ଉପଦେସକ୍‌ 7

ଜ୍ଞାନି ଆରି ଅଜ୍ଞାନି

1 ବେସି ଦାମ୍‌ନେ ଞ୍ଚୁ ବାଦୁଲ୍‌ ନିମାଣ୍ଡା କାମ୍‌ନେ ମ୍ନି ବଲ୍‌ ଆରି ଜନମ୍‌ ଦିନ୍‌ ବାଦୁଲ୍‌ ଗୁଏଃନେ ଦିନା ନିମାଣ୍ଡା । 2 ଚଙ୍ଗ୍‌ ଡୁଆ ୱେନେ ବାଦୁଲ୍‌ ଅଃନେ ଡୁଆ ୱେନେ ନିମାଣ୍ଡା । ମେଃଡାଗ୍‌ଲା ଆତେନ୍‌ ସାପା ରେମୁଆଁ ଜାତିନେ ସାରାସାରି ଗାଲି ଆରି ମ୍ବ୍ରଲେକ୍ନେ ରେମୁଆଁ ଆତ୍‌ଅରିଆ ମନ୍‌ ଦିଆନ୍‌ ବିଃଚେ ବାବେଏ । 3 ଲୁଆଃନେ ବାଦୁଲ୍‌ ଦୁକ୍‌ ଡିଙ୍ଗ୍‌ନେ ନିମାଣ୍ଡା, ମେଃଡାଗ୍‌ଲା ନ୍‌ସୁଆର୍‌ ଲେଃକ୍ନେ ସାର୍‌ମୁଆଃ ଏତେ ମନ୍‌ ସାର୍ଦା ଡିଂଏ । 4 ଜ୍ଞାନି ରେମୁଆଁଇଂନେ ଜିବନ୍‌ ଗ୍ରି ବଗ୍‌ ବଗ୍‌ଚେ ଅଃଡିଙ୍ଗ୍‌କ୍ନେ ଡୁଆନିଆ ଲେଃଏ, ମାତର୍‌ ମୁର୍କ ରେମୁଆଁଇଂନେ ଜିବନ୍‌ ସାର୍‌ଦା ଡିଙ୍ଗ୍‌କ୍ନେ ଡୁଆନିଆ ଲେଃଏ । 5 ମୁର୍କ ରେମୁଆଁଇଂନେ ଅସ୍‌ମାର୍‌ ଦ୍ରିଗ୍‌ନେ ବାଦୁଲ୍‌ ଜ୍ଞାନି ରେମୁଆଁଇଂନେ ୱିଙ୍ଗ୍‌ନେ ଦ୍ରିଗ୍‌ନେ ନିମାଣ୍ଡା । 6 ଡିରକମ୍‌ ଙ୍କୁଇ ଆଲ ଡୁଆଡିଙ୍ଗ୍‌କ୍ନେ ଗ୍ରେଃନେ କଡ଼୍‌ କଡ଼୍‌ ସବଦ୍‌ ଡିଙ୍ଗ୍‌ଏ, ମୁର୍କ ରେମୁଆଁନେ ଲୁଆଃନେ ଦେତ୍‌ରକମ୍‌ ଡିଙ୍ଗ୍‌ଏ । ଆକେନ୍‌ ଆଃ ସରାଃ । 7 ସତ୍‌ରେ ଅନ୍ୟାୟ୍‌ ଡିଙ୍ଗ୍‌ଚେ ଦନ୍‌ ଆର୍‌ଜେ ବଲା ଜ୍ଞାନି ରେମୁଆଁକେ ମୁର୍କ ଆଃଡିଙ୍ଗ୍‌ଏ ଆରି ଲାଞ୍ଚୁଆ ବୁଦି ନସ୍‌ଟ ଆଃଡିଙ୍ଗ୍‌ଏ । 8 ସ୍ଲେ ଆରାମ୍‌ ଡିଙ୍ଗ୍‌ନେ ବାଦୁଲ୍‌ ମେଁ ବାନ୍‌ ଡାନେ ନିମାଣ୍ଡା । ବାରି, ଆତ୍ମା ବିତ୍‌ରେ ଗର୍ବ ଡିଙ୍ଗ୍‌ନେ ବାଦୁଲ୍‌ ଆତ୍ମାଅରିଆ ଦର୍‌ଜ୍ୟ ଡିଙ୍ଗ୍‌ନେ ନିମାଣ୍ଡା । 9 ରିସା ଡିଙ୍ଗ୍‌ ନ୍‌ସାଃ ନିଜର୍‌ ମନ୍‌ ବିତ୍‌ରେ ତେରେପେତେ ଆଡିଙ୍ଗ୍‌ପା, ମେଃଡାଗ୍ଲା ମୁର୍କ ରେମୁଆଁଇଂନେ ରୁଦୟ୍‌ନିଆ ରିସା କାଲାଆଃ ଲେଃଏ । 10 ଆକେନ୍‌ କାଲ୍‌ ବାଦୁଲ୍‌ ଅଃସେ କାଲ୍‌ ନିମାଣ୍ଡା ଲେଃନେ କାରନ୍‌ ମେଃନେ, ଆକେନ୍‌ ପେ ଆବାସଙ୍ଗ୍‌ପା, ମେଃଡାଗ୍ଲା ଆପେକେ ଗିଆନ୍‌ ଣ୍ଡୁ କି ଆକେନ୍‌ ବିସ‍ଏରେ ପ୍ରଶ୍ନ ପେସାଲ୍ୟାଃକୁ ନାଡିଙ୍ଗ୍‌କେ । 11 ଗିଆନ୍‌ ନ୍ତା ଞ୍ଜାଇଂନେ ବାନ୍‌ ସିକେ ଲେଲା ନିମାଣ୍ଡା; ଆରି, ମ୍ୱ୍ରଲେକ୍ନେ ରେମୁଆଁଇଂ ଆଡ଼ାତ୍ରା ଆତେନ୍‌ ବେସି ମୁଲ୍ୟବାନ୍‌ । 12 ମେଃଡାଗ୍ଲା ଦନ୍‌ ଡିରକମ୍‌ ଆସା ରକମ୍‌, ଗିଆନ୍‌ ଡିଗ୍‌ ଦେତ୍‌ରକମ୍‌ ଆସା ରକମ୍‌; ମାତର୍‌ ବିଦ୍ୟାବାନ୍‌ ସାପାଟୁ ମ୍ନାଃ ଆକେନ୍‌ ଜେ, ଗିଆନ୍‌ ନିଜର୍‌ ସାକାର୍‌ନେ ଜିବନ୍‌କେ ରକ୍ୟା ଡିଂଏ । 13 ମାପ୍‌ରୁନେ ସ୍ଲେ ଚିନ୍ତା ଡିଙ୍ଗ୍‌ କେଲା, ମେଃଡାଗ୍ଲା ମେଁ ମେଃନେ ବାଙ୍ଗ୍‌ଟ ଆଡିଙ୍ଗ୍‌ଏ, ବାରି ଜା ଆତେନ୍‌ ସିଦା ଆଡିଙ୍ଗ୍‌ ୟାଏ ? 14 ସୁକ୍‌ ବେଲା ସାର୍‌ଦା ଡିଙ୍ଗ୍‌ପା ଆରି ଦୁକ୍‌ ବେଲା ଚିନ୍ତା ଡିଙ୍ଗ୍‌ କେଲାପା, ରେମୁଆଁ ଜାତିକେ ବବିସତ୍‌ ବେଲା ମେଃ ଗଟେଏ, ଆତେନ୍‌ ଡିରକମ୍‌ ମେଁ ମ୍ୟାଃ ଆୟା ଣ୍ଡୁ, ଆତେନ୍‌ସାଃ ମାପ୍‌ରୁ ସୁକ୍‌ ଆରି ଦୁକ୍‌କେ ଡାଗ୍ରା ଡାଗ୍ରା ବକେ । 15 ନେଙ୍ଗ୍‌ ନିଜେ ସରାଃ ଲେଃବେଲା ଆକେନ୍‌ ସାପା କେନ୍ଲେଃକେ । ଦାର୍‌ମିକ୍ ରେମୁଆଁ ଅଃନା ଅଃନା ନିଜର୍‌ ଦରମ୍‌ ସାମୁଆଁରେ ବିନାସ୍‌ ଡିଙ୍ଗ୍‌ଏ, ବାରି ଦୁଷ୍ଟ ରେମୁଆଁ ନିଜର୍‌ ଦୁସ୍‌ଟ କାମ୍‌ରେ ଜାବର୍‌ ମୁଆଁ ବ୍ରୁଆ ଲେଃଏ । 16 ବେସି ଦରମ୍‌ ରେମୁଆଁ ଆଡିଙ୍ଗ୍‌ପା । କି ନିଜେକେ ବେସି ଗିଆନି ଡାଗ୍‌ଚେ ଆରାସୁଏଗ୍‌ପା । ମେଃନ୍‌ସାଃ ନା ନିଜେକେ ବିନାସ୍‌ ନାରାଃଡିଙ୍ଗ୍‌ଏ ? 17 ପେ ବେସି ଦୁସ୍‌ଟ ଆଡିଙ୍ଗ୍‌ପା, କି ବକୁଆ ଆଡିଙ୍ଗ୍‌ଗେ । ନା କାଲ୍‌ ମାପିଙ୍ଗ୍‌ଚାନେ ସିସେ ମେଃନ୍‌ସାଃ ନା ନାଗୁଏଃଏ ? 18 ଆକେନ୍‌ ସାଃଚେ ବନେ ବାଦୁଲ୍‌, ମେଁବାନ୍‌ ନ୍ତି ତଃଚେ ରାଙ୍ଗ୍‌ମାଡନେ ପାକା ନିମାଣ୍ଡା । ମେଃଡାଗ୍ଲା ଜା ମାପ୍‌ରୁକେ ବୁଟଏ, ମେଁ ଆକେନ୍‌ ସାପାବାନ୍‌ ଜିତେଏ । 19 ମୁଇଂ ଗିଆନ୍‌ ଲେକ୍ନେ ରେମୁଆଁ ବାନ୍‌ ଇନି ନିଆ ସାସନ୍‌ ଡିଙ୍ଗ୍‌ନେ ଗୁଆକ୍ଲିଗ୍‌ ନେତା ବାନ୍‌ ଗିଆନ୍ ବେସି ବପୁ ରକମ୍‌ । 20 ପାପ୍‌ ମାଡିଙ୍ଗ୍‌ଚେ ସତ୍‌ କାମ୍‌ ଡିଙ୍ଗ୍‌ଏ, ଦେକ୍‌ରକମ୍‌ ମୁଇଂଜା ଡିଗ୍‌ ଦରମ୍‌ ରେମୁଆଁ ଡିଲାଡିଗ୍‌ ମଞ୍ଚ୍‌ପୁର୍‌ନିଆ ଣ୍ଡୁ । 21 ଉଡ଼ି ସାମୁଆଁ ବାସଙ୍ଗ୍‌ନେଡିଙ୍ଗ୍‌କେ, ଆତେନ୍‌ ସାପାନିଆ ମନ୍‌ ଦିଆନ୍‌ ଆବିଗ୍‌ପା । ଡିଙ୍ଗ୍‌ଲେଃଏ ନାନେ ଚାକର୍‌ ଆନାକେ ଶାଏପ୍‌ ବିଃନେ ନା ନାଅଁଏ । 22 ମେଃଡାଗ୍ଲା ନାନେ ମନ୍‌ ମ୍ୟାଃଲେଃକେ ଜେ, ନା ଡିଗ୍‌ ବିନ୍‌ରେକେ ଦେତ୍‌ରକମ୍‌ ପ୍ରେକ୍‌ ପ୍ରେକ୍‌ ସାଏବ୍‌ ବିଃନାବକେ । 23 ନେଙ୍ଗ୍‌ ଗିଆନ୍‌ ବାନ୍‌ ଆକେନ୍‌ ସାପା ପରିକ୍ୟା ଡିଙ୍ଗ୍‌ମ୍ୱକେ । ନେଙ୍ଗ୍‌ ମ୍ୱାସଙ୍ଗ୍‌କେ, ନେଙ୍ଗ୍‌ ଗିଆନି ଣ୍ଡିଙ୍ଗ୍‌ଏ । ମାତର୍‌ ଆତେନ୍‌ ନେଙ୍ଗ୍‌ ବାନ୍‌ ବେସି ସୁଲ ଲେଃଗେ । 24 ମେଃନେ ଲେଃକେ, ଆତେନ୍‌ ସୁଲ ଲେଃକେ ଆରି ବେସି ସ୍ରି ଲେଃକେ । ଆତେନ୍‌ ଜା ବାୟାଏ ? 25 ଗିଆନ୍‌ ବିସ‍ଏରେ ମ୍ୟାନ୍‌ସା, ଆରି ଦୁଷ୍ଟ ଡିଙ୍ଗ୍‌ନେ ଜେ ବକୁଆ ରକମ୍‌, ଆରି ମୁର୍‌କ ଡିଙ୍ଗ୍‌ନେ ଜେ, ବାୟା ରକମ୍‌, ଆକେନ୍‌ ମ୍ୟାନ୍‌ସା ନେଙ୍ଗ୍‌ ମ୍ପାଙ୍ଗ୍‌କେ ଆରି ନେଙ୍ଗ୍‌ନେ ମନ୍‌ ଆତେନ୍‌ ତୁର୍‌ନେସା ଆରି ଟିକିନିକି ବାବ୍‌ରେ ତୁର୍‌ନେସା ଇକ୍‌ଚା ଡିଙ୍ଗ୍‌କେ । 26 ଆରି, ନେଙ୍ଗ୍‌ କେଣ୍ଡିଙ୍ଗ୍‌କେ ଜେ, ମୁଃଡ଼ି ସେଲାମ୍ବୁଏଃନେ ମନ୍‌ ପାନ୍ଦ୍‌ ରକମ୍‌ ଆରି ଜାଲ୍‌ ରକମ୍‌ ଆରି ନ୍ତି କାଡ଼ୁ ସିକ୍‌ଲି ରକମ୍‌, ମେଁ ଗୁଏଃନେ ବାନ୍‌ ବେସି ବିସେଃ ଲାଏଃକେ । ଜା ଜଦି ମାପ୍‌ରୁକେ ସାନ୍ତି ଆଃଡିଙ୍ଗ୍‌ଏ, ମେଁ ମେଁବାନ୍‌ ରକ୍ଷା ବାଏ । ମାତର୍‌ ପାପି ମେଁବାନ୍‌ ଦାରାପଡ଼େଏ । 27 ଉପଦେସକ ବାସଙ୍ଗ୍‌ ଡିଂକେ, କେଲା, ମୁଇଂ ସାମୁଆଁ ମ୍ୟାଃନ୍‌ସା ବାରି ମୁଇଂ ସାମୁଆଁକେ ଅଲ୍‌ଗା ଅଲ୍‌ଗା ସାମୁଆଁ ଆଃମିସୁଃଚେ ଆକେନ୍‌ ବିଷୟ୍‌ ବାନ୍ଲେକେ । 28 ନେଙ୍ଗ୍‌ନେ ଜିବନ୍‌ ଏବେ ଜାକ ଡିଗ୍‌ ତୁର୍‌ ଅଲେଙ୍ଗ୍‌ଡିଙ୍ଗ୍‌କେ, ମାତର୍‌ ନେଙ୍ଗ୍‌ ଆତେନ୍‌ ନ୍ନାଅବାକେ ଣ୍ଡୁ । ଅଜାର୍‌ଟା ବିତ୍‌ରେ ନେଙ୍ଗ୍‌ ମୁଇଂ ରେମୁଆଁକେ ଅବାନ୍ଲେଃକେ । ମାତର୍‌ ମେଙ୍ଗ୍‌ନେ ବିତ୍ରେବାନ୍‌ ନେଙ୍ଗ୍‌ ମୁଇଂ ଡିଗ୍‌ ସେଲାମ୍ବୁଏଃକେ ନ୍ନାଅବାକେ ଣ୍ଡୁ । 29 କେଲା, ନେଙ୍ଗ୍‌ ଅଃକେନ୍‌ ମାତର୍‌ ବାନ୍ଲେଃକେ ଜେ, ପର୍‌ମେସର୍ ରେମୁଆଁକେ ଦରମ୍‌ ଆଃଡିଙ୍ଗ୍‌ଚେ ତିଆର୍‌ ଡିଙ୍ଗ୍‌କେ । ମାତର୍‌ ମେଇଂ ଗୁଲେ ବିସ‍ଏକେ ତିଆର୍‌ ଆଡିଙ୍ଗ୍‌ ନ୍‌ସାଃ ତୁର୍‌ ଅଲେଙ୍ଗ୍‌ଡିଂଆର୍‌କେ ।