1 Buludi ti baala batomini tya Nzambi, beeno bonso yandi. 2 Dyatileeno mu zola, bonso Klisto katuzodila mpe wukihaana yandi bende ku Nzambi bonso munkayulu na munkayulu we yoka wu kwe hananga mfuku yimbote yikwe yangidikanga Nzambi.

3 Kindumba, busafu na nzinunu zimbi, bilendi yenika ha kati dyeno ko bonso bufwanakani ku bantu balongo. 4 Ludukisangandi mpova zinsoni ko, ka zi buhulu hoti zimbi ko, mu dyambu ti buu bumbote ko, kansi duukisangeeno mpova ze vutudila matondo ku Nzambi. 5 Kansi tomeeno we zaba ti: kunaani muntu wukwe sadilanga kindumba, busafu, hoti zinzinunu zimbi (zidi mpe nsambudulu zi biteki) wulenda byadila difwa mu Kimfumu ki Klisto na ki Nzambi ko.

6 Muntu kaluhunandi mu nzonzolo andi yi luvunu ko. Misamu bemyomyo mikwe twalanga nganzi zi Nzambi ku yobobo bakwe lembolo mu tumiminanga. 7 Lubandi kintwadi nawu ko. 8 Mu ntama luba ku nsye kitombe, kansi mu kintwadi na Mfumu, bwabu lweka kukya. Ni hahoho, dyatileeno bonso baala baa mu kya. 9 Mu dyambu ti kya kukwe butanga mbutu yii bumbote, lunungu na kedika. 10 Zabangeeno mu bakula nki bikwe yangidikanga Mfumu. 11 Ka lubandi kintwadi na nsadulu zi kitombe zikwe lembolo butanga mbutu zimbote ko, kansi tungudileeno zo. 12 Mu dyambu ti misamu bemyomyo mikwe hidikanga bantu mu mansweki, nsoni midi mu zonzila. 13 Kansi mimvimba mi kwe totulanga, mikwe toma yenikanga mu kya, 14 mu dyambu ti mimvimba mikwe totokanga, mikwe kitukanga myabende kya. Ni hahoho bateela ti:

«Vumbuka ngeye wuu ku tolo,

totuka kwaku mu bafwa,

mpe Klisto waakukyenzola.»

15 Ni hahoho, kebeno kweno mu ndyatulu eno. Ludyatilandi bonso bantu balembolo ba na ndwenga ko, kansi bonso bantu baa na ndwenga. 16 Sadileeno ntangu, kadi bilumbu byeka bimbi. 17 Ni hahoho, lubandi bantu balembolo ba na madyela, kansi soseeno mu zaba bwedi buu luzolo lu Mfumu.

18 Lukolwandi malamu ko: mawu makwe natanga ku nzimbusulu, kansi beeno bafuluka mu Mpeve. 19 Syamasaneeno mu mikunga, mu mikunga mi nzitusu na mu mikunga mi kimpeve, Yimbidileeno na zitiseeno Mfumu mu mitima myeno mimvimba. 20 Ntangu zimvimba, vutulangeeno matondo ku Nzambi Tata mu misamu mimvimba, mu nkumbu yi Mfumu eto Yesu Klisto.

21 Lufweti tumama yeno na yeno mu dyambu di kivumi kii neeno mu Klisto,

22 Bakento, tumimineeno babakala beno, bonso bu lukwe tumiminanga Mfumu. 23 Mu dyambu ti bakala wuu mfumu yi mukento, bonso Klisto kadi Mfumu yi dibundu. Dibundu ni nitu yi Klisto, mpe yandi wudi Muvuukisi yi dibundu dyandi. 24 Bonso dibundu dikwe tumiminanga Klisto, bwabobo mpe bakento bafweti tumimina babakala bawu mu mimvimba.

25 Babakala, tyeeno bakento beeno bonso Klisto bu katiila dibundu na bu kakiyekola mu dyambu dyandi, 26 mwanki kabyeka dyo diba dilongo, bu kameni dye vedisa mu mamba na mu Mambu mandi, 27 mu yenikisa ha ntadisi andi dibundu dinkembo dilembolo ba na matona, na mifisu-mifisu hoti na dyambu dihiika dimbi, mwanki diba divedila na dilembolo ba na kibila. 28 Ni bwabobo mpe babakala bafweni tiila bakento bawu bonso nitu zi yawu bende. Yondowo tiidi mukento andi, wukitiidi yandi bende. 29 Mu dyambu ti kuu muntu ko kwe belanga nitu yi yandi bende, kansi fweni ye dikila na fweni toma ye keba, bonso bukwe sanga Klisto ku dibundu, 30 mu dyambu ti tudi binama bi nitu andi. 31 «Ni hahoho, bakala kafweti sisa nzo yi ngudi andi na tata andi mu kwenda ba na mukento andi, mpe ya babole baaba nitu yimosi*.» 32 Mansweki mamanene maa hoho. Nteedidi bobo mu dyambu di Klisto na dibundu. 33 Kansi ku yeno mpe: kadi bakala katya mukento andi bonso yandi bende, mpe kadi mukento kavumina bakala dyandi.