1 Meno ni Pawuli, ntumwa yi Yesu-Klisto mu lutumu lu Nzambi, Muvuukisi eto, na yi Yesu-Klisto, kivuvu kyeto.

2 Nasonikini ku ngeye, Timote, wuu mwana ani wukedika wu kiminu. Bika Nzambi Tata, na Yesu-Klisto Mfumu eto bakusakumuna, bakufwila nkenda na bakuhaana kiyenge!

3 Bonso bu nakusyamisa mu ntangu yi nedi kwenda ku kizunga ki Masedwani ti zakala mu mbanza Efeso, mwanki wukanikina bantu bana kwe longi ndongosolo zi luvunu. 4 Bateela balembolo ba bakangama mu bimpa na mu kinkulu ki makanda mawu bilembolo ba na nsukunu, na bikwe twalanga mbakani, ha kibuka kye sadila makani ma Nzambi, makwe lunganga mu kiminu. 5 Mfunu yi ntumunu beyoyo, ni mu yenikisa luzolo lukwe fumanga mu mutima wuvedila, mu mabanza mambote na mu kiminu kikedika. 6 Bantu bahiika, bateka nzila beyoyo manima, na bakangama kwawu mu binzonzi bibuzengi. 7 Bana kibongila bonso milongisi mi Misiku mi Nzambi, kansi bakwe bakulanga mi bakwe tanga ko na myo mi bakwe zonzilanga na kivuvu kimvimba.

8 Tuzebi ti Misiku mimbote midi, tala ti mina sadulu bonso bufwanakani. 9 Tuzebi ti ka mu dyambu di bantu baa na nkadulu yi lunungu ko batuudila Misiku, kansi mu dyambu di bakwe hidikanga misamu mimbi na bakwe lembolo tumiminanga misiku, baa na mitima mimbi na minsumuki, bakwe lembolo vuminanga Nzambi na bima bilongo, yobobo bakwe hondanga matata mawu na zingudi zawu, mimpondi, 10 bantu bakwe sadilanga kindumba, babakala bakwe vukisanga nitu yawu na yawu, bakwe tekanga zinkole, ba nga luvunu, bakwe dyanga ndefi zi luvunu, mpe mimvimba myomyo mikwe tingunanga ndongosolo yikedika. 11 Ndongosolo beyiyi yidi mu Musamu Wumbote wunkembo wufuma ku Nzambi yi mayangi, wu kampaana bonso kiyeko.

12 Nina vutula matondo ku Yesu-Klisto Mfumu eto, wumpaana ngolo zifwanakani mu sala kisalu kyani. Mu dyambu ti wuyena ti wufwanakana nidi mu sala kisalu kyandi. 13 Mpeleko mu ntama naba muntyaki, munkwamisi, muntu wu bituku. Kansi Nzambi wumfwila nkenda mu dyambu ti nedi zaba misamu mi nedi hidikanga ko, mpe naba na kiminu ko. 14 Mfumu eto wunyekisa mulemvo andi mu meno, wumpaana kiminu na luzolo bikwe fumanga mu kintwadi na Yesu-Klisto. 15 Musamu bewuwu wufwanakani ti bamvimba batambula wo: Yesu-Klisto wuyiza mu nza mu vuukisa minsumuki. Meno ni wuntete ha kati dyawu. 16 Kansi, bwabobo Nzambi kamfwila nkenda. Wutya ti Yesu-Klisto kalonka luvibudulu lwandi lumvimba mu meno mpyokidi masumu mu minsumuki mimvimba. Kii bonso kifwani kimbote ku yobobo baasa kiminu kyawu mu yandi na baatambula luzingu lu mimvu ka mimvu. 17 Bika nzitusu na nkembo biba mimvu ka mimvu ku Ntinu yi ntangu zimvimba, Nzambi yikwe lembolo fwanga, yikwe lembolo yenikanga mpe yidi yimosi kaka! Ameni!

18 Mwana ani Timote, ntumunu eyi nina kuhaana bonso mbikudulu zibabikula mu ngeye mu ntama. Bika zikuhaana kibakala, mwanki wunwana mvita yimbote, 19 mu keba kiminu na mabanza mambote. Bantu bahiika babisa mu yuwa mina ta mabanza mawu, ni bahombisa kiminu kyawu. 20 Ha kati dyawu tuu na Imene na Alezandeli. Nabayekola mu moko ma satana mwanki balongoka mu lembolo tyaka Nzambi.