ଇତପଦେସ୍‌ 7

ବେବିଚାର୍‌ ଡିଂନେ ସେଲାମ୍ବୁଏଃବାନ୍‌ ତରକ୍‌ ସାମୁଆଁ

1 ଅ ନିଂନେ ଉଙ୍ଗ୍‌, ନିଂନେ ସାମୁଆଁ ସାପା ପାଲନ୍‌ ଡିଂ ଆରି ନିଂନେ ଆଦେସ୍‌ ସାପା ନିଜର୍‌ ଡାଗ୍ରା ରାଃସିଙ୍ଗ୍‌ଚେଃ ବ । 2 ନିଂନେ ଆଦେସ୍‌ ସାପା ମାନେଃ, ନାମ୍ବ୍ର‍ଏ ଆରି ନିଜର୍‌ ମ୍‌ମୁଆଃନେ ପୁତ୍‌ଲା ରକମ୍‌ ନିଂନେ ନିଅମ୍‌ ରକ୍ୟା ଡିଂ । 3 ନାନେ ସାପା ଆର୍‌ୱେଃତିଅରିଆ ଆତେନ୍‌ ଗାଗ୍‌; ନାନେ ମନ୍‌ ପାଟାଅରିଆ ଆତେନ୍‌ ସାପା ଗୁଆର୍‌ଚେଃ ବ । 4 ଗିଆନ୍‌କେ ବାସଙ୍ଗ୍‌, ନା ନିଂନେ ତନା, ଆରି ନିମାଣ୍ଡାଃ ବାବ୍‌ନାକେ ନାନେ ନିଜର୍‌ ରେମୁଆଁ ଡାଗ୍‌ଚେଃ ବାସଙ୍ଗ୍‌ । 5 ତେଲା ମେଇଂ ବିନ୍‌ଣ୍ଡ୍ରେନେ ସେଲାମ୍ବୁଏଃବାନ୍‌, ଣ୍ଡୁଲା, ମ୍ବ୍ରେ ମ୍ବ୍ରେ ସାମୁଆଁ ବାସଙ୍ଗ୍‌ନେ ସେଲାମ୍ବୁଏଃବାନ୍‌ ନିଜର୍‌ ଆଣ୍ଡାକେ ଆନ୍ତାର୍‌ଚେଃ ବିନ୍‌ ଆଣ୍ଡାଅରିଆ ୱେନେ ସେଲାମ୍ୱୁଏଃବାନ୍‌ ଆନାକେ ରକ୍ୟା ଡିଂଆର୍‌ଏ । 6 ନିଂ ନିଜର୍‌ ଡୁଆନେ ଜର୍‌କାନେ ଜାଲି ପର୍ଦା ପାକା କିକେଣ୍ଡିଂଗେ; 7 ତେଲା ନିଂ ଙ୍କେକେ, ଦରମ୍‌ ରେମୁଆଁଇଂନେ ବିତ୍ରେ ଆରି ଙ୍ଗିରେଇଂନେ ବିତ୍ରେ ମୁଇଂଡା ବୁଦି ଆଲାଏଃକ୍ନେ ଙ୍ଗିରେ ରେମୁଆଁ, 8 ବେବିଚାର୍‌ ଡିଂନେ ସେଲାମ୍ବୁଏଃନେ ଡୁଆନେ ମୁଲୁଆ ଡାଗ୍ରା ଲାଏଃକ୍ନେ ସାଇ ବିଃଚେ ୱେନେ ବେଲା ମେଁନେ ଡୁଆ ୱେନେ ଗାଲିଅରିଆ ଅଲେଙ୍ଗ୍‌କେ । 9 ଅଃତେନ୍‌ବେଲା ଲମ୍‌ଡିଗ୍‌ ବେଲା, ସ୍ନି ଲଗ୍‌ଡିଙ୍ଗ୍‌ଗେ, ମିଡିଗ୍‌ ଡିଙ୍ଗ୍‌ ଡିଙ୍ଗ୍‌ଗେ ଆରି ତାଙ୍ଗ୍‌କିଗ୍‌ ବେଲା । 10 ଅଃତେନ୍‌ବେଲା କେଲା, ମୁଇଂଡା ସେଲାମ୍ବୁଏଃ ମେଁ ଏଃତେ କୁଡ଼େଃକେ, ମେଁ ବେସ୍ୟା ରୁପ୍‌ ସାଃଲାଏଃଗେ ଆରି ମନ୍‌ଅରିଆ ଚତୁର୍‌ ଲାଏଃଗେ । 11 ମେଁ ଜାବର୍‌ ତୁମୁଆଃରେଗ୍‌ ଆରି ଜିଦ୍‌କାରିଆ, ମେଁନେ ଞ୍ଚ ନିଜର୍‌ ଡୁଆ‍ଅରିଆ ଆଲେଃ ଣ୍ଡୁ । 12 ମେଁ ଅଃନା ଅଃନା ଗାଲିଅରିଆ, ଅଃନା ଅଃନା ଚକ୍‌ଅରିଆ ଲେଃଏ ଆରି ସର୍‌ତେ ମୁଲୁଆ‍ଅରିଆ ଉର୍‌ଚେଃ କଲେଃଏ । 13 ଆତେନ୍‌ ସେଲାମ୍ବୁଏଃ ଆମେକେ ସାଃଚେ ବୈନ୍ତାକେ, ଆରି ମାଗ୍ୟାସଃଚେ ଆମେକେ ବାସଙ୍ଗ୍‌କେ, 14 "ମଙ୍ଗଲ୍‌ ଆତ୍‌ଲା ବଲି ନିଂ ଡାଗ୍ରା ଲାଏଃକେ; ନିଂ ଏଃକେ ନିଜର୍‌ ମାନସିକ୍‌ ପୁରା ଆଃଡିଂମ୍ବକେ । 15 ଏନ୍‌ସାଃ ନା ଏଃତେ କୁଡ଼େଃନ୍‌ସାଃ ବାଏରେ ମ୍ପାଙ୍ଗ୍‌କେ ଆରି ଜତନ୍‌ରେ ନାନେ ସାର୍ମୁଆଃ ତୁତୁର୍‌ନ୍‌ସାଃ ପାଙ୍ଗ୍‌ନ୍ଲେଃକେ, ଆରି ଆନାକେ ମ୍ବାକେ । 16 ନିଂ ଗଦି ଆରି ମିସର୍‌ନେ କାବ୍ରାଚିତ୍ରା ରକମ୍‌ନେ ପାଟେଇ ନିଜର୍‌ ପଲଙ୍କ‍ଅରିଆ ବେଃମ୍ବକେ । 17 ବାରି, ଗନ୍ଧରସ ଆରି ଅଗୁରୁ ଆରି ଡାଲ୍‌ଚିନି ବାନ୍‌ ନିଂନେ ସିଙ୍ଗ୍‌ଲାଃ ବାସ୍‌ନା ଆଃଡିଂମ୍ବକେ । 18 ଏଃଲାପା, ନେଃ ଞ୍ଜିର୍‌ ଜାକ ଆଲାଦ୍‌ରେ ଡୁଲେଗ୍‌ ନେଃଲେପା ଆରି ନେ ଆଲାଦ୍‌ରେ ନିଜ୍‌କେ ସାର୍ଦା ନେଃଡିଙ୍ଗ୍‌ପା । 19 ମେଃଡାଗ୍‌ଲା ଆଣ୍ଡା ଡୁଆ ଣ୍ଡୁ, ମେଁ ସ୍ଲ ଦେସ୍‌ ୱେଲାଏଃକେ । 20 ମେଁ ମୁଇଂ ମୁନା ଡାବୁ ସାଃଚେ ୱେଲାଏଃକେ, ମେଁ ଆର୍କେ ତ୍ନା ବେଲା ଆଣ୍ଡେ ୱିଗ୍‌ଏ ।" 21 ଦେକ୍‌ରକମ୍‌ ଗୁଲୁଏ ମ୍ବ୍ରେ ମ୍ବ୍ରେ ସାମୁଆଁ ବାସଙ୍ଗ୍‌ଚେଃ ମେଁ ମେଁନେ ମନ୍‌ ଗୁଃକେ, ତୁମୁଆଃନେ ମିଟା ମିଟା ସାମୁଆଁ ବାସଙ୍ଗ୍‌ଚେ ଆମେକେ ଟମେଗ୍‌ ଡୁଙ୍ଗ୍‌ୱେକେ । 22 ଡିରକମ୍‌ ଅରେଃ ଗୁଏଃନେସା ୱେଏ ଆରି ଡିରକମ୍‌ ସିକ୍‌ଲି ଏଃତେ ଗାଗ୍‌ବକ୍ନେ ଅଗ୍ୟାନ୍‌ ରେମୁଆଁ ଡଣ୍ଡ୍‌ ବାନ୍‌ସାଃ ୱେଏ, ଦେତ୍‌ରକମ୍‌ ମେଁ ଆତେନ୍‌ ଦାପ୍ରେ ମେଁନେ ପ୍ଲାଃ ପ୍ଲାଃ ୱେକେ । 23 ଆରି, ଡିରକମ୍‌ ପ୍ଲିଗ୍‌ ବ୍ନେଗ୍‌ନିଆ ଲଃଚେ ଜିବନ୍‌ ୱେଗେ ଡାଗ୍‌ଚେ ମାମ୍ୟାଃଚେଃ ଆତ୍‌ଅରିଆ ଲଃନ୍‌ସାଃ ଦାପ୍ରେ ୱାଲେଃଏ, ସାରାସାରି ମେଁନେ ଗ୍ରି ଦେତ୍‌ରକମ୍‌ ଙାଁ ଏଃତେ ଗୁଏଃକେ । 24 ଏନ୍‌ସାଃ ଅ ନିଂନେ ଉଙ୍ଗ୍‌ଇଂ, ନିଂନେ ସାମୁଆଁ ଦ୍ରିଗ୍‌ପା ଆରି ନିଂ ତୁମୁଆଃନେ ସାମୁଆଁଅରିଆ ମନ୍‌ ବିଃପା । 25 ନାନେ ମନ୍‌ ମେଁନେ ଗାଲିଅରିଆ ଆୱେଲେଃ, ନା ମେଁନେ ଗାଲିନିଆ ବୁଲ୍‌ ଗାଲି ପାକା ଅଲେଙ୍ଗ୍‌ଣ୍ଡ୍ରେ ଆଡିଂଗେ । 26 ମେଃଡାଗ୍‌ଲା ମେଁ ଗୁଲୁଏ ରୁଆକେ ଚିନାବାନା ଆଃଡିଂବକେ, ହଁ, ମେଁନେ ଗୁଏଃକ୍ନେ ରେମୁଆଁ ଆଣ୍ଡେଙ୍ଗ୍‌ ଇସାବ୍‌ ଣ୍ଡୁ । 27 ମେଁନେ ଡୁଆ ପାତାଲ୍‌ ୱେନେ ଗାଲି, ଆଣ୍ଡିନେକି ଗୁଗୁଏଃନେ ଡୁଆ‍ଅରିଆ ଆଃୱେଚାଃଏ ।