1 Zimpangi, mu myo mitadidi mvutukulu yi Mfumu eto Yesu-Klisto na kukutakana kweto ha yandi, ebu tululombidi: 2 mayindu meno mabandi yeku-yeku ko, mpe lubandi na bunkuta ko bantu bu baaluteela ti bwabu kilumbu ki Mfumu kitudidi. Ni baluteela wo bonso mbikudulu, mu nzonzolo hoti bonso mukanda wufumuni ku yeto, lukwikilandi wo ko. 3 Kaluhunukandi ku muntu mu mutindu nakani wumosi ko. Mu dyambu ti kilumbu bekyokyo kyaakitudila ko tekila bantu babisa mu bwesa kwikila Nzambi, mpe tekila muntu wumbalu kayenika, yondowo wuna kwenda mu zimbala. 4 Muntu bewowo waanwanisa bima bimvimba bebyobyo bikwe fukiminanga bantu na bi bakwe bongilanga bonso Nzambi. Waanwanisa bima bimvimba bebyobyo natee bu kaakwenda zakala mu nzo-Nzambi, mu kibika yandi bende Nzambi. 5 Luna bambuka moyo ko ti wanaluteela buna ba ku yeno e? 6 Mpe luzebi bwabu nki bina kakidila muntu wumbalu, mwanki kayenika mu ntangu andi . 7 Lulendo luswekama lu muntu wumbalu luna sala, kansi yondowo wuna mukakidila bu kaakatuka, kaabwesa sala mu mansweki ko. 8 Buna muntu wumbalu waayenika, mpe Mfumu Yesu waamuhonda mu mupepe wu munwa andi na waamufukisa mu kyezezi ki kaakwizila. 9 Muntu wumbalu waakwiza na lulendo lu Satana, waasa bimangu bi mumpila-mumpila na bidimbu bingitukulu biluvunu. 10 Mpe waasadila misamu mimbi mi mumpila-mumpila mu hukumuna yobobo bana kwenda mu zimbala. Mu dyambu ti batambula luzolo lu kikedika luketi bavuukisa ko. 11 Ni hahoho, Nzambi kakwe batambikilanga lulendo lu bunzimbu, luna banata mu kwikila misamu mi luvunu, 12 mpe bantu bamvimba balembolo kwikila mu kikedika, kansi bayangalala mu hidika misamu mimbi, baafundusu.

13 Zimpangi zizola mu Mfumu, yeto tufweti tatamana mu vutulanga matondo ku Nzambi mu dyambu dyeno, kadi Nzambi wulusoola tuuka ku mbadukulu mwanki lutambula mpulusu. Mu dyambu ti Mpeve Yilongo yikwe sanga ti luba na luzingu lu bulongo, mpe mu dyambu ti lukwe kwikilanga mu kikedika. 14 Ni mu dyambu bedyodyo mpe kalutumisina mu Musamu Wumbote wu tululonga, mwanki lubaka nkembo wu Mfumu eto Yesu-Klisto. 15 Ni hahoho zimpangi, syameeno nakekete na kangameeno mu malongi ma tululonga hoti mu mpova zeto hoti mu mukanda weto.

16 Bika yandi bende Mfumu eto Yesu-Klisto na Tata eto Nzambi wututya na wutuhaana mu lusakumunu lwandi nsyamusunu yi mimvu ka mimvu na kivuvu kimbote, 17 kalusyamisa na kalukindisa mu bisalu byeno bimvimba bimbote mpe mu mpova zimbote!