1 Kwedi kukwe fumanga mvita na bikindu ha kati dyeno e? Ka ni zinsatu zeno zimbi ko zikwe nwanisanga binama bi nitu byeno e? 2 Luna zinina bima, na luna bye baka ko, mimvondi ludi mpe lufulukidi mu musoki, mpe lulendi baka kani kima ko. Mboki lukwe sanga mvita na bikindu. Lulendi baka kima ko, mu dyambu ti lukwe lombanga ko. 3 Bu lukwe lombanga, yeno lukwe tambulanga ko mu dyambu ti bumbi lukwe lombilanga. Yeno lukwe lombanga mu yangidika kwandi nsatu zeno. 4 Yeno bantu ba kinsuza ludi! Luzebi ko ti wumana ba mukundi wu nza, weka mutantu wu Nzambi e? Ni hahoho, wonso tiidi mu ba mukundi wu nza, weka mbeni yi Nzambi. 5 Luna banza ti mu mpamba Masonama mana teela ti: «Na kimbanda kyonso Nzambi kakwe tilanga mpeve yi kwe zinganga mu yeto.» 6 Kansi, Nzambi kwe tuhaananga lusakumunu luvudidi bunene, mu dyambu ti wusonama ti: «Nzambi katiidi banga mayama ko, kansi kwe sanga mbote ku banga luyinunu.» 7 Ni hahoho, tumimineeno Nzambi, tedimineeno nkadyampemba, mpe yandi waatina kitatu neeno. 8 Finameeno ku Nzambi, mpe yandi waafinama ku yeno. Yeno minsumuki, sukuleeno moko meno, na yeno banga mitima myole*, vediseeno mitima myeno! 9 Bakuleno mpasi zeno, beno mu kifwidi, na dileeno. Bika tuseho tweno tu kaluka bidilu, na kyese kyeno ki kaluka kyadi. 10 Kikululeeno ha ntadisi yi Mfumu, mpe yandi waaluzangula.

11 Mpangi zani, lutesasanandi yeno na yeno misamu mimbi ko. Wonso waatesa munandi misamu mimbi hoti wafundisa mpangi andi, yandi vwezidi na fundisi Misiku. Wumana fundisa Misiku, wuna misadila ko, kansi ngeye weka mumfundisi wu Misiku. 12 Mu dyambu ti Nzambi kwandi yandi hiika kwe hekanga Misiku mpe wuu mumfundisi. Yandi kwandi lenda vuukisa na hondisa. Kansi ngeye nani wudi mu fundisa munaku e?

13 Yuweno bwabu, yeno lukwe tanga ti: «Bubu hoti mbazi twaakwenda ku mbanza eyi, na mumvu wumosi twaahyokisa koko, twaasa mumbungu, mpe twaabaka mbongo.» 14 Yeno luzebi ko nki byaalutudila mbazi! Kadi, luzingu lweno ludi bonso dibungi dikwe yenikanga mu mwa ntangu mboki dikwe zimbalanga. 15 Taleno bwedi lulenda zonzilanga: «Mfumu kamana tya, twaazinga, mpe twaahidika musamu ewu hoti ewuna.» 16 Kansi yeno luna kitumpidika mu mpova zeno zi mayama. Mayama mabobobo mambi madi. 17 Tala ti muntu zebi mu hidika musamu wumbote, na kahidikidi wo ko, disumu kasiidi.