1 ନେଙ୍ଗ୍‌ ଆକେନ୍‌ ସାପା ବିସ‍ଏରେ ମନ୍‌ ଦିଆନ୍‌ ବିଃଚେ ନ୍ତୁର୍‌କେ, ଦାର୍ମିକ୍‌ ଆରି ଗିଆନ୍‌ ରେମୁଆଁନେ, ଆରି ମେଙ୍ଗ୍‌ନେ କାମ୍‌ ପର୍‌ମେସର୍‌ନେ ନ୍ତିଅରିଆ ଲେଃକେ । ଆକେନ୍‌ ଆଲାଦ୍‌ କି ଗୁର୍‌ନା, ଆତେନ୍‌ ରେମୁଆଁ ଆମ୍ୟାଃ ଣ୍ଡୁ । ସାପା ମେଙ୍ଗ୍‌ନେ ସାମ୍‌ନାନିଆ ଲେଃଏ 2 ସାପା ବିଷୟ୍‌ ସାପାରେ ଆଡ଼ାତ୍ରା ସମାନ୍‌ ଗଟେଏ, ଦାର୍ମିକ୍‌ ଆରି ଦୁସ୍‌ଟ, ନିମାଣ୍ଡାଣ୍ଡ୍ରେ, ବାରି ପବିତ୍ର ଆରି ଅପବିତ୍ର, ବଲି ଡିଙ୍ଗ୍‌ଣ୍ଡ୍ରେ ଆରି ବଲି ମାଡିଙ୍ଗ୍‌ଣ୍ଡ୍ରେ, ସାପାରେନେ ଆଡ଼ାତ୍ରା ମୁଇଂ ରକମ୍‌ ଗଟ୍‌ନା ଗଟେଏ । ନିମାଣ୍ଡାଃ ରେମୁଆଁ ଡିରକମ୍‌, ପାପି ରେମୁଆଁ ଡିଗ୍‌ ଦେତ୍‌ରକମ୍‌ । ବାରି ପାର୍‌ମାନ୍‌ ଡିଙ୍ଗ୍‌ଣ୍ଡ୍ରେ ଡିରକମ୍‌, ପାର୍‌ମାନ୍‌ ଡିଙ୍ଗ୍‌ ନ୍‌ସାଃ ବୁଟନେ ରେମୁଆଁ ଡିଗ୍‌ ଦେତ୍‌ରକମ୍‌ । 3 ସ୍ନି ଆଲ ଉଃଡ଼ି କାମ୍‌ ଡିଙ୍ଗ୍‌ଆର୍‌ଏ, ଆତ୍‌ ବିତ୍‌ରେ ଦୁକ୍‌ନେ ବିଷୟ୍‌ ଆକେନ୍‌ ଜେ, ସାପାରେନେ ଆଡ଼ାତ୍ରା ସମାନ୍‌ ଗଟ୍‌ନା ଗଟେଏ । ଆରି ଡିଗ୍‌ ରେମୁଆଁ ଉଂଡେଇଂନେ ମନ୍‌ ଦୁଷ୍ଟରେ ପୁରନ୍‌ ଡିଙ୍ଗ୍‌ଲେକେ ଆରି ବ୍ରୁଆଲେ ଜାକ ମେଙ୍ଗ୍‌ନେ ମନ୍‌ଅରିଆ ବାୟା ରକମ୍‌ ଲେଃଏ, ଆରି ଇଡ଼ିଙ୍ଗ୍‌ ମେଇଂ ଗୁଏଃକ୍ନେ ରେମୁଆଁଇଂନେ ଡାଗ୍ରା ୱେଆର୍‌ଏ । 4 ମେଃଡାଗ୍ଲା ମୁଡ଼ି ରେମୁଆଁ ମ୍ବ୍ରଲେଃକ୍ନେ ରେମୁଆଁଇଂନିଆ ମିସୁଃ ଲେଃକେ, ମେଁନେ ଆସା ଲେଃଏ । ମେଃଡାଗ୍ଲା ଗୁଏଃଲେକ୍ନେ ସିଂଅଁ ବାଟା ମ୍ବ୍ରଲେଃକ୍ନେ ଗୁସୁଃ ନିମାଣ୍ଡାଃ । 5 ଜିବନ୍‌ ଲେଃକ୍ନେ ରେମୁଆଁଇଂ ନେଗୁଏଃଏ ଡାଗ୍‌ଚେ ମ୍ୟାଲେଃଆର୍‌କେ । ମାତର୍‌ ଗୁଏଃଲେକ୍ନେ ରେମୁଆଁଇଂ ମେଃଡିଗ୍‌ ଆମ୍ୟାଃଆର୍‌କେ ଣ୍ଡୁ, କି ମେଇଂ ଆରି ମେଃଡିଗ୍‌ ବଦ୍‌ଲା ଆବାଆର୍‌ ଣ୍ଡୁ । ମେଃଡାଗ୍ଲା ମେଙ୍ଗ୍‌ନେ ବୁଦି ବାନା ଡିଙ୍ଗ୍‌ୱେଏ । 6 ଡିରକମ୍‌ ମେଇଂନେ ଆଲାଦ୍‌, ଦେତ୍‌ରକମ୍ ମେଙ୍ଗ୍‌ନେ ଗୁର୍‌ନା ଆରି ଇର୍ସା ନସ୍‌ଟ ଡିଙ୍ଗ୍‌ଏ; ଆରି ସ୍ନି ଆଲ ଜା ସାପା ଡିଙ୍ଗ୍‌ନେଡିଙ୍ଗ୍‌, ଆତ୍‌ଅରିଆ ଜୁଗ୍‌ ଜାକ ମେଙ୍ଗ୍‌ନେ ମେଃଡିଗ୍‌ ବାଗ୍‌ ଆଲେ ଣ୍ଡୁ । 7 ନା ନାଁନେ ଗାଲିପାକା ୱେଲା, ସାର୍‌ଦାରେ ଚଙ୍ଗ୍‌ ଉଗ୍‌ ଆରି ସୁକ୍‌ରେ ନାନେ ଅଙ୍ଗୁର୍‌ ରସ୍‌ ଉଗ୍‌, ମେଃଡାଗ୍ଲା ପର୍‌ମେସର୍‌ ନାନେ କାମ୍‌ ଗ୍ରହନ୍‌ ଡିଙ୍ଗ୍‌ବକେ । 8 ନାନେ ପାଟେଇ କାଲାଆଃ ତୁଲେ ତ୍ନାଲେଃ ଆରି ନାନେ ବାଆଃନିଆ ଞ୍ଚୁନେ ଅବାବ୍‌ ଆଡିଂଲେଃ । 9 ସ୍ନି ଆଲ ମେଁ ଆନାକେ ସରାଃ ଆୟୁସ୍‌ନେ ଉଃଡ଼ି ଦିନା ବ୍ରୁଆନେ ବିଃବକେ, ନାନେ ଆତେନ୍‌ ସରାଃ ଆୟୁସ୍‌ନେ କାଲାଆଃ ଆଲାଦ୍‌ ଡିଂନାଡିଂକ୍ନେ ନାକୁନେଃ ଏଃତେ ସାର୍‌ଦାରେ ବ୍ରୁଆଡିକେଃ; ମେଃଡାଗ୍ଲା ଜିବନ୍‌ କାଲ୍‌ ବିତ୍‌ରେ ଆରି ସ୍ନି ଆଲ ନା ଆଣ୍ଡିନ୍‌ ସାପା କାମ୍‌ ଡିଙ୍ଗ୍‌ନାଡିଙ୍ଗ୍‌କେ, ଆତେନ୍‌ କାମ୍‌ ବିତ୍‌ରେ ଆକେନ୍‌ ଆଃ ନାନେ ବାଗ୍‌ । 10 ନାନେ ନ୍ତି ମେଃଡିଗ୍‌ କାମ୍‌ ଡିଙ୍ଗ୍‌ ନ୍‌ସାଃ ନାଅବାଲା, ଆତେନ୍‌ ନାନେ ବପୁ ଏଃତେ ଡିଙ୍ଗ୍‌; ମେଃଡାଗ୍ଲା ନା ଆଣ୍ଡିନ୍‌ ଜାଗାନ୍ନିଆ ୱେନାଡିଙ୍ଗ୍‌କେ, ଆତେନ୍‌ ରାଃଚ୍ୟାନ୍ନିଆ ମେଃଡିଗ୍‌ କାମ୍‌, କି ଚିନ୍‌ତା, କି ବିଦ୍ୟା, କି ଗିଆନ୍‌ ଣ୍ଡୁ । 11 ନେଙ୍ଗ୍‌ ଆଣ୍ଡେଚେ ସ୍ନି ଆଲ ଙ୍କେକେ ଜେ, ୱିର୍‌ନିଆ ଦାପ୍ରେ ୱିର୍‌ଣ୍ଡ୍ରେ, କି ବିରବାର ରେମୁଆଁଇଂକେ ଜିତେନେ, କି ଗିଆନ୍‌ ଲେଃକ୍ନେ ରେମୁଆଁଇଂକେ ଚଙ୍ଗ୍‌ନେ କାଦି, କି ବୁଦି ଲେଃକ୍ନେ ରେମୁଆଁଇଂକେ ଦନ୍‌, କି ପଣ୍ଡିତ୍‌ ରେମୁଆଁଇଂକେ ଅନୁଗ୍ରହ ଆଲେଃ ଣ୍ଡୁ, ମାତର୍‌ ସାପାରେ ଆଡ଼ାତ୍ରା ବେଲା ଆରି ମାରିୟାଃତୁଗ୍ ଗଟ୍‌ନା ଗଟେଏ । 12 ମେଃଡାଗ୍ଲା ରେମୁଆଁ ଡିଗ୍‌ ନିଜର୍‌ ବେଲା ମ୍ୟାଃ ଆୟା ଣ୍ଡୁ । ଡିରକମ୍‌ ଆଃଡ଼ଇଂ ଦଦ୍ୟା ଜାଲ୍‌ନିଆ ଲାଃଏ ଆରି ଡିରକମ୍‌ ପ୍ଲିଗ୍ଇଂ ପାନ୍ଦ୍‌ନିଆ ଲଃଆର୍‌ଏ, ଦେତ୍‌ରକମ୍‌ ରେମୁଆଁଇଂ ଡିଗ୍‌ ମାର୍ୟାଃତୁଗ୍‌ ବିପଦ୍‌ ପାଙ୍ଗ୍‌ନେ ବେଲା ଦାରା ପଡ଼େଆର୍‌ଏ ।

13 ନେଙ୍ଗ୍‌ ଡିଗ୍‌ ସ୍ନି ଆଲ ଦେକ୍‌ରକମ୍‌ ଗିଆନ୍‌ କେନ୍ଲେକେ, ଆରି ଆତେନ୍‌ ନେଙ୍ଗ୍‌ ସାମ୍‌ନାନିଆ ମ୍ନାଃ ତ୍ନାକେ; 14 ଡାଗ୍‌ଲା ଗଣ୍ଡା ରେମୁଆଁ ଲେଃକ୍ନେ ମୁଇଂ ଡାଆଁ ଇନି ଲେଃଗେ, ଆରି, ମୁଇଂ ମ୍ନାଃ ରାଜା ଆତେନ୍‌ ବିରଦ୍‌ରେ ପାଙ୍ଗ୍‌ଚେ ଆମେକେ ପିତୁର୍‌ପାକା ଗେରେକେ ଆରି ଆତେନ୍‌ ବିରଦ୍‌ରେ ମ୍ନାଃ ମ୍ନାଃ ଦୁର୍ଗ ଆଃରେକେ । 15 ଦେକ୍‌ରକମ୍‌ ବେଲା ଆତ୍‌ଅରିଆ ମୁଇଂ ଦରିଦ୍ର ଗିଆନି ରେମୁଆଁ ତ୍ନାକେ, ବାରି ମେଁ ମେଁନେ ଗିଆନ୍‌ ଏଃତେ ଇନିକେ ରକ୍ୟା ଆଃଡିଙ୍ଗ୍‌କେ; ଏଲେଡିଗ୍‌ ଆତେନ୍‌ ଦରିଦ୍ର ରେମୁଆଁକେ ଜା ଡିଗ୍‌ ଆଏତେଆର୍‌କେ । 16 ତେସା ନେଙ୍ଗ୍‌ ମ୍ୱାସଙ୍ଗ୍‌କେ, "ବପୁ ଲେଃ ବାଟା ଗିଆନ୍‌ ଲେଃଲା ନିମାଣ୍ଡା; ଏଲେଡିଗ୍‌ ଦରିଦ୍ର ରେମୁଆଁନେ ଗିଆନ୍‌ ଗ୍ରୁନା ଡିଂଆର୍‌ଏ ଆରି ମେଁନେ ସାମୁଆଁ ଜା ଡିଗ୍‌ ଆଦ୍ରିଗ୍‌ଆର୍‌ ଣ୍ଡୁ । 17 ମୁର୍କ ରେମୁଆଁଇଂନେ ବିତ୍‌ରେ ସାସନ୍‌ ଡିଂଣ୍ଡ୍ରେନେ କିରନେ ବାଟା ସାନ୍ତିରେ ଚାପେ ବକ୍ନେ ଗିଆନ୍‌ ରେମୁଆଁନେ ସାମୁଆଁ ବେସି ଅଁଆର୍‌ଏ । 18 ଯୁଦ୍‌ ଡିଙ୍ଗ୍‌ନେ ବାଦୁଲ୍‌ରେ ଗିଆନ୍‌ ନିମାଣ୍ଡା; ମାତର୍‌ ମୁଇଂ ପାପି ବେସି ବଲ୍‌ ବିସ‍ଏକେ ବିନାସ୍‌ ଆଃଡିଙ୍ଗ୍‌ଏ ।"