1 Yeno baala, lufweti tumamanga ku bibuti byeno, bonso Mfumu bu katiidi, bwabobo budi budedama. 2 «Vumina tata aku na ngudi aku», wo ni musiku wuntete, wuu na nsilulu, 3 «mwanki wuba mu kyese mpe wuzinga bilumbu bibingi ha butoto*.»

4 Yeno matata, lufwemisandi baala beno ko, kansi bakudiseeno mu malongi na ndwengosolo zikwe fumanga ku Mfumu.

5 Yeno mindongo, lufweti tumamanga ku zimfumu zeno zi ha butoto mu kivumi na mu kintekoto mpe mu mutima wuzibuka bonso bu lukwe tumamanga ku Klisto. 6 Ka musanga bobo ha meso mawu kaka ko mu bayangidika, kansi lubatumamananga bonso mindongo mi Klisto mina hidika luzolo lu Nzambi mu mutima awu wumvimba. 7 Basadileno mu mutima wumosi, bonso ti Mfumu luna sadila, kansi ka bantu ko. 8 Zabeeno ti, Mfumu waahaana musendo ku kadi muntu, ni kaba mundongo hoti muntu wu kimpwanza, bonso buu mavanga mandi mambote makahidikidi.

9 Yeno zimfumu, bwabobo kwandi mpe luhidika ku mindongo myeno. Lubavumisandi ko. Bu luzebi ti Mfumu yimosi kwandi yii neeno ku Yulu, yeno na mindongo myeno, yandi kakwe swasisanga bantu ko.

10 Mu manisa: soseeno ngolo zeno mu Mfumu na mu ngolo zi lulendo lwandi. 11 Lwateno binwanunu bimvimba bi Nzambi, mwanki luba na lulendo lwe kanga nzila zi luvunu zi nkadyampemba. 12 Mu dyambu ti yeto tuna nwaninisa nsuni na menga ko, kansi baa na lulendo, zimfumu, minyadi mi nza beyiyi yi kitombe na mpeve zimbi zii ku Yulu. 13 Ni hahoho, bongeeno binwanunu bimvimba bi Nzambi, mwanki luba basyama mu kilumbu kimbi na luba batelama nakekete bu lumeni nwana.

14 Telameeno nakekete: kangeeno kikedika mu nketo zeno bonso melika mpe lwateeno ludedomo bonso kisengo kikwe kebanga ntulu zeno. 15 Lwateeno vema mu samuna Musamu Wumbote wu kiyenge bonso nsampatu mu malu meno. 16 Ntangu zimvimba bongeeno kiminu bonso kikaku, kikwe kakidilanga madyonga mamvimba matiya ma Munga Mbi. 17 Bongeeno mpulusu bonso mpu yi kisengo na Mambu ma Nzambi bonso mbele yi mvita yi Mpeve Yilongo. 18 Ntangu zimvimba, sambilangeeno mu zinsambudulu na ndombolo zi mumpila na mumpila mu lusadusu lu Mpeve Yilongo. Ni hahoho, tatamanangeeno mu kaya meso, mboki sambidilangeeno kadi ntangu balongo bamvimba. 19 Nsambidilangeeno meno mpe, mwanki Nzambi kampana mpova zifwanakani bu na zonza, mu samuna na kivuvu kyonso mansweki ma Musamu Wumbote. 20 Mu dyambu di Musamu Wumbote bewowo nidi kimonikisi kikangama mu misinga mi bisengo. Sambileeno mwanki nasamuna wo na kivuvu bonso bu nafweti we zonzila.

21 Tisiki, mpangi ani yi zola, kisadi kikwikama mu Mfumu, waaluyadila mpolo mu mimvimba, mwanki yeno mpe luzaba bwedi nidi, mpe nki nina sa. 22 Ka mumpamba ko meno namutambikidi ku yeno, mwanki luzaba bwedi buu mavimpi meto, na kalusyamisa.

23 Bika Nzambi Tata na Mfumu eto Yesu-Klisto kahaana ku zimpangi zimvimba kiyenge, zola na kiminu! 24 Bika lusakumunu lu Nzambi luba ku bamvimba bakwe tyanga Mfumu eto Yesu-Klisto mu luzolo lukwe lembolo hwanga.