1 Muntama, kuba mpe na mimbikudi mi luvunu ha kati di mukangu wu Isaeli, bumosi mpe ha kati dyeno, kwaaba na milongisi mi luvunu. Baakotisa mu mansweki ndongosolo ziluvunu zaanata ku nzimbukusu eno, mpe baabisa Mfumu yi bakuula, zaabanata ha nsi na nsi ku nzimbukusu awu. 2 Bantu babingi baabalanda mu ndyatulu awu yi busafu mpe mu dyambu dyawu, bantu baavweza nzila yi kikedika. 3 Mu dyambu di nzodi yi mbongo, baaluhuuna mu nzonzolo zi luvunu. Kansi, tuuka ntama mfundusu awu yikubama yidi, mpe nzimbukusu awu yaazingila ko.

4 Nzambi katabila zimbazi zi hola masumu, kansi wubabindika misinga mi bisengo na wubatuba ku mbungulu ku nsye tombe kingolo ku bakwe bakebanga natee mu kilumbu ki mfundusu. 5 Mpe katabila nza yintama ko, kansi bu katambika nyamba yiyinene ha nza yiba yifuluka mu minsumuki, Nowa kwandi kavuukisa wedi samunanga lunungu, ha kimosi na nsambwadi yihiika. 6 Mboki mpe, Nzambi wubonga nzengolo ye bunga mbanza zi Sodomo na Ngomola mu tiya, na zikituka bombe na bombe. Wulonka mu kifwani bekyokyo, misamu myaatudila minsumuki. 7 Kansi wuvuukisa Loti, muntu wulunungu, wedi yenanga kyadi kikingi mu dyambu di ndyatulu yi busafu yi bantu bebobo bakindumba. 8 - Muntu bewuwu wulunungu wedi zinganga ha kati dyawu, wedi kwamusungu kadi kilumbu mu mutima andi mu dyambu di mavanga mawu mambi ma kedi yenanga na ma kedi yuwanga - 9 Buna, Mfumu zebi mukuula bantu balunungu mu ntontolo, mpe zebi mukeba balembolo ba balunungu mwanki kasemba mu kilumbu ki mfundusu, 10 mbo kasemba sungula yobobo bakwe landanga nsatu zi kimuntu zi mbi mpe bakwe safulanga kimfumu ki Nzambi.

Milongisi mi luvunu bemyomyo baa na kivuvu mu yawu bende na mayama, mii na kivumi ko mu tuka zimpeve zinkembo zii ku mazulu.

11 Kati zimbazi zibavudidi mu ngolo na mu lulendo, zikwe tukanga zimpeve bezozo zinkembo ko mu bafunda ha ntadisi yi Mfumu. 12 Kansi milongisi mi luvunu bemimi mii bonso bibulu bilembolo ba na madyela, mikubuku mu bakama mu mitambu na mu hondo. Yawu bakwe tyakanga byo bi balembolo zaba, mpe baafwa bonso bibulu, 13 mpe baatambula mufutu wu mambi mawu, yawu bakwe yangalalanga mu mwini ngemba mu sadila kindumba. Bantu basafuka na basumuka badi. Bakwe yangalalanga mu luvunu lwawu bu bakwe dyanga kintwadi neeno mu ndambisa zeno. 14 Meso mawu mafuluka mu kinsuza, mpe mayukutanga masumu ko, bakwe bwilanga mu mutambu bantu balembolo ba basyama. Mitima myawu mii mifuluka mu mpwila ze tumbu baka. Mpe baala bansingulu badi. 15 Bu basisa nzila yisungama, bazimbala bu balanda nzila yi Balami, mwana wu Bosoli, yondowo wutya mu bonka mbongo mu kwe sa mambi, 16 kansi bamusemba bu kalembolo vumina Misiku: mbuluku yinkento yikwe lembolo zonzanga yitoona mu zonza mu ndinga yi yeto bantu, mpe yikakidila buzengi bu mumbikudi.

17 Milongisi mi luvunu bemyomyo mii bonso mikelo milembolo ba na mamba na matuti mana kwe natu ku kitembo. Babakubikila tombe kii na bokoboko [mimvu ka mimvu]. 18 Mu nzonzolo zawu zimpamba, bakwe bwilanga mu mutambu wu byese bi kinsuni na wu kindumba kyawu, yobobo bavukidi mu mutambu wu bantu bakwe zinganga mu nzimbukusu. 19 Bakwe basilanga nsilulu ye bahaana kimpwanza, nsyongono yawu bende mindongo kwandi midi mi nsatu zawu zimbi, mu dyambu ti kadi muntu wudi mundongo wu myo mikwe mu yaalanga. 20 Tala ti, yobobo bavukidi mu nsatu zimbi zinza, bu bazebi Mfumu eto na Muvuukisi eto, Yesu-Klisto, kansi babwesi bakama dyaka mu nsye luyaalu lwawu, buna kitezo kyawu kyaalutila bubi na bubabedi ha ntete. 21 Buba bumbote ku yawu mu lembolo zaba nzila yi lunungu, na mu zaaba yo, mboki batekidi manima mu mina milongo mi babahaana. 22 Misamu mi babwididi ni mina zonzila bingana ebi: «Mbwa yivutukidi mu dya bilusu bi kalukidi», mpe: «Ngulu yiyobidi malu-malu beyiyi, bwedi kwe vindumuka mu dyanga.»