1 ଗୁଏଃକ୍ନେ ଣ୍ଡ୍ରୁଏ ବାସ୍ନା ବିଃଡିଙ୍ଗ୍‌କ୍ନେ ଞ୍ଚୁକେ ଆଃମଃଏ । ଦେତ୍‌ରକମ୍‌ ଇଃକୁଡ଼ା ମୁର୍କ ଡିଙ୍ଗ୍‌ନେ ବାନ୍‌ ଗିଆନ୍‌ ଆରି ବପୁବାନ୍‌ ବେସି ଲିଗିଙ୍ଗ୍‌ । 2 ଗିଆନିରେନେ ମନ୍‌ ମେଁନେ ବଲ୍‌ ପାକା ଲେଃଏ । ମାତର୍‌ ମୁର୍କନେ ମନ୍‌ ମେଁନେ କରାପ୍‌ ପାକା ଲେଃଏ । 3 ଆରି, ମୁର୍କ ଗାଲିନିଆ ଅଲେଙ୍ଗ୍‌ ବେଲା ମେଁନେ ବୁଦି ଗଣ୍ଡା ତ୍ନାଏ, ବାରି ମେଁ ସାପାରେକେ ବାସଙ୍ଗ୍‌ଏ ଜେ, ମେଁ ମୁର୍କ । 4 ନା ଆଡ଼ାତ୍ରା ସାସନ୍‌ ଡିଂଣ୍ଡ୍ରେନେ ମନ୍‌ ବିତ୍‌ରେ ବିରଦ୍‌ ବାବ୍‌ନା ତାର୍‌ଲା, ନାନେ ଜାଗା ଆଆନ୍ତାର୍‌ଗେ; ମେଃ ଡାଗ୍ଲା ଅଦିକାର୍‌ରେ ଲେଃନ୍‌ସା ଜଦି ଇକ୍‌ଚା ପେଡିଙ୍ଗ୍‌ଏ, ତେଲା ମ୍ନାଃ ମ୍ନାଃ ପାପ୍‌ ବାନ୍‌ କେମା ଡିଂଏ । 5 ନେଙ୍ଗ୍‌ ସ୍ନି ଆଲ ମୁଇଂ ଦଦିଆ ବିଷୟ୍‌ କେନ୍ଲେକେ, ଆତେନ୍‌ ସାସନ୍‌ ଡିଂଣ୍ଡ୍ରେବାନ୍‌ ତାର୍‌କ୍ନେ ରକମ୍‌ ବୁଲ୍‌ ରକମ୍‌ ତ୍ନାଏ । 6 ମୁର୍କ ରେମୁଆଁକେ ବେସି ତିଆର୍‌ ଜାଗାନ୍ନିଆ ତିଆର୍‌ ଡିଂଏ, ବାରି ସାକାର୍‌ ରେମୁଆଁ ଡାଆଁ ଜାଗାନ୍ନିଆ କଏ । 7 ନେଙ୍ଗ୍‌ ଗତିରେଇଂକେ ଗଡ଼ା ଆଡ଼ାତ୍ରା ଆରି ନେତାଇଂକେ ଗୁତିରେ ରକମ୍‌ ସରାଃ ଞ୍ଚ ଅଲେଙ୍ଗ୍‌ ଅଲେଙ୍ଗ୍‌ଚେ ପାଙ୍ଗ୍‌ନେ କେନ୍ଲେଃକେ । 8 ଜା କୁରୁ ଗଃଏ, ମେଁ ଆତ୍‌ଅରିଆ ଲଃଏ ଆରି ମୁଃଡ଼ି ରେମୁଆଁ ତେୱାଁ ପାକ୍‌ଚିଏ, ଆମେକେ ବୁବଃ ଆଃଏ । 9 ମୁଃଡ଼ି ରେମୁଆଁ ବ୍ରି ଜଗ୍‌ ନ୍‌ସାଃ ଗଃଏ, ମେଁ ମେଁବାନ୍‌ ଚିନା ବାନା ଡିଙ୍ଗ୍‌ଏ । ବାରି, ଜା ସୁଆ ବାଏ, ମେଁ ମେଁବାନ୍‌ ମେଁ ଚିନା ବାନା ଡିଙ୍ଗ୍‌ଏ । 10 ଲୁଆ ମଟ ଡିଙ୍ଗ୍‌ଲା ଅଃନା ଆମେକେ ଦାର୍‌ ଆରାଃବଗ୍‌, ତେଲା ମେଁ ଆଡ଼ାତ୍ରା ବେସି ବପୁ ବିଃପଡ଼େଏ । ମାତର୍‌ କାମ୍‌କେ ଆଃସୁଏଃ ନ୍‌ସାଃ ଗିଆନ୍‌ ଚୁଚୁ ରକମ୍‌ । 11 ବୁବଃ ମନ୍ତର୍‌ ଅଁଚେ ସାନ୍ତି ଡିଙ୍ଗ୍‌କ୍ନେ ଇଡ଼ିଙ୍ଗ୍‌ ଆଃଲା ଡିସାରିନେ ମେଃଡିଗ୍‌ ଦର୍‌କାର୍ ଣ୍ଡୁ । 12 ଗିଆନ୍‌ ରେମୁଆଁନେ ତୁମୁଆଃନେ ସାମୁଆଁ ଦୟା ରକମ୍‌ । ମାତର୍‌ ମୁର୍କନେ ନିଜର୍‌ ତୁମୁଆଃ ଆମେକେ ନସ୍‌ଟ ଆଃଡିଙ୍ଗ୍‌ଏ । 13 ମେଁ ତୁମୁଆଃବାନ୍‌ ପର୍‌ତୁମ୍‌ ତାର୍‌କ୍ନେ ସାମୁଆଁ ଗିଆନ୍‌ ଣ୍ଡୁନେ ସାମୁଆଁ ଆରି ମେଁ ବାସଙ୍ଗ୍‌କ୍ନେ ସାରାସାରି ସାମୁଆଁ ଦୁକ୍‌ ସାମୁଆଁ ବାୟା ରକମ୍‌ । 14 ମୁର୍କ ବେସି ସାମୁଆଁ ବାସଙ୍ଗ୍‌ମ୍ୟା । ଏଲେଡିଗ୍‌ ମେଃନେ ଗଟେଏ, ରେମୁଆଁ ଆମ୍ୟାକେ ଣ୍ଡୁ; ଆରି, ଆତେନ୍‌ ଇଡ଼ିଙ୍ଗ୍‌ ମେଃନେ ଗଟେଏ, ଜା ଆମେକେ ଆଃମ୍ୟାଃ ୟାଏ ? 15 ମୁର୍କନେ ସାପା ସ୍ଲେ ଆମେକେ ଆଲିଆ ଆଃଡିଂଏ, ମେଃଡାଗ୍ଲା ଡିରକମ୍‌ ଇନି ବିତ୍‌ରେ ୱେ ଡିଙ୍ଗ୍‌ଏ, ଆତେନ୍‌ ମେଁ ଆମ୍ୟାଃକେ ଣ୍ଡୁ । 16 ଅ ଦେସ୍‌, ନାନେ ରାଜା ଜଦି ଗଡ଼େଅ ଡିଙ୍ଗ୍‌ଏ ଆରି ନାନେ ନେତା ଜଦି ଞ୍ଜିର୍‌ନୁଗ୍‌ ବଲେ ଚଙ୍ଗ୍‌ଏ, ତେଲା ନା ଅବିସାପ୍‌ନେ ଉଂଡେ । 17 ଅ ଦେସ୍‌, ନାନେ ରାଜା ଜଦି ରାଜାନେ ଉଂଡେବାନ୍‌ ପାପାଙ୍ଗ୍‌ ଆରି ନାନେ ନେତାଇଂ ଜଦି ବୁସାଃରେ ଜଦି ଡିଙ୍ଗ୍‌ ଆଲେଃଆର୍‌, ମାତର୍‌ ବପୁ ବାନ୍‌ସା ସମାନ୍‌ ବେଲା ଚଙ୍ଗ୍‌ଆର୍‌ଏ, ତେଲା ନା ଦନ୍ୟ । 18 ଅଲ୍‌ସୁଆ ରେମୁଆଁନେ ବ୍ଲେସାଙ୍ଗ୍‌ ଡଃବେଗ୍‌ ଲଃଏ, ବାରି ନ୍ତିନେ ଅଲ୍‌ସୁଆ ବାନ୍‌ ଡୁଆ ଆଡ଼ାତ୍ରାବାନ୍‌ ଣ୍ଡିଆ ଡଙ୍ଗ୍‌ଏ । 19 ଲୁଆଃନେ ନ୍‌ସା ବଜି ଆଃର୍ମେଏ, ବାରି ଅଙ୍ଗୁର୍‌ ରସ୍‌ ଜିବନ୍‌କେ ସାର୍‌ଦା ଆଡିଙ୍ଗ୍‌ଏ; ଆରି ଦନ୍‌ ସାପା କାମ୍‌ନ୍ନିଆ ଲାଗେଏ । 20 ରାଜାକେ ଅବିସାପ୍‌ ଆବିଃଗ୍‌ପା, କି ମନେ ମନେ ଡିଗ୍‌ ଆବିଃଗେପା; ଆରି, ସାକାର୍‌ ରେମୁଆଁକେ ନା ଡୁଲେଗ୍‌ ଡୁଆନିଆ ଅବିସାପ୍‌ ଆବିଃଗେ; ମୁଇଂ ପ୍ଲିଗ୍‌ ସାମୁଆଁ ରାଙ୍ଗ୍‌ୱେ ୟାଏ ଆରି ପେ ବାସଙ୍ଗ୍‌ପେବକ୍ନେ ଆତେନ୍‌ ସାମୁଆଁ ଆମେକେ ଆମ୍ୟାଃବିଃଏ ।