1 Mpangi zani zizola, lukwikilandi mu yonso-yonso mpeve ko, kansi fyongonineeno zo mu zaba ti zi Nzambi zidi, mu dyambu ti, mimbikudi mi luvunu mimingi mi mwangani mu nza. 2 Taleeno bwedi lulendi zabila ti Mpeve yo yi Nzambi yidi: yonso mpeve yikwe tambulanga ti Yesu Klisto wuyiza bonso muntu, Mpeve yo yi Nzambi yidi. 3 Kansi yonso mpeve yikwe bisanga mu tambula ti Yesu wuyiza bonso muntu, kavwihulu ku Nzambi ko, yandi ni mpeve yi Mutantu wu Klisto: yeno luyuwa nyizulu andi, mpe yandi weka bwabu mu nza.

4 Kansi yeno baala bani, luvwihulu ku Nzambi na lubedisi mimbikudi mi luvunu bemyomyo, mu dyambu ti Mpeve yina yaala mu yeno yivudidi lulendo na mpeve yina yaala nza. 5 Bantu bebobo badi bantu ba nza. Nzonzolo awu yi kinza yidi, mpe nza yikwe bayuwilanga. 6 Yeto tudi bantu bavwihu ku Nzambi. Wonso zebi Nzambi kwe tuyuwilanga, kansi yondowo lembolo vwihu ku Nzambi, kakwe tuyuwilanga ko. Bwabobo tukwe zabilanga Mpeve yi kikedika, na mpeve yi luvunu.

7 Mpangi zani zizola, bika tuzolasaneeno yeto na yeto, mu dyambu ti, zola kukwe fumanga ku Nzambi. Wonso muntu wuu na zola wubutu ku Nzambi mpe zebi Nzambi . 8 Yondowo lembolo ba na zola, kazebi Nzambi ko, mu dyambu ti Nzambi wudi zola. 9 Taleeno bwedi Nzambi katulonkila zola kwandi: wutambika Mwana andi wumosi kaka mu nza, mwanki tubaka luzingu mu yandi. 10 Luzolo ebu ludi: ka yeto ko tutya Nzambi, kansi yandi wututya, wutambika Mwana andi wukiyekola bonso munkayulu mu dyambu di ndemvokolo yi masumu meto.

11 Mpangi zani zizola, tala ti bwabobo Nzambi katuzodila, yeto mpe, tufweti zolasana yeto na yeto. 12 Kuu muntu ko weka ne yena Nzambi. Tala ti tukwe zolasananga yeto na yeto, Nzambi mbo kasikila mu yeto, mboki luzolo lwandi lwaaba lulunga mu yeto.

13 Taleeno bwedi tukwe zabilanga ti tukwe sikilanga mu Nzambi mboki Nzambi kwe sikilanga mu yeto: wutuhaana Mpeve andi. 14 Mpe yeto, tuyeni mpe tuna ta kimbangi ti Tata wutambika Mwana andi mu ba Muvuukisi wu nza. 15 Tala ti muntu bakudi ti Yesu Mwana Nzambi kadi, Nzambi wuna sikila mu yandi mpe yandi mu Nzambi. 16 Mpe yeto, tuzebi na tukwikidi ti Nzambi wututiidi.

Nzambi wudi zola: yondowo kwe sikilanga mu zola, kwe sikilanga mu Nzambi na Nzambi mu yandi. 17 Bwabobo zola kudi kulunga mu yeto, mwanki tuba na kivuvu mu kilumbu ki mfundusu, mu dyambu ti tuu mu nza beyiyi bonso yandi bu kadi. 18 Mu zola, munaani bunkuta, zola kulunga kukwe katulanga bunkuta. Mu dyambu ti bunkuta bukwe twalanga nsembolo. Yondowo kwe yenanga bunkuta kaa na zola kulunga ko.

19 Yeto tukwe tyanga mu dyambu ti Nzambi wututya wuntete. 20 Tala ti muntu teedi ti: «nkwe tyanga Nzambi», kansi kwe belanga mpangi andi, muntu wuluvunu wudi. Mu dyambu ti, yandi kwe lembolo tyanga mpangi andi yi kakwe yenanga, bwedi kalendi tiila Nzambi yi kakwe lembolo yenanga e? 21 Eyi ni ntumunu yi katuhaana: yondowo kwe tyanga Nzambi, fweti tya mpe mpangi andi.