1 Musamu bewuwu wukedika wudi: tala ti muntu tiidi mu ba muntwadisi wu dibundu, kisalu kimbote kidi. 2 Muntwadisi wu dibundu kalendi ba na dyambu dye musembila ko, na kaba bakala di mukento wumosi kaka. Fweti ba muntu wuludedomo, wuu na mpisulu, na wuu na nkadulu yi fwanakani. Fweti toma zaba mu bwananga zinzenza mpe kaba na lulendo lwe longila. 3 Ka bandi kinkolo mbungu ko, ka muntu wu bikindu ko, kansi fweti ba muntu wu kizunu na wu kiyenge. Mpe ka bandi na nzodi yi mbongo! 4 Fweti zaaba mu twadisa nzo andi bumbote mpe fweti sa ti baala bandi baba na lutumumu mpe na kivumi kimvimba. 5 Kansi tala ti muntu kazebi mu twadisa nzo andi ko, bwedi kalenda twadisila dibundu di Nzambi e? 6 Kalendi ba muntu wumoona wuviludi ka ntama ko madyela, nganunu wuna ba muntu wu mayama, mpe ku nsukunu kabedoso bonso nkadyampemba. 7 Bafweti muteela kimbangi kimbote ku bantu balembolo ba mu Klisto, mwanki balembolo munyafuna, na kalembolo bwa mu mitambu mi nkadyampemba.

8 Bumosi mpe, bisadi bi dibundu bifweti ba bantu ba kivumi, mpe baba na kikedika mu nzonzolo awu. Babandi binkolo mbungu, na ka basosangandi mu baka mbongo mu nzila zimbi ko. 9 Bafweti ba bakangama mu kikedika ki kiminu mu kati di mabanza mambote. 10 Bufwanakani mu teka bameka(kusinsa), ku manima, basala kwawu bonso bisadi, tala ti kuu na dyambu dye basembila ko. 11 Bumosi mpe, bakento bafweti ba bantu bakivumi, balembolo ba na matoola, bafweti ba na ludedomo mpe bafweti ba bakwikama mu mimvimba. 12 Kisadi kafweti ba bakala di mukento wumosi kaka, mpe fweti zaaba mu twadisa bumbote baala bandi na nzo andi yimvimba. 13 Mu dyambu ti, bisadi byo bikwe toma salanga bumbote kisalu kyawu, bantu bamvimba bakwe toma bazitisanga, mpe bakwe banga na kivuvu kikinene mu kiminu kyawu mu Yesu-Klisto.

14 Nina kusonikina mukanda bewuwu na kivuvu kye luyena munswalu. 15 Tala ti nina tumbu kwiza ko, zaba bwedi bwe dyatila mu nzo-Nzambi, dibundu di Nzambi yimoyo, kunzi na musinguku wu kikedika. 16 Wukedika ti, mansweki me ba makangama mu Nzambi mamanene madi:

Klisto wukiyenikisa bonso muntu,

wuyenokoso wulunungu ku Mpeve yilongo,

wuyenika ku zimbazi.

Bamusamuna ku bantu ba nsi zihiika,

Bantu mu nza yimvimba bakwikila mu yandi,

Mpe Nzambi wumuzangula mu nkembo.