1 ସ୍ନି ଆଲ ନେଙ୍ଗ୍‌ ମୁଇଂ ଦୁକ୍‌ନେ ବିଷୟ୍‌ କେନ୍ଲେଃକେ, ଆରି ଆତେନ୍‌ ରେମୁଆଁଇଂନେ ପାକା ବେସି ଲିଗିଙ୍ଗ୍‌ ରକମ୍‌ । 2 ମାପ୍‌ରୁ ଆଜାକେ ଆଜାକେ ଅଃକେନ୍‌ ଦନ୍‌ସମ୍ପତି ଆରି ସାକାର୍‌ ଆଃଡିଂମ୍ୟାକେ ଜେ, ମେଁନେ ମନ୍‌ବାଞ୍ଚା ପୁରନ୍‌ ଆଡିଙ୍ଗ୍‌ସା ମେଃଡିଗ୍‌ ବିସ‍ଏରେ ଅବାବ୍‌ ଆଲେଃ ଣ୍ଡୁ, ଏଲେଡିଗ୍‌ ଆତେନ୍‌ ବଗେନେସା ମାପ୍‌ରୁ ଆମେକେ ଅଦିକାର୍‌ ବିଃଆମ୍ୟାକେ ଣ୍ଡୁ, ମାତର୍‌, ଅଲ୍‌ଗା ରେମୁଆଁ ଆତେନ୍‌ ବଗେ ମ୍ୟାକେ । ଆକେନ୍‌ ସରାଃ ଆରି ଦଦିଆ ବାରି କସ୍‌ଟ ରକମ୍‌ । 3 ଜଦି ମୁଡ଼ି ରେମୁଆଁ ଶହେଟା ଗଡ଼େଅ ଜନମ୍‌ ଡିଙ୍ଗ୍‌ଚେ ଗୁଲେ ମୁଆଁ ବ୍ରୁଆଚେଃ ଲେଃଲା ମେଁନେ ବ୍ରୁଆନେ ମୁଆଁ ମ୍ନାଃଏ, ମାତର୍‌ ମେଁନେ ଜିବନ୍‌ ଜଦି ସୁକ୍‌ ସାନ୍ତିରେ ଆଲେଃ ଣ୍ଡୁ, ଆରି ଜଦି ଆମେକେ ରାଃଚ୍ୟାନ୍ନିଆ ଆଆତିଆର୍‌, ତେଲା ନେଙ୍ଗ୍‌ ବାସଙ୍ଗ୍‌ଣ୍ଡିଙ୍ଗ୍‌କେ, ଆତେନ୍‌ ରେମୁଆଁ ବାଟା ମେଁ ଜନମ୍‌ ଡିଙ୍ଗ୍‌ ବେଲା ଆଃ ଗୁଏଃକ୍ନେ ଚିର୍‌ଲାଃଅ ନିମାଣ୍ଡାଃ । 4 ଡାଗ୍ଲା ଆତାନ୍‌ ମାଃସ ରକମ୍‌ ପାଙ୍ଗ୍‌କେ ଆରି ତାଂକିଗ୍‌ନିଆ ୱେଏ, ଆରି ମେଁନେ ମ୍ନି ଡିଗ୍‌ ତାଂକିଗ୍‌ନିଆ ବୁଃଡ଼ି ୱେଏ । 5 ଆରି, ଆକେନ୍‌ ଗଡ଼େଅ ସ୍ନି ଆକେକେ କି ଆମ୍ୟାଃକେ । ଏଲେଡିଗ୍‌ ଆକେନ୍‌ ଗୁଏଃକ୍ନେ ଗଡ଼େଅ ଆତେନ୍‌ ରେମୁଆଁ ବାନ୍‌ ଜାବର୍‌ ପୁଣ୍ଡେଏ । 6 ବାରି ଆତେନ୍‌ ରେମୁଆଁ ମେଃଡିଗ୍‌ ସୁକ୍‌ ମାବଗେଚେ ମ୍ବାର୍‌ ଅଜାର୍‌ ମୁଆଁ ବ୍ରୁଆଲା ଡିଗ୍‌ ସାପାରେ କି ମୁଇଂ ଜାଗାନ୍ନିଆ ଆୱେଆର୍‌ ? 7 ରେମୁଆଁନେ ସାପା ସ୍ଲେଗ୍ନାର୍‌ ମେଁନେ ତୁମୁଆଃ ଆତ୍ଲା, ଏଲେଡିଗ୍ ଉଡ଼ି ଚଙ୍ଗ୍‌ଲା ଡିଗ୍‌ ଆମେକେ ସୁଲୁଏ ଆବ୍‌ସେ ଣ୍ଡୁ । 8 ଆତେନ୍‌ସା ମୁର୍କ ରେମୁଆଁବାନ୍‌ ଗିଆନ୍‌ ରେମୁଆଁନେ ମେଃ ଲାବ୍‌ ? ଆରି, ଜିବନ୍‌ ଲେଃକ୍ନେ ରେମୁଆଁଇଂନେ ସାମ୍‌ନାନିଆ ଚାଲିଚଲନ୍‌ ଡିଙ୍ଗ୍‌ ନ୍‌ସାଃ ମ୍ୟାଃଏ ମୁଃଡ଼ି ଦରିଦ୍ର ରେମୁଆଁ, ମେଁନେ ଆରି ମେଃ ଲାବ୍‌ ? 9 ମନ୍‌ନେ ଲାଲ୍‌ସା ଡିଙ୍ଗ୍‌ନେ ବାଦୁଲ୍‌ ବେଟ୍‌ଗାଟ୍‌ ଡିଙ୍ଗ୍‌ନେ ବଲ୍‌ । ଆକେନ୍‌ ସରାଃ ଆରି ସରାଃ ୱେଡ଼୍ୟାଃକେ ସାଃନ୍‌ସାଃ ୱେକେ ରକମ୍‌ । 10 ମେଃନେ ଡିଙ୍ଗ୍‌ଲେକେ, ଗୁଲେ ମୁଆଁ ଡିଙ୍ଗ୍‌ଗେ ଆତ୍‌ନେ ମ୍ନି ବିଃବ୍ନ, ଆରି ଆତେନ୍‌ ରେମୁଆଁ ଡାଗ୍‌ଚେ ମ୍ୟାଃଲେଃଆର୍‌କେ; ବାରି, ମେଁ ନିଜର୍‌ ବାନ୍‌ ବପୁ ରେମୁଆଁ ଏତେ ବିରଦ୍‌ ଡିଙ୍ଗ୍‌ ଆୟା ଣ୍ଡୁ । 11 ଦେକ୍‌ରକମ୍‌ ସରାଃ ସାମୁଆଁ ଗୁଲେ ଲେଃକେ, ଆତ୍‌ଅରିଆ ରେମୁଆଁନେ ମେଃ ଲାବ୍‌ ? 12 ମେଃଡାଗ୍‌ଲା ରେମୁଆଁ ଲୁଡ଼୍ୟାଃ ରକମ୍‌ ନିଜର୍‌ନେ ଆଣ୍ଡିନ୍‌ ସାପା ସରାଃ ଜିବନ୍‌ନେ ଦିନ୍‌ ସାପା ବ୍ରୁଆ ଡିକେଃଏ, ଆତେନ୍‌ ଜିବନ୍‌ କାଲ୍‌ ବିତ୍‌ରେ ମେଁନେ ସୁକ୍‌ ମେଃନେ, ଆକେନ୍‌ ଜା ମ୍ୟାଃଲେଃକେ ? ଆରି, ରେମୁଆଁ ଗୁଏଃକ୍ନେ ଇଡ଼ିଙ୍ଗ୍‌ ସ୍ନି ଆଲ ମେଃନେ ଗଟେଏ, ଆକେନ୍‌ ଜା ଆମେକେ ଆଃମ୍ୟାଃ ୟାଏ ।