1 Meno Pawuli na Timote, bisadi bi Yesu-Klisto, tutambikidi mukanda bewuwu ku bantu bamvimba bavwihulu ku Nzambi mu Yesu-Klisto baa ku mbanza yi Filipi, na ku mintwadisi mpe na minsadisi myawu:

2 Bika Nzambi, Tata dyeto na Mfumu eto Yesu-Klisto kalusakumuna na kaluhaana kiyenge!

3 Nkwe vutulanga matondo ku Nzambi ani, kadi ntangu yi nakwe lubambukilanga moyo, 4 ntangu zimvimba zi nakwe lusambidilanga, nakwe sambilanga mu kyese, 5 mu dyambu ti lunsadisa mu samuna Musamu Wumbote, kutonina kilumbu kintete natee mu ntangu beyiyi. 6 Nina kwikila ti Nzambi wutonini kisalu bekiki kimbote ha kati dyeno, waatatamana kyo natee ku nsukunu, natee kilumbu kyaakwiza Yesu-Klisto. 7 Bumbote budi naba na mabanza ma bobobo mu yeno bamvimba. Mu kati di mutima ani ludi, mu dyambu ti yeno bamvimba, lunsadisa mu kisalu kimpaana Nzambi mu mulemvo andi, bu nidi bwabu mu boloko, na buna kwe nwaninanga mu kibakala Musamu Wumbote. 8 Nzambi zebi ti nalutiidi bubwingi mu luzolo lu Yesu-Klisto.

9 Misamu mi nakwe lusambidilanga ku Nzambi ni emi: luzolo lweno lutoma kula mu nzayilu yimbote na mu madyela, 10 mwanki luzaba mu swasikisa misamu mii mfunu. Bwabobo, lwaabela bantu bavedila mpe balembolo ba na dyambu dye basembila mu kilumbu kyaakwiza Yesu-Klisto. 11 Lwaaba bafuluka mu mimbutu mi lunungu mi lukwe tambulanga mu Yesu-Klisto, mu kembisa na mu siika Nzambi.

12 Zimpangi, ntiidi luzaba ti: misamu mintudidi misidi ti Musamu Wumbote wutoma mwangana. 13 Ni hahoho, zimbulu-mbulu zikwe kenganga nzo yi munyadi na bantu bamvimba bihiika, bazebi ti mu boloko nidi mu dyambu di kisalu ki Klisto. 14 Mpangi zizingi bu zinyena mu boloko, mpe bu basa kivuvu kyawu mu Mfumu, balwata dyaka kibakala mu samuna Mambu ma Nzambi balembolo ba na bunkuta.

15 Wu kedika wudi ti bantu bahiika bana samuna Klisto mu nzinunu na mu mpeve yi kimpala, kansi bahiika bana samuna Klisto mu mabanza mambote. 16 Bantu bahiika bana sadila mu luzolo, mu dyambu ti bazebi ti, nidi mu boloko mu nwanina Musamu Wumbote. 17 Kansi bahiika dyaka bana samuna Klisto mu mpeve yi kimpala, na mabanza mawu maa mambote ko, bana tya mu mbwesa mpasi bu bu nidi mu boloko.

18 Ka musamu ko! Ni basadila bobo mu kibila kimbi hoti kikedika, dyambu dii mfunu ni Klisto bana samuna! Nina kyese mpe nina tatamana mu yena kyese, 19 kadi nzebi ti mimvimba bemyomyo myaatwala mpulusu ani, mu dyambu di zinsambulu zeno, mpe na lusadusu lu Mpeve yi Yesu-Klisto. 20 Mu dyambu ti, mu myo mi nina kingila mpe mi nsiididi kivuvu, ndendi yena nsoni ko. Kansi, nii na kivuvu ti, bu tusidi bubu natee ntangu zimvimba, naalonka bunene bu Klisto mu nitu ani, ni naba wumoyo hoti wufwa. 21 Kedika, mu meno, luzingu ni Klisto, mpe lufwa ni ndandu. 22 Kansi tala ti kuzinga kwampaana dyaka luve mu lungisa kisalu kimfunu, buna nzebi ko nki nafweti soola. 23 Mayindu mana nwanisa mu ndambu nzole: Ntiidi mu sisa luzingu belulu, mwanki naba kintwadi na Klisto, bwabobo buvudidi bumbote, 24 kansi mu dyambu dyeno, buvudidi bumbote natatamana mu zinga ha luse lu butoto. 25 Nii na kivuvu ti, naatatamana mu ba neeno, mu lusadisa mu kula mpe mu ba na kyese mu kiminu. 26 Ni hahoho, bu naavutuka ku yeno, lwaayangalala bubwingi mu dyambu dyani, mu kintwadi kyeno na Yesu-Klisto .

27 Kansi, dyatileeno bonso bufwanakani na Musamu Wumbote wu Klisto. Ni hahoho, ni niza na lutala hoti kaani, mfweti yuwanga ti luu bakangama nakekete mu Mpeve yimosi, mpe luna nwana mu mutima wumosi mu dyambu di kiminu kyeno ki Musamu Wumbote. 28 Luyenandi mitantu myeno bunkuta ko. Kyo kyaaba kidimbu kina lonka ti yawu bana zimbala, kansi yeno mu nzila yi mpulusu ludi. Mpe mimvimba bemyomyo mifumini ku Nzambi. 29 Mu dyambu ti, lutambula kaka mulemvo we kwikila mu Klisto ko, kansi we yena mpe mpasi mu dyambu dyandi. 30 Bwabu luna nwana mvita yimosi naani, yoyoyo yi luyena yi nedi nwana mu ntama, mpe yi nina tatamana mu nwana bwabu bonso bu luzabidi wo.