ଇତପଦେସ୍‌ 3

ଙ୍ଗିରେଇଂନେ ଆତ୍ଲା ନିମାଣ୍ଡା ସାମୁଆଁ

1 ଅ ନିଂନେ ଉଙ୍ଗ୍‌, ନା ନିଂନେ ନିଅମ୍‌ ଆଆବଃଗେ; ମାତର୍‌ ନାନେ ମନ୍‌ ନିଂନେ ଆଦେସ୍‌ ସାପା ପାଲନ୍‌ ଡିଂଲେଃ । 2 ମେଃଡାଗ୍‌ଲା ତେନ୍‌ବାନ୍‌ ମ୍ବ୍ରନେ ଆୟୁସ୍‌ ଜବର୍‌ ଡିଙ୍ଗ୍‌ଏ ଆରି ଜିବନ୍‌ନେ ବରସ୍‌ ସଂକ୍ୟା ଆରି ସାନ୍ତି ଜାବର୍‌ ଡିଂଏ । 3 ଦୟା ଆରି ସତ୍‌ ଆନାକେ ଆଆନ୍ତାର୍‌ଲେଃ; ନିଜର୍‌ ଲୁଗଃନିଆ ମ୍ବାୟାକେ ଗାଗ୍‌ ଆରି ନିଜର୍‌ ମନ୍‌ନେ ପାଟାଅରିଆ ଗୁଆର୍‌ଚେଃ ବ । 4 ଆତେନ୍‌ ଡିଂଲା, ନା ପର୍‌ମେସର୍‌ ଆରି ରେମୁଆଁ ମୁଆଃଅରିଆ ଅନୁଗ୍ରହ ଆରି ନିମାଣ୍ଡାଃ ବିଚାର୍‌ ଲାବ୍‌ ନାଡିଂଏ । 5 ନା ସର୍‌ତେ ମନ୍‌ ପାରାନ୍‌ ଏଃତେ ମାପ୍‌ରୁଅରିଆ ବିସ୍‌ବାସ୍‌ ଡିଂ ଆରି ନିଜର୍‌ ନିମାଣ୍ଡାଃ ବିଚାର୍‌ଅରିଆ ୱେଃଜଙ୍ଗ୍‌ ଆଲଃଗେ । 6 ନିଜର୍‌ ସାପା ଗାଲିଅରିଆ ଆମେକେ ଆଃମ୍ୟାଃପା; ତେଲା ମେଁ ନାନେ ଗାଲି ସାପା ସିଦା ଆଃଡିଂଏ । 7 ନା ନିଜର୍‌ ମୁଆଃଅରିଆ ଜ୍ଞାନି ଆଡିଂଗେ; ମାପ୍‌ରୁକେ ବୁଟମେଗ୍‌ ଆରି କରାପ୍‌ କାମ୍‌ବାନ୍‌ ସ୍ଲ ଡିଂ । 8 ଆତେନ୍‌ ଡିଙ୍ଗ୍‌ଲା ନାଁନେ ଗାଗ୍‌ଡ଼େ ସାପା ନିମାଣ୍ଡା ଲେଃଏ ବାରି ଞ୍ଚ୍ୟାନେ ତ୍ମସାର୍‌ ଡିଂଏ । 9 ନା ନିଜର୍‌ ଦନ୍‌ଅରିଆ ଆରି ସାପା ଆର୍‌ଜେକ୍ନେ ପର୍‌ତୁମ୍‌ ଚୁଚୁଅରିଆ ମାପ୍‌ରୁନେ ସନ୍‌ମାନ୍‌ ଡିଂପା । 10 ତେଲା ନାନେ ପାଃଲିଃ ଜାବର୍‌ ଦନ୍‌ ଏଃତେ ବର୍‌ତି ଡିଂଏ ଆରି ନାନେ କୁଣ୍ଡ୍‌ଅରିଆ ତ୍ମି ଦ୍ରାକ୍ୟା ରସ୍‌ ଲାଃଡ଼୍ୟାଃ ଲଃଏ । 11 ଅ ନିଂନେ ଉଙ୍ଗ୍‌, ମାପ୍‌ରୁନେ ନିମାଣ୍ଡା ବୁଦି ବିଃନେ ସାମୁଆଁ ଗୁର୍ନା ଆଡିଂଗେ ଆରି ମେଁନେ ସାସନ୍‌ଅରିଆ ଆଲିଆ ଆଡିଂଗେ । 12 ମେଃଡାଗ୍‌ଲା ଡିରକମ୍‌ ଆବା ନିଜର୍‌ ଆଲାଦ୍‌ ଡିଂମ୍ୟାଃକ୍ନେ ଉଙ୍ଗ୍‌କେ, ଦେତ୍‌ରକମ୍‌ ମାପ୍‌ରୁ ନିଜର୍‌ ଆଲାଦ୍‌ ଡିଂମ୍ୟାଃକ୍ନେ ରେମୁଆଁକେ ସାସନ୍‌ ଡିଂମ୍ୟାଃକେ । 13 ମୁଃଡ଼ି ରେମୁଆଁ ଗିଆନ୍‌ ବାଏ ଆରି ବୁଦି ଲାବ୍‌ ଡିଂଏ, ମେଁ ଦନ୍ୟ । 14 ମେଃଡାଗ୍‌ଲା ରୁପାନେ ବେପାର୍‌ବାନ୍‌ ମେଁନେ ବେପାର୍‌ ନିମାଣ୍ଡାଃ, ବାରି ପର୍‌ଚଲ୍‌ ସୁନାବାନ୍‌ ମେଁନେ ଲାବ୍‌ ମ୍ନାଃ । 15 ଆତେନ୍‌ ମୁକ୍ତାବାନ୍‌ ଜାବର୍‌ ମୁଲ୍ୟବାନ୍‌, ବାରି ମେଃଡିଗ୍‌ ନିଜର୍‌ ଜିନିସ୍‌ ମେଁ ରକମ୍‌ ସମାନ୍‌ ଆଡିଙ୍ଗ୍‌ ଣ୍ଡୁ । 16 ମେଁନେ ବେଃସ୍ୟାଃ ନ୍ତିଅରିଆ ଚ୍ଲେ ଆୟୁସ୍‌, ମେଁନେ ଇଞ୍ଚଙ୍ଗ୍‌ତିଅରିଆ ଦନ୍‌ ଆରି ସନ୍‌ମାନ୍‌ ଲେଃମ୍ୟାଃକେ । 17 ମେଁନେ ଗାଲି ସାପା ସୁକ୍‌ ବିଃନେ ଗାଲି ଆରି ମେଁନେ ସାପା ଗାଲି ସାନ୍ତିନେ ଗାଲି । 18 ଜା ମେଁ ଆଡ଼ାତ୍ରା ଆସା ବଏ, ମେଇଂନେ ଆଡ଼ାତ୍ରା ମେଁ ଜିବନ୍‌ ବିଃନେ ସ୍ଲାଃ ରକମ୍‌; ମୁଃଡ଼ି ରେମୁଆଁ ଆତେନ୍‌ ସାଃଚେଃ ବମ୍ୟାଃକେ, ମେଁ ଦନ୍ୟ । 19 ମାପ୍‌ରୁ ଗିଆନ୍‌ବାନ୍‌ ମଞ୍ଚ୍‌ପୁର୍‌ ଆଃରେକେ, ମେଁ ବୁଦିମାନ୍‌ କିତଙ୍ଗ୍‌ଇନି ସାନ୍ତି ଆଃଡିଂକେ । 20 ମେଁନେ ଗିଆନ୍‌ରେ ସ୍ରି ଜାଗାବାନ୍‌ ଣ୍ଡିଆଃ ଲାଃଡ଼୍ୟାଃ ତଃଡ଼୍ୟାଃଏ, ବାରି ତ୍ରିଗ୍‌ଡ୍ୟାଃବାନ୍‌ ଅଁସ୍‌ଡ଼୍ୟାଃ ଟପା ଟପା ଲଃଏ । 21 ଅ ନିଂନେ ଉଙ୍ଗ୍‌, ଆକେନ୍‌ ସାପା ନାନେ ମୁଆଃବାନ୍‌ ଆୱେଲେଃ, ନା ଆତେନ୍‌ ଗିଆନ୍‌ ଆରି ସିକ୍ୟା ରକ୍ୟା ଡିଂ । 22 ଆତେନ୍‌ ନା ପାରାନ୍‌ନେ ଜିବନ୍‌ ଆରି ଲୁଗଃନେ ମାଲିସରା ଡିଂଏ । 23 ତେଲା ନା ନିଜର୍‌ ଗାଲିଅରିଆ ମାବ୍‌ଟଚେଃ ନା‍ଅଲେଙ୍ଗ୍‌ଏ, ବାରି ନାନେ ଞ୍ଚ ଆଟେପ୍‌ଲଃ ଣ୍ଡୁ । 24 ଡୁଲେଗ୍‌ନେ ବେଲା ନାଁ ନାବୁଟ ଣ୍ଡୁ, ହାଁ, ନା ନାଡୁଲେଗ୍‌ଏ ଆରି ନାନେ ଲେମୁଁଆଃ ସୁକ୍‌ ରକମ୍‌ ଡିଂଏ । 25 ମାର୍ୟାଃତୁଗ୍‌ ତାର୍‌କ୍ନେ ଡଣ୍ଡ୍‌କେ କି ଦୁସ୍‌ଟ‍ଇଂନେ ବିନାସ୍‌ ଆଃଡିଙ୍ଗ୍‌ ପାଙ୍ଗ୍‌ଡିଙ୍ଗ୍‌କ୍ନେ ବିନାସ୍‌କେ ଆବ୍‌ଟଗେ । 26 ମେଃଡାଗ୍‌ଲା ମାପ୍‌ରୁ ନାନେ ସାପଟ୍‌ ଡିଂଏ, ମେଁ ନାନେ ଞ୍ଚ ବ୍ନେଗ୍‌ବାନ୍‌ ରକ୍ୟା ଡିଂଏ । 27 ସାଆଜ୍ୟ ଡିଂନେ ବପୁ ନା ନ୍ତିଅରିଆ ଲେଃଲା, ଟିକ୍‌ ଦାନ୍‌ ବିଃନେ ରେମୁଆଁଇଂକେ ମନା ଆଡିଂଗେ । 28 ନିଜର୍‌ ଡାଗ୍ରା ଜିନିସ୍‌ ଲେଃଲା, ୱେଲା, ବାର୍‌ମୁଇଂତର୍‌ ପାଙ୍ଗ୍‌ଲା, ନିଂ ଞ୍ଜଃଡ଼େ ମ୍ବିଃଏ, ଆକେନ୍‌ ନାନେ ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେକେ ଆବାସଙ୍ଗ୍‌ଗେ । 29 ନାନେ ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେ ନା ଡାଗ୍ରା ମାବ୍‌ଟଚେଃ ବାସାକେସାଃ ମେଁନେ ବିରୁଦ୍‌ରେ କାରାପ୍‌ ଚିନ୍ତା ଆଡିଂଗେ । 30 ରେମୁଆଁ ନାନେ କେତି ଆଡିଂଲା, ସରାଃସିରିଃ ମେଁ ଏଃତେ ବିରଦ୍‌ ଆଡିଂଗେ । 31 ୱିଙ୍ଗ୍‌ଆଃନେ ରେମୁଆଁ ଆଡ଼ାତ୍ରା ଇର୍ସା ଆଡିଂଗେ, ବାରି ମେଁନେ ମେଃଡିଗ୍‌ ଗାଲି ଆସ୍ରିଗେ । 32 ମେଃଡାଗ୍‌ଲା କୁଟ୍‌ରିଆ ରେମୁଆଁକେ ମାପ୍‌ରୁ ଗ୍ରୁନା ଡିଙ୍ଗ୍‌ମ୍ୟା, ମାତର୍‌ ଦରମ୍‌ ରେମୁଆଁଇଂନେ ଏଃତେ ମେଙ୍ଗ୍‌ନେ ଆଲାଦ୍‌ନେ ବାଃଲିର୍‌ବାଃତା ଲେଃଏ । 33 ପାପି‍ ରେମୁଆଁଇଂନେ ଡୁଆ‍ଅରିଆ ମାପ୍‌ରୁନେ ଅବିସାପ୍‌ ଲେଃଏ, ମାତର୍‌ ମେଁ ଦରମ୍‌ ରେମୁଆଁଇଂନେ ଡୁଆକେ ଆସିର୍ବାଦ୍‌ ଡିଂମ୍ୟାଃକେ । 34 ଜଦି ଡିଗ୍‌ ମେଁ ନିନ୍ଦା ଡିଂଣ୍ଡ୍ରେଇଂକେ ନିନ୍ଦା ଡିଂମ୍ୟାଃକେ, ଏଲେଡିଗ୍‌ ମେଁ ଦରମ୍‌ ରେମୁଆଁଇଂକେ ଦୟା ବିଃମ୍ୟାଃକେ । 35 ଜ୍ଞାନି ରେମୁଆଁ ସନ୍‌ମାନ୍‌ନେ ଅଦିକାରି ଡିଂଆର୍‌ଏ, ମାତର୍‌ ଅଗ୍ୟାନି‍ଇଂନେ ଆତ୍‌ଲା ଗିଆସଃମାଲା ଡିଙ୍ଗ୍‌ଏ ।