1 Mpangi zani zizola, ewu ni mukanda wunzole wu nalusonikini. Mu mikanda mya mimyole, ntiidi mu lubambula moyo mu sikimisa mu yeno, mayindu mambote, mu ndongosolo zi lutambula. 2 Ntiidi lubambuka moyo mu misamu mi zonza mu ntama mimbikudi milongo na ntumunu zihaana Mfumu eto na Muvuukisi eto, mu nzila yi zintumwa zeno. 3 Tekila mimvimba, tomeeno zaba ti: mu bilumbu bimanunu, kwaakwiza bantu ba nga yola, baadyatila bonso budi nsatu zawu zimbi. 4 Baata ti: «Wusa nsilulu yi nyizulu andi, kabwa ko e? Bwabu kwedi kadi e? Matata meto mamana fwa, kansi nakani kima kimosi kikitukidi ko tuka mbadukulu yinza!» 5 Batiidi mu zimbakana ti: tuka ntama, Nzambi wuhidika yulu na butoto mu mpova andi. Butoto buduuka ku nsye mamba na buyiza sikama ha kati-kati di mamba, 6 bana zimbakana mpe ti, nyamba yiyinene yidyamisa na yizimbisa nza yintama. 7 Kansi mu mpova yi Nzambi, mazulu na butoto bi bubedidi, bii bilundama mu bungu ku tiya mu kilumbu ki mfundusu na nzimbukusu yi minsumuki.

8 Mpangi zani zizola, kuu na musamu wu lulendi zimbakana ko. Mu dyambu ti ha meso ma Mfumu, kilumbu kimosi kii bonso funda di mimvu (1000), mpe funda di mimvu (1000) dii bonso kilumbu kimosi. 9 Mfumu kana zingila mu lungisa nsilulu andi ko, bonso buna banzila wo bahiika. Kansi kwe vibidilanga mu dyambu dyeno, mu dyambu ti katiidi ko nakani wumosi kahombila, mpe yandi tiidi ti bamvimba babaka ntangu ye vilula madyela.

10 Bwabu kilumbu ki Mfumu kyaakwiza bonso mwivi. Mu kilumbu bekyokyo, yulu dyaazimbala na lusuku lulunene, bima bi ku yulu byaahya na byaafuukusu, mpe butoto na bima byandi bimvimba, byaafuukusu mu tiya. 11 Budidi ti bima bimvimba bobo byaazimbidila, zaabeeno bwedi lufweti natina luzingu lweno. Bika ndyatulu eno yiba yilongo mpe luba bakangama mu Nzambi. 12 Lufweti kingila, mpe seeno ti kilumbu ki Mfumu kiiza mu muswalu. Mu kilumbu bekyokyo, yulu dyaahya, dyaanyengoso na bima bii ku yulu byaasulumuka mu mbangasi yi milaka mi tiya. 13 Kansi bonso Nzambi katusila nsilulu, tuna kingila, mazulu mamoona na butoto bumoona, koo kwaaba lunungu.

14 Ni hahoho, zimpangi zani zizola, bu tuna kingila kilumbu bekyokyo, seeno ngolo mu ba bavedila, mpe mu lembolo ba na kibila ha meso ma Nzambi, mwanki lu ba mu kiyenge nandi. 15 Zabeeno ti luvibudulu lu Mfumu eto luna luhaana mpulusu. Pawuli, mpangi eto yizola, wutusonikina wo mu ndwenga zi muhaana Nzambi. 16 Myamyomyo mi kasonika mu mikanda mimvimba mu kana zonzila dyambu bedyodyo. Muu na misamu momo mii mpasi mu bakula, mpe bantu balembolo zaba na baa na mabanza yeku-yeku bana kituula myo mbangudulu, bonso bu bana sanga mu bibuku bihiika bi Masonama. Mu nsadulu beyoyo bana kota mu nzimbukusu awu.

17 Yeno zimpangi zani zizola, balulwengisi bwabu mu misamu bemimi. Kebeeno kweno, lukotandi mu nzimbukusu zi bantu bambi, mwanki lulembolo zimbisa kusikama ku kiminu kyeno. 18 Bika bumbote na luzaabu lu Mfumu na Muvuukisi eto, Yesu-Klisto, bikula mu yeno. Nkembo ku yandi, bubu natee mu mimvu ka mimvu! Ameni.