Kintwadi ki nitu yi Klisto
1 Meno nkole yi Mfumu, nina lulomba mu ba na nkadulu yimbote mu mbokolo yi lutambudi, 2 beeno na luyinunu, na lembami, na luvibudulu, mboki vibidileno nkadulu zi baneeno mu luzolo. 3 Seeno ngolo mu keba kintwadi ki Mpeve mu nzila yi kiyenge. 4 Nitu yimosi kwandi yidi na Mpeve yimosi kwandi mpe yidi. Bumosi mpe kivuvu kimosi kwandi kidi bonso mbokolo yi lutambula ku Nzambi. 5 Mfumu yimosi kwandi yidi, kiminu kimosi mpe mbotokolo yimosi kwandi yidi, 6 Nzambi yimosi kwandi yidi, Tata di bamvimba. Yandi wuu ha yulu yi bima bimvimba, kwe salanga mu bamvimba, mpe wuu ha kati di bamvimba.
7 Kadi muntu mu yeto wutambula munkayulu bonso Klisto bu katezila wo mu muhaana. 8 Ni hahoho, kateela ti:
«Wutomboka mu yulu,
wunata zinkole,
mpe wuhaana minkayulu ku bantu.»
9 «Wutomboka», mbangululu yawu nki e? Yina lonka ti: wukulumuka ku nsye butoto e? 10 Yondowo wukulumuka, ni yandowo kwandi mpe wutomboka kuhyoka yulu, mwanki kafulusa nza yimvimba. 11 Yandi wusa ti bahiika baba zintumwa, bahiika mimbikudi, bahiika milongi, bahiika dyaka mimvungi mpe bahiika milongisi, 12 mwanki kakubika bantu balongo mu sala kisalu kyawu, mu ntungulu yi nitu yi Klisto,