1 Mpeve Yilongo yitoma bangula ti: mu ntangu yi nsukunu, bantu bazimbisa kiminu, mu landa mpeve zi luvunu mpe na ndongosolo zimpeve zimbi. 2 Baabazimbisa ku bantu baa na luvunu na banga diisu ku nsye lukaya, mabanza mawu meka mambi bonso kisengo kimeni benga ku tiya, maabwesa swasikisa mbi na mbote ko. 3 Bantu bebobo bana kanikina bantu mu kwela na mu dya bindya bihiika. Kansi ni Nzambi wuhidika byo, mwanki minkwikidi mizebi kikedika, bu bavutudi matondo, badidi byo. 4 Mu dyambu ti bima bimvimba bihidika Nzambi bimbote bidi. Kunaani kima ki balendi loosa, kansi lufweti tambula byo mu kati di mvutudulu yi matondo, 5 mu dyambu ti Mambu ma Nzambi na lusambulu lu ndilu mvutu bakwe byekanga byo.

6 Tala ti longidi mimvimba bemimi ku zimpangi, waaba kisadi kimbote ki Yesu-Klisto, kwe dikulungu mambu ma kiminu na mu ndongosolo yimbote yi wutoma landa. 7 Kansi, bisa bimpa bi buzengi, bilembolo fwanakana na kiminu. Ngeye fweti banga wukangama mu Nzambi. 8 Kusakidikisanga nitu kuu ndandu mu bima bibingi ko, kansi mu banga wukangama mu Nzambi mu na ndandu mu bimvimba. Mu dyambu ti, muu na nsilulu zi luzingu lu bubedidi na luna kwiza. 9 Mambu bemama makedika madi mpe bantu bamvimba bafweni tambula mo. 10 Tala ti tukwe sanga ngolo na tukwe nwananga, mu dyambu ti tutuula kivuvu kyeto mu Nzambi yi moyo, wudi Muvuukisi yi bantu bamvimba, sungula minkwikidi.

11 Mambu mamomo fweti toma zabikisa ku bantu na ku balonga mo. 12 Kani muntu kasafulandi kintwenya kyaku ko! Kansi fweti ba kifwani kimbote ku minkwikidi, mu mpova, mu ndyatulu, mu luzolo, mu kiminu na mu ku vedila. 13 Tekila niza, fweti sa kimfuzi mu tangilanga minkwikidi Mambu ma Nzambi, mu basyamisa, na mu balonga. 14 Kunyafunandi munkayulu aku wu wutambula mu mulemvo wu Nzambi ko, mu ntangu yibikula mimbikudi na bakuluntu ba dibundu bu bedi kutentika moko. 15 Sadila myo mu mutima aku wumvimba, kihaana mvimba mu kisalu kyaku, mwanki bamvimba bayena bwedi wuna kwendila ku mutwala. 16 Kikenga ngebende na ndongosolo aku. Tatamana mu nzila beyoyo. Mu dyambu ti mu sadila bobo, wuna kivuukisa ngebende na bantu bana kuyuwa.