ଇତପଦେସ୍‌ 28

1 ଜା ଆନୁଆଁଲା ଡିଗ୍‌ ଦୁସ୍‌ଟ ଲାଗ୍‌ଡ‍ଏ; ମାତର୍‌ ଦାର୍ମିକ୍‌ଇଂ ସିଂଅଁ ରକମ୍‌ ସାଆସ୍‌ ରେମୁଆଁ । 2 ଦେସ୍‌ନେ ପାପ୍‌ ନ୍‌ସାଃ ଆତ୍‌ନେ ନେତା ଗୁଲୁଏ ଡିଂଆର୍‌ଏ; ମାତର୍‌ ବୁଦିମାନ୍‌ ଆରି ଜ୍ଞାନି ରେମୁଆଁଇଂନେ ବାନ୍‌ ଆତେନ୍‌ ଦେସ୍‌ଅରିଆ ଜାବର୍‌ସି ନ୍‌ସାଃ ଲେଃଆର୍‌ଏ । 3 ମୁଃଡ଼ି ରେମୁଆଁ ଗରିବ୍‌ ରେମୁଆଁକେ ଅନ୍ୟାୟ୍‌ ଡିଂଏ, ମେଁ କିଆଉଁଆଃ ନସ୍‌ଟ ଆଃଡିଂନେ ଗୁର୍‌ନେ ଣ୍ଡିଆଃ ରକମ୍‌ ଡିଂଏ; ଆତ୍‌ତେ କାଦିନେ ଅବାବ୍‌ ଡିଂଏ । 4 ନିଅମ୍‌ ଆନ୍ତାର୍‌ଣ୍ଡ୍ରେ ଦୁସ୍‌ଟ‍ଇଂକେ ପ୍ରସଂସା ଡିଂମ୍ୟାଃଆର୍‌କେ, ବାରି, ଆଦେସ୍‌ ମାନେଃଣ୍ଡ୍ରେ ମେଇଂନେ ଏଃତେ ବିରଦ୍‌ ଡିଂମ୍ୟାଃଆର୍‌କେ । 5 ଦଦ୍ୟା ରେମୁଆଁଇଂ ନ୍ୟାୟ୍‌ ଆବୁଜେଆର୍‌ ଣ୍ଡୁ, ମାତର୍‌ ମାପ୍‌ରୁକେ ତୁତୁର୍‌ଣ୍ଡ୍ରେ ସାପା ସାମୁଆଁ ବୁଜେଆର୍‌ଏ । 6 ମ୍ୱାକ୍ଲିଗ୍‌ ଗାଲି ଅଲେଙ୍ଗ୍‌ନେ କୁଟ୍‌ ରେମୁଆଁ ସାକାର୍‌ ଡିଂଲା ଡିଗ୍‌ ମେଁ ବାଦୁଲ୍‌ ନିଜର୍‌ ଇକ୍‌ଚାରେ ଅଲେଙ୍ଗ୍‌ନେ ଗରିବ୍‌ ରେମୁଆଁ ନିମାଣ୍ଡାଃ । 7 ଜା ନିଅମ୍‌ ମାନେଃଏ, ମେଁ ବୁଦିମାନ୍‌ ଗଡ଼େଅ; ବାରି, ଜା କାଉରା ରେମୁଆଁଇଂନେ ସାଙ୍ଗ ଡିଂଏ, ମେଁ ନିଜର୍‌ ଆବାକେ ଆଃଗିଆସଃଏ । 8 ମୁଃଡ଼ି ରେମୁଆଁ ପିଲ୍‌ ଆରି ଜାବର୍‌ ବାନ୍‌ ନିଜର୍‌ ସମ୍ପତି ଜାବର୍‌ ଆଃଡିଂଏ, ମେଁ ଗରିବ୍‌ ଆଡ଼ାତ୍ରା ଲିବିସଃ ଡିଂଣ୍ଡ୍ରେ ନ୍‌ସାଃ ଆତେନ୍‌ ରାଃସିଙ୍ଗ୍‌ଏ । 9 ମୁଃଡ଼ି ରେମୁଆଁ ନିଅମ୍‌ ଦ୍ରିଗ୍‌ନ୍‌ସାଃ ନିଜର୍‌ ନ୍ଲୁଗ୍‌ ଆବିଃ‍ ଣ୍ଡୁ, ମେଁନେ ପାର୍‌ତନା ଆଃ ଗ୍ରୁନାନେ ସାମୁଆଁ ଡିଂଏ । 10 ମୁଃଡ଼ି ରେମୁଆଁ ଦରମ୍‌ ରେମୁଆଁକେ ଦଦ୍ୟା ଗାଲି ପାକା ୱାରାଙ୍ଗ୍‌ୱେଏ, ମେଁ ନିଜେ ଗଃବକ୍ନେ କୁରୁଅରିଆ ମେଁ ମନ୍‌କେ ଲଃଏ; ମାତର୍‌ ଦରମ୍‌ ରେମୁଆଁ ନିମାଣ୍ଡାଃ ଅଦିକାର୍‌ ଡିଂଏ । 11 ସାକାର୍‌ ନିଜର୍‌ ମ୍‌ମୁଆଃଅରିଆ ଜ୍ଞାନି; ମାତର୍‌ ବୁଦିମାନ୍‌ ଗରିବ୍‌ ରେମୁଆଁ ମେଁନେ ପରିଚୟ୍‌ ଡୁଙ୍ଗ୍‌ୱେଏ । 12 ଦାର୍ମିକ୍‌ଇଂ ଜିତେଲା ମ୍ନାଃ ଗୌରବ୍‌ ଡିଂଏ; ମାତର୍‌ ଦୁସ୍‌ଟ‍ଇଂନେ ଉନ୍ନତି ଡିଂଲା ରେମୁଆଁଇଂ ନିଜ୍‌କେ ବୁଃଡ଼ିମ୍ୟାଃଆର୍‌କେ । 13 ଜା ନିଜର୍‌ ପାପ୍‌ ବୁଃଡ଼ିଏ, ମେଁନେ ମେଃଡିଗ୍‌ ମଙ୍ଗଲ୍‌ ଆଡିଙ୍ଗ୍‌ ଣ୍ଡୁ; ମାତର୍‌ ମୁଃଡ଼ି ରେମୁଆଁ ଆତେନ୍‌ ସତ୍‌ ବାସଙ୍ଗ୍‌ଚେଃ ଆନ୍ତାର୍‌ଏ, ମେଁ ଦୟା ବାଏ । 14 ମୁଃଡ଼ି ରେମୁଆଁ କାଲାଆଃ ପାପ୍‌ କାମ୍‌ ଡିଂନ୍‌ସାଃ ବୁଟ‍ଏ, ମେଁ ନିମାଣ୍ଡାଃ; ମାତର୍‌ ଜା ନିଜର୍‌ ମନ୍‌କେ ଡାଟ୍‌ ଆଃଡିଂଏ, ମେଁ ବିପଦ୍‌ଅରିଆ ଲଃଏ । 15 ସାରଡିଂକ୍ନେ ସିଂଅଁ ଆରି ଅଲେଙ୍ଗ୍‌ଡିଂକ୍ନେ ଗିବେ ଡିରକମ୍‌; ଗରିବ୍‌ ରେମୁଆଁଇଂ ଆଡ଼ାତ୍ରା ଦୁସ୍‌ଟ ସାସନ୍‌ ଡିଂଣ୍ଡ୍ରେ ଦେତ୍‌ରକମ୍‌ । 16 ମୁଃଡ଼ି ନେତାକେ ବୁଦି ଆଲାଏଃକେ, ମେଁ ଡିଗ୍‌ ଜାବର୍‌ ଅନ୍ୟାୟ୍‌ କାମ୍‌ ଡିଂଏ, ମାତର୍‌ ଜା ମୁଚ୍‌କିକେ ଗ୍ରୁନା ଡିଂଏ, ମେଁ ନିଜର୍‌ ଦିନ୍‌ ଆଃମ୍ନାଃଏ । 17 ମୁଃଡ଼ି ରେମୁଆଁ ମେଃଡିଗ୍‌ ରେମୁଆଁକେ ବାଗୁଏଃନେଅରିଆ ଦସି ଡିଂଏ, ମେଁ କୁରୁ ଜାକ ଲାଗ୍‌ଡ‍ଏ; ଜାଡିଗ୍‌ ଆମେକେ ଆରାଃଅଟ୍‌କେଲେଃ । 18 ମୁଃଡ଼ି ରେମୁଆଁ ନିମାଣ୍ଡାଃ ଗାଲି ଅଲେଙ୍ଗ୍‌ଏ, ମେଁ ରକ୍ୟା ବାଏ; ମାତର୍‌ ମୁଃଡ଼ି ରେମୁଆଁ ଦଦ୍ୟା ଗାଲି ଅଲେଙ୍ଗ୍‌ଏ, ମେଁ ମାର୍ୟାଃତୁଗ୍‌ ବିପଦ୍‌ଅରିଆ ଲଃଏ । 19 ନିଜର୍‌ ଲିଜ ଜା ଚାସ୍‌ବାସ୍‌ ଡିଂଏ, ମେଁ ଜାବର୍‌ କାଦି ବାଏ; ବାରି, ଜା ବେକାର୍‌ ରେମୁଆଁଇଂନେ ପ୍ଲା ୱେଏ, ମେଁ ଜାବର୍‌ ଗରିବ୍‌ ଡିଂଏ । 20 ବିସ୍‌ବାସ୍‌ ରେମୁଆଁ ଜାବର୍‌ ଆସିର୍ବାଦ୍‌ ବାଏ; ମାତର୍‌ ଜା ସାକାର୍‌ ଡିଂନ୍‌ସାଃ ଜାବର୍‌ ଚେସ୍‌ଟା ଡିଂଏ, ମେଁ ଡିଲାଡିଗ୍‌ ଡଣ୍ଡ୍‌ ବାଏ । 21 ସାର୍ମୁଆଃ କେଚେଃ ବିଚାର୍‌ ଡିଂନେ ନିମାଣ୍ଡାଃ ଣ୍ଡୁ । କି ମେତାଃ ରୁଟି ନ୍‌ସାଃ ଅଦରମ୍‌ ଡିଂନେ ନିମାଣ୍ଡାଃ ଣ୍ଡୁ । 22 କରାପ୍‌ ମ୍ମୁଆଁ କେନେ ରେମୁଆଁ ସମ୍ପତି ପ୍ଲାଃ ୱିର୍‌ଏ, ମାତର୍‌ ମେଁ ଗରିବ୍‌ଅରିଆ ନ୍‌ଲଃଏ ଡାଗ୍‌ଚେଃ ଆମ୍ୟାଃ ଣ୍ଡୁ । 23 ନ୍ଲିୟା‍ଅରିଆ ମ୍ବ୍ରେ ମ୍ବ୍ରେ ସାମୁଆଁ ବାସଙ୍ଗ୍‌ଣ୍ଡ୍ରେ ବାନ୍‌ ରେମୁଆଁକେ ୱିଙ୍ଗ୍‌ନେ ରେମୁଆଁ ଇଡ଼ିଂ ଜାବର୍‌ ଅନୁଗ୍ରହ ବାଏ । 24 ଜା ନିଜର୍‌ ଆବା କି ଇୟାଙ୍ଗ୍‌ନେ ଜିନିସ୍‌ ଡଙ୍ଗାଚେଃ ବାସଙ୍ଗ୍‌ଏ, ଆକ୍‌ଅରିଆ ମେଃଡିଗ୍‌ ପାପ୍‌ ଣ୍ଡୁ, ମେଁ ବିନାସ୍‌ ଆଃଡିଂଣ୍ଡ୍ରେନେ ସାଙ୍ଗ । 25 ଲବ୍ରା ରେମୁଆଁ ୱିଙ୍ଗ୍‌ଆଃ ଆଃତାର୍‌ଏ, ମାତର୍‌ ଜା ମାପ୍‌ରୁନେ ଆଡ଼ାତ୍ରା ଆସା ବ‍ଏ, ମେଁ ସାକାର୍‌ ଡିଂଏ । 26 ଜା ନିଜର୍‌ ମନ୍‌ଅରିଆ ଆସା ବ‍ଏ, ମେଁ ମୁର୍କ; ମାତର୍‌ ଜା ଗିଆନ୍‌ଅରିଆ ଅଲେଙ୍ଗ୍‌ଏ, ମେଁ ରକ୍ୟା ବାଏ । 27 ଜା ଗରିବ୍‌କେ ଦାନ୍‌ ବିଃଏ, ମେଁନେ ଅବାବ୍‌ ଆଡିଂ ଣ୍ଡୁ; ମାତର୍‌ ଜା କେଚେଃ ଡିଗ୍‌ ଆକେକେ ରକମ୍‌ ଡିଂଏ, ମେଁ ଗୁଲୁଏ ଅବିସାପ୍‌ ବାଏ । 28 ଦୁସ୍‌ଟ‍ଇଂ ଜାବର୍‌ ଡିଂଆର୍‌ଲା, ରେମୁଆଁଇଂ ନିଜେକେ ବୁଃଡ଼ିଆର୍‌ଏ; ମାତର୍‌ ମେଇଂ ବିନାସ୍‌ ଡିଂଆର୍‌ଲା, ଦାର୍ମିକ୍‌ଇଂ ଜାବର୍‌ ଡିଂଆର୍‌ଏ ।