1 Mpangi zani! Yangalaleeno bu ludi kintwadi na Mfumu. Nina lebakana ko mu vutukila misamu mi nateka lusonikina, mpe buvudidi bumbote mu yeno. 2 Kebeeno kweno ku bantu bakwe sanga misamu mimbi, zimbwa zidi, ni yawu mpe bakwe haananga mfunu mu nzengosolo yi bubakala. 3 Ni yeto tudi nkatika na nzengosolo yi bubakala yi makedika. Mu dyambu ti, tukwe sadilanga Nzambi mu Mpeve andi, tukwe kitumpidikanga mu Yesu-Klisto, mpe tukwe vula tuulanga kivuvu kyeto mu misamu mi kimuntu ko. 4 Mpeleko meno mpe nalenda sosa mu tuula kivuvu kyani mu misamu kimuntu, mpe vudidi bantu bamvimba mu ba na luve mu sosa myo. 5 Banzenga bubakala mu kilumbu ki nana ku manima ma mbutukulu*. Meno muntu Isaeli nidi, mu kifumba ki Benyami. Nkatika mu Ebeleo wubutu ku ba-Ebeleo. Mu myo mitadidi Misiku, Mufalisi * naba. 6 Mu myo mitadidi vema, naba munkwamisi wu Dibundu. Mu myo mitadidi lunungu lu Misiku, naba kaa na kibila kimosi ko. 7 Kansi bima byedi banga ndandu ku meno, bwabu na sala bi yeni mfunu ko mu dyambu di Klisto. 8 Nina yena bima bimvimba bonso bima bimpamba, mu dyambu di mbote yivudidi bunene: ni mu zaba Yesu-Klisto Mfumu ani. Mu dyambu dyandi natambula mu hombisa bima bilembolo ba ndandu, mpe nina yena byo bonso dyala, mwanki nabaka Klisto 9 mpe nayenika mu yandi ka mu lunungu lu mebende ko, lukwe fumanga mu Misiku, kansi lololo lukwe fumanga mu kiminu mu Klisto. Lunungu lukwe fumanga ku Nzambi ni lololo lu tukwe tambulanga mu kiminu. 10 Dyambu dii naani mpwila, ni mu zaba Klisto na lulendo lu mfulukulu lwandi, mu ba kintwadi nandi mu mpasi zandi mpe mu fwanakana nandi mu lufwa lwandi. 11 Mpe nii na kivuvu ti meno mpe bamfulukisa mu bafwa.

12 Nina ta ko ti meno nanungini hoti neka muntu wulunga, kansi nina tatamana mu nooka ntiinu mu baka musendo, mu dyambu ti mebende Yesu-Klisto wumeni mbwila. 13 Zimpangi, meno nina ta ko ti musendo wa nabeki, kansi kima kimosi kwandi nina sa: kuzimbakana misamu mii ku manima mpe kutadisa ku myo mii ku mutwala. 14 Ni hahoho, nina nooka ntiinu mu tula natee ku naabaka musendo wututumisina Nzambi mu tambula ku yulu, mu Yesu-Klisto.

15 Bwabu yeto bamvimba tudi bakula mu nzila yi Nzambi, tulandeeno ndyatulu beyoyo, mpe tala ti mayindu maswaswana maa neeno mu musamu wumosi, Nzambi waalulonka kikedika ki musamu bewowo. 16 Bwabu, mu hohoho ha tweka, tudyatileeno mu kitambi kimosi.

17 Zimpangi, yeno bamvimba landeeno nkadulu ani, mpe taleeno yobobo bana dyatila bonso buu kifwani ki luyena mu yeto. 18 Mya nateka luteela, mpe mya nina vutukila dyaka mu kati di kidilu: Babingi bana dyatila bonso mitantu mi kulunsi di Klisto. 19 Nsukunu awu ni mu zimbala, nzambi awu ni moyo awu, bakwe tuulanga nkembo awu mu myo mikwe bayenisanga nsoni, mpe misamu mi nza beyiyi kaka bakwe yindulanga. 20 Kansi yeto, tudi bantu ba mazulu, ku tuna kingila nyizulu yi Muvuukisi eto, Mfumu Yesu-Klisto. 21 Waakitula nitu eto yimpamba yikwe fwanga, mwanki kafwanikisa yo na nitu andi yi nkembo, mu nzila yi lulendo lukwe muhaananga luve mu tuula bima bimvimba ku nsye luyalu lwandi.