1 ଆତ୍‌ବାନ୍‌ ନେଙ୍ଗ୍‌ ଆଣ୍ଡେଚେ ସ୍ନି ଆଲ ଡିଙ୍ଗ୍‌କ୍ନେ ଅତ୍ୟାଚାର୍‌ ସାପା ଙ୍କେକେ । ଆରି ଆଃକେପା, ଅତ୍ୟାଚାର୍‌ ବାଲେଃକ୍ନେ ରେମୁଆଁଇଂନେ ଡେଃମୁଆଃ ଲଃଡିଙ୍ଗ୍‌କେ, ବାରି ଆମେଇଂକେ ସାନ୍ତି ଆଃଡିଂଣ୍ଡ୍ରେ ଜା ଣ୍ଡୁ । ବାରି, ମେଙ୍ଗ୍‌ନେ ଆଡ଼ାତ୍ରା ନସ୍‌ଟ ଆଡିଙ୍ଗ୍‌ନେ ରେମୁଆଁଇଂନେ ସପଟ୍‌ରେ ବପୁ ଲେଃଗେ, ମାତର୍‌ ଅତ୍ୟାଚାର୍‌ ଡିଙ୍ଗ୍‌ଲେଃଆର୍‌କ୍ନେ ରେମୁଆଁଇଂକେ ସାନ୍ତି ଆଃଡିଂଣ୍ଡ୍ରେ ଜା ଣ୍ଡୁ । 2 ଆତେନ୍‌ସା ନେଙ୍ଗ୍‌ ଏବେ ଜିବନ୍‌ ଲେଃକ୍ନେ ରେମୁଆଁଇଂନେ ବାଦୁଲ୍‌ ଆତେନ୍‌ ସିସେ ଗୁଏଃଲେକ୍ନେ ରେମୁଆଁଇଂକେ ଜାବର୍‌ ପ୍ରଶଂସା ଣ୍ଡିଂକେ । 3 ମାତର୍‌ ମୁଡ଼ି ରେମୁଆଁ ଏଃ ଜାକ ଜନମ୍‌ ଆଡିଙ୍ଗ୍‌କେ ଣ୍ଡୁ ଆରି ସ୍ନି ଆଲ ଗଟେଲେଃକ୍ନେ କାରାପ୍‌ କାମ୍‌ ଆକେକେ, ଆମେକେ ନେଙ୍ଗ୍‌ ଆତେନ୍‌ ବୟଙ୍କାର୍‌ ବାଦୁଲ୍‌ ଜାବର୍‌ ବଲ୍‌ ଗିଆନ୍‌ ନ୍ନାଃଡିଙ୍ଗ୍‌କେ । 4 ଆତେନ୍‌ସା ନେଙ୍ଗ୍‌ ସାପା କାମ୍‌ ଆରି ସାପା ସପଲ୍‌ ଡିଙ୍ଗ୍‌ନେ କାମ୍‌ ଙ୍କେକେ ଜେ, ଆତେନ୍‌ସାଃ ମୁଡ଼ି ରେମୁଆଁ ନିଜର୍‌ ରେମୁଆଁକେ ଇର୍ସା ଡିଙ୍ଗ୍‌ମ୍ୟାଃକେ । ଆକେନ୍‌ ଆଃ ସରାଃ ଆରି ୱେଡ଼ିଆକେ ସାଃନ୍‌ସା ଚେସ୍‌ଟା ଡିଙ୍ଗ୍‌ନେ ରକମ୍‌ । 5 ମୁର୍କ ନିଜେ ନ୍ତି ମୁଟା ଆଃଡିଂଚେ ନିଜର୍‌ ଚିଲିକେ ଚଙ୍ଗ୍‌ଏ । 6 କାମ୍‌ ଡିଙ୍ଗ୍‌ନେ ଆରି ୱେଡ଼୍ୟାଃ ପ୍ଲାଃ ୱେନେ ଏଃତେ ମ୍ୱାର୍‌ ମୁଟା ବାଦୁଲ୍‌ ସାନ୍‌ତିରେ ମୁଇଂ ମୁଟା ନିମାଣ୍ଡା । 7 ବାରି ନେଙ୍ଗ୍‌ ଆଣ୍ଡେଚେ ସ୍ନି ଆଲ ସରାଃ ଆଃ ଙ୍କେକେ । 8 ମେଃଡିଗ୍‌ ରେମୁଆଁ ମୁଇଂଜା ଆଃ ଲେଃଏ ବାରି ମେଁନେ ଆରି ଜା ଡିଗ୍‌ ଣ୍ଡୁ, ଣ୍ଡୁଲା ମେଁନେ ଉଂଡେ କି ବୟାଁ ଣ୍ଡୁ । ଏଲେଡିଗ୍‌ ମେଁନେ ସାପା କାମ୍‌ ଡିଙ୍ଗ୍‌ନେ ସିମା ଣ୍ଡୁ, ଣ୍ଡୁଲା ଦନ୍‌ ସମ୍ପତିନିଆ ମେଁନେ ମ୍‌ମୁଆଃ ସାନ୍‌ତି ଣ୍ଡୁ । ମେଁ ବାସଙ୍ଗ୍‌ଏ, ତେଲା ନେଙ୍ଗ୍‌ ଜା ଆତ୍‌ଲା କାମ୍‌ ଡିଙ୍ଗ୍‌ଣ୍ଡିଂକେ ଆରି ନିଜର୍‌ ଜିବନ୍‌କେ ସୁକ୍‌ ସାନ୍‌ତିରେ ମ୍ୱକେ ? ଆକେନ୍‌ ଆଃ ସରାଃ ଆରି ଦୁକ୍‌ରେ ଲେଃନେ ଜିବନ୍‌ । 9 ମୁଇଂଜା ବାନ୍‌ ମ୍ୱାୟା ନିମାଣ୍ଡାଃ, ମେଃଡାଗ୍‌ଲା ମେଇଂ ନିଜର୍‌ ନିଜର୍‌ନେ କାମ୍‌ ଡିଙ୍ଗ୍‌କ୍ନେ ବାନ୍‌ ନିମାଣ୍ଡା ଚୁ ବାଆର୍‌ଏ । 10 ମେଇଂ ଲଃଲା, ମୁଇଂଜା ନିଜର୍‌ ସାଙ୍ଗକେ ଆଃତଡ଼ିଆଏ, ମାତର୍‌ ଜାଣ୍ଡେ ଲଃକେଲା ମୁଇଂଜା ଲେଃଏ ଆରି ଆଜାକେ ଆଃତଡ଼ିଆ ନ୍‌ସା ବାରି ଜା ଡିଗ୍‌ ଆଲେଃଣ୍ଡୁ, ମେଁ ଅବିସାପ୍‌ ବାନେ ଦର୍‌କାର୍‌ । 11 ଆରି, ମ୍ୱାୟା ମୁଇଂନୁଗ୍‌ ଡୁଲେଗ୍‌ଲା ଗରମ୍‌ ଲାଗେଏ । ମାତର୍‌ ମୁଇଂଜା ଡିରକମ୍‌ ଗରମ୍‌ ବା ୟାଏ । 12 ଜଦି ଅଃନା ମୁଇଂଡା ଲେକ୍ନେ ରେମୁଆଁକେ ଜିତେଏ, ତେଲା ମ୍ୱାୟା ଆମେକେ ବିରଦ୍‌ ଡିଙ୍ଗ୍‌ଆର୍‌ଏ । ବାରି ଞ୍ଜିପୁର୍‌ ମୁଲିବକ୍ନେ ଗେହେଃ ଜ୍ୟାଃ ଟିକ୍‌ଚି ଆୱେ ଣ୍ଡୁ । 13 ମୁଃଡ଼ି ଡକ୍ରା ଆରି ମୁର୍କ ରାଜା ଆରି ମେଃଡିଗ୍‌ ସାଲ୍ୟାଃକୁଚେ କାମ୍‌ ଡିଙ୍ଗ୍‌ ନ୍‌ସା ଆମ୍ୟାଃ ଣ୍ଡୁ, ମେଁ ବାଦୁଲ୍‌ ଦରିଦ୍ର ଆରି ଗିଆନ୍‌ ଲେକ୍ନେ ଙ୍ଗିରେ ନିମାଣ୍ଡା । 14 ମେଃଡାଗ୍‌ଲା ମେଁ ରାଜା ଡିଙ୍ଗ୍‌ ନ୍‌ସା ଜେଲ୍‌ ଡୁଆବାନ୍‌ ତାର୍‌ଚେ ପାଙ୍ଗ୍‌କେ । ଆରି, ମେଁ ମେଁନେ ରାଜିନ୍ନିଆ ଦରିଦ୍ର ଡିଙ୍ଗ୍‌ଚେ ଜନମ୍‌ ଡିଙ୍ଗ୍‌ଲେଗେ । 15 ନେଙ୍ଗ୍‌ ସ୍ନି ଆଲ ଅଲେଙ୍ଗ୍‌ନେ ସାପା ଜିବ୍‌ ଜନ୍ତୁକେ ଙ୍କେକେ ଜେ, ମେଇଂ ଆତେନ୍‌ ଙ୍ଗିରେନେ, ମୁଃଡ଼ିନେ ଦୁତିୟ ରେମୁଆଁ ଆକ୍‌ମେନେ ଜାଗା‍ଅରିଆ ତୁଆଁକେ, ମେଁନେ ସାଙ୍ଗ ଡିଙ୍ଗ୍‌କେ । 16 ମେଁ ଜାଣ୍ଡେଇଂନେ ମୁକିଆ ଡିଙ୍ଗ୍‌କେ, ଆତେନ୍‌ ରେମୁଆଁଇଂ ଜାବର୍‌ ଡିଙ୍ଗ୍‌ଆର୍‌କେ; ଏଲେଡିଗ୍‌ ମୁଡ଼ି ରେମୁଆଁଇଂ ଇଡ଼ିଂଡେ ପାଙ୍ଗ୍‌ଆର୍‌ଏ ମେଇଂ ମେଁ ଡାଗ୍ରା ସାର୍‌ଦା ଆଡିଙ୍ଗ୍‌ଆର୍‌ ଣ୍ଡୁ । ଆକେନ୍‌ ଡିଗ୍‌ ସରାଃ ଆରି ୱେଡ଼୍ୟାଃ ପ୍ଲାଃ ୱେନେ ରକମ୍‌ ।