1 Pedro 3

Bakento na babakala bawu

1 Bumosi mpe ku yeno bakento, lufweti tumimina balumi beeno. Mwanki tala ti balumi bahiika bana kwikila mu Mambu ma Nzambi ko, balendi kwikila mu dyambu di nkadulu yi bakento bawu, wulembolo zonza dyambu. 2 Mu dyambu ti yawu baayena bwedi nkadulu eno yidi yivedila na yikivumi. 3 Lusosandi mu kiyenikisa mu bima bikwe yenikanga mu meso bonso: kukangusu milengi, misanga miwola, hoti binkutu bintalu. 4 Kansi soseeno kitoko ki kati di mutima, kitoko kikwe lembolo bebanga, ni mpeve yi lembami na yi kizunu, mpe yii na mfunu yiyingi ha ntadisi yi Nzambi. 5 Ni bwabobo bubela mu ntama, kitoko ki bakento balongo bedi sanga kivuvu mu Nzambi. Yawu bedi tumiminanga balumi bawu, 6 bonso Sala wedi tumiminanga Abalahami na wedi mu mutumisinanga «mfumu ani.» Yeno lukitukidi baala bandi ba bakento tala ti luhidikidi misamu mimbote, wulembolo yena bunkuta bu kima.