1 ଲମୂୟେଲ ଇଃସାଙ୍ଗ୍‌ନେ ସାମୁଆଁ: ଡାଗ୍‌ଲା, ମେଁନେ ଇୟାଙ୍ଗ୍‌ଡେ ଆମେକେ ମେଃନେ ଆଃସିକେବଗେ, ଆତେନ୍‌ ସାମୁଆଁ । 2 ଅ ନିଂନେ ଉଙ୍ଗ୍‌, ଅ ନିଂନେ ଗର୍ବେନେ ଉଙ୍ଗ୍‌, ଅ ନିଂନେ ମାନତ ଡିଂଚେଃ ମ୍ବାକ୍ନେ ଉଙ୍ଗ୍‌, ନେଙ୍ଗ୍‌ ଆନାକେ ମେଃ ମ୍ବାସଙ୍ଗ୍‌ଏ ? 3 ନା ସେଲାମ୍ବୁଏଃଇଂକେ ନିଜର୍‌ ବପୁ ଆବିଃଗେ, କି ଇଃସାଙ୍ଗ୍‌ଇଂ ଆଣ୍ଡିଅରିଆ ଗୁଏଃଆର୍‌ଏ, ଆତ୍‌ଅରିଆ ଆୱେଗେ । 4 ଅ ଲମୂୟେଲ, ଇଃସାଙ୍ଗ୍‌ଇଂ ଅଙ୍ଗୁର୍‌ ରସ୍‌ ଉଗ୍‌ନେ ନିମାଣ୍ଡାଃ ଣ୍ଡୁ, ଇଃସାଙ୍ଗ୍‌ଇଂନେ ଟିକ୍‌ ଣ୍ଡୁ; ଣ୍ଡୁଲା ସାଗ୍ରା ଆଣ୍ଡିକାଃ ଡାଗ୍‌ଚେଃ ବାସଙ୍ଗ୍‌ନେ ସାସନ୍‌ ଡିଂଣ୍ଡ୍ରେଇଂନେ ଟିକ୍‌ ଣ୍ଡୁ । 5 ମେଇଂ ଉଗ୍‌ଆର୍‌ଲା, ନିଅମ୍‌ ଆବଃଚେଃ ଦୁକ୍‌ ରେମୁଆଁ ସାପାରେନେ ବିଚାର୍‌ ଉଲ୍‌ଟା ଆଃଡିଂଏ । 6 ତେଃଗୁଏଃନେ ରେମୁଆଁକେ ସାଗ୍ରା ଆଃଉଗ୍‌ ଆରି ମନ୍‌ଅରିଆ ଦୁକ୍‌ରେ ଲାଏଃକ୍ନେ ରେମୁଆଁକେ ଅଙ୍ଗୁର୍‌ ରସ୍‌ ବିଃ । 7 ଆତେନ୍‌ ରେମୁଆଁ ଉଗ୍‌ଚେଃ ନିଜର୍‌ ଗରିବ୍‌ ଅବସ୍ତା ଆବଃଲେଃ ଆରି ନିଜର୍‌ କସ୍‌ଟ ଆରି ମନ୍‌ଅରିଆ ଆଡିଂଲେଃ । 8 କନ୍ଦା ରେମୁଆଁନେ ପାକା ଆରି ସର୍‌ତେ ଅରେଉଙ୍ଗ୍‌ ପାକା ନିଜର୍‌ ତୁମୁଆଃ ଆଃତର୍ସା । 9 ତୁମୁଆଃ ଆଃତର୍ସାଚେଃ ସତ୍‌ ବିଚାର୍‌ ଡିଂ, ବାରି, ଦୁକ୍‌ ରେମୁଆଁ ଆରି ଗରିବ୍‌ ରେମୁଆଁଇଂନେ ନିମାଣ୍ଡାଃ ବିଚାର୍‌ ଡିଂ ।

10 ଗୁନ୍‌ବତି ସେଲାମ୍ବୁଏଃ ଜାଣ୍ଡେଃ ବା ୟାଏ ? ମୁକ୍ତାବାନ୍‌ ଡିଗ୍‌ ମେଁନେ ମୁଲ୍ୟ ଜାବର୍‌ । 11 ମେଁନେ ଆଣ୍ଡାନେ ମନ୍‌ ମେଁଅରିଆ ଆସା ଡିଂଏ, ବାରି, ମେଁନେ ଲାବ୍‌ନେ ଅବାବ୍‌ ଆଡିଂ ଣ୍ଡୁ । 12 ମେଁ ଜିବନ୍‌ ଜାକ ଆଣ୍ଡାନେ କେତି ମାଡିଂଚେଃ ମଙ୍ଗଲ୍‌ ଡିଂଏ । 13 ମେଁ ମେଣ୍ଡା ଉଗ୍‌ବଃ ଆରି ମସିନା* ତୁର୍‌ଚେଃ ସାନ୍ତିରେ ନିଜର୍‌ ନ୍ତି ଏଃତେ କାମ୍‌ ଡିଂଏ । 14 ମେଁ ବେପାର୍‌ ଜାଆଜ୍‌ ରକମ୍‌; ମେଁ ସ୍ଲବାନ୍‌ ନିଜର୍‌ କାଦି ଡୁଙ୍ଗ୍‌ପାଙ୍ଗ୍‌ଏ । 15 ଏଲେଡିଗ୍‌ ମେଁ ଞ୍ଜିର୍‌ନୁଗ୍‌ ତଃଡ଼୍ୟାଃଏ ଆରି ନିଜର୍‌ କୁଟୁମ୍‌ ସାପାରେନେ ନ୍‌ସାଃ କାଦି ଆଃରେଏ ଆରି ଚାକର୍‌ବୁଏଃଇଂକେ ବିନ୍‌ ବିନ୍‌ କାମ୍‌ ବିଃଏ । 16 ମେଁ ଲିଜନେ ସାମୁଆଁ ବୁଜେଚେଃ ଆତେନ୍‌ ବିଆର୍‌ଏ, ମେଁ ନିଜେ ଆର୍ଜେକ୍ନେ ଡାବୁ ବିଃଚେଃ ଡୁଗ୍‌ଡିନିଆ ସ୍ଲା ଉଙ୍ଗ୍‌ଏ । 17 ମେଁ ବପୁ ଏଃତେ ନିଜର୍‌ ନ୍‌ସାଃ ଗାଗ୍‌ଏ ଆରି ନିଜର୍‌ ନ୍ତି ବପୁ ଆଃଡିଂଏ । 18 ନିଜର୍‌ ବେପାର୍‌ ଜେ ଲାବ୍‌ ବିଃଏ, ଆକେନ୍‌ ମେଁ ବୁଜେଏ; ବାରି, ମିଡିଗ୍‌ ବେଲା ମେଁନେ କୁପିସ ଆଲିଗ୍‌ ଣ୍ଡୁ । 19 ମେଁ ନିଜର୍‌ ନ୍ତି ଏଃତେ ସୁତାକେ ତଗ୍‌ଚେ ଆରି ନିଜର୍‌ ସକାକେ ନିଜେ ଆଃରେମ୍ୟାକେ । 20 ମେଁ ଦୁକ୍‌ ରେମୁଆଁଇଂନେ ଆଡ଼ାତ୍ରା ମନ୍‌ ସାର୍ଦାରେ ବିଃଏ ଆରି ଗରିବ୍‌ ରେମୁଆଁଇଂନେ ଆଡ଼ାତ୍ରା ନିଜର୍‌ ନ୍ତି ଆଃଚ୍ଲେଏ । 21 ମେଁ ଅଁସ୍‌ଡ଼୍ୟାଃ ନ୍‌ସାଃ ନିଜର୍‌ ଡୁଆ ବିସ‍ଏରେ ଆବ୍‌ଟ ଣ୍ଡୁ; ମେଃଡାଗ୍‌ଲା ମେଁନେ ସର୍‌ତେ ଡୁଆଣ୍ଡ୍ରେ ଉସୁମ୍‌ ତଗ୍‌ରିଆ ସଃମ୍ୟାଃଆର୍‌କେ । 22 ମେଁ ନିଜର୍‌ ଆତ୍‌ଲା କାବ୍ରାଚିତ୍ରା କୁଇନେ ସକାପାଟାଇ ଆଃରେଏ, ବାରି, ମେଁ ତୁଲୁଏ ପାତଲ୍ ସୁତା ସକାପାଟାଇ ଆରି କଃଡ଼େଆଁ ବାନା ସକାପାଟାଇ ସଃଏ । 23 ମେଁନେ ଆଣ୍ଡା ଦେସ୍‌ନେ ମ୍ନାଃ ରେମୁଆଁଇଂନେ ଏଃତେ ଗୁଲିସାଙ୍ଗ୍‌ଅରିଆ କୁକନେ ବେଲା ମ୍ୟାଃଡିଂଏ । 24 ମେଁ ତୁଲୁଏ ସକାପାଟାଇ ଆଃରେଚେଃ ସ‍ଏ, ବାରି, ବେପାରିଇଂନେ ନ୍ତିଅରିଆ ଗ୍ନେଗ୍‌ସାଃ ସଃଏ । 25 ବପୁ ଆରି ସନ୍‌ମାନ୍‌ ମେଁନେ ସକାପାଟାଇ ରକମ୍‌; ବାରି, ଇଡ଼ିଂଡେ ବିସ‍ଏରେ ମେଁ ଆବ୍‌ଟ ଣ୍ଡୁ । 26 ମେଁ ଗିଆନ୍‌ଅରିଆ ନିଜର୍‌ ତୁମୁଆଃ ଆଃତର୍ସାଏ; ମେଁନେ ନ୍ଲିୟା‍ଅରିଆ ଲିବିସଃନେ ନିଅମ୍‌ ଲେଃଏ । 27 ମେଁ ନିଜର୍‌ ଡୁଆଣ୍ଡ୍ରେନେ ବେବ‍ଆର୍‌ଅରିଆ ଦିଆନ୍‌ ଡିଂଏ, ବାରି, ଅଲ୍‌ସୁଆରେ ମେ ଜିବନ୍‌ ଆକାଟେ ଣ୍ଡୁ । 28 ମେଁନେ ଉଙ୍ଗ୍‌ଡେଇଂ ତଃଡ଼୍ୟାଃଚେଃ ଆମେକେ ଦନ୍ୟ ଦନ୍ୟ ଡାଗ୍‌ଚେଃ ବାସଙ୍ଗ୍‌ଆର୍‌ଏ ଆରି ମେଁନେ ଆଣ୍ଡା ଆଃ ଆମେକେ ଦେକ୍‌ରକମ୍‌ ପ୍ରସଂସା ଡିଂଏ; 29 "ଗୁଲୁଏ ସେଲାଇଂ ଗୁନ୍‌ ଆଃସୁଏଃବ‍ଆର୍‌କେ, ମାତର୍‌ ନା ତେନ୍‌ ସାପାରେନେ ବାନ୍‌ ମ୍ନାଃ ।" 30 ମେଁନେ ରୁପ୍‌ରେ ରସେନେ ମିଚ୍‌ ରକମ୍‌ ଆରି ମେଁନେ ସବା ସରାଃ; ମାତର୍‌ ମୁଃଡ଼ି ସେଲାମ୍ବୁଏଃ ମାପ୍‌ରୁକେ ବୁଟଏ, ମେଁ ପ୍ରସଂସା ବାଏ । 31 ମେଁ କାମ୍‌ ଡିଂକ୍ନେ ଚୁଚୁ ଆମେକେ ବିଃ, ବାରି, ମେଁନେ ନିଜର୍‌ କାମ୍‌ ଗୁଲିସାଙ୍ଗ୍‌ଅରିଆ ମେଁନେ ପ୍ରସଂସା ଡିଂଲେଃ ।