1 Mpangi zani zizola, Nkatika nsatu yii naani mu luyena dyaka! Yeno lukwe nyangidikanga na ludi musendo wu kisalu kyani. Bakundi bani, beeno bakangama mu kintwadi na Mfumu.

2 Nina syamisa Evodi na Sintike, bazinga mu nyuwasani mu kati di kintwadi kyawu na Mfumu. 3 Ngeye mpe mukundi ani wu kisalu wukwikama, nina kulomba wubasadisa, mu dyambu ti banweni ha kimosi naani mu samuna Musamu Wumbote, bumosi mpe na Kelima na bakundi bani bahiika ba kisalu mu Mfumu, kadi nkumbu zawu zii zisonama mu buuku di luzingu.

4 Yangalaleeno ntangu zimvimba mu Mfumu. Mbwesi ta dyaka: yangalaleeno!

5 Bika mbelo eno yi kizunu yizabakana ku bantu bamvimba. Mfumu weka lukufi. 6 Lukikwamisangandi mu kani kima ko, kansi mu mimvimba, zabikisangeeno nsatu zeno ku Nzambi mu zinsambulu na mu zindombolo. Na, muvutudilangeeno mpe matondo. 7 Bika kiyenge ki Nzambi kihyokidi madyela mamvimba, kikeba mitima na mabanza meno mu Yesu-Klisto.

8 Zimpangi, mu manisa, bika mabanza meno maba mu misamu mimvimba mikedika, mi buzitu, milunungu, mivedila, mizolakana, mi kikumu kimbote, mpe mimvimba mimbote na mi bakwe siikanga. 9 Sadileeno misamu mi lulongokidi na mi lutambudi ku meno, myo mi luyuwa mina ta mpe myo mi luyena mina sa. Mpe Nzambi yikwe haananga kiyenge waaba neeno.

10 Natomini yangalala bubwingi mu Mfumu mu dyambu ti lulonkidi dyaka luzolo lweno mu meno. Luzolo belolo luba neeno, kansi lubaka hwakisa dye ndonkisa lo ko. 11 Ka mu dyambu di nsatu yi bima ko nina zonzila bobo, mu dyambu ti nkwe yangalalanga mu byo bii naani. 12 Nzebi mu zinga mu bumputu na nzebi mpe mu zinga mu kimvwama. Mu bibuka bimvimba na mu mimvimba, nalongoka mu ba wuyukuta na mu fwa nsatu, mu ba na bimvwama na mu lembolo ba na kima. 13 Nkwe lendanga mu hidika mimvimba mu lusadusu lu Klisto kwe mpaananga ngolo. 14 Kansi, bumbote lusidi bu lunsadisi mu mpasi zani.

15 Bisi-Filipi, yeno bende walutomini zaba: bu nakatuka ku kizunga ki Masedwani, mu ntangu yitona mu samuna Musamu Wumbote, kuba nakani Dibundu dimosi di nsadisa ko, yeno kwandi kaka lunsadisa mu nsatu zani. 16 Mu ntangu yi naba ku mbanza Tesalonika, ka nkumbu yimosi kaka ko luntambikila lusadusu, mu byo bi ba naani nsatu. 17 Didyandi ko ti minkayulu nina sosa, kansi nina sosa ti lubaka ndandu yivudidi mu kisalu kyeno. 18 Bima bimvimba bi luntambikidi byanabeki, nii na byo bihyoka kitezo. Natomini yangalala mu tambula minkayulu mi luntambikidi ku Epafodite, mii bonso mananasi ma mfuku yimbote. Nzambi kwe tambulanga munkayulu bewowo na wukwe mu yangidikanga. 19 Nzambi ani waaluhaana bimvimba bii neeno nsatu, bonso budi bunene bu kimvwama andi mu Yesu-Klisto. 20 Nkembo ku Nzambi, Tata dyeto, mimvu ka mimvu! Ameni!

21 Haaneeno mbote ku bantu bamvimba bavwihulu ku Nzambi mu Yesu-Klisto. Mpangi zii naani mpe, balutambikidi mbote. 22 Bantu bamvimba bavwihulu ku Nzambi balutambikidi mbote, sungula yobobo bakwe salanga mu nzo yi ntinu Kayisali.

23 Bika Mfumu Yesu-Klisto kalusakumuna!