1 Musamu wuntete tekila mimvimba, nina lusyamisa luhaananga ku Nzambi zindombolo, zinsambulu, ndilu mvutu na mvutudulu yi matondo mu dyambu di bantu bamvimba. 2 Tusambidilangeeno zintinu mpe na bantu bamvimba baa na kimfumu, mwanki tuba na luzingu luzuna, lukiyenge, lukivumi, mu kati di buzitu mpe mu ba batoma kangama mu Nzambi. 3 Misamu myamyomyo mii mimbote na mikwe yangidikanga Nzambi Muvuukisi eto, 4 Nzambi tiidi ti bantu bamvimba bavuuka mpe biza ku nzayilu yikedika. 5 Mu dyambu ti Nzambi yimosi kwandi yidi, mpe nzonzi yimosi kwandi yidi, yikwe vutulanga kikundi ha kati di Nzambi na bantu, ni Yesu-Klisto, 6 wukiyekola yandi bende bonso munkayulu mu kuula bantu bamvimba. Kyo ni kimbangi Nzambi ki kalonka mu ntangu yi kakubika. 7 Ni hahoho, (nina huna ko, makedika nina ta), Nzambi kansoodila mu ba mulongi, mpe ntumwa wufweti longa kiminu na kikedika ku balembolo ba Bayudayo.

8 Ni hahoho, ntiidi ti mu bibuka bimvimba babakala basambila, moko mavedila ku yulu, balembolo ba na mankesi na mpeve yi mayuma.

9 Bumosi mpe bakento, bafweti lwatanga binkutu bibuzitu, ndwatulu yifwanakani na yidedama. Ka balendi kangusungu milengi ko, balendi lwatanga misanga mi wola na mi palata ko, mpe binkutu bintalu ko, 10 kansi bafweti hidikanga mavanga mambote, bonso bufwanakani ku bakento bakwe lonkanga ti bakwe vuminanga Nzambi. 11 Bakento bafweti banga na swii mu ntangu yi ndongokolo, mpe mu kati di lutumumu. 12 Nina haana luve ku mukento ko mu longanga, na mu yaalanga bakala, kansi kafweti banga na swii. 13 Mu dyambu ti Nzambi Adami kateka hidika, mboki Eva. 14 Ka Adami ko wuhunuka, kansi ni mukento. Bu kahunuka, wubisa mu tumimina Nzambi. 15 Kansi mukento waavuuka mu mbutulu yi baala, tala ti waaba wukangama mu kiminu na luzolo, mpe waazinga mu bulongo na mu kivumi ki Nzambi.