1 ଅ ନିଂନେ ଉଙ୍ଗ୍‌, ନାଁ ଅଃନା ନିଂନେ ସାମୁଆଁ ଗ୍ର‍ଅନ୍‌ ନାଡିଂଏ ଆରି ନିଂନେ ଆଦେସ୍‌ ସାପା ମନେ ନାବ‍ଏ; 2 ଅଃନା ଗିଆନ୍‌ ପାକା ନାନେ ନ୍ଲୁଗ୍‌ ନାବିଃଏ ଆରି ବୁଦିଅରିଆ ମନ୍‌ ନାବିଃଏ; 3 ହାଁ, ଅଃନା ନା ନିମାଣ୍ଡାଃ ବାବ୍‌ନାକେ ନାୱାଏ ଆରି ବୁଦି ଆତ୍‌ଲା ଜାବର୍‌ ନାୱାଃସାର୍‌ଏ; 4 ଅଃନା ରୁପାନେ ସତ୍‌କେ ନାତୁର୍‌ଏ ଆରି ବୁଃଡ଼ିକ୍ନେ ଦନ୍‌ ରକମ୍‌ ଆମେକେ ନାପାତୁର୍‌; 5 ତେଲା ନା ମାପ୍‌ରୁନେ ବିସ‍ଏରେ ବୁଟନେ ନାବୁଜେଏ ଆରି ପର୍‌ମେସର୍‌ନେ ବିସ‍ଏରେ ସାପା ଗିଆନ୍‌ ନାବାଏ । 6 ମେଃଡାଗ୍‌ଲା ମାପ୍‌ରୁ ଗିଆନ୍‌ ବିଃଡିଂକେ, ମେଁନେ ତୁମୁଁଆଃବାନ୍‌ ଗିଆନ୍‌ ଆରି ବୁଦି ତାର୍‌ମ୍ୟାଃକେ । 7 ମେଁ ସତ୍‌ ରେମୁଆଁନେ ଆତ୍‌ଲା ଗିଆନ୍‌ ରାଃସିଙ୍ଗ୍‌ମ୍ୟାଃକେ, ମେଁ ଦରମ୍‌ ଡିଂଚେଃ ଲେଃମ୍ୟାଃଆର୍‌କ୍ନେ ରେମୁଆଁଇଂନେ ରକ୍ୟା ଡିଂଣ୍ଡ୍ରେ ରକମ୍‌ ଡିଂଚେଃ ଲେଃମ୍ୟାଃକେ । 8 ଡିରକମ୍‌ ମେଁ ନ୍ୟାୟ୍ ଗାଲି ରକ୍ୟା ଡିଂ ୟାଏ ଆରି ନିଜର୍‌ ବିସ୍‌ବାସ୍‌ ରେମୁଆଁଇଂ ଅଲେଙ୍ଗ୍‌ନେ ଗାଲି ସାମ୍ବାଲେଏ । 9 ତେଲା ନା ଦରମ୍‌ ଜିବନ୍‌ ଆରି ନିମାଣ୍ଡାଃ ଚିନ୍ତା ଆରି ସତ୍‌ ଆରି ମଙ୍ଗଲ୍‌ନେ ସର୍‌ତେ ଗାଲି ନାମ୍ୟାଃଏ । 10 ମେଃଡାଗ୍‌ଲା ଗିଆନ୍‌ ନାନେ ଉର୍ଦେଅରିଆ ଗାଏ, ବାରି ବିଦ୍ୟା ନା ଜିବନ୍‌ନେ ସୁକ୍‌ ରକମ୍‌ ଡିଂଏ; 11 ବୁଜେଣ୍ଡ୍ରେ ନାନେ ରକ୍ୟା ଡିଂଣ୍ଡ୍ରେ ଡିଂଏ, ବୁଦି ଆନାକେ ରକ୍ୟା ଡିଂଚେଃ ବଏ । 12 ଆତ୍‌ଅରିଆ ଜାଜା ଦଦ୍ୟା ସାମୁଆଁ ବାସଙ୍ଗ୍‌ଡିଂଆର୍‌କେ, 13 ଜାଜା ତାଙ୍ଗ୍‌କିଗ୍‌ ଗାଲିଅରିଆ ଅଲେଙ୍ଗ୍‌ନ୍‌ସାଃ ସିଦା ଗାଲି ଆନ୍ତାର୍‌ ମ୍ୟାଃଆର୍‌କେ; 14 ଜାଜା ଦଦ୍ୟା କାମ୍‌ ଡିଂନ୍‌ସାଃ ବଲ୍‌ ବାଆର୍‌ଏ ଆରି ଦୁସ୍‌ଟ‍ଇଂନେ କରାପ୍‌ ସାମୁଆଁ ବାସଙ୍ଗ୍‌ଆର୍‌ଏ; 15 ଜା ନିଜର୍‌ ଗାଲିଅରିଆ କୁଟ୍‌ ସାମୁଆଁ ଆରି ନିଜର୍‌ ନିଜର୍‌ ଗାଲିଅରିଆ ବାଙ୍ଗ୍‌ଟୁଏଃ ଟିଙ୍ଗ୍‌ଟୁଏଃ ଗାଲି ଅଲେଙ୍ଗ୍‌ଣ୍ଡ୍ରେ, ଦେକ୍‌ରକମ୍‌ କରାପ୍‌ ରେମୁଆଁଇଂନେ ଗାଲିବାନ୍‌ ନାନେ ରକ୍ୟା ଡିଂଏ । 16 ଆରି, ମୁଃଡ଼ି ବିନ୍‌ରେନେ ସେଲାମ୍ବୁଏଃ ମ୍ୱ୍ରେ ମ୍ୱ୍ରେ ସାମୁଆଁ ବାସଙ୍ଗ୍‌ଏ, ଜା ନିଜର୍‌ ସେଲା ବେଲାନେ ସାଙ୍ଗକେ ଆନ୍ତାର୍‌ଚେଃ ନିଜର୍‌ ପର୍‌ମେସର୍‌ନେ ନିଅମ୍‌ ଆବଃଏ । 17 ଜାନେ ଡୁଆ ମରନ୍‌ ପାକା, 18 ଆରି ଜାନେ ଗାଲି ଗୁଏଃନେ ପାକା ୱେଏ, ଜା ଡାଗ୍ରା ଅଲେଙ୍ଗ୍‌ଲା ଜାଡିଗ୍‌ ଆଣ୍ଡେ ଆୱିଗ୍‌ ଣ୍ଡୁ ଆରି ଜିବନ୍‌ନେ ଗାଲି ଆରି ଆସାଃ ଣ୍ଡୁ, 19 ଦେକ୍‌ରକମ୍‌ ମୁଇଂ କରାପ୍‌ କାମ୍‌ ଡିଂନେ ସେଲାମ୍ବୁଏଃବାନ୍‌ ନାନେ ରକ୍ୟା ଡିଂଏ । 20 ଆକେନ୍‌ସାଃ ନାଁ ସତ୍‌ ରେମୁଆଁଇଂନେ ଗାଲିଅରିଆ ଅଲେଙ୍ଗ୍‌ ଆରି ଦରମ୍‌ ରେମୁଆଁଇଂନେ ଗାଲି ମାନେଃ, 21 ମେଃଡାଗ୍‌ଲା ଦରମ୍‌ ରେମୁଆଁଇଂ ଦେସ୍‌ଅରିଆ ବାସାଆର୍‌ଏ, ବାରି ଦସ୍‌ ଆଲାଏଃକ୍ନେ ରେମୁଆଁ ଆତ୍‌ଅରିଆ ସାନ୍ତିରେ ଲେଃଆର୍‌ଏ । 22 ମାତର୍‌ ଦୁସ୍‌ଟ‍ଇଂ ଦେସ୍‌ବାନ୍‌ ବିନାସ୍‌ ଡିଙ୍ଗ୍‌ଆର୍‌ଏ ଆରି ବିସ୍‌ବାସ୍‌ଗାତ୍‌ ଡିଂଣ୍ଡ୍ରେଇଂ ଇନିବାନ୍‌ ନୁଆଁ ବିଃଆର୍‌ଏ ।