ଉପଦେସକ୍‌ 5

ପର୍‌ମେସର୍‌କେ ବୁଟନେ

1 ନା ମାପ୍‌ରୁନେ ଡୁଆ ୱେନେ ବେଲା ସାବ୍‌ଦାନ୍‌ରେ ନାନେ ଞ୍ଚ ବ; ମେଃଡାଗ୍‌ଲା ମୁର୍କ ରେମୁଆଁଇଂନେ ସୁଗୁଆ ବଲି ବିଃନେ ବାଦୁଲ୍‌ ମାପ୍‌ରୁକେ ମାନେଃନେ ଜାବର୍‌ ନିମାଣ୍ଡା; ମେଃଡାଗ୍‌ଲା ମେଇଂ ଦଦିଆ କାମ୍‌ ଡିଙ୍ଗ୍‌କେ ଡାଗ୍‌ଚେ ଆମ୍ୟାଃକେ ଣ୍ଡୁ । 2 ନା ନାନେ ସାର୍ମୁଆଃଅରିଆ ଜାବର୍‌ ଆବାବେଗେ ଆରି ମାପ୍‌ରୁନେ ସାମ୍‌ନାନିଆ ମେଃଡିଗ୍‌ ସାମୁଆଁ ବାସଙ୍ଗ୍‌ ନ୍‌ସାଃ ନାନେ ମନ୍‌ ତର୍‌ବର୍‌ ଆଡିଙ୍ଗ୍‌ଲେଃ । ମେଃଡାଗ୍‌ଲା ମାପ୍‌ରୁ କିତଂ ଆଡ଼ାତ୍ରା ଲାଏଃକେ ଆରି ନା ମଞ୍ଚ୍‌ପୁର୍‌ ନାଲେଃକେ । ଆତେନ୍‌ସାଃ ନାନେ ସାମୁଆଁ ଗଣ୍ଡାଃ ଡିଙ୍ଗ୍‌ଲେଃ । 3 ମେଃଡାଗ୍‌ଲା କାମ୍‌ ଡିଙ୍ଗ୍‌ନେ ବାନ୍‌ ମୁଃସୁଡ଼ିଙ୍ଗ୍‌ ପାଙ୍ଗ୍‌ମ୍ୟାକେ । ବାରି ସାମୁଆଁ ବାସଙ୍ଗ୍‌ନେ ଜାବର୍‌ ବାନ୍‌ ମୁର୍କ ରେମୁଆଁନେ ସାମୁଆଁ ଡିଙ୍ଗ୍‌ଏ । 4 ନା ମାପ୍‌ରୁ ଡାଗ୍ରା ଅପେଃ ନାଡିଂଲା, ଆତେନ୍‌ ବିଃନ୍‌ସା ତଙ୍ଗାର୍‌ ଆରାଃଡିଙ୍ଗ୍‌ଗେ । ମେଃଡାଗ୍‌ଲା ମୁର୍କ ରେମୁଆଁଇଂ ଡାଗ୍ରା ମେଁନେ ସାନ୍ତି ଣ୍ଡୁ । ନା ମେଃନେ ନାଅପେଃଏ, ଆତେନ୍‌ ବିଃ । 5 ଅପେଃଚେ ମାବିଃନେ ବାଟା ପେନେ ମାଅପେଃନେ ନିମାଣ୍ଡା । 6 ନାନେ ଗାଗ୍‌ଡ଼େକେ ପାପ୍‌ ଆଃଡିଙ୍ଗ୍‌ ନ୍‌ସାଃ ନାନେ ତୁମୁଆଃକେ ସାମୁଆଁ ବାସଙ୍ଗ୍‌ ନ୍‌ସା ଆବିଃଗେ; ଣ୍ଡୁଲା ଆକେନ୍‌ ବୁଲ୍‌ ଡିଙ୍ଗ୍‌ଗେ ଡାଗ୍‌ଚେ ଦୁତ୍‌ ସାମ୍‌ନାରେ ଆବାସଙ୍ଗ୍‌ଗେ; ମେଃଡାଗ୍‌ଲା ମାପ୍‌ରୁ ନାନେ ସାମୁଆଁକେ ରିସା ଡିଙ୍ଗ୍‌ଚେ ନାନେ ନ୍ତିବାନ୍‌ କାମ୍‌ ଡିଙ୍ଗ୍‌ନାବକ୍ନେ କାମ୍‌କେ ନାସ୍‌ ଆଡିଙ୍ଗ୍‌ଏ ? 7 ଗୁଲୁଏ ମୁସୁଃଡ଼ିଙ୍ଗ୍‌ କିକେନେ ଆରି ଗୁଲୁଏ ସାମୁଆଁ ସରାଃ । ତେସାଃ ନା ମାପ୍‌ରୁକେ ବୁଟପା ।

ସନ୍‌ମାନ୍‌ ଆରି ସମ୍ପତି ସରାଃ

8 ଅଃନା ନା ମେଃଡିଗ୍‌ ଦେସ୍‌ନିଆ ଦରିଦ୍ର ରେମୁଆଁ ଆଡ଼ାତ୍ରା ଆର୍‌ଲା ଡିଙ୍ଗ୍‌ନେ, ଅତ୍ୟାଚାର୍‌ ଡିଙ୍ଗ୍‌ଚେ ବିଚାର୍‌ ଡିଙ୍ଗ୍‌ନେ, ଆରି ନ୍ୟାୟ୍‌ ମାଡିଙ୍ଗ୍‌ନେ ପେକେଏ, ତେଲା ଆତେନ୍‌ ବିସ‍ଏରେ ତର୍‌ବର୍‌ ଆଡିଂଗେ, ମେଃଡାଗ୍‌ଲା ମୁଇଂ ମ୍ନାଃରେ ବାନ୍‌ ବାର୍‌ମୁଇଂଜା ମ୍ନାଃରେ କେଡିଙ୍ଗ୍‌କେ । ବାରି, ମେଙ୍ଗ୍‌ନେ ବାନ୍‌ ବାରିମୁଇଂ ମୁକିଆ ଲେଃକେ । 9 ଆରି, ମଚ୍‌ପୁର୍‌ନେ ଚୁଚୁ ସାପାରେ ଆତ୍‌ଲା, ଲିଜବାନ୍‌ ରାଜା ନିଜେ ଲାବ୍‌ ବାଏ । 10 ମୁଡ଼ି ରେମୁଆଁ ଡାବୁକେ ବଲ୍‌ ବାଏ, ମେଁ ଡାବୁବାନ୍‌ ସାନ୍ତି ଆବା ଣ୍ଡୁ । ବାରି, ମୁଃଡ଼ି ରେମୁଆଁ ଜାବର୍‌ ଲିଜ ବ୍ରିକେ ବଲ୍‌ ବାଏ, ମେଁନେ ଉଃଡ଼ି ଲିଜ ବ୍ରି ସମ୍ପତି ଲେଃଲା ଡିଗ୍‌ ଆମେକେ ସାନ୍ତି ଆମିଲେ ଣ୍ଡୁ । ଆକେନ୍‌ ଆଃ ସରାଃ । 11 ସମ୍ପତି, ଲିଜ ବ୍ରି ବେସି ଡିଙ୍ଗ୍‌ଲା, ଆତ୍‌ଅରିଆନେ ରେମୁଆଁଇଂ ଜାବର୍‌ ଡିଙ୍ଗ୍‌ଆର୍‌ଏ । ଆତେନ୍‌ସାଃ ନିଜର୍‌ ମ୍‌ମୁଆଃ ଏତେ କିକେନେ ଆନ୍ତାର୍‌ଚେ ଆତେନ୍‌ ଅଦିକାର୍‌ ଡିଙ୍ଗ୍‌ବକ୍ନେ ରେମୁଆଁନେ ମେଃ ଲାବ୍‌ ? 12 ସ୍ଲେଣ୍ଡ୍ରେ ଗଣ୍ଡା କି ବେସି ଚଙ୍ଗ୍‌ଲା ଡିଗ୍‌ ମେଁନେ ଲେମୁଆଃ ନିମାଣ୍ଡା ଆଡିଙ୍ଗ୍‌ ଣ୍ଡୁ । ମାତର୍‌ ଦନ୍‌ ଲେଃକ୍ନେ ରେମୁଆଁନେ ଦନ୍‌ ସମ୍ପତିବାନ୍‌ ଆମେକେ ଡୁଲେଗ୍‌ ନ୍‌ସାଃ ଆବିଃ ଣ୍ଡୁ । 13 ଦନ୍‌ ସମ୍ପତିନେ ସାକାର୍‌ ବାନ୍‌ ନିଜର୍‌ ଅମଙ୍ଗଲ୍‌ ଆତ୍‌ଲା ଦନ୍‌ ସମ୍ପତି ବଃଏ, ଆକେନ୍‌ ମୁଇଂ କସ୍‌ଟ ରକମ୍‌ନେ କସ୍‌ଟ ଗଟେନେ ନେଙ୍ଗ୍‌ ସ୍ନି ଆଲ କେନ୍ଲେଃକେ । 14 ଆରି ବାଗ୍ୟ ଆଲେଃକ୍ନେ ବାନ୍‌ ଆତେନ୍‌ ସାପା ଦନ୍‌ ସମ୍ପତି ନସ୍‌ଟ ଡିଙ୍ଗ୍‌ଏ । ବାରି, ମେଁ ଗଡ଼େଅ ଜନମ୍‌ ଡିଙ୍ଗ୍‌ଲା, ମେଁ ନ୍ତିନିଆ ମେଃଡିଗ୍‌ ଆଲେଃ ଣ୍ଡୁ । 15 ମେଁ ନିଜର୍‌ ଇୟାଙ୍ଗ୍‌ଡେ ଗର୍ବେବାନ୍‌ ଡିରକମ୍‌ ପାଙ୍ଗ୍‌କେ, ଦେତ୍‌ରକମ୍‌ ନାଙ୍ଗ୍‌ଲା ଡିଙ୍ଗ୍‌ଚେ ପାଙ୍ଗ୍‌କେ ରକମ୍‌ ଆଣ୍ଡେ ୱିଗ୍‌ଏ, ଆରି ମେଁ ନିଜେ କାମ୍‌ ଡିଂବକ୍ନେ ବାନ୍‌ ନିଜର୍‌ ନ୍ତିବାନ୍‌ ମେଃନେ ଡୁଙ୍ଗ୍‌ୱିଗ୍‌ ୟାଏ, ଦେକ୍‌ରକମ୍‌ ମେଃଡିଗ୍‌ ମେଁ ଏଃତେ ଡୁଙ୍ଗ୍‌ଆୱେ ଣ୍ଡୁ । 16 ବାରି, ମେଁ ଡିରକମ୍‌ ପାଙ୍ଗ୍‌କେ, ଟିକ୍‌ ଦେଃତୁଆଃ ଆଃ ମେଁ ଆଣ୍ଡେ ୱିଗ୍‌ଏ, ଆକେନ୍‌ ଆଃ କସ୍‌ଟ ରକମ୍‌ନେ କସ୍‌ଟ । ବାରି, ୱେଡ଼ିଆ ଆତ୍‌ଲା ମେଁ ସ୍ଲେଲା, ମେଁନେ ମେଃ ଲାବ୍‌ ? 17 ଆରି ମେଁ, ଜିବନ୍‌ କାଲ୍‌ ଜାକ ତାଂକିଗ୍‌ନିଆ ଜିବନ୍‌ କାଟେଏ, ବାରି ମେଁ ବେସି ବିରକ୍ତ ଡିଂଏ, ଆରି, ଆମେକେ ରଗ୍‌ ବାରି ବିରକ୍ତ ଡିଙ୍ଗ୍‌ଏ । 18 କେଲା, ଚଙ୍ଗ୍‌ ଉଗ୍‌ନେ ଆରି ମାପ୍‌ରୁ ବିଃବକ୍ନେ ବ୍ରୁଆନେ ବିତ୍‌ରେ ରେମୁଆଁ ସ୍ନି ଆଲ ମେଃ ମେଃନେ କାମ୍‌ ଡିଂଆର୍‌ଏ, ଆତେନ୍‌ ସାପା କାମ୍‌ନ୍ନିଆ ସୁକ୍‌ ବାନେ, ଆକେନ୍ ଆଃ ମେଁ ପାକା ନିମାଣ୍ଡା ଆରି ସାର୍‌ଦା ମନ୍‌ ଡାଗ୍‌ଚେ ନେଙ୍ଗ୍‌ କେନ୍ଲେଃକେ । ମେଃଡାଗ୍‌ଲା ଆକେନ୍‌ ଆଃ ମେଁନେ ବାଟା । 19 ଆରି ମାପ୍‌ରୁ ମେଃଡିଗ୍‌ ରେମୁଆଁକେ ଦନ୍‌ସମ୍ପତି ଦାନ୍‌ ବିଃଚେ ଆମେକେ ସାର୍‌ଦା ଡିଙ୍ଗ୍‌ ନ୍‌ସାଃ, ଆରି ନିଜର୍‌ ଆତ୍‌ଲା ବାଟା ଡୁଙ୍ଗ୍‌ୱିଗ୍‌ ନ୍‌ସାଃ ଆରି ନିଜର୍‌ କାମ୍‌ନ୍ନିଆ ସାର୍‌ଦା ଡିଙ୍ଗ୍‌ ନ୍‌ସାଃ ଅଦିକାର୍‌ ବିଃକେ, ଆକେନ୍‌ ଆଃ ମାପ୍‌ରୁନେ ଦାନ୍‌ । 20 ମେଃଡାଗ୍‌ଲା ମେଁ ନିଜର୍‌ ବ୍ରୁଆନେ ଦିନ୍‌ ସାପା ବେସି ଆଏତେ ଣ୍ଡୁ । ମେଃଡାଗ୍‌ଲା ମାପ୍‌ରୁ ମେଁନେ ମନ୍‌ଅରିଆ ସାର୍‌ଦା ଆଃଡିଙ୍ଗ୍‌ଚେ ଆମେକେ ଉତର୍‌ ବିଃଏ ।