1 Zimpangi, mu manisa, tusambidilangeeno, mwanki Mambu ma Mfumu matatamana mu mwangana na bantu bakembisa mo bonso yeno bu lukwe me kembisilanga. 2 Sambileeno mpe Nzambi katukuula mu bantu bambi na bambalu. Mu dyambu ti bamvimba baa na kiminu ko.

3 Kansi Mfumu wukwikama kadi. Waalusyamisa na waalukeba mu Munga Mbi. 4 Tutomini sa kivuvu mu Mfumu, mu dyambu dyeno, ti lukwe sanga na lwaatatamana mu sa misamu mi tulutumini.

5 Bika Mfumu katwadisa mitima myeno mu toma tya Nzambi na mu ba na mvibudulu bonso Klisto.

6 Zimpangi, tuna lulomba mu nkumbu yi Mfumu eto Yesu Klisto: beeno kitatu na zimpangi zimvimba zikwe dyatilanga mu mvwanzi na zikwe lembolo landanga ndongosolo zi tubalonga. 7 Yebende luzebi bwedi lufweti landila kifwani kyeto, mu dyambu ti tudyatila mu mvwanzi ha kati dyeno ko. 8 Tulomba ku muntu mu tudikila ko, kansi bu tutambula mpasi na lebakani, tusala mpimpa na mwini mu lembolo ba kizitu ku muntu ha kati dyeno. 9 Tudyatila bobo, ka mu dyambu ti tuba na luve mu tambula lusadusu lweno ko, kansi tutya mu ba kuu yeno kifwani ki lufweti landa. 10 Kadi bu tuba ku yeno, tuluhaana ntumunu eyi: «Tala ti muntu katiidi mu sala ko, kabika mpe mu dya!»

11 Kadi tuna yuwanga ti bahiika ha kati dyeno, bana dyatilanga mu mvwanzi, bakwe salanga ko, kansi yawu ni mukwe kotingi mu misamu mingana. 12 Ku bantu bebobo tuna balomba, tuna batuma mu nkumbu yi Mfumu Yesu-Klisto: basala mu kizunu mu baka mu kyufuta kyawu bindya bi yawu bende.

13 Ku yeno zimpangi zeto, ka lulebakanandi mu hidika misamu mimbote ko. 14 Tala ti muntu kana tumimina mi tuna ta mu mukanda bewuwu ko, tomeeno we simbidila na lubandi kintwadi nandi mwanki kafwa nsoni. 15 Ka lumubongilandi bonso mutantu ko, kansi mulubuleeno bonso mpangi.

16 Bika Mfumu yi kiyenge kaluhaana yandi bende kiyenge mu ntangu zimvimba na mu mimvimba! Bika Mfumu kaba na yeno bamvimba!

17 Meno Pawuli, nina sonika mbote bezizi mu kooko kwani. Bwabobo nakwe silanga kinyemo mu mikanda myani mimvimba, yoyo ni nsonokono ani.

18 Bika Mfumu eto Yesu-KListo kalusakumuna yeno bamvimba!