1 Wonso muntu kwe kwikilanga ti Yesu ni Klisto, mwana Nzambi kadi, mpe wonso muntu kwe tyanga Tata, kwe tyanga mpe Mwana andi. 2 Taleeno bwedi tukwe zabilanga ti tutiidi baala ba Nzambi: bu tukwe tyanga Nzambi na bu tukwe tumamanga mu ntumunu zandi. 3 Mu dyambu ti, kutya Nzambi, ni kutumama mu ntumunu zandi. Mpe ntumunu zandi zii kizitu ko, 4 mu dyambu ti wonso muntu wubutu ku Nzambi, kwe nunganga misamu mi nza. Nzila ye bakila nungunu mu nza, ni kiminu kyeto. 5 Nani kwe bedisanga nza e? Ni yondowo kwandi kwe kwikilanga ti Yesu ni Mwana Nzambi.

6 Ni Yesu-Klisto wuyizila mu mamba na mu menga. Ka mamba kaka ko, kansi mamba na menga. Mpe ni Mpeve yina ta kimbangi, mu dyambu ti Mpeve yidi kikedika. 7 Mbangi zitatu zidi: 8 Mpeve, mamba na menga, mpe bya bitatu bikwe tanga kimbangi kimosi. 9 Tala ti tukwe tambulanga kimbangi kikwe tanga bantu, tufweti zaba ti kimbangi ki Nzambi kivudidi bunene, mu dyambu ti kimbangi ki Nzambi kidi, wuta kyo mu dyambu di Mwana andi. 10 Muntu kwe kwikilanga mu Mwana Nzambi wudi na kimbangi bekyokyo mu mutima andi. Kansi yondowo kwe lembolo kwikilanga mu Nzambi, kwe sanga ti Nzambi kaba muntu wuluvunu, mu dyambu ti kakwe kwikilanga kimbangi kita Nzambi mu Mwana andi ko. 11 Eki ni kimbangi bende: Nzambi wutuhaana luzingu lu mimvu ka mimvu, mpe luzingu belolo mu Mwana andi ludi. 12 Yondowo wuu na Mwana, wuu na luzingu, kansi yondowo lembolo ba na Mwana Nzambi, kaa na luzingu ko.

13 Nalusonikini mukanda bewuwu, ku yeno lukwe kwikilanga mu nkumbu yi Mwana Nzambi, mwanki luzaba ti luu na luzingu lu mimvu ka mimvu. 14 Kivuvu kii neto mu Nzambi, ni eki: tala ti tumulombidi kima bonso buu luzolo lwandi, yandi kwe tuyuwanga. 15 Tala ti tuzebi ti kwe tuyuwanga, kima ni kima ki tukwe mulombanga, tuzebi ti tutambudi kyo ki tumulombidi.

16 Tala ti muntu wuna yena mpangi andi wuna hola masumu makwe lembolo natanga ku lufwa, bika kasambila, mpe Nzambi waahaana luzingu ku mpangi beyoyo. Ni yobobo bakwe holanga masumu makwe lembolo natanga ku lufwa nina zonzila. Kansi kuu na disumu dikwe natanga ku lufwa, mpe ka mu dyambu di disumu bedyodyo ko nina lomba mu sambila. 17 Yonso-yonso nkadulu yimbi, disumu didi. Kansi ka dyonso-dyonso disumu ko dikwe natanga ku lufwa.

18 Tuzebi ti ka kuu mwana Nzambi wumosi wukwe tatamananga mu hola masumu ko, mu dyambu ti Mwana Nzambi kwe mu kebanga, mpe Munga Mbi kalendi mu sa nakani kima ko.

19 Tuzebi ti bavwihu tudi ku Nzambi, kansi nza yimvimba yii ku nsye lulendo lu Munga Mbi.

20 Tuzebi mpe ti Mwana Nzambi wuyiza na wutuhaana madyela mu zaba Nzambi yi makedika. Tudi kintwadi na Nzambi yi makedika mu nzila yi Mwana andi Yesu-Klisto. Ni yandi wudi Nzambi yi makedika, na luzingu lu mimvu ka mimvu.

21 Baala bani, kebeeno kweno mu nzambi zi biteki.