1 Meno Petelo, ntumwa yi Yesu-Klisto.

Nina sonika ku bantu Nzambi ba kasoola na bakwe zinganga mu zinsi zinzenza, mpe bamwangana mu nsi yi Ponti, yi Ngalatiya, yi Kapadose, yi Aziya, na yi Bitini. 2 Tata Nzambi wulusoola ntama bonso bubela makani mandi, na wulubyeka mu nzila yi Mpeve andi, mwanki luba na lutumumu mpe luba bavedila mu menga ma Yesu-Klisto.

Bika Nzambi kaluhaana lusakumunu na kiyenge mu kitezo kihyokidi.

3 Masiika ku Nzambi, Tata di Mfumu eto Yesu-Klisto! Mu bunene bu bumbote bwandi, wusa ti tubutuka mbutuka yimoona bu kafulukisa Yesu-Klisto mu bafwa, mwanki tuba na kivuvu kikedika, 4 mu kinganga fwa Nzambi di kakubikila bantu bandi. Fwa bedyodyo dilendi fuuka ko, dilendi biha ko, mpe dilendi zimbisa kitoko kyandi ko. Nzambi wulukubikila dyo mu mazulu, 5 ku yeno Nzambi ba kakwe kebanga mu lulendo lwandi, mu nzila yi kiminu natee mu ntangu yaakwiza mpulusu, yoyoyo yi kakubika mu lonka mu ntangu yi nsukunu.

6 Ni hahoho, luu bafuluka mu kyese, mpeleko bulendi ba ti mu mwa ntangu yifyoti, luba mu kyadi, mu dyambu di mpasi zi mumpila mu mpila. 7 Mwanki mfunu yi bunene bu kiminu kyeno- kivudi mfunu na wola dikwe bebanga mpeleko bakwe yokanga dyo ku tiya- yitambula masiika, nkembo na nzitusu mu ntangu Yesu-Klisto yi kaayenika. 8 Lukwe mu tyanga mpeleko lumuyena ko, lukwe mu kwikilanga mpeleko lwamuyeni ko. Mpe luu bafuluka mu kyese kihyokidi kilembolo ba na bwe teela, 9 mu dyambu ti luna tambula mpulusu yi myela myeno bonso mufutu wu kiminu kyeno.

10 Mimbikudi misosa na mitoma fyongonina misamu mitadidi mpulusu beyoyo. Yawu babikula mu dyambu di munkayulu wulukubikila Nzambi mu tambula. 11 Basosa mu zaba nkye ntangu na bwedi misamu bemyomyo myaahidimina, bonso bu balonkila myo Mpeve yi Klisto yiba mu yawu. Yikizonzila mpasi zaayena Klisto, mpe mukembo waakwiza ku mutwala. 12 Nzambi wubazabikisa ti, misamu mi bata, ka mu dyambu di yawu bende ko, kansi mu dyambu dyeno. Bwabu musamu bewowo, milongisi mi Musamu Wumbote wabaluzabikisi, mu lulendo lu Mpeve Yilongo yifuma ku yulu. Zimbazi mpe zii na mpwila yiyingi mu zaba musamu bewowo.

13 Ni hahoho, beeno bakubama na kayeeno meso. Tuleeno kivuvu kyeno kimvimba mu bumbote bu baalusiila mu ntangu Yesu-Klisto yi kaayenika. 14 Bonso baala bakwe tumamanga, lulandandi nsatu zimbi ziteka ba neeno mu ntama, bu luba ku nsye bunzimbu. 15 Kansi beeno balongo mu nkadulu eno yimvimba, bonso Nzambi wulutumisi kadi wulongo. 16 Mu dyambu wuu wusonama ti: «Lufweti ba balongo, kadi nidi wulongo.»

17 Tala ti lukwe sambilanga Tata, yondowo wukwe lembolo swasikisanga mu ntangu yi kaafundisa muntu-muntu bonso buu nkadulu andi, buna, mu ntangu yisidi neeno mu zinga ha butoto, lufweti dyatila mu kivumi. 18 Luzebi ti, ka mu dyambu di bima bikwe fukilanga ko, bonso mbongo hoti wola, balukuudila mu mbelo yimbi yi sala lusisila zinkaka zeno, 19 kansi mu menga ma ntalu ma Klisto, wukiyekola bonso mwana dimeme dilembolo ba na kyeta na mvindu. 20 Nzambi wumusoola tekila nza yi hilama. Mu dyambu dyeno kamuyenikisi mu ntangu beyiyi yi nsukunu. 21 Mu yandi, lukwe kwikilanga mu Nzambi wumufulukisa mu bafwa, na wumuhaana nkembo, mwanki kiminu kyeno na kivuvu kyeno kiba mu Nzambi.

22 Luvedisi myela myeno bu lutumimini kikedika, mu zolasana mu kimpangi wulembolo ba na diisu ku nsye lukaya. Buna tomeeno zolasana yeno na yeno mu mutima wuvedila. 23 Mu dyambu wuu wusonama ti, lubutukidi mbutuka yimoona, ka mu nkuna yikwe fwanga ko, kansi mu nkuna yikwe lembolo fwanga mu nzila yi Mambu ma Nzambi, maa moyo na makwe sikilanga ntangu zimvimba. 24 Mu dyambu wuu wusonama ti:

« Kadi muntu

wuu bonso kititi,

na nkembo andi wumvimba

bonso kifulu ki kititi,

kititi kikwe yumanga

na kifulu kikwe sotokanga,

25 kansi Mambu ma

Mfumu makwe sikilanga

mimvu ka mimvu.»

Mambu bemomo ni Musamu Wumbote wubalusamunina.