1 Nina syamisa [bwabu] bakuluntu ba dibundu baa ha kati dyeno. Meno bende mukuluntu niidi bonso yawu, mbangi yi mona meso mu mpasi zi Klisto mpe nina ba kintwadi mu nkembo andi waayenika. Misamu myamyomyo nina lulomba: 2 Beeno mimvungi mi kamba di mameme di luheeni Nzambi, bakengeeno, ka bonso bantu ba bana kwikisa ko, kansi mu mutima wumbote, bonso bukwe tyanga Nzambi. Sadileeno bobo, ka mu sosa kimvwama ko, kansi mu vema di kusadila. 3 Ka lusosandi mu kwamisa yobobo ba baluheeni mu keba, kansi beeno kifwani kimbote ku kamba di mameme. 4 Ni hahoho, mu ntangu yaayenika Mfumu yi mimvungi mi mameme, lwaatambula musendo wu mpu yi nkembo yalembolo zimbisa kulezima kwandi.

5 Bumosi mpe ku zintwenya, bangangeeno batumama ku bihunda. Bangangeeno bakuluka ha kati di zimpangi zeno, mu dyambu ti Masonama mana ta ti: «Nzambi kwe belanga banga mayama, kansi kwe yangalalanga bakwe kikululanga.» 6 Ni hahoho, lukikulula ku nsye kooko ku lulendo lu Nzambi, mwanki kaluzangula mu ntangu yifweni. 7 Muyekodileeno manyongo meno mamvimba, mu dyambu ti yandi kwe lusadisanga.

8 Lufweti kiyaala mpe kayeeno meso! Mu dyambu ti mutantu eno, nkadyampemba, wuna zyeta bifuulu bimvimba bonso nkosi yina samba, mpe wuna sosa nani kaadya. 9 Musyamineeno mu kiminu kii na kekete, bambukeeno moyo ti mpangi zeno mu nza yimvimba mpasi zimosi kwandi zina yena. 10 Nzambi yikwe lulonkanga bumbote bwandi yilutumisa mu Yesu-Klisto ku nkembo andi wu mimvu ka mimvu. Ku manina bu lwa mana yena mpasi mu mwa ntangu yifyoti, waalulungisa yandi bende, waalusyamisa, waaluhaana ngolo, mpe waalutedimisa ha lufulu lu nakekete. 11 Bika lulendo lusikila ku yandi mimvu ka mimvu! Ameni!

12 Nalusonikini mukanda wuwukufi bewuwu mu lusadusu lu silase wu nakwe bongilanga bonso mpangi yikwikama. Ntiidi mu lusyamisa mpe mu luteela kimbangi ti nkatika mu mulemvo wu Nzambi luu bakangama nakekete.

13 Dibundu di ekuku, ku mbanza Babiloni, disoola Nzambi bonso yeno na Malako mwana ani, mbote balutambikidi. 14 Haanasaneeno yeno na yeno mbote yi zola yi kubumbasana.

Bika kiyenge ki Nzambi kiba mu yeno bamvimba luvwihu ku Klisto!