1 Ku yeno bamvwama bwabu, dileeno na yendeeno kungi mu dyambu di mpasi zaalutudila. 2 Bimvwama byeno byeka bibola na zinsyedi zi meni dya binkutu byeno. 3 Wola dyeno na mbongo zeno zimeni kota mbungi. Mbungi beyoyo yina lonka kimbangi kina lubedisa, na yaayoka nitu eno bonso tiya. Lumeni yonzika bimvwama mu bilumbu bizimunina. 4 Yeno lubisidi mufuta bisadi bikwe yonzikanga mu zimfuba zeno. Miloko myawu mitudidi mu makutu ma Mfumu Sebaoti. 5 Luzingidi mu byese ha butoto na mu bimvwama. Luyukuti na Lukitukidi navwele-vwele, bonso bibulu mu kilumbu ki bya hondo. 6 Lubedisi, na luhondisi bantu balembolo zaba dyambu mpe babisidi ko.

7 Mpangi zani, beno na mvibudulu natee mu mvutukulu yi Mfumu. Taleno bonso kisadi kimfuba: kwe kingilanga mimbutu mimbote mikwe fumanga mu butoto kutonina mimbutu mintete mi mvula zintombo natee mu mimbutu mi mvula zimanunu zindolo. 8 Yeno mpe, beno na mvibudulu, kindiseeno mitima myeno, mu dyambu ti mvutukulu yi Mfumu yeka lukufi.

9 Mpangi zani, lunyungutilagandi baneeno, mwanki lulembolo fundusu. Taleno, mumfundisi telamani ha mwelo. 10 Mpangi zani, mu mpasi na mvibudulu, bongeeno kifwani ki mimbikudi mi zonza mu nkumbu yi Mfumu. 11 Tukwe tanga ti kyese ku yobobo bakwe vibidilanga. Luyuwa mvibudulu yi Yobi, mboki luzebi nkye musendo katambula ku Mfumu ku nsukunu, mu dyambu ti Mfumu wufuluka kadi mu nkenda na zola.

12 Mpangi zani, tekila misamu mimvimba, ludyangandi ndefi mu nkumbu yi yulu hoti mu nkumbu yi butoto ko, mpe ka ndefi yi mutindu wuhiika ko. Kansi bika ninga yeno yiba ninga, na kaani dyeno diba kaani. Mwanki lulembolo fundusu.

13 Wonso muntu ha kati dyeno wuu mu mpasi, biika kasambila. Wonso muntu ha kati dyeno wuu mu kyese, biika kayimbila mikunga mi masiika. 14 Wumosi ha kati dyeno wuu na kimbevo, biika katumisa bakuluntu ba dibundu, biza bamusambidila mpe bamukusa mafuta mu nkumbu yi Mfumu. 15 Lusambulu lu kiminu lwaanyakisa mbevo, mpe Mfumu waamutedimisa. Tala ti masumu kasiidi, Mfumu waamulemvokila. 16 Ni hahoho, funguleeno masumu meno yeno na yeno, mpe sambidilangeeno zimpangi zeno yeno na yeno, mwanki lunyaka. Lusambulu lu muntu wulunungu lulendo ludi. 17 Eliya wuba muntu bonso yeto. Wutatamana mu sambila, mwanki mvula zilembolo bwesa noka, na mimvu mitatu na ngonda sambanu ha butoto ha noka mvula ko. 18 Mboki wusambila dyaka, yulu ni di nokisa mvula, na butoto ni bubuta mimbutu.

19 Mpangi zani, tala ti ha kati dyeno muntu wumosi zimbakani nzila yi kedika, mpe muntu wuhiika wumuvutudi, 20 zabeeno ti yondowo waavutula munsumuki mu nzila yi kazimbakani, waamuvuukisa mu lufwa, na waasa ti masumu mamingi makatuka.