1 Meno mukuluntu nina sonika kuu Mukento wusoolo ku Nzambi na ku baala bandi ba natiidi mu dyambu di kikedika. Ka meno kaka ko nibatiidi, kansi yobobo mpe bamvimba bazaba kikedika, 2 mu dyambu ti kikedika kii kisikila mu yeto mpe kyaaba neto mimvu ka mimvu.

3 Bika Nzambi Tata, na Yesu-Klisto Mwana andi, batuhaana lusakumunu, nkenda na kiyenge, mwanki tuzinga mu kikedika na mu luzolo!

4 Natomini yangalala bubwingi mu yena ti baala baku bahiika bana dyata mu kikedika, bonso budi ntumunu yi tutambula ku Tata. 5 Ngeye Mukento, nina kulomba ti: tuzolasaneeno yeto na yeto. Ka yii ntumunu yimoona ko nina kusonikina, kansi ni yoyoyo yi tutambula tuuka ku mbadukulu. 6 Luzolo ni mu zinga bonso buu ntumunu zi Nzambi. Mpe ntumunu yilutambula tuuka mbadukulu ni mu zinga mu luzolo.

7 Mu dyambu ti, bihuni bibingi bimeni mwangana mu nza. Ba kwe tambulanga ko ti Yesu-Klisto wuyiza bonso muntu. Bwabobo bakwe zabilanga kihuni na Mutantu wu Klisto. 8 Lwengeeno kweno, mwanki lulembolo hombisa ndandu yi kisalu kyeto, kansi lutambula musendo wulunga .

9 Wonso-wonso muntu kwe lembolo sikilanga mu ndongosolo yi Klisto, kansi wuna landa ndongosolo yihiika, kaa kintwadi na Nzambi ko. Yondowo kwe sikilanga mu ndongosolo beyoyo, wuu kintwadi na Tata mpe na Mwana. 10 Tala ti muntu wizidi ku yeno na wulutwadidi ndongosolo yihiika, lumutambulandi ko na lumuhaanandi mbote ko, 11 mu dyambu ti wonso muntu waamuhaana mbote, weka kintwadi na nsadulu zandi zimbi.

12 Misamu mimingi mii naani mu lusonikina, kansi ntiidi mu sadila kipapila na ntinta ko. Nii na kivuvu ti nina kwiza ku yeno mu luzonzila meso na meso, mwanki kyese kyeto kiba kilunga.

13 Baala ba Kibusi kyaku kisoolo ku Nzambi, bakutambikidi zimbote.