବିସାପ୍‌ ବିଃଏ ଆରି ନା ଦସି ନାଡିଂଏ । 11 ଜାଜା ନିଜର୍‌ ଆବାକେ ଅବିସାପ୍‌ ବିଃଏ, ବାରି, ନିଜର୍‌ ଇୟାଙ୍ଗ୍‌କେ ଆସିର୍ବାଦ୍‌ ଆଡିଂଆର୍‌, ଦେକ୍‌ରକମ୍‌ ରେମୁଆଁଇଂ ଲେଃଆର୍‌କେ । 12 ନିଜର୍‌ ମ୍‌ମୁଆଃଅରିଆ ପର୍‌ଚଲ୍‌, ଦେକ୍‌ରକମ୍‌ ରେମୁଆଁଇଂ ଲେଃଆର୍‌କେ, ଏଲେଡିଗ୍‌ ମେଇଂ ନିଜର୍‌ ମ‍ଇଲାବାନ୍‌ ପର୍‌ଚଲ୍‌ ଡିଂଆଲେଃଆର୍‌କେ । 13 ଦେକ୍‌ରକମ୍‌ ମୁଇଂ ବଂସ ଲାଏଃକେ, ମେଇଂ ନିଜର୍‌ ସାମ୍‌ନାରେ ମ୍ନା, ଆରି ମେଙ୍ଗ୍‌ନେ ମୁଆଃନେ ପତା ଆଡ଼ାତ୍ରା ଡିଙ୍ଗ୍‌ଲେକେ । 14 ଦେକ୍‌ରକମ୍‌ ମୁଇଂ ବଂସ ଲାଏଃଆର୍‌କେ, ମଞ୍ଚ୍‌ପୁର୍‌ବାନ୍‌ ଦୁକ୍‌ ରେମୁଆଁଇଂକେ ଆରି ରେମୁଆଁଇଂ ବିତ୍ରେବାନ୍‌ ଗରିବ୍‌ଇଂକେ ଆଃଗୁଏଃ ନ୍‌ସାଃ ଜା ଜାନେ ଗ୍ନି କାଣ୍ଡା ରକମ୍‌ ଆରି ଜାମା ଗ୍ନି ନ୍‌ସଗ୍‌ ରକମ୍‌ ଡିଂଲାଏଃକେ । 15 ଗ୍ନିଙ୍ଗ୍‌ନେ ମ୍ବାକ୍ଲିଗ୍‌ ସେଲାମ୍ବଃଅ ଲେଃଆର୍‌କେ, ଜାଜା ବାସଙ୍ଗ୍‌ଡିଂଆର୍‌କେ "ବିଃଲା, ବିଃଲା ।" ଞ୍ଜିକ୍ଲିଗ୍‌ ଜିନିସ୍‌ ଲାଏଃକେ, ଆଣ୍ଡିନେକି ଅଃନାଡିଗ୍‌ ସାନ୍ତି ଆଲାଗେ ଣ୍ଡୁ, ବାରି, ଅଁକ୍ଲିଗ୍‌ ଜିନିସ୍‌ ଅଃନାଡିଗ୍‌ ଆବାସଙ୍ଗ୍‌ ଣ୍ଡୁ, "ଜାବର୍‌ ଡିଂଗେ ।" 16 ରାଃଚ୍ୟା, ବାଞ୍ଜି ସେଲାମ୍ବୁଏଃନେ ଗର୍ଭ, ନ୍‌ସୁଆକ୍ନେ ତୁବଃ ଆରି ସୁଆ ଜେ ଅଃନାଡିଗ୍‌ ଆବାସଙ୍ଗ୍‌ ଣ୍ଡୁ, ଜାବର୍‌ ଡିଂଗେ । 17 ମୁଃଡ଼ିନେ ମ୍‌ମୁଆଃ ନିଜର୍‌ ଆବାକେ ଲୁଆଃଏ ଆରି ଇୟାଙ୍ଗ୍‌ନେ ସାମୁଆଁ ମାନେଃନ୍‌ସାଃ ଅମାନି ଡିଂଏ, ଆତେନ୍‌ କଣ୍ଡାନେ ଗିଃଗ୍ୟାଃଇଂ ତଃଆର୍‌ଏ, ବାରି ଚାଃଟିଃଆଁ ପିଗ୍‌ନେ ଉଙ୍ଗ୍‌ଡେଇଂ ଆତେନ୍‌ ଚଙ୍ଗ୍‌ଆର୍‌ଏ । 18 ନିଂନେ ଞ୍ଜିକ୍ଲିଗ୍‌ ସାମୁଆଁ ଜାବର୍‌ କାବା ଲାଗେଡିଂକେ, ବାରି, ଅଁକ୍ଲିଗ୍‌ ସାମୁଆଁ ନିଂ ମ୍ୟାଃନ୍ନାଡିଂକେ ଣ୍ଡୁ । 19 କିତଙ୍ଗ୍‌ଅରିଆ ଚାଃଟିଃଆଁ ପିଗ୍‌ନେ ୱାଲେଃନେ, ବ୍ରିଅରିଆ ବୁବଃ ଅଲେଙ୍ଗ୍‌ନେ, କେଣ୍ଡିଆଃ ବିତ୍ରେ ଜାଆଜ୍‌ ୱେନେ, ସେଲା ଡାଗ୍ରା ଙ୍ଗିରେ ୱେନେ । 20 ଦେତ୍‌ରକମ୍‌ ବେସ୍ୟା କାମ୍‌ ଡିଂନେ ସେଲାମ୍ବୁଏଃ ୱେନେ, ମେଁ ଚଙ୍ଗ୍‌ଚେଃ ତୁମୁଆଃ ଚୁଃବିଃଏ ଆରି ବାସଙ୍ଗ୍‌ଏ, ନେ ମେଃଡିଗ୍‌ କାରାପ୍‌ କାମ୍‌ ଡିଂନେବକେ ଣ୍ଡୁ । 21 ଞ୍ଜିକ୍ଲିଗ୍‌ ସାମୁଆଁନେ ଲିଗିଙ୍ଗ୍‌ରେ ମଞ୍ଚ୍‌ପୁର୍‌ ତର‍ଅର ଡିଂଏ, ବାରି ଅଁକ୍ଲିଗ୍‌ ସାମୁଆଁନେ ଲିଗିଙ୍ଗ୍‌ରେ ଡିଗ୍‌ ଆତେନ୍‌ ମେଁ ସମ୍ବାଲେ ଆୟା ଣ୍ଡୁ । 22 ଚାକର୍‌ ରାଜା ଡିଂଏ ଆରି ମୁର୍କ ସୁଲୁଏଃ ବର୍ତି ଚଙ୍ଗ୍‌ଏ; ବିହେ ଡିଂନେ ଗିନ୍‌ ସେଲାମ୍ବୁଏଃନେ ଲିଗିଙ୍ଗ୍‌; 23 ବାରି, ମୁଃଡ଼ି ଚାକର୍‌ବୁଏଃ ସାକାର୍‌ବୁଏଃନେ ଅଦିକାର୍‌ ବାଏ, ଆତେନ୍‌ ମେଁନେ ଲିଗିଙ୍ଗ୍‌ । 24 ମଞ୍ଚ୍‌ପୁର୍‌ଅରିଆ ଅଁକ୍ଲିଗ୍‌ ଡାହାଁ ପ୍ରାନି ଲେଃଆର୍‌କେ, ମାତର୍‌ ଜାବର୍‌ ବୁଦି, 25 ବୁଇଃଇଂ ଦୁର୍ବଲ୍‌, ଏଲେଡିଗ୍‌ ନ୍ନାଃସେଙ୍ଗ୍‌କିଗ୍‌ କାଦି ରାଃସିଙ୍ଗ୍‌ମ୍ୟାଃଆର୍‌କେ । 26 ଶାଫନ୍‌ ଜନ୍ତୁଇଂ ଦୁର୍ବଲ୍‌ ଜାତି, ଏଲେଡିଗ୍‌ ମେଇଂ ତାଲେବିର୍‌ଅରିଆ ନିଜର୍‌ ନିଜର୍‌ ଉଙ୍ଗ୍‌ଚ୍ୟାଃ ଆଃରେମ୍ୟାଃଆର୍‌କେ । 27 ଗିତାଙ୍ଗ୍‌ଡ଼ିଆଃଇଂନେ ମେଃଡିଗ୍‌ ଇଃସାଙ୍ଗ୍‌ ଣ୍ଡୁ, ଏଲେଡିଗ୍‌ ତେନ୍‌ ସାପାରେ ମାନ୍ଦା ମାନ୍ଦା ଡିଂଚେଃ ଅଲେଙ୍ଗ୍‌ମ୍ୟାଃଆର୍‌କେ । 28 ବାରି, କର୍ଲକେ ନ୍ତି ଏଃତେ ସାଃଡିଂଏ, ଏଲେଡିଗ୍‌ ମେଁ ଇଃସାଙ୍ଗ୍‌ନେ ଡୁଆ ବିତ୍ରେ ଲେଃମ୍ୟାଃକେ । 29 ଞ୍ଜିକ୍ଲିଗ୍‌ ପ୍ରାନି ସୁନ୍ଦର୍‌ ବାବ୍‌ରେ ଅଲେଙ୍ଗ୍‌ମ୍ୟାଃଆର୍‌କେ, ବାରି, ଅଁକ୍ଲିଗ୍‌ ପ୍ରାନି ସୁନ୍ଦର୍‌ ବାବ୍‌ରେ ଅଲେଙ୍ଗ୍‌ମ୍ୟାଃଆର୍‌କେ; 30 ପସୁଇଂନେ ବିତ୍ରେ ବପୁ ଲାଏଃକ୍ନେ ସିଂଅଁ ଜାନେ ସେଃମଁବାନ୍‌ ଡିଗ୍‌ ଆଆଣ୍ଡେ ଣ୍ଡୁ । 31 ଜୁଜ୍‌ ଡିଂନେ ବୁସ, ବଙ୍କାମିଃ ଆରି ଇଃସାଙ୍ଗ୍‌, ଜାନେ ବିରୁଦ୍‌ରେ ଜାଡିଗ୍‌ ଆତଃଡ଼୍ୟାଃଆର୍‌ ଣ୍ଡୁ । 32 ଅଃନା ନା ନିଜ୍‌କେ ମ୍ନାଃ ଆଃଡିଂନ୍‌ସାଃ ମୁର୍କନେ କାମ୍‌ ଡିଂନାବ‍ଏ, ଣ୍ଡୁଲା ଅଃନା ଦଦ୍ୟା ଚିନ୍ତା ଡିଂନାବ‍ଏ, ତେଲା ନିଜର୍‌ ତୁମୁଆଃଅରିଆ ନ୍ତି ବିଃ । 33 ମେଃଡାଗ୍‌ଲା ଡିରକମ୍‌ ତ୍ରାଃଡ଼୍ୟାଃ ରେତେଲା ଲବଣୀ ତାର୍‌ଏ ଆରି ମ୍‌ମୁ ରେତେଲା ମ୍‌ମ୍ୟା ତାର୍‌ଏ; ଦେତ୍‌ରକମ୍‌ ରିସା ସାଃଲେଲା ୱିଙ୍ଗ୍‌ଆଃ ତାର୍‌ଏ ।